Naʼyataain na Aluwataaushikana
20 Neimalaapa na wayuukana, nuunejirakalaka Pablo na anoujashiikana. Nütütüleʼerakalaka naaʼin jee nüpütaakalaka napüla, nuʼunakalaka Macedoniamüin süchikijee tia. 2 Nülatapa suluʼupünaa tü pueulo eejatkat chaa Macedonia jee nütütüleʼerapa naaʼin na anoujashii chajanakana chayaa, nüntakalaka Greciamüin. 3 Apünüin kashi makatüin nia chayaa. Shiasaʼa nülüʼütpa süpüla nuʼunajachin suluʼu anuwa chaa Siriamüin, naashajaajiraaka na judíokana nikiira. Chajaaka joo nia suluʼupünaa tü mmakat Macedonia. 4 Nia oʼunaka nümaa Pablo Sópater, chi nüchonkai Pirro, chi chejeʼewaikai Berea. Eejachia Aristarco otta müshia Segundo, chi chejeʼewaikai Tesalónica. Eejachi Gayo, chi chejeʼewaikai Derbe otta müshia Timoteo. Eejachiaʼaya Tíquico otta Trófimo, na chejeʼewaliikana suluʼu tü mmakat Asia.* 5 Noʼunakalaka wapüleerua jee naʼatapajaka waya chaa Troas. 6 Süchikijee tü Miʼiraa Saainjünakalü oʼu tü Pan Maʼakasatkat Soolojia, anuwaluʼukalaka waya Filiposmüin. Wasaʼwajaakalaka naya Troasmüin jaʼrai kaʼi süchikijee tia. Makatüshiijeseʼe waya chayaa akaratshi kaʼi.
7 Jutkatakalaka waya sünain ekawaa shiinaluʼujee semaanakat. Yootoko Pablo namaa na wayuu jutkatüshiikana, jama nuʼunajachin waneemüin kaʼi. Ooʼulaʼaleeshia nia suulia aashajawaa süseʼeruʼu aikat. 8 Watta saalii ranpara suluʼu tü kuatta chajatkalü iipünaa eejanale jutkatüin waya. 9 Eejachika yala wanee jimaʼai joyotuin soʼuluʼu tü wentaanakat, Eutico nünülia. Saapaain nia lapü wanaa sümaa naashajaain Pablo. Ojutuushijeseʼe nia iipünaajee, jama sükanalüin nia tü lapükat. Apünüin piiso eejeere nujutuuin. Nüpataanaiwaʼaya jimaʼaikai natuma na wayuukana, outatüjüiya napüla. 10 Nüshakataka Pablo iipünaajee, aʼwachiraashijeseʼe nia naaʼu jimaʼaikai sümaa nükoʼojooin nünain. «Nnojo jüinkuuin aaʼin, katoʼuchin»,* nümakalaka. 11 Nikerotoko paülüʼümüin sümaa noʼotooin sooʼopünaa tü kaleerakat, nüshaletaka wanee pan jee nikaka shia. Ayatakalaka nia aashajaain suwasajaʼaleepa aikat, nuʼunakalaka süchikijee tia. 12 Nümaanakalaka chi jimaʼaikai sümaa katüin noʼu jee talataleekalaka maʼin naaʼin na wayuukana sutuma tia.
13 Süchikijee tia, anuwaluʼuka waya suluʼumüin tü mmakat Asón eejachire wasaapünaain Pablo. Waainjüinjaʼaya tia, jama nüküjatüjülin wamüin nuuʼuikainjachin nia suluʼumüin tia mmakat. 14 Nüsaʼwajaapa waya suluʼumüin tü mmakat Asón, anuwaluʼukalaka nia wamaa suluʼumüin tü mmakat Mitilene. 15 Waneemüin kaʼi, anuwaluʼukalaka waya yalejee jee wantakalaka suluʼumüin tü mmakat Quíos. Wattaʼamüin woʼotoko motsomüin suluʼupünaa tü mmakat Samos, wantakalaka Miletomüin wanee kaʼi süchikijee tia. 16 Nnojoishi antüin Pablo Éfesomüin süka nnojolin kamaʼweein nia suluʼupünaa tü mmakat Asia. Ashapajaashi nia süpüla nüntamaatüin Jerusalénmüin soʼunnaa tü Miʼiraa kanüliakat Pentecostés.*
17 Nüjütirüinjeseʼe nünüiki Miletojee namüin na laülaashii chajanakana Éfeso süpüla noʼunajanain nünainmüin. 18 Anuujeseʼe nünüiki Pablo namüin na laülaashiikana nantapa nümaʼanamüin: «Jütüjaa aaʼulu jamüin takuwaʼipa jaʼaka soʼujeʼereeya tü palajatkat kaʼi tantakalü oʼu suluʼumüin mmakat Asia. 19 Aʼyataashi taya suluʼu nüchepchiain taya chi Señotkai sümaa nnojoluin yaletüin taaʼin. Aʼyalajüshi maʼin taya jee watta saalii tamüliala sutuma naashajaajiraain na judíokana tekiira. 20 Mayaapejeʼe müin sukuwaʼipa tia, nnojotsü tataʼülüin sukuwaʼipa suulia taküjainjatüin jümüin wanee pütchi analuʼut, tekirajüinjanain jia suʼupala wayuu jee taküjainjachin pütchi sainküin miichi. 21 Wanaa sümaa taküjain pütchi namüin na judíokana otta na griegokana, tapansaajüin namüin nayaawajaainjanain suulia naainjala, narütkaainjanain nachikuaʼa nünainmüin Maleiwa jee kanoulainjanain naya nünain chi Señotkai Jesús. 22 Nuʼunirüin takuwaʼipa Maleiwa sükajee tü nüpülainkat süpüla toʼunajachin Jerusalénmüin, nnojotpejeʼe tatüjaain saaʼu kaseerüin alatüin tamüin chamüin. 23 Tantüle suluʼu wanee pueulo, nüküjawalin tamüin Maleiwa sükajee tü nüpülainkat tataʼüneechin jee teʼreechin wainma kasa mojusü tantapeena Jerusalénmüin. 24 Shia taaʼinreeka amüin tü eʼitaanakat tapüleerua* jee tekeraajüinjatü tü aʼyatawaa niʼitaakat tajapuluʼu chi Señotkai Jesús süchiki taküjainjachin tü pütchi anakat maʼin sünain kamaneein maʼin chi Maleiwakai. Taainjeerü tia jaʼitashi outuin taya sünainjee.
25 »Tatüjaa aaʼulu nnojoleechin taya jiʼrüin piantua, jiakana taküjakana amüin pütchi süchiki nuluwataainjachin Maleiwa. 26 Teenajirüinjeseʼe jia süpüla jütüjaainjatüin saaʼu soʼukai nnojolin tayain kasirüin outule wanee wayuu, 27 jama taküjain namüin tü nüchekakat Maleiwa napüleerua. 28 Eeja jaaʼin jaaʼujiraa jee jaaʼinmaja na wawalayuukana maʼaka naaʼin wanee arüleejüi aaʼinmajakai naʼanneetse. Aneekünüshii jia nutuma Maleiwa sükajee tü nüpülainkat süpüla jaaʼinmajüinjanain na anoujashiikana nünain Maleiwa. Niyaʼlajüin naya sükajee nüsha chi Nüchonkai. 29 Toʼunapeena, tatüjaa aaʼu nekeroleenain jaʼakamüin wayuu makana aka saaʼin erü simoluuna eekai jashichin. Mülieena maʼin na anoujashiikana natuma. 30 Jaʼitakajeʼe neʼe jaʼakajee eejeena wayuu aʼwanajaakana tü pütchi shiimainsükat süpüla wanaawainjatüin naaʼin na anoujashiikana namaa jee noushikajaainjanain süchiirua nakuwaʼipa.
31 »Eeja jaaʼin jee soto jaaʼin eejachin taya jümaa sünain achiawaa jia soʼukai jee saʼwai. Tachiaain jia teʼiraluʼu waneʼewai jukua soʼu apünüin juya. 32 Kasataalejeseʼe naaʼinmajüin jia Maleiwa jee kasataalejeseʼe anain jukuwaʼipa sutuma nünüiki, tü anuu jooluʼu atütüleʼerüin jaaʼin süpüla saapünajatüin jümüin tü eʼipünaalaa namüinjatkat na aneekuushikana. 33 Nnojotsü jamajatüin tamüin tü nneerü pülaata eekat nümaʼana wanee wayuu jee müsia tü ooro eekat nümaʼana. Jaʼitakajeʼe neʼe nüsheʼin wanee wayuu, nnojotsü jamajatüin tamüin. 34 Jütüjaa aaʼuchi taʼyataalin maʼin süpüla tayaʼlajüinjachin wanee kasa eekai choʼujaain tamüin jee wanee kasa eekai choʼujaain namüin na tamaataraliikana. 35 Teʼitaain sukuwaʼipa jüpüleerua jiʼyataaliinjanain maʼin süpüla jükaalinjainjanain na eekai matchin aaʼin sünain anoujaa. Soto jaaʼin tü pütchi nümüsüinkakat chi Señotkai Jesús wanaa sümaa nümüin: ‹Talataleesia maʼin waaʼin wasülajüle wanee kasa suulialeʼeya süsülajünapa wamüin›».
36 Keraapa nünüiki, nüsapainkaka nia sünain oʼuraajaa namaa napüshuaʼa. 37 Naʼyalajayaa namakalaka jee nokoʼojooko nünain Pablo sümaa natuʼluin nuwalapaʼa. 38 Mojusü maʼin naaʼin, jama nüküjain Pablo namüin nnojoleechin nia neʼrüin piantua. Neʼikalaaka nia eemüin tü anuwakat.