Jueces
5 Anuukalaka shiiʼirain Débora soʼu kaʼikat tia nümaa Barac, chi nüchonkai Abinoam:
2 «Anashi nuʼwaajünüle Jehová süka nantüin
na wayuu chejeʼewaliikana Israel süka naaʼin namüiwaʼa sünain atkawaa.
Anashi nuʼwaajünüle saaʼujee nantüin sünain atkawaa na wayuu nnojoliikana kaülajüin aʼwala.*
3 Jülüja jaaʼin tü tamüinjatkat jümüin jia aluwataashiikana,
jülüja jaaʼin tü tamüinjatkat jümüin jia sülaülakana mma.
Teeʼirajeerü wanee jayeechi nümüin Jehová.
Nieechi teeʼirajaka amüin Jehová, chi Namaleiwasekai na israelitakana.
4 Jehovákalee, akutkujaasü tü mmakat,
miyoʼu maʼin tü juyakat soʼu pujuʼitüin suluʼujee tü mmakat Seír
jee soʼu pujuʼitüin suluʼujee tü mmakat Edom,
aʼitüsü maʼin tü juyakat.
5 Akutkujaasü* tü uuchikat nuʼupala Jehová,
akutkujaasü tü uuchikat Sinaí nuʼupala Jehová, chi Namaleiwasekai na israelitakana.
6 Eesü wopu moʼunajuuka aluʼu nükalioʼu Samgar,
chi nüchonkai Anat jee sükalioʼu Jael,
oʼunusü wayuu suluʼupünaa wopu naatajatü.
7 Nnojorülaa müshii na apünajülii kepiakana wünaʼapü, nnojorülaa müshii naya.
Aleʼejüshii naya nachikuaʼa noumainpaʼamüin tantapa tayakat Débora.
Müsü taya maʼaka saaʼin nei namüin na israelitakana.
8 Sutuma naʼwaajüin maleiwayaasü na israelitakana,
eejatü atkawaa soʼuluʼu tü pueulo eejanale kepiain naya.
Nnojotsü eejatüin wanee escudo jee wanee lanza*
namaʼana na cuarenta miit israelita eejanakana.
9 Paaʼinwasü taya namaa nekiipüʼü na surulaat yaakana Israel,
na oʼunakana süka naaʼin namüiwaʼa sünain atkawaa namaa na wayuukana.
¡Anashi nuʼwaajünüle Jehová!
10 Anasü jüsakireʼerüle jaaʼin jia püliikoʼukana,
jia joyotokana saaʼu wanee kuluulu anaka maʼin,
jia oʼunakana suluʼupünaa wanee wopu.
11 Aapünüsü nanüiki na wayuu chajanakana asiʼrüin tü mürütkalüirua.
Yootushii naya süchiki tü kasa anasü naainjakat Jehová,
yootushiʼiya naya süchiki tü kasa anasü naainjakat na apünajülii kepiakana wünaʼapü.
Nantakalaka soʼuluʼumüin tü pueulokot na aʼwaajakana Jehová.
12 ¡Püchijiraa Débora, pütamaa!
Püchijiraa, pütamaa jee piiʼiraja wanee jayeechi.
Pütamaa Barac, pia nüchonkai Abinoam, pümaa na wayuu pükanajakana.
13 Na israelita apütaakana oʼunushii naya eemüin na wayuu kojutukana atumawaa.
Antüshii tamaʼanamüin na wayuu aʼwaajakana Jehová süpüla watkaainjanain namaa na weʼipolokana.
14 Chajana patajatshii na nüikeyuukana Efraín,
kottushii naya jümaa jia nüikeyuukana Benjamín.
Shikiipüʼü surulaat na nüikeyuukana Makir
jee na nüikeyuukana Zabulón shikiipüʼü na surulaat akotchojokana wayuu.
15 Eejana sümaa Débora nekiipüʼü na nüikeyuukana Isacar.
Eejachi Barac wanaa namaa na nüikeyuukana Isacar.
Antüshi nia eemüin tü patajatshiikat.
Eeshii na nüikeyuukana Rubén nnojoliikana atüjaain saaʼu tü naaʼinrajatkat.
16 ¿Jamüshii jüikalaakaʼa maʼaka süikalaain wanee mürüt suupünaa süchise
sümaa jaapajüin shiʼira tü «flauta» naʼyalajirakat na arüleejüliikana?
Eeshii na nüikeyuukana Rubén nnojoliikana atüjaain saaʼu tü naaʼinrajatkat.
17 Malatüinsalii waneemüin saʼata tü süchikat Jordán na wayuu chajanakana suluʼu tü mmakat Galaad.
¿Kasa makataka anainjee na nüikeyuukana Dan süʼütpaʼa tü naʼanuwainkat?
Ojoyolooshii na nüikeyuukana Aser sotpaʼa tü palaakat sümaa nnojoliin kasain naainjain,
nnojoishii naya watteein suulia süshaʼwajüle tü naʼanuwainkat.
18 Nnojoishii mmoluin seema outaa na nüikeyuukana Zabulón wanaa sümaa chajanain naya uuchoʼu,
müsia neʼe nakuwaʼipa na nüikeyuukana Neftalí.
19 Atkaashii na sülaülajanakana mma namaa na israelitakana,
natkaaka suluʼu tü mmakat Taanac na aluwataakana naaʼu na wayuu chajanakana Canaán,
chajana naya atkaain süʼütpaʼa tü wüin chakat Meguidó.
Nnojotkalaka nashannüin pülaata noulia na wayuu nashutakana aaʼu.
20 Atkaasü tü shüliwalakat iipünaajee,
atkaasü shia nümaa Sísara.
21 Sülüʼüjain naya tü luwopu chakat Cisón,
tü luwopu sümaiwajatkat, tü luwopukat Cisón.
Talüükata aaʼuchii na wayuu katchinjakana maʼin.
22 Kepisanasü maʼin suuʼui tü ama katchinjakat maʼin,
jama süpantajaain suulia sütaʼünnüin.
23 Anuu nünüiki chi aapiee nümaʼanajeejachikai Jehová:
‹Kasataalejeseʼe sülatüin kasa mojusü namüin na wayuu chakana Meroz,
anasü sülatüle kasa mojusü namüin na wayuu chakana kepiain suluʼu tia mmakat, jama nnojoliin nantüin sünain akaalinjaa Jehová.
Nnojoishii naya antüin namaa na wayuu katchinjakana maʼin sünain akaalinjaa Jehová›.
24 Kojutusü maʼin atumawaa Jael naʼakajee na jieyuukana,
nuʼwayuuse shia Héber, chi quenitakai.
Kojutusü maʼin shia naʼakajee na jieyuu kepiakana suluʼu miichi aainjuushi süka loona.
25 Ojulijashi Sísara wüin saaʼu, süsiʼrapejeʼe nia leechi.
Süsirüin nia kojosü suluʼu wanee iita anasü maʼin.
26 Saapaaka wanee wunuʼu kasaka eʼichi,
tü achechennakalü aka wanee miichi aainjuushika süka loona.
Saapaakalaka tü mattiiakat süka tü sajapü shikiakat.
Süchitakalaka nikii Sísara süka, suwajaakalaka nikii. Süchinaain suwalapaʼa nikii, susonojookalaka wunuʼu nikii.
27 Ojuttushi nia süʼütpaʼa suuʼui,
ojuttushi nia jee makutulaainsai.
Ojuttushi nia süʼütpaʼa, akanajuushi nia eejachire nujuttuin.
28 Anaʼlaasü wanee wayuu suluʼupünaa tü wentaanakat.
Eirakaasü tü niikat Sísara suluʼupünaa tü wentaanakat sümaa sümüin:
‹¿Jamüshiche nnojoikaʼa nüntamaatüin suluʼu neʼejena?
¿Jamüsüche nnojotkaʼa taapüin shipisana suuʼui naʼamain?›.
29 Nasoutakalaka sümüin na jieyuu kekiijakana maʼin shipialujunakana,
anuu sünüiki tü niikat Sísara sümaa kojuyatuain sünüiki:
30 ‹Chashii eera na surulaatkana sünain eitajaa tü nasütakat noulia na neʼipolokana.
Eesüjaʼa naneeküle waneʼewai nakua na surulaatkana wanee majayüt
jee shiale piamasü majayünnüü. Eesüjaʼa naapaale Sísara wanee kuluulu atinñajuushi, atinjuushi tia kuluutkat.
Eesüjaʼa nanutpunaale na ashutushiikana wanee kuluulu anasü maʼin,
wanee kuluulu atinñajuushi jee shiale piamasü shiʼipapaʼa kuluulu anajüsü maʼin›.
31 Jehovákalee, kasataalejeseʼe outuin napüshuaʼa na püʼünüükana maʼaka outuin wayuukana naainnua.
Eekajasaʼa na wayuu aikana apüla pia, kasataalejeseʼe warattüin naya maʼaka warattüin chi kaʼikai».
Nnojotkalaka eein atkawaa chaa Israel soʼu pienchi shikii juya.