Tü nüshajalakat Marcos

6 Nuʼunakalaka Jesús yalejee namaa na nikirajüinkana chaa nuumainpaʼamüin. 2 Shiasaʼa soʼu tü sükaliakalü eemerawaa, nikirajaka Jesús wayuu suluʼu tü ekirajüleekat nüchiki Maleiwa. Nayasaʼa na wayuu aapajakana nünüiki, ponusü maʼin naaʼin tü nümakat, namajiraaka: «¿Jalajatche nüpüla wayuukai chii tü nütüjakalü apüleerua? ¿Jarai kekiika atuma nia? ¿Jaraiche pülaka atuma nia süpüla nuuntajatüin naaʼinrüin kasa pülasü? 3 ¿Aashin niain chi kuʼyamaikai süka taapüla, chi süchonkai María? ¿Aashin niain nuwala Santiago, José, Judas otta Simón? Anuu tü nushunuukalüirua kottuin wamaa ¿aashi müin?». Manoujainkalaka wayuu nünain sünainjee tia. 4 Nümaka Jesús namüin: «Chi nünüikimaajachikai Maleiwa kojutushi atumawaa suluʼupünaa wanee mma naatajatü, mojutupejeʼe nia sutuma wayuu nuumainpaʼa, mojutusai nia chaa nipialuʼu jee mojutusai nia natuma na kasayuukana nünain». 5 Nnojoikalaka naaʼinrüin kasa pülasü chayaa, shiajaʼa neʼe niʼitaain najapü naaʼu waneinnua wayuu ayuuishii, naawalaakalaka nutuma. 6 Ponokoloko naaʼin Jesús manoulain naya. Nuʼunaka sünain ekirajaa wayuu sainküinpünaa tü pueulo eekat süʼütpünaa tia mmakat.

7 Nuutkajeʼeraka Jesús na Polookana Piamamüin aluwataaushi jee nüjütakalaka naya suluʼu piamawalin naya. Naapakalaka laülawaa namüin süpüla nayuʼluinjatüin yolujaa süleʼeruʼujee wayuu. 8 Nüküjain namüin nnojoluinjatüin kasain nalüʼüjain sünain oʼunajawaa. Shia neʼe nalüʼüjainjatka wanee waraarat, nnojoishii naya kemiainjanain, nnojoishii naya kachisepalainjanain jee nnojoishii naya alüʼüjainjanain nneerü suluʼu tü woʼot naseʼeruʼupünaakat. 9 Nüküjain namüin kakoʼusüinjanain naya, nnojoliipejeʼe naya alüʼüjainjanain suwalaʼata* nasheʼin. 10 Nümakalaka namüin: «Jüntapa suluʼumüin wanee miichi, anashii yalainnale jia waneʼereeya juʼunapa suluʼujee tia miichikat. 11 Mamaneere na wayuu jüntakana epialuʼumüin jee nnojorüle naapaain sümaa tü pütchi jüküjakat, joʼotojoojeerü juuʼui juʼunapa namaʼanajee nayaawateetka saaʼu mojuin tü naainjakat». 12 Noʼunakalaka na nikirajüinkana Jesús sünain aküjaa pütchi jee naküjaka sümüin wayuu shiyaawajaainjatüin suulia saainjala. 13 Wainma yolujaa nojuʼitiraka süleʼeruʼujee wayuu jee nashulerüin seita nanain na wayuu eekai ayuulin sümaa naawalaain natuma.

14 Niasaʼa Herodes chi aluwataashikai, naapüin tü sümakat wayuu nüchiki Jesús. Eʼraajünüshi maʼin Jesús, anuu sünüiki wayuu nüchiki: «Asoʼiraasü naaʼin Juan, chi Awoutisaajüikai, müshijeseʼe eein süpüla naaʼinrüin kasa pülasü». 15 «Nia Elías», eeshii na makana, «nia wanee nünüikimaajachi Maleiwa maʼaka naaʼin na eepuʼukana namaiwa», eetaashii joo na makanaya. 16 Anuujeseʼe nünüiki Herodes naapapa nüchiki Jesús: «Asoʼiraakajasaʼa naaʼin Juan, chi tashottirakai anutpünaa». 17 Apüreesajinnüshi Juan otta kaleenaluʼushi nia nutuma Herodes süka sootuin nia Herodías, tü nuʼwayuusekat Filipo, chi nuwalakai Herodes. Eekajasaʼa Herodes, nüsütüin nuʼwayuuse chi nuwalakai 18 otta maʼwaisü nünüiki Juan nümüin Herodes: «Nnojotsü anain püsütüle nuʼwayuuse chi puwalakai». 19 Müsüjeseʼe süʼürülaain Herodías nünain Juan jee suʼutee aaʼinchi nia, isapejeʼe süchiki saaʼinrüin tia 20 süka wainmajüin naaʼin Herodes naaʼu Juan. Nütüjaa aaʼulu wayuuin loto akuwaʼipachi nia otta nuʼwaajülin Maleiwa, naaʼinmajünaka nutuma Herodes. Naapajawaipa Herodes nünüiki Juan, wainmajawaisü naaʼin. Nnojotsü nütüjaain aaʼu tü naaʼinrajatkat, kamalainpejeʼe nümüin naapajüin nünüiki.

