Levítico
17 Ayatakalaka naashajaain Jehová nümaa Moisés sümaa nümüin nümüin: 2 «Yootuinjachi pia nümaa Aarón, namaa na nüchonniikana jee namaa napüshuaʼa na israelitakana. Anuu tü pünüikinjatkat namüin: ‹Anuu tü taluwataakalü anain tayakai Jehová:
3 »›«Eere wanee wayuu naʼakajee na israelitakana oʼutakai naaʼin wanee paaʼa, wanee anneetchon jee shiale wanee kaaʼula sümaa naaʼinrüin tia naʼaka na israelitakana jee shiale wattaluʼu suulia nepia na israelitakana 4 sümaa nnojoluin niʼikajaain shia soʼuluʼumüin tü miichi aʼwaajüleekat süpüla naapüinjatüin shia tamüin tayakai Jehová soʼuluʼu tü miichi eere taʼwaajünüin tayakai Jehová, kaainjaleechi chia wayuukai süka amülain isha nutuma, oʼutunajachi aaʼin chia wayuukai naʼakajee na israelitakana saaʼu amülain isha nutuma. 5 Tüü süpülajatü nnojoluin noʼutuin saaʼin na israelitakana tü namüʼlüinkat anooipaʼa, anasü neʼikajaale shia tamaʼanamüin tayakai Jehová soʼuluʼumüin tü miichi aʼwaajüleekat eekai chi sacerdotekai. Noʼutajatü aaʼin süpüla naapüinjatüin shia tamüin tayakai Jehová süpüla anajiraainjanain naya tamaa. 6 Nütülüittireetka chi sacerdotekai saaʼu tü aʼajüleekat süsha tü mürüt oʼutunakalü aaʼin tamüin tayakai Jehová soʼuluʼuka tü miichi aʼwaajüleekat, kaitteetkalaka nutuma sümüsain tü saüsükat, maʼaka wanee kasa jemetaka maʼin eejuu asülajünaka tamüin tayakai Jehová. 7 Nnojoleenakalaka naya oʼutuin saaʼin mürüt sümüin tü yolujaa makalü aka saaʼin kaaʼula, aʼluwajiraashii neʼe naya nakuwaʼipa soʼu naʼwaajüin tia yolujaakalüirua. Tüü shia wanee kasa naaʼinrajatkat süpüla kaʼikat süpüshuaʼa na jüikeyuu eejeenakana jüchikumüin»›.
8 »Anuu joo pünüikinjatkaʼaya namüin: ‹Eere wanee wayuu naʼakajee na israelitakana jee wanee wayuu nnojoikai israelitain kepiakai jaʼaka asülajüinjachikai wanee mürüt süpüla suʼutunuin aaʼin jee saʼajünüin tamüin, shialejeʼe wanee kasa nüsülajüinjatka tamüin 9 jee nnojorüle niʼikajaain shia soʼuluʼu tü miichi aʼwaajüleekat süpüla nüsülajüinjatüin shia tamüin tayakai Jehová, oʼutunajachi aaʼin nia naʼakajee na israelitakana.
10 »›Eere wanee wayuu naʼakajee na israelitakana jee wanee wayuu nnojoikai israelitain kepiakai jaʼaka ekakai süsha kasa eekai eein, nnojoleechi taya talatüin nümaa süka niküin isha jee toʼuteechi aaʼin nia naʼakajee na israelitakana. 11 Shia kataka atuma soʼu wayuu jee kataka atuma soʼu mürüt tü ishakat. Shia taapaka apüla tü ishakat shiʼitaainjatüin saaʼu tü aʼajüleekat süpüla sülatinnüinjatüin jaainjala juulia süka shiain tü ishakat kataka atuma soʼu wayuu. Eeka süpüla sülatinnüin jaainjala sükajee. 12 Müshijeseʼe tamüin namüin na israelitakana: «Nnojotsü jaralüin eküinjatüin isha jee nnojotsü niküinjatüin shia chi wayuu nnojoikai israelitain kepiakai jaʼaka».
13 »›Eere wanee israelita jee niale wanee wayuu nnojoikai israelitain kepiakai jaʼaka oʼunakai sünain olojoo, nüsirüle joo wanee wüchii simoluuna jee shialejeʼe wanee wüchii eekai süpüla niküin, amülainjatü tü süshakat nutuma jee nijitüinjatü mma saaʼu. 14 Katüsü soʼu wanee kasa sünainjee tü süshakat, müshijeseʼe tamüin namüin na israelitakana: «Nnojoishii eküinjanain jia isha süka shiain tü ishakat katüin atuma soʼu wayuu jee katüin atuma soʼu mürüʼlü. Outeechi chi eekai eküin shia». 15 Yarütteechi wanee israelita jee niale wanee wayuu nnojoikai israelitain ekakai shiʼiruku wanee mürüt eekai outuin jee shiale shiʼiruku mürüt eekai süsirüin wüchii jashichi. Acheküshi nüshijaainjachin nüsheʼin jee noʼoojuinjachin waneʼereeya wulein nia motsopa kaʼikat. 16 Nnojoire nüshijaain nüsheʼin jee nnojoire noʼoojuin, asouteechi nia saaʼu naainjala›».