Karaloʼuta namüinjatka na chajanakana Éfeso
6 Jia achonniikana, joonoo sümaa nünüiki jüshi jee sümaa sünüiki jii, wanaapünaa sümaa tü nüchekakat chi Señotkai, jama shiain anain tia. 2 «Kojutu pümüin püshi sümaa pii», tia shia tü palajatkat pütchi aluwataanaka anain sümaʼaleeya süküjünüin tü eejeetkat suluʼujee. Shia tü makat mayaa: 3 «Süpüla anainjatüin pukuwaʼipa jee süpüla piʼrüinjachin miyoʼuwaa yaa saaʼu tü mmakat». 4 Jia wayuu kachonniikana, nnojo jaashichijain na jüchonniikana, shia anaka aluʼu jikirajüle naya wanaapünaa sümaa tü nümakat Jehová* jee wanaapünaa sümaa tü nuluwataakalü anain.
5 Jia achepchieekana, oonooinjana jia sümaa nanüiki na jülaamainkana, jaʼitashii wayuuin neʼe naya. Jaaʼinrajatü tia sümaa kojutuin naya jümüin jee jaaʼinrajatü shia süka süpüshuaʼa jaaʼin. Müinjachi niakaijaʼa joonooin amaa anüiki Cristo. 6 Nnojotsü jaaʼinrajatüin tia suʼupalapünaa neʼe wayuu shiiʼiree anainjatüin saaʼin jümaa. Jaaʼinrajatü tia maʼaka wanee nüchepchia Cristo aaʼinrakai süka süpüshuaʼa naaʼin* tü nuluwataakalü anain Maleiwa. 7 Süka achepchieein jia, jaaʼinrajatü wanee kasa süka anaka akuwaʼipa, müinjachi niakaijaʼa aaʼin jiʼyataain amüin Jehová,* nnojotsü sümüinjatüin wayuu, 8 jama jütüjaain saaʼu keeʼirakeerüin nümüin wanee wayuu nutuma Jehová* tü kasa anasü naaʼinrakat, jaʼitashi achepchieein nia jee nnojoirejeʼe achepchieein nia. 9 Jee müshiʼiya jia nalaamainkana, anashii kojutule naya jutuma, nnojo jiimolojuin naya, süka jütüjaain saaʼu niaʼinña neʼe Jülaamain chi Nalaamainkai, chi chakai sirumatuʼu otta nnojotsü koʼuin nukuwaʼipa.
10 Anuu sujutaaya tanüiki jümüin: kasataalejeseʼe katchin jaaʼin nutuma chi Señotkai sükajee tü nüpülainkat. 11 Maa jaʼatakai saaʼin süpüshuaʼa tü kasa naapakat Maleiwa jümüin süpüla jütkaayainjatüin, süpüla eejiraainjanain jia sümaa tü kasa nimeejeekalü aka jia chi Yolujaakai. 12 Atkaashii waya, nnojoliipejeʼe atkaain waya sümaa wayuu, shia watkaaka amaa tü aluwataasükalüirua, tü ekiipüʼükat, tü sülaülajanakat tü wayuu saʼakakat piʼyuushi, shiaʼaya watkaaka amaa tü yolujaairua chakat iipünaa. 13 Müsüjeseʼe choʼujaain müin jaʼatakai saaʼin jünain tü kasa naapakat Maleiwa jümüin süpüla jütkaayainjatüin, shiasaʼa saainjünapa kasa mojusü jümüin,* eejiraweena jia, jüchechereerü jaaʼin, jama jaaʼinrüitpain süpüshuaʼa tü kasa jaaʼinrajatkat.
14 Müshiijeseʼe jüchecherüinjanain jaaʼin sümaa müin jaʼatakai saaʼin jüseʼeruʼupünaa süpüshuaʼa tü kasa eekai shiimain jee müinjatü jaʼatakai saaʼin jaaʼintoʼupünaa tü lotookalü akuwaʼipaa. 15 Müinjana kasapaatsekai jaaʼin jee yapainjana jia süpüla jüküjainjanain tü pütchi anakat maʼin süchiki aleewaa nümaa Maleiwa. 16 Sümaʼaleeya müin jaʼatakai saaʼin jünain tia, kanoulainjana jia nünain Maleiwa. Tia müsü aka saaʼin wanee ounjulaaya* eekai miyoʼuin, meetkalaka jiyokojookai saaʼin süpüshuaʼa tü jatü chuwatüsü nujutakalü jooʼomüin chi Yolujaakai.* 17 Jülüjainjatü jaaʼin juʼtteʼennajanain maʼaka naaʼin wanee wayuu aʼatakai nünain wanee casco suulia seewaʼalaain nikii otta shia jaapaainjatka tü chajaruuta naapakat Maleiwa sükajee tü nüpülainkat, shiyaawase nünüiki Maleiwa tia makat. 18 Sümaʼaleeya jaaʼinrüin süpüshuaʼa tia, ayataʼaya juʼuraajüin jee juuʼulaa nuʼunirai jukuwaʼipa Maleiwa sükajee tü nüpülainkat. Oʼuraajüinjana jia jee achuntajana maʼin jia süpüla juuntunjatüin tia. Ayataʼaya eejüin jaaʼin jee juchunta maʼin waneepia napüleerua napüshuaʼa na anoujashiikana. 19 Juchuntaleeya tapüleerua süpüla yalayalainjatüin taaʼin sünain aküjaa sümüin wayuu tü pütchi anakat maʼin* süchiki tü nütüjaakalü aaʼu Maleiwa. 20 Nia kajünalaka taya Maleiwa sünain aküjaa tü pütchi anakat maʼin, püreesaichikalaka taya sünainjee tia. Juchunta nümüin Maleiwa tapüleerua süpüla tountajachin aküjaa tü pütchi anakat maʼin sümaa meimmoluin taya, müinjatüjaʼaya sukuwaʼipa tatuma.
21 Ichaa tajütüin jümüin Tíquico, aishi maʼin nia tapüla. Waneepiashi nia sünain aʼyatawaa nümüin chi Señotkai, nieechi aküjaka jümüin süpüshuaʼa tü kasa alatakat tamüin jee jamüin maʼin takuwaʼipa. 22 Anuu tü tajütakalü apüla nia jümaʼanamüin: süpülajatü jütüjaain saaʼu jamüin wakuwaʼipa jee süpüla nümüliajüin jaaʼin.
23 Kasataalejeseʼe jimatüin naaʼin na wawalayuukana jee aijiraain naya sümaa kanoulain naya nutuma chi Maleiwakai, chi Washikai jee nutuma chi Señotkai Jesucristo. 24 Kasataalejeseʼe kamaneein maʼin chi Maleiwakai namüin napüshuaʼa na aikana apüla chi Waseñotsekai Jesucristo sümaa nnojoleerüin sajaʼttüin tü naalinkat napüla.