21 Naainjitka Herodes wanee miʼiraa shikiira shikeraajüin nuuyase. Nuunejaaka na niʼipajanakana sünain aluwatawaa, na shikiipüʼükana surulaat jee müshiʼiya na wayuu eʼraajünakana maʼin chaa Galilea. Sajayataka Herodías tia süpüla saaʼinrajatüin tü saaʼinreekalü amüin paala. 22 Süntaka tü süchonkat Herodías sünain oyonnojoo, talataka naaʼin Herodes sutuma tia namaʼaleeya na wayuu eejanakana sünain ekawaa nümaa. Nümakalaka chi aluwataashikai sümüin tia majayütkat: «Puchunta tamüin tü puchunteekalü amüin, taapeetka shia pümüin». 23 Naapakalaka nünüiki Herodes sümüin sünain maa: «Taapeerü pümüin tü kasa eekai puchuntuin tamüin, jaʼitasü shiain süseʼeruʼupünaa tü mma taluwataakalü aaʼu». 24 Suʼunakalaka tü majayütkat sünain asakiraa tü shiikat sünain maa: «¿Kaseerü tachuntaka nümüin?». «Anasü shiale puchuntuin nikii Juan, chi Awoutisaajüikai», sümakalaka tü shiikat sümüin. 25 Suʼunamaataka tü majayütkat nümaʼanamüin chi aluwataashikai jee sümakalaka nümüin: «Paapa tamüin jooluʼuleʼeya suluʼu wanee pülaata nikii Juan chi Awoutisaajüikai». 26 Mojusiaaje naaʼin chi aluwataashikai saalinjee tia, naaʼinrapejeʼe tü sümakat saaʼujee pansaaitpain nünüiki sümüin jee naaʼujee na wayuu yalajanakana nümaa. 27 Niasaʼa chi aluwataashikai, nüjütamaataka wanee nuwaariase süpüla nüshottajatüin nunut Juan. Nuʼunakalaka chi waariakai sünain aaʼinraa tia suluʼu tü kaatsetkat. 28 Nüntitkalaka nikii Juan suluʼu wanee pülaata. Naapakalaka shia sümüin tü majayütkat jee shiʼikajaaka shia sümüin tü shiikat. 29 Naapapa na nikirajüinkana Juan süchiki tü aaʼinnakat nüka, nasaajaka müliashii süpüla neʼiküinjachin nia.

30 Nantaka na aluwataaushikana eejachire Jesús jee naküjaka nümüin süchiki süpüshuaʼa tü kasa naaʼinrakat chejee jee tü nekirajakalü anain. 31 Süka süntayaa sümüin watta saalii wayuu nünainmüin Jesús, nnojotsü apütaain kaʼi süpüla neküinjanain. Müshijeseʼe nümüin Jesús namüin na nikirajüinkana: «Anashii juʼunule tamaa suluʼumüin wanee mma wattasü yaajee süpüla jeemeraainjanain». 32 Müshiijeseʼe anuwaluʼuin naya suluʼumüin wanee mma eere yüütüülin. 33 Eepejeʼe wayuu eʼrajaka nukua Jesús wanaa sümaa nuʼunuin otta watta naalii na aapakana nüchiki. Sukoʼulayaa sümaka wayuu suluʼujee süpüshuaʼa tü pueulokalüirua. Nooʼuikashii naya jee nantaka palajana nüpüleerua Jesús namaa na nikirajüinkana. 34 Nüshakatapa Jesús suluʼujee tü anuwakat, niʼrüin watta saalii wayuu, sümülialaakalaka naaʼin saalinjee. Müshii naya maʼaka saaʼin anneerü eekai marüleejuuin, nikirajaka naya sünain watta saalii kasa.

