Tü nüshajalakat Lucas

11 Soʼu wanee kaʼi, chajachi Jesús sünain oʼuraajaa jee kettaapa nia süchikijee oʼuraajaa nümaka wanee nikirajüin nümüin: «Señotkalee, pikiraja waya sünain oʼuraajaa maʼaka nikirajüin Juan sünain oʼuraajaa na nikirajüinkana».

2 Nümakalaka Jesús namüin na nikirajüinkana: «Müinjatü jünüiki juʼuraajapa: ‹Washikai, kasataalejeseʼe shiʼraajüin wayuu pünülia otta kojutuin pia sümüin. Wachuntuin pümüin puluwataainjachin saaʼu tü mmakat. 3 Paapa wamüin tü weküinjatkat sükaaluʼuwai wanee kaʼi, wanaapünaa sümaa tü choʼujaakat wamüin. 4 Moto paaʼin tü kasa nnojotkalü anain watuma maʼaka motuin waaʼin tü kasa mojusü saainjakat wayuu wamüin. Pükaalinja waya suulia suuʼulakünüin waaʼin›».

5 Nümakalaka Jesús namüin: «Jamüshijaʼa eetaale wanee jaʼaleewain antakai süseʼeruʼu ai jünainmüin sümaa nümüin jümüin: ‹Waʼle, paʼanapajira maa taya apünüinsü pan. 6 Isaa antüin tepialuʼumüin wanee wayuu taʼaleewain, nnojotka kasain asaijaanajatüin niyaaluʼu›. 7 Nusoutakalaka paülüʼüjee chi nipiajachikai nümüin: ‹Nnojo pikeʼejüin taaʼin, süttüipa tü miichoʼukat, atunkuinnapa na tepichikana, eisalaainnapa waya. Nnojoishi süpüla tatamaainjachin sünain alatiraa wanee kasa pümüin›. 8 Shiimain tanüiki jümüin, nnojoleechi atamaain chia wayuukai sünain aapaa wanee kasa nümüin, jaʼitashi naʼaleewain nia. Alatireechipejeʼe nia wanee kasa nümüin jee naapeerü tü choʼujaakat nümüin saaʼujee masütaajüin nia sünain achuntaa jee saaʼujee nikeʼejakuʼu nümüin naaʼin. 9 Anuukalaka tanüiki jümüin: Ayataʼaya juchuntuin, jüsülajüneenaka amüin, ayataʼaya jüchajaain jünteetka sünain tü jüchajaakalü achiki. Ayataʼaya jütaletüin miichoʼu, sujutanneetka jüpüleerua. 10 Nuchuntule wanee wayuu, aapüna amüinchi, nüchajaale süchiki wanee kasa, nünta anainrü, nütaletüle miichoʼu, ojutanna apüleeruachi. 11 ¿Eeshichejeʼe wanee wayuu jaʼaka asülajakai wanee wüi nümüin nüchon nujulijünüle aaʼu jime nutuma? 12 ¿Jama nujulijüle chi nüchonkai kaliinashuku naaʼu? ¿Asülajeeiche wanee jeʼyut nümüin? 13 Asülajawaishii jia kasa anasü namüin na jüchonniikana eerejeʼe wayuuin mojulaashii jia, nieemataka nnojolin aapeematüin jümüin chi Jüshi iipünaajachikai tü nüpülainkat juchuntule shia nümüin».

14 Shiasaʼa mapa, nujuʼitiraka Jesús wanee yolujaa nüleʼeruʼujee wanee wayuu manüikai atuma chia wayuukai. Kanüika nia nujuʼitirapa Jesús tü yolujaakat nüleʼeruʼujee, ponoko maʼin saaʼin wayuu tia. 15 Eepejeʼe waneinnua wayuu makana anüiki: «Eekajasaʼa wayuukai chii ojuʼititshi yolujaa süleʼeruʼujee wayuu nükajee ‹Belcebú›,* chi sülaülashikai yolujaa». 16 Eekalaka waneinnua wayuu achuntayaakana nümüin Jesús naaʼinrüinjatüin wanee kasa pülasü noʼupala süpüla nooʼulaküin naaʼin. 17 Nütüjaapejeʼe saaʼu Jesús tü jülüjakat naaʼin naya wayuukana, nümakalaka namüin: «Mojujiraale wanee wayuuirua suluʼu wanee mma, ajaʼlajaajiraweerü shia jee shiale mojujiraain wanee wayuu sümaa süpüshi, ajaʼlajaajiraweerü. 18 Akaataajaʼa niale neʼe Satanás ojuʼitirüin tü yolujaa nümaajatkalüirua, nnojoleechi nia paaʼinwain sümaa. Nuuʼulaweechika suulia aluwatawaa suluʼujee tia. Jamüshijaʼa taya jaajüin jiakana, ojuʼititshi taya yolujaa nükajee ‹Belcebú›. 19 Tojuʼitirülejeʼe yolujaa süleʼeruʼujee wayuu nükajee ‹Belcebú›, ¿jaraikaʼa nojuʼitirüin akajee yolujaa na jüchooinkana? Nayeena na jüchooinkana aküjaka alawaain neʼe tü jümakat. 20 Eekajasaʼa tojuʼitirüle yolujaa süleʼeruʼujee wayuu sükajee tü nüpülainkat Maleiwa, nnojotsüjaʼamata jiyaawatüin saaʼu shikeraajüitpain maaʼulu yaa süchiki niainjachin aluwataain Maleiwa saaʼu mmakat. 21 Naaʼinmajataale nipia wanee wayuu katchinshi sümaa kaʼapülain nia, nnojoleerü jamajüin atumawaa tü kasa eekat nümaʼana. 22 Aluʼujasaʼa nüntataale wanee wayuu katchinreekai nuulia jee nushutataale naaʼu sümaa niyamülüüin nutuma, nüsüteerü nuulia tü naʼapüla nuʼwaataapuʼukalü aluʼu jee niitajeerü tü kasa nüsütakat nuulia. 23 Chi nnojoikai wanaawain aaʼin tamaa, peʼipolooshi tamaa otta chi wayuu nnojoikai ekirajüin wayuu tamaa, nükaaʼinjüin toulia.

24 »Sujuʼitapa wanee yolujaa nüleʼeruʼujee wanee wayuu, alatüsü isashiipaʼapünaa sünain achajawaa eeinjatüle seemeraain, nnojotpejeʼe süntüin anain jalainjatüin shia. Müsüjeseʼe müin sünüiki: ‹Anainjaʼa taleʼejüle tachikuaʼa nüleʼeruʼumüin chi wayuu kaleʼerujachikai taya paala›. 25 Süleʼejapa tü yolujaakat nüleʼeruʼumüin chi wayuukai, müshi nia maʼaka saaʼin wanee miichi eekai wulein otta anain shiyolojo. 26 Oʼuna müsüjaʼa tü yolujaakat, süsaapünaaka akaratshisü yolujaa mojulaʼaleesia maʼin suulia, shikerotoko nüleʼeruʼumüin chi wayuukai, yalairüleeka shia. Keemaleejeeria tü alatakat nümüin chia wayuukai suulia tü kasa alatakat nümüin paala».

27 Wanaa sümaa nüküjain Jesús tia, susoutaka wanee wayuu naʼakajee na wayuu wattakana naalii jee sümakalaka sümaa emetuluin sünüiki: «Anakuwaʼipattaʼaleeja maʼin tü wayuu wayuuichikalü atuma pia, tü wayuu atujeʼerakai pia». 28 Anuujeseʼe nünüiki Jesús sümüin: «Nnojotsü shiain anakuwaʼipalüin, naya anakuwaʼipaliika na wayuu aapakana nünüiki Maleiwa sümaa naaʼinrüin tü nümakat».

29 Anuukalaka nünüiki Jesús narütkaayaa namapa na wayuukana nünainmüin: «Wayuu mojulaashii jia, shia neʼe jiʼreeka amüin kasa pülasü, nnojoleetpejeʼe jiʼrüin tia. Shia neʼe jiʼreetka tü kasa pülasü aainjünakat nüpüleerua Jonás. 30 Sutuma tü alatakat nümüin Jonás jee sünainjee tü kasa naaʼinrakat, nayaawata aaʼu na wayuu chajanakana Nínive nüjünalain nia Maleiwa. Akaʼaya neʼe sutuma tü kasa alateetkat nümüin chi Süchonkai Wayuu, nayaawateerü aaʼu na wayuu eekana maaʼulu nüjünalain nia Maleiwa. 31 Kasalajanapeena saainjala wayuu nutuma Maleiwa, asoʼiraajeerü saaʼin wanaa jümaa tü aluwataasü uuchijeʼewatkat, süküjeetka wayuuin mojulaashii jia. Antüsü shia wattajee süpüla saapajüinjatüin nünüiki Salomón. Aniipejeʼe wanee wayuu jaʼaka alanaʼaleekai nuulia Salomón. 32 Kasalajanapeena saainjala wayuu nutuma Maleiwa, asoʼiraajeerü jaaʼin wanaa namaa na wayuu chajanakana Nínive, naküjeetka wayuuin mojulaashii jia. Ayaawajaashii naya suulia naainjala nüküjapa pütchi Jonás namüin, aniipejeʼe wanee wayuu jaʼaka alanaʼaleekai nuulia Jonás. 33 Jamüshijaʼa wanee wayuu nipejaale wanee ranpara, nnojotsü nuunjuluin jee nnojotsü nuʼwachirüin wanee kasa saaʼu. Niʼitaain shia saaʼu tü süpülajanakat süpüla shiʼnnajatüin tü suwaralakat sutuma wayuu eekai shikerolüin. 34 Tü poʼukot müsü aka saaʼin wanee luusa, anale tü poʼukot meerü chuwatuuikai saaʼin tü pütapaʼakat. Eekajaʼa suchunjale paaʼin saaʼu tü kasa piʼrakat, meerü kojokoi saaʼin piʼyuushi paaʼu. 35 Eejeekalaka maʼin paaʼin suulia kojoin piʼyuushi paaʼu. 36 Müle chuwatuuikai saaʼin pütapaʼa, chuwatuuijeerü kasa süpüshuaʼa pünain maʼaka jaʼyain pia sutuma suwarala ranpara».

