Karaloʼuta namüinjatka na Hebreokana
4 Süka ayatayülüinña tü pütchi apansaajünakat wamüin süchiki weemeraainjanain soʼu tü kaʼi neemeraainjatkalü oʼu Maleiwa, eejeesü waaʼin suulia eejüin joo wanee eekai nnojoluin keraain süpüla tia. 2 Aküjünüsiaʼaya wamüin tü pütchi anakat maʼin* maʼaka süküjünüin namüin naya wayuukana, nnojotpejeʼe anain nakuwaʼipa naya wayuukana sünainjee tü pütchi naapakat, jama nnojoliin paaʼinwain naya namaa na wayuu jaa makana. 3 Eekajasaʼa waya anoujashiikana, eemeraajeena waya soʼu tü kaʼi neemeraakalü oʼu Maleiwa, tü nümakalü achiki mayaa «Anuujeseʼe tanüiki sümaa jashichin taya: ‹Nnojoleena naya eemeraain soʼu tü kaʼi teemeraakalü oʼu›», kettaatüjütpejeʼe nutuma Maleiwa tü kasa naaʼinrakat soʼujeʼereeya shiʼitaanüin shikii wayuu.* 4 Anuu tü nümakat Maleiwa süchiki tü akaratshikat kaʼi suluʼu tü Karaloʼuta Nüchikimaajatkat: «Neemeraakalaka Maleiwa soʼu tü akaratshikat kaʼi süchikijee naaʼinrüin kasa süpüshuaʼa». 5 Jee müshi nia: «Nnojoleena naya eemeraain soʼu tü kaʼi teemeraakalü oʼu».
6 Saaʼujee eeyüliin na nnojoliika eemeraain soʼu tü kaʼi neemeraakalü oʼu Maleiwa otta müshiʼiya na aküjünakana amüin tü pütchi anakat maʼin, nnojoishii eemeraain soʼu tia kaʼikat süka nnojoliin noonooin sümaa nünüiki Maleiwa. 7 Shiasaʼa mapa maʼin nüshajüin David wanee Salmo eere niʼitaain Maleiwa wanee kaʼi süchikuaʼa, «soʼu kaʼikat tüü» müshi nia. Shiaʼaya ashajünaka tia suluʼu karaloʼutakat tüü eere müin sünüiki mayaa: «Jaapaale sümaa tanüiki soʼu kaʼikat tüü, nnojoliinjana jia macheʼein». 8 Nümaalejeʼeya naya Josué suluʼumüin wanee mma eere neemeraainjanain, nnojoishije aashajaain Maleiwa süchiki eeinjatüin wanee kaʼi eemeraanajatka oʼu. 9 Müsüjeseʼe choʼujaain wanee kaʼi neemeraainjanaka oʼu na nüpüshikana Maleiwa. 10 Chi wayuu eemeraakai soʼu tü kaʼi neemeraakalü oʼu Maleiwa, eemeraashia nia suulia tü kasa naainjakat maʼaka neemeraain Maleiwa suulia tü kasa naainjakat.
11 Anakajaʼa waaʼinmaale maʼin weemeraain soʼu tü kaʼi neemeraakalü oʼu Maleiwa suulia eejüin neʼe wanee wayuu eekai nüshatüin nakuwaʼipa na wayuu nnojoliikana oonooin sümaa nünüiki Maleiwa. 12 Müsü katakai soʼu tü nünüikikat Maleiwa jee pülasü shia. Kasaleesia maʼin shia suulia wanee chajaruuta eekai piamain süsa, eesü süpüla sütüjaanüin aaʼu sutuma tü nünüikikat Maleiwa tü suluʼukat naaʼin* wanee wayuu jee tü jaʼyakat saaʼu nukuwaʼipa. Müsü sükatalakai saaʼin tü süülekat niipüse wanee wayuu suulia tü süsholoinkot jee atüjaana aaʼu sutuma tü nünüikikat Maleiwa tü kasa jülüjakat naaʼin wanee wayuu jee tü kasa suchuntaakat naaʼin. 13 Nnojotsü eein wanee kasa nukumala Maleiwa eekai suunjulaain nuulia, niʼrüin kasa süpüshuaʼa jee jaʼyaleesia shia nümüin chi wasoutajachikai amüin saaʼu tü kasa waainjakat.
14 Jesús, chi Nüchonkai Maleiwa, nia eʼitaanaka wamüin nutuma süpüla laülaashinjachin nia napüleerua na sacerdotekana. Chaichipa nia chaa iipünaa, müsüjeseʼe waaʼinmaainjatüin maʼin waküjainjanain pütchi nüchiki sümüin wayuu. 15 Nnojotsü maalin wamüliala nümüin chi laülaashikai napüleerua na sacerdotekana, chi niʼitaakai Maleiwa wamüin. Ooʼulaküna aaʼinchi nia süka süpüshuaʼa tü ooʼulakünakalü aka waaʼin, shiajaʼa neʼe maainjalain nia. 16 Anakajaʼa warütkaale sünainmüin tü einasee eere nuluwataain Maleiwa, niaʼaya kamaneeka maʼin wamüin jee nnojo mmoluin waya sünain achuntaa nümüin, nümülialaajeechika aaʼin waalin jee kamaneejeechika maʼin nia wamüin wanaa sümaa choʼujaain wamüin akaalinjünaa.