35 Süka motsoin tü kaʼikat, narütkaaka na nikirajüinkana nünainmüin jee namaka nümüin: «Wattasü tü mmakat otta motsosü kaʼi naaʼu na wayuukana. 36 Anashii püjütüle naya noʼunaiwa chaa pueulopaʼamüin jee chaa metkaaraluʼumüin sünain ayaʼlajaa wanee kasa nayaaluʼu». 37 Nusoutaka Jesús namüin: «Jüchajaa wanee kasa nayaaluʼu». Anuujeseʼe nanüiki na nikirajüinkana nümüin: «¿Jalejeekuwalinjatü wapüla 200 ‹denario›* süpüla wayaʼlajüinjatüin pan nayaaluʼu nala wayuukana?». 38 Anuujeseʼe nünüiki Jesús namüin: «Jünaʼla jeʼrain pan jümaʼana». Nanaʼlaka shia na nikirajüinkana jee namakalaka nümüin: «Jaʼraisü pan otta piamashiichein jime». 39 Naikaajaaka na wayuukana saaʼu tü alamakat sümaa yaawawalin naya süka nuluwataain naya Jesús sünain tia. 40 Naikaajaaka na wayuukana suluʼu poloʼowalin nekii jee jaʼraiwalin nekii. 41 Naapaaka Jesús tü jaʼraisükat pan jee tü piamasükat jime, nuʼuraajaka nümüin Maleiwa sümaa niirakaain iipünaamüin. Nüshanaajakalaka tü pankat jee naapaka shia namüin na nikirajüinkana süpüla neitajüin shia namüin na wayuukana. Akaataʼaya neʼe tü piamasücheinkat jime neitajüin shia namüin napüshuaʼa na wayuukana. 42 Emirakalaka napüshuaʼa na wayuukana, 43 sukotchojunaka poloo piamamüin kanaasüta tü eküülü apütaasükat otta müsia tü jimecheinkat. 44 Eeshii maʼaka 5.000 tooloyuu ekakana pan soʼu tia.

45 Nüjütamaatakalaka Jesús na nikirajüinkana süpüla noʼunajanain nüpüleerua suluʼu anuwa waneemüin saʼata tü palaakat, chaa suluʼumüin tü pueulokot Betsaida, sümaʼainruʼu naʼatapüin noʼunuin na wayuukana. 46 Noʼunapa na wayuukana oʼunushi Jesús saaʼumüin tü uuchikat süpüla nuʼuraajüin nümüin Maleiwa. 47 Aipouupa, wattasü tü anuwakat pasanain sünain tü palaakat, eekajasaʼa Jesús chajachi nümüiwaʼa saaʼu tü uuchikat. 48 Niʼraka Jesús kapüleein namüin na nikirajüinkana oʼuniraa tü anuwakat süka napanapajeein tü joutaikat. Shiasaʼa maʼaka eeiwaʼaya aikat, nuʼunakalaka Jesús nanainmüin sümaa waraittüin nia sooʼopünaa tü palaakat. Nülatitpünaainjana naya nüküjainruʼu. 49 Neimmolojooka na nikirajüinkana neʼraiwaʼaya nia waraittüin sooʼopünaa tü palaakat. «¡Yolujaanee!» namaka nekiiseruʼu, 50 jama neʼrüin nia, müshiijeseʼe neimmolojooin. Asoutapejeʼe Jesús namüin, «Nnojo mmoluin jia, tayan», nümaka namüin. 51 Noʼotooko Jesús suluʼu tü anuwakat namaa jee shiimalaaka tü joutaikat. Ponokoloko maʼin naaʼin tia na nikirajüinkana. 52 Nnojotsü natüjaain aaʼu tü nikirajeekalü anain naya wanaa sümaa wainmajaain tü pankat nutuma. Ayatüsia neʼe süttüin nekii, nnojotsü kasain nayaawatüin aaʼu.

53 Nalatapa waneemüin saʼata tü palaakat, nantakalaka suluʼumüin tü mmakat Genesaret. Nashaʼwaleʼetka tü anuwakat yala peje sünain. 54 Mayaashii nashakanuwaain suluʼujee tü anuwakat, niyaawatünaka Jesús sutuma wayuu. 55 Suʼwalakajaayaa sümaka nüchiki Jesús natuma na wayuukana sainküinpünaa tia mmakat. Sülüʼüjiraanaka nümaʼanamüin wayuu eekai ayuulin. Oʼunushii naya eere naapüin nüchiki Jesús. 56 Nüntawaipa Jesús eemüin shipiapala wayuu jee suluʼumüin wanee pueulo, antinnawaisü nümüin chaa metkaaraluʼu wayuu eekai ayuulin. Nayasaʼa na wayuukana nachuntuin nümüin Jesús shiiʼiree nepettüin soluyaakaijeʼe nüsheʼin, anaka napüshuaʼa na wayuu epettakana nia.