Palajatka karaloʼuta Samuel
20 Nüpantajaakalaka David suluʼujee tü mmakat Nayot, tü chakat Ramá. Nüntakalaka nümaʼanamüin Jonatán jee nümakalaka nümüin: «¿Kasakai taainjalaka? ¿Jaratka toʼutaka aaʼin? ¿Kasanainjeejachikai taya nümüin chi püshikai nuʼuteeka taaʼin?». 2 Anuujeseʼe nünüiki Jonatán nümüin David: «Nnojoleechi pia oʼutunuin aaʼin. Matüjainsat nuunjulajaa achiki chi tashikai wanee kasa toulia, nüküjeerü süchiki tia tamüin. Nnojoleechi jamajüin pia nutuma». 3 Anuupejeʼe nünüiki David nümüin: «Nütüjaa aaʼu chi püshikai alin taya püpüla. ‹Anasü nnojorüle nütüjaain saaʼu Jonatán toʼutajatüin naaʼin David suulia mojujain naaʼin nüchiirua›, eeshijaʼa nümüle Saúl suluʼu naaʼin. Choʼujaʼalaa motsomüin süpüla toʼutunajachin aaʼin, shiimain maʼin tü tamakat nuʼupala Jehová, chi Maleiwa matüjainkai outaa otta puʼupala piakai».
4 Anuukalaka nünüiki Jonatán nümüin David: «Taaʼinreerü püpüleerua tü puchuntakat tamüin». 5 Anuujeseʼe nünüiki David nümüin Jonatán: «Aainjüneerü wattaʼa tü miʼiraa shikiirakat piʼyuushoʼu, tekaainjachikalaka nümaa chi aluwataashikai. Anasü shiale paaʼinrüin tüü tapüleerua: puuʼulaa toʼunaiwa tounjulaajeechika anuuipaʼa sünain tü pueulokot, taleʼejeechikalaka wattapiaʼa aliika. 6 Anuu tü püküjainjatkat nümüin chi püshikai nusukajapa taya: ‹Anashi püjütamaatüle taya toumainpaʼa, chaa Belénmüin. Oʼutajana saaʼin mürüt na tapüshikana otta naʼajüinjatü shia nümüin Maleiwa, naaʼinrawalin tia juyawai, müsü nünüiki David tamüin›, pümeechikalaka nümüin. 7 ‹Aaa, anakajaʼa›, nümüle pümüin, nnojoishijaʼamata jamajeechin taya nutuma. Eekajasaʼa naashichijaale piyaawateerü aaʼu naainjeein kasa mojusü tamüin. 8 Püpansaajiraainka pünüiki tamaa nuʼupala Jehová süchiki aijiraainjanain waya waneepia, anashi pikeraajüle tia pümakat. Kaainjaralejeʼeya taya, anashi piale oʼutuin taaʼin, nnojo paapüin tekii nümüin chi püshikai».
9 Anuujeseʼe nünüiki Jonatán nümüin: «Nnojo jülüjain paaʼin tia waʼle. Taapüle süchiki naainjeein chi tashikai pümüin wanee kasa eekai mojuin, taküjamaateerü pümüin». 10 «¿Jaraikaʼa aapireechin taya naashichijaale chi püshikai?», nümakalaka David nümüin Jonatán. 11 Anuujeseʼe nünüiki Jonatán nümüin David: «Anashii woʼunule anuuipaʼamüin sünain tü pueulokot...». Noʼunakalaka piamaleʼeya. 12 Anuujeseʼe nünüiki Jonatán nümüin David: «Tachajaajeerü maʼin sukuwaʼipa wattaʼa jee wattapiaʼa shiale, maʼaka maaʼutpünaa süpüla tatüjaain saaʼu jamüin nünüiki chi tashikai. Tayaawatüle saaʼu nnojoluin naainjeein kasa mojusü pümüin, taapiramaateechi pia. Nütüjaa aaʼu Jehová taaʼinreerüin tia, nütüjaa aaʼu tia chi Namaleiwasekai na israelitakana. 13 Anashi süsalale taya nutuma Jehová tatüjaale saaʼu naaʼinreein kasa mojusü pümüin chi tashikai jee tounjulajüle süchiki tia puulia. Kasataalejeseʼe eein Jehová pümaa maʼaka eepuʼuin nia nümaa chi tashikai. 14 Anashi aire taya waneepia püpüla jee anashi waneepiale pia tamaa maʼaka naaʼinrüin shia Jehová, jaʼitakajeʼe outule taya. 15 Jaʼitakajeʼe najaʼttirüle Jehová na püʼünüükana, anashii aire püpüla na tapüshikana jee anashi waneepiale pia namaa». 16 Nüpansaajakalaka nünüiki Jonatán namaa na nüpüshikana David sükajee tia nümakat. Anuujeseʼe nünüiki: «Nüchekajeerü Jehová süpüshuaʼaleeya tü kasa mojusü aaʼinnakat nümüin David». 17 Nuchuntuinjeseʼe Jonatán nümüin David nikeraajüinjatüin tü nümakat süchiki aleewajiraainjanain* naya waneepia, jama alin maʼin David nüpüla maʼaka aijiraain nia nüpülajiraa.