37 Süchikijee nüküjain Jesús tia, nuunejaanaka sünain ekawaa nutuma wanee fariseo, nuʼunakalaka Jesús nipialuʼumüin chi fariseokai jee nüikalaaka sünain ekawaa. 38 Ponopejeʼe naaʼin chi fariseokai nnojoluin nuʼlojooin najapü* Jesús süpülapünaa ekaa. 39 Nümakalaka chi Señotkai nümüin: «Eekajasaʼa jiakana fariseokana, müshii jia maʼaka saaʼin wanee waasü jee wanee pülaata wuleka atouta, suchuntaapejeʼe jaaʼin wanee kasa naata kakorotshi otta wayuu mojulaashii jia. 40 Mayaawatüinsalii jia saaʼu jukuwaʼipa, chi kakumainka tü weʼirukukat nukumajüinya tü waaʼinkat, ¿aashi müin? 41 Shia anaka aluʼu jükaalinjale wayuu sükajee tü suluʼukat jaaʼin, wuleetka jukuwaʼipa suluʼujee tia. 42 Eʼreena jia müliaa jiakana fariseokana. Aapüshii jia* ‹menta›, ‹ruda› otta waneirua wunuʼu. Motopejeʼe jaaʼin lotuinjatüin jukuwaʼipa maʼaka lotuin nukuwaʼipa Maleiwa otta nnojotsü alin jüpüla wayuu maʼaka alin wayuu nüpüla niakai. Jaapüinjatü tü tachuunajakalü anülia jümüin, nnojotpejeʼe motuinjatüin jaaʼin tü taküjakat jümüin chiiruaa. 43 Eʼreena jia müliaa jiakana fariseokana süka kamalain jümüin aikalawaa palajana suluʼu tü miichi ekirajüleekat nüchiki Maleiwa jee kamalainsü jümüin jüsakünüin metkaaraluʼu. 44 Eʼreena jia müliaa süka müin jia maʼaka saaʼin woowira eekai mmapüin, alatüsü wayuu sooʼopünaa sümaa nnojoluin sütüjaain saaʼu».

45 Nümakalaka nümüin Jesús wanee wayuu atüjakai süpüleerua tü Pütchi Aapünakat nümüin Moisés:* «Ekirajüikalee, müsü waliajatkaiya neʼe saaʼin tü pütchi püküjakat». 46 Nusoutakalaka Jesús nümüin: «Akaʼaya jia wayuu atüjakana süpüleerua tü Pütchi Aapünakat nümüin Moisés, eʼreena jia müliaa, tü juluwataakalü anain müsü aka saaʼin chisooui jawataka maʼin joʼotoko saaʼu wayuu, nnojotpejeʼe müin jipetteekai saaʼin süka süchon jajapü.

47 »Eʼreena jia müliaa süka jukumajüin tü woowira natainjatkat na nünüikimaajanakana Maleiwa. Nayapejeʼe na jutuushinuukana uwomuyuuin nachiki naya wayuukana. 48 Shiimain jütüjaain saaʼu tü naaʼinrakat na jutuushinuukana otta anashiisü shia jümüin. Jamüshiijaʼa na jutuushinuukana naya oʼutiraka naaʼin na nünüikimaajanakana Maleiwa, jiakalaka joo akumajirüin tü woowira napülajanakat. 49 Müsüjeseʼe müin nünüiki chi Maleiwa kekiikai maʼin: ‹Ajüteechi taya tanüikimaajana nanainmüin jee müshiʼiya wayuu aluwataaushi. Eejeena na noʼutakana aaʼin otta eejeena na nachajaakana achiki. 50 Kasalajaneetka namüin na wayuu eekana maaʼulu yaa nasha na nünüikimaajanakana Maleiwa, tü amülatüjütkalia atumawaa soʼujeʼereeya shiʼitaanüin shikii wayuu.* 51 Nünainjee Abel nünainmüinreʼeya Zacarías, chi oʼutunakai aaʼin suluʼu süpaatiase tü aʼwaajüleekat, süʼütpaʼa tü aʼajüleekat kasa nümüin Maleiwa›. Shiimain tü tamakat jümüin kasalajaneerü tia namüin na wayuu eekana maaʼulu yaa.

52 »Eʼreena jia müliaa, jia wayuu atüjakana süpüleerua tü Pütchi Aapünakat nümüin Moisés. Müsü jüsütakai saaʼin shiyaawein tü miichoʼu sünainmüinkat atüjaa nüchiki Maleiwa. Nnojoishii ekeroteein jia chamüin sümaa jütaʼülüin sukuwaʼipa wayuu eekai shikeroteein».

53 Wanaa sümaa nuʼunuin Jesús chejee, apüleeruaana aaʼinchi maʼin nia natuma na karaloʼutamaajanakana jee natuma na fariseokana. Wainma neʼe tü kasa nasakirayaakalü anain nia 54 süpüla süsalainjachin nia natuma saaʼujee wanee pütchi eekai nujuʼitirüin.