Tü nüshajalakat Lucas

24 Shiasaʼa soʼu tü kaʼi shiinaluʼujeekat semaana, noʼunakalaka na jieyuukana wattachon maʼin chaa amuuyuupaʼamüin, alüʼüjashii naya wunuʼu jemeta eejuut yapatüjütkalia natuma. 2 Neʼraka süsünneʼeruushin tü ipa soʼulujunakat tü woowirakat, 3 nnojoikalaka chi Señotkai Jesús napüla nekerotapa. 4 Süpatanajaaka maʼin naaʼin na jieyuukana neʼrapa tia, neeʼiyalaaka piamashii wayuu jorottokana maʼin asheʼin. 5 Mmotkalaka maʼin na jieyuukana sümaa jepütüin neʼe naya, anuujeseʼe nanüiki na wayuukana namüin: «¿Jamüshi jüchajaaka naʼaka na outushiikana wanee wayuu eekai katüin noʼu? 6 Asoʼireʼennüitpa naaʼin, nnojoluichipa yaain, soto jaaʼin tü nümakat jümüin chaiwaʼaya nia Galilea. 7 Mataasü nüküjakai süchiki naapünajachin ekii chi Süchonkai Wayuu* namüin wayuu kaainjaralii jee nükachennajachin sünain wanee wunuʼu süpüla outajachin nia, asoʼireʼenneetpejeʼe naaʼin apünüin kaʼi süchikijee tia». 8 Sotojooka naaʼin na jieyuukana tü nüküjakat paala Jesús. 9 Naleʼejapa amuuyuupaʼajee, naküjaka namüin na Polookana Waneemüin aluwataaushi süchiki süpüshuaʼa tü kasa alatakat otta naküjain shia namüin na waneinnua. 10 Eejatüjaʼaya María Magdalena, Juana otta María tü niikat Santiago. Nayasaʼa na wane jieyuu eejanakana namaa, naküjain tiaʼaya namüin na aluwataaushikana. 11 Mapejeʼe alawaakai saaʼin namüin tü naküjakat na jieyuukana, nnojotkalaka nanoujain tü namakat.

12 Nütamaakalaka Pedro jee nuwataakalaka amuuyuupaʼamüin, shiasaʼa nüntapa chamüin niirakaaka suluʼu tü woowirakat, shiakalaka neʼe niʼrüin tü kuluulu aainjuushikat süka lino, tü akoʼonnokalü aka müliashii. Nüleʼejakalaka sümaa nüsakireʼerüin naaʼin kasain maʼin alatüin nümüin Jesús.

13 Soʼuleʼeya kaʼikat tia, oʼunushii piamashii nikirajüin Jesús suluʼumüin tü pueulokot Emaús, eesü maʼaka saaʼin poloo waneemüin kilómetro* oʼunushi Jerusalénjee. 14 Yootushii naya süchiki süpüshuaʼa tü kasa alatakat.

15 Wanaa sümaa yootuin naya süchiki tia kasa alatakat, nürütkaakalaka Jesús nanainmüin sümaa nuʼunuin namaa, 16 nnojoipejeʼe nia nayaawatawalain. 17 Anuujeseʼe nünüiki Jesús namüin: «¿Kasa jaashajaaka achiki?». Nashaʼwalaakalaka sümaa jaʼyain saaʼu noʼupünaa mojuin maʼin naaʼin. 18 Anuujeseʼe nünüiki Cleopas nümüin: «¿Nnojoishijasa chejeʼewalin pia Jerusalén, nnojottaalaka pütüjaain saaʼu kasain alatüin chayaa?». 19 «¿Kasakai alataka chayaa?», nümakalaka Jesús namüin. Anuujeseʼe nanüiki nümüin: «Shia tü alatakat nümüin Jesús chi chejeʼewaikai Nazaret, nünüikimaajachi Maleiwa chia makai. Kapülashi nia naaʼin Maleiwa otta kapülashi nia naaʼin na wayuukana süka naainjain kasa pülasü otta kaawain maʼin nünüiki. 20 Naapa ekiichi nia nekiipüʼü na sacerdotekana otta na aluwataashiikana süpüla nüchitünajachin sünain wanee wunuʼu süpüla outajachin nia. 21 Apünüinrü kaʼi tia makat, niainjachiaa waaʼinruʼu oʼtteʼeraka na wayuu yaakana Israel. 22 Ainkataalasü joo waaʼin sutuma tü namakat wamüin waneinnua jieyuu nikirajüin Jesús, oʼunushii naya wattachon chaa amuuyuupaʼamüin, 23 nnojoikalaka müliashii napüla. Naküjakalaka wamüin neʼrüin waneinnua aapiee nümaʼanajeejana Maleiwa, aküjakana namüin nüsoʼireʼenüichipain aaʼin Jesús. 24 Noʼunakalaka amuuyuupaʼamüin waneinnua nikirajüin Jesús, maluʼukalaka napüla tü woowirakat maʼaka naküjain na jieyuukana paala namüin, nnojoishi Jesús napüla».

25 Anuujeseʼe nünüiki namüin: «Maaʼin aaʼinchii jia otta nnojotsü junoujamaatüin anain tü namakat na nünüikimaajanakana Maleiwa. 26 ¿Aashin shiain alatajatüin nümüin Cristo tia otta kojutuinjachin nia atumawaa?». 27 Nüküjakalaka namüin tü ashajünakat nüchiki suluʼu tü Karaloʼuta Nüchikimaajatkat Maleiwa, sünainjee tü nüshajakat Moisés sünainmüinreʼeya tü nashajakat na Nünüikimaajanakana Maleiwa.

28 Nalüʼülaapa sünainmüin tü pueulo eeʼewalinjanale naya, müshi wattamüinjachiyaakai naaʼin Jesús. 29 Naʼalijitpejeʼe nia jee namakalaka nümüin: «Yaashia pia wamaa, aipaʼairü püpüleerua». Nujuntaapünaaka namaʼana. 30 Wanaa sümaa nikaain namaa, naapaakalaka wanee pan jee süchikijee nuʼuraajüin, nüshaletakalaka tü pankat jee naapakalaka shia namüin. 31 Nayaawatakalaka saaʼu niain Jesús, nnojoiraa nümaka. 32 Namajiraakalaka: «Shiajaʼa makaʼa sütanalüin waaʼin tü nümakat wamüin wanaa sümaa yootuin nia wamaa wopuluʼupünaa otta wanaa sümaa nüpansaajüin wamüin sünüiki tü Karaloʼuta Nüchikimaajatkat Maleiwa». 33 Soʼuleʼeya tia noʼunakalaka Jerusalénmüin, chajanaka napüla na Polookana Waneemüin aluwataaushi otta na wanee wayuu yalajanakana jutkatüin namaa 34 jee müshii naya: «¡Shiimain sünain nüsoʼireʼennüin aaʼin chi Señotkai otta eeʼiyalaashi nia nümüin Simón!». 35 Naküjakalaka tü alatakat namüin wanaa sümaa wopuluʼuin naya otta nayaawatüin niain Jesús wanaa sümaa nüshaletüin tü pankat namüin.

36 Yalaiwaʼaya naashajaain süchiki tia, niiʼiyalaʼalaa nümaka Jesús pasanain nanain jee nümakalaka namüin: «Kasataalejeseʼe anain jia».* 37 Moʼookoloko neʼe naya sutuma mmoluin maʼin naya, kasayaa wayuu epeijaaka napüla naaʼinruʼu. 38 Nusoutakalaka namüin: «¿Jamüshii mmotkaʼa jia? ¿Jamüsü wainmajaka jaaʼin? 39 Tayaʼayan, jiirakaa sümüin tajapü jee sümüin tooʼui, ¿jeʼratuwairü jiʼrüin keʼirukuin jee keipüsein wanee kasa shipeijaale?». 40 Nüküjapa tia niiʼiyatakalaka najapü sümaa nuuʼui namüin. 41 Talatakalaka maʼin naaʼin sümaa ponuin naaʼin tia jee nümaka Jesús namüin: «¿Kasa eeyaaka jümaʼana tekaiwa jümaa?». 42 Nekirakalaka nia wanee saʼata jime asijuushi. 43 Nikaka shia noʼupala.

44 Anuujeseʼe nünüiki Jesús namüin: «Soto jaaʼin tü pütchi taküjakat jümüin wanaa sümaa yaajachin taya jümaa, shikeraajüinjatüin süpüshuaʼa tü pütchi ashajünakat tachiki suluʼu tü Pütchi Aapünakat nümüin Moisés,* tü namakat na Nünüikimaajanakana Maleiwa otta tü ashajünakat suluʼu Salmos».* 45 Nükaalinjaka naya süpüla nayaawataleeinña saaʼu tü Karaloʼuta Nüchikimaajatkat Maleiwa 46 jee müshi nia namüin: «Müsü tü pütchi ashajünakat suluʼu tü Karaloʼuta Nüchikimaajatkat Maleiwa, niʼrüinjachin müliaa Cristo, asoʼireʼeneetpejeʼe naaʼin apünüin kaʼi süchikijee outaa. 47 Aküjüneerü tü pütchikat sainküinpünaa mma nünülialuʼu Cristo, aküjünajatü shiyaawajaainjatüin wayuu suulia saainjala süpüla sülatinnajatüin suulia. Oʼttajatü tia Jerusalénjee. 48 Aküjeena jia pütchi süchiki tia. 49 Soto jaaʼin taluwataajeerüin jümüin tü nümakat chi Tashikai. Makatüinjanapejeʼe jia pueulopaʼa süshakataleepa jaaʼu tü nüpülainkat Maleiwa».

50 Nümaakalaka naya Jesús chaa Betaniamüin. Niyaletkalaka najapü sümaa nüküjain pütchi analuʼut namüin. 51 Wanaa maʼin sümaa nüküjain pütchi analuʼut namüin, nükayalaaka noulia jee nümaanaka nutuma Maleiwa iipünaamüin. 52 Nasapainkaka na nikirajüinkana süpüla kojutajachin nia namüin, shiasaʼa süchikijee tia naleʼejakalaka Jerusalénmüin sümaa talatüin maʼin naaʼin. 53 Ayatüshiʼiya naya sünain aʼwaajaa Maleiwa suluʼu tü aʼwaajüleekat.