18 Anuujeseʼe nünüiki Jonatán nümüin: «Piʼyuushoʼujeerü wattaʼa, atüjaaneerü aaʼu nnojolin pia, jama maajuneerüin tü einasee eepuʼule pia. 19 Atüjaanaleejeetpejeʼe wattapiaʼa nnojolin pia. Shiakalaka anain püleʼejüle püchikuaʼa eejachinkale puunjulaain, yaajeechikalaka pia süʼütpaʼa ipakat tüü. 20 Tojuteetkalaka apünüinsü jatü saʼatoʼupünaa tü ipakat, meerü taʼitayaakai saaʼin wanee kasa sükajee. 21 Taluwataajeechi wanee achepchiee süpüla nüsaajüin tü jatükat jee tameechikalaka nümüin: ‹Anashi püsaajüle tü jatükat, nna püʼütpaʼa›, tamüle nümüin sümaa paapüin tanüiki, piyaawateerü aaʼu sükajee tia anain püleʼejüle püchikuaʼa. Shiimain maʼin tanüiki pümüin nuʼupala Jehová, chi Maleiwa matüjainkai outaa. Nnojoleechi pia jamajüin nutuma chi tashikai. 22 Eekajasaʼa ‹ichaa püpüleerua›, tamüle nümüin chi tachepchiakai sümaa paapüin tanüiki, anashi puʼunamaatüle, shia paaʼinrajatka tia naashin Jehová. 23 Kasataalejeseʼe naapajüin Jehová waneepia tü pütchi tapansaajüitpakat pümaa».
24 Nuunjulaakalaka David anuuipaʼa sünain tü pueulokot. Süntapa sükalia piʼyuushoʼu, nüikalaaka sünain ekaa chi aluwataashikai. 25 Nüikalaaka Saúl saaʼu tü niinase yalajatkat süʼütpaʼa süsepü tü miichikat. Nüikalaaka Jonatán wanee saʼata tü meesakat, niʼipoʼujee Saúl. Niakalaka yalajachin joyotuin nüʼütpaʼa Saúl Abner. Nnojoipejeʼe jaralin joyotuin saaʼu tü niinasekat David. 26 Koʼutapejeʼe neʼe Saúl noʼu kaʼikai chia. «Eeinjaʼa tü kasa alatakat nümüin yarüttaka atuma nukuwaʼipa. Nnojotyülia eera naaʼinrüin tü nümakat Maleiwa süpüla wuleinjatüin nukuwaʼipa», nümakalaka Saúl suluʼu naaʼin. 27 Shiasaʼa waneemüin kaʼi, süchikijee piʼyuushoʼu, ayatüsia maajunain tü niinasekat David. Asakinnüshijeseʼe Jonatán nutuma Saúl sünain maa: «¿Jamüshi nnojoikaʼa nüntüin sünain ekaa chi nüchonkai Jesé?». 28 Anuujeseʼe nünüiki Jonatán nümüin Saúl: «Nuchuntuin maʼin David tamüin tajütajachin nia Belénmüin. 29 ‹Anashi puuʼulaale toʼunuin, oʼutajana saaʼin mürüt na tapüshikana jee naʼajüinjatü shia nümüin Maleiwa chaa toumainpaʼamüin. Nuunejirüin taya chi tawalakai, anashiirejeʼeya saaʼin pümüin anashi püjütüle taya teʼraiwa na tawalayuukana›, müshi tamüin David. Müshijeseʼe nnojolin yaain nia sünain ekawaa pümaa aluwataashikalee». 30 Naashichijaakalaka Saúl nooʼomüin Jonatán jee nümakalaka nümüin: «Malasaʼata maʼin pia, nnojotsü kasaʼatain anain apüla tü piikat. ¿Nnojoliaasü tatüjaain aaʼu paaʼinruʼu wanaawain paaʼin nümaa chi nüchonkai Jesé? Eʼreechi japülii pia sutuma tü paaʼinrakat otta eʼreerü japülii putuma tü piikat. 31 Jaʼitakajeʼe piale aluwataain tachikumüin, motsoʼojoopünaajeerü pümaʼa sünain aluwatawaa katüle noʼu chi nüchonkai Jesé. Shiakalaka anain aluʼu püsaajirüle nia nuʼutunaiwa aaʼin».
32 Anuujeseʼe nünüiki Jonatán nümüin chi nüshikai: «¿Jamüshikai nuʼutunajachikaʼa aaʼin? ¿Kasakai naainjalaka?». 33 Nujutakalaka Saúl nooʼomüin Jonatán tü lanzakat süpüla nuʼutajachin naaʼin. Nütüjaakalaka saaʼu Jonatán suluʼujee tia nuʼutuneein aaʼin David nutuma chi nüshikai. 34 Nütamaajaakalaka Jonatán suulia ekawaa, jashichishi maʼin nia. Noʼu chi piamakai kaʼi nnojotsü kasain niküin Jonatán, piʼyuushoʼujatü tia makat. Mojusü maʼin naaʼin Jonatán naalin David, jama naapülijünüin nutuma chi nüshikai.
35 Nuʼunakