Chiiruaajatka karaloʼuta namüinjatka na chajanakana Corinto
6 Süka waʼyataajiraain nümaa chi Maleiwakai, wachuntuin maʼin jümüin nnojoluinjatüin jiyoutuin süchiki tü nümaneekat jee nnojoluinjatüin motuin jaaʼin kasapülajatüin tia makat. 2 Anuu tü nümakat Maleiwa: «Taapüin pünüiki soʼu tü kaʼi anashiikat maʼin jee takaalinjain pia soʼu tü kaʼi sükaliakat oʼtteʼeraa». Kaʼikat tüü shia keraaka maʼin süpüla saaʼinnajatüin tia. Tüü shia tü kaʼi keraakat maʼin süpüla suʼtteʼennajatüin wayuu.
3 Nnojoishii waya aainjain kasa mojusü sümüin wayuu suulia mojujain sünüiki wayuu süchiki tü waʼyataainkat nümüin Maleiwa. 4 Atüjaana aaʼu waʼyataain nümüin chi Maleiwakai sünainjee süpüshuaʼa tü kasa waainjakat. Wachecherüin waaʼin soʼunnaa suuʼulakünüin waaʼin, soʼunnaa weʼrüin müliaa, soʼunnaa weʼrüin choʼujawaa, soʼunnaa sülatüin wanee kasa mojusü wamüin, 5 soʼunnaa waʼyaajünüin, soʼunnaa püreesain waya atumawaa, soʼunnaa sushutuin watta saalii wayuu waaʼu, soʼunnaa waʼyataain maʼin, soʼunnaa matunkuin waya saʼwai, soʼunnaa walatirüin jamü, 6 wulesü tü wakuwaʼipakat, waainjain wanee kasa süka watüjaain saaʼu nüchiki Maleiwa, nnojoishii waya ashapajaain, kamaneeshii waya, wooʼulaain nuʼunirüin wakuwaʼipa chi Maleiwakai sükajee tü nüpülainkat, aisü wayuu wapüla sümaa nnojoluin piamain woʼupünaa, 7 waküjain tü shiimainkat, weʼitaain waaʼin sünain naapeerüin wamüin Maleiwa tü nüpülainkat, wountuin waainjain tü kasa lotokalü akuwaʼipa, süka jamüin, müshii kaʼapülakai waaʼin,* müsü wajapuluʼujakai saaʼin tia süka tü wajapü wekiakat jee tü wepeʼekat. 8 Eeshii kojutule waya sutuma wayuu jee eeshii mojutule waya atumawaa, eesü anale sünüiki wayuu wachiki jee eesü mojule pütchi wachiki, aküjashii waya alawaa saashin wayuu mayaainjeʼe waküjain tü shiimainkat, 9 müshii meʼraajuukai waaʼin, eʼraajünapejeʼe maʼin waya, müshii outajanakaijaʼaya waaʼin, katapejeʼe woʼu, müshii süsalakai waaʼin waainjala, nnojotpejeʼe aapünüin wekii süpüla outajanain waya, 10 müsü mojukai waaʼin, talatapejeʼe waya waneepia, müshii maʼletsekai waaʼin, wattapejeʼe naalii na wayuu washinnuukana watuma, müsü nnojotkai kasain wantüin anain, wamaʼanapejeʼe kasa süpüshuaʼa.
11 Jia chakana Corinto, waküjain jümüin tü shiimainkat jee kooʼomüinsü tü jaalinkat wapüla. 12 Nnojotsü wataʼülüin sukuwaʼipa tü jaalinkat wapüla, eekajasaʼa jiakana jütaʼüla akuwaʼipat tü waalinkat jüpüla. 13 (Aashajaashijeseʼe taya jümaa süka müin jia maʼaka naaʼin tachonnii), anashii aire waya jüpüla maʼaka alin jia wapüla. Shia anaka aluʼu kooʼomüinre saalin wayuu jüpüla.
14 Nnojo wanaawain jaaʼin namaa na manoujainsaliikana. ¿Kasa wanaawaka aluʼu tü lotookalü akuwaʼipaa sümaa tü mojulawaakat? ¿Kasa wanaawaka aluʼu tü luusakat sümaa tü piʼyuushikat? 15 ¿Kasa wanaawaka aluʼu Cristo nümaa chi Yolujaakai?* ¿Kasa wanaawaka aluʼu wanee wayuu anoujashi nümaa chi eekai manoujain? 16 ¿Kasa wanaawaka aluʼu tü aʼwaajüleekat Maleiwa sümaa tü shiyaakuakat maleiwayaasü? Müshii waya maʼaka saaʼin tü miichi aʼwaajüleekat chi Maleiwa matüjainkai outaa, shiaʼaya nüküjaka tia chi Maleiwakai wanaa sümaa nümüin: «Eejeechi taya namaa, naʼakeechi taya, Namaleiwaseechi taya jee tapüsheena naya». 17 Anuu nünüiki Jehová:* «Jujuʼita naʼakajee, jükatalaa noulia, juuʼulaa suulia jaapaain tü kasa yarüttakat» «jee taaʼinmajeenaka jia». 18 «Anuu nünüiki Jehová,* chi Pülashikai maʼin: ‹Jüshinjachi taya jee tachonniijeena jia›».