Karaloʼuta namüinjatka na Hebreokana

10 Tü Pütchi Aapünakat nümüin Moisés* shiyaawase shia tü kasa anasü eejeetkat mapeena, nnojotpejeʼe shiain tü shiimainkalüjaʼaya maʼin. Nnojotsü süpüla anain nakuwaʼipa na aʼwaajakana Maleiwa sutuma tü Pütchi Aapünakat nümüin Moisés jee sutuma tü kasa asülajünawaikat nümüin Maleiwa juyawai. 2 Mülejeʼeya sukuwaʼipa tia nnojotsüje choʼujaain suʼutunuin aaʼin mürüt nümüin Maleiwa napüleerua na wayuu aʼyataakana nümüin, jama wuleitpain nakuwaʼipa jee nnojoluitpa mojuin naaʼin saalinjee wanee kasa mojuka natuma. 3 Sutuma suʼutunuin aaʼin mürüt nümüin Maleiwa, sotowaisü naaʼin na wayuukana juyawai kaainjaraliin naya. 4 Nnojotsü süpüla sülaʼajaanüin naainjala wanee wayuu sutuma amülain süsha paaʼa toolo jee amülain süsha kaaʼula.

5 Anuu nünüiki Cristo nümüin Maleiwa wanaa sümaa nüntüin saʼakamüin wayuu: «‹Nnojotsü pücheküin süchiki suʼutunuinjatüin aaʼin mürüt pümüin jee saapünajatüin pümüin wanee kasa, wayuupejeʼe taya putuma. 6 Piyouta achikit suʼutunuinjatüin aaʼin mürüt jee saʼajünajatüin pümüin otta piyouta achikiriaʼaya saapünajatüin pümüin wanee kasa saaʼu saainjala wayuu›. 7 Anuujeseʼe tanüiki nümüin: ‹Maleiwakalee, antüshi taya süpüla taaʼinrüin tü püchekakat maʼaka süshajünüin tachiki suluʼu tü rooyokot›». 8 Anuu nünüiki palajana: «Piyouta achikit suʼutunuinjatüin aaʼin mürüt pümüin sümaa süsülajünüinjatüin pümüin wanee kasa jee saʼajünüinjatüin pümüin otta piyouta achikiriaʼaya suʼutunuinjatüin aaʼin mürüt saaʼu saainjala wayuu». Aapünüinjatüjaʼaya tia saashin tü Pütchi Aapünakat nümüin Moisés. 9 Jee anuu nünüiki mapa: «Antüshi taya süpüla taaʼinrüin tü püchekakat». Nüsünneʼerüin tü kasa palajatkat süpüleerua tü kasa chiiruaajatkat. 10 Sutuma nücheküin Maleiwa tia, wuleitpa wakuwaʼipa sükajee naapajiraain nikii uwatua Jesucristo waaʼu, nükaalinjakalaka wayuu sükajee tia süpüla kaʼikat süpüshuaʼa.

11 Oʼunawaishii waneepia na sacerdotekana naʼyataaleruʼumüin, naʼyataakalaka nümüin Maleiwa jee oʼunawaishii naya weinshi süpüla noʼutuinjatüin saaʼin mürüt nümüin Maleiwa, ayatapejeʼeya neʼe kaainjalain wayuu mayaainjeʼe naainjain tia. 12 Uwatua naapajiraain nikii Cristo saaʼu saainjala wayuu, nükaalinjakalaka wayuu sükajee tia süpüla kaʼikat süpüshuaʼa. Nüikalaakalaka nikialuʼujee chi Maleiwakai. 13 Soʼujeʼereeya tia naʼatapajüin tü kaʼi nuuʼuipalainjanakana oʼu na nüʼünüükana. 14 Aapajiraashi nia nikii uwatua, lotoko nakuwaʼipa nutuma süpüla kaʼikat süpüshuaʼa na akataluushikana nutuma Maleiwa. 15 Nüküjain wamüin Maleiwa tia sükajee tü nüpülainkat, anuu tü nümakat palajana: 16 «‹Anuu tü tapansaajakat namaa süchikijee kaʼikat tia, meerü tashajakai saaʼin suluʼu nekii jee meerü teʼitaakai saaʼin suluʼu naaʼin tü pütchi taluwataakalü anain›, müshi Jehová».* 17 Anuu nünüiki mapa: «Nnojoleerü sotuin taaʼin tü naainjalakat jee nnojoleerü sotuin taaʼin tü kasa mojusü naainjakat». 18 Nnojoluitpa choʼujaain suʼutunuin aaʼin mürüt saaʼu naainjala naya wayuukana, jama motuitpain naaʼin Maleiwa naainjala.

19 Tawalayuwaa, eeinnapa süpüla müin woʼunakai aaʼin suluʼupünaa tü wopu sünainmüinkat tü kuatta wulekat maʼin sümaa meimmoluin waya, jama amülain nüsha Jesús waaʼu. 20 Müsü nujutatkai saaʼin wanee wopu jeketü sünainmüinkat kataa oʼuu süpüla kaʼikat süpüshuaʼa, nujutalüin tia wopukot wapüleerua wanaapünaa sümaa tü kuluulu soʼulujunakat tü kuattakat, tia shiyaawase tü niʼirukukat. 21 Sutuma niʼitaanüin wamüin wanee sacerdote kojutukai maʼin jee laülaakai saaʼu nipia Maleiwa, 22 anashii warütkaale nünainmüin Maleiwa süka süpüshuaʼa waaʼin sümaa kanoulain maʼin waya, jama wuleitpain waaʼin sümaa nnojoluin eein wanee kasa mojuka atuma waaʼin, müinnapaka woʼoojinnakai aaʼin süka wüin wulesü. 23 Waaʼinmaa maʼin waküjain sümüin wayuu süchiki tü kasa waʼatapajakat sümaa nnojoluin wainmajüin waaʼin, jama shiimain maʼin tü nümakat chi apansaajakai tia pütchikat. 24 Anasü kachipünaale waaʼin nakuwaʼipa na waneinnua süpüla aijiraainjanain waya jee süpüla waaʼinrüinjanain kasa anasü. 25 Nnojoliinjana makatüin waya suulia tü outkajawaakat maʼaka makatawalin waneinnua wayuu suulia. Shiainjaʼa anain watütüleʼerüle naaʼin na waneinnua waneʼewai wakua, jama sülüʼülüin maʼin tü nükaliakat Maleiwa.

26 Waainjataale wanee kasa eekai mojuin sümaa watüjaain saaʼu mojuin shia jee wayaawatüle maʼin saaʼu tü pütchi shiimainkat, nnojoluitpajaʼamata eein wanee kasa waapüinjatka nümüin Maleiwa süpüla nülaʼajaainjatüin waainjala. 27 Shiaitpa neʼe waʼatapajaka tü kaʼi süsaleenakalü oʼu waya waainjala sümaa mmoluin maʼin waya jee waʼatapajüin tü kaʼi jashicheechikalü oʼu Maleiwa, tü makalü aka saaʼin wanee siki chuwatsü ajaʼttireenaka na ayoutakana tü nümakat Maleiwa. 28 Eere wanee wayuu moonooinkai sümaa tü Pütchi Aapünakat nümüin Moisés jee nüküjünüle achiki natuma piamashii jee apünüinshii wayuu, oʼutunajachi aaʼin chia wayuukai saalinjee naainjala. 29 Alanaʼaleeinjatü maʼin tü kasa aainjünakat nüka chi wayuu mojutukai amüin* chi Nüchonkai Maleiwa sümaa mojutuin nümüin tü isha amülakat saaʼu tü pütchi apansaajünakat, tü aneekünakalü akajee chia wayuukai nutuma Maleiwa. Alanaʼaleeinjatü maʼin tü kasa aainjünakat nüka chia wayuukai süka mojutuin nümüin tü nüpülainkat Maleiwa, tü kamaneekalü aaʼujee Maleiwa sümüin wayuu. 30 Watüjaa aaʼu müin nünüiki Maleiwa mayaa: «Tayeechi pasalaaka atuma wanee kasa, tayeechi achekajaka». Jee müshi niaya: «Nieechi Jehová* kasalajanaka atuma na nüpüshikana». 31 Miyoʼu maʼin tü müliaa niʼreetkat wanee wayuu süsalale nia naainjala nutuma chi Maleiwa matüjainkai outaa.

32 Soto jaaʼin waneepia jüchecherüin jaaʼin soʼunnaa tü müliaa jiʼrakat, alatüsü tia jümüin süchikijee jütüjaain saaʼu tü pütchi shiimainkat. 33 Eesü mojule pütchi jümüin jee müliale jia atumawaa suʼupala wainma wayuu jee eeshii jiale akaalinjain na alatakana amüin tia. 34 Amülialaasü jaaʼin naalin na anoujashii püreesakana jee talatüsü jaaʼin mayaainjeʼe suʼluwajünüin wanee kasa juulia, jama jütüjaain saaʼu eein jümaʼana wanee kasa alanaʼaleeka maʼin jee matüjainka ajaʼttaa.

35 Ayataʼaya yalayalain jaaʼin, jama saapüneerüin jümüin kasa anasü. 36 Choʼujaasü jüchecherüinjatüin jaaʼin, naapeetkalaka jümüin Maleiwa tü nüküjatüjütkalia achiki paala jümüin saaʼu jaaʼinrüin tü nuluwataakalü anain. 37 «Soʼu palit kaʼi», «semaateechi chi antajachikai anülia, nnojoleechi kamaʼain nia». 38 «Kateerü noʼu chi wayuu lotokoi akuwaʼipa sünainjee kanoulain nia» jee «nükatalaale toulia, nnojoleechi taya talatüin nümaa». 39 Nnojoishii müin waya maʼaka naaʼin na wayuu ajaʼttinnakana sünainjee nakatalaain nuulia Maleiwa. Müshii waya maʼaka naaʼin na wayuu katakana oʼu sünainjee kanoulain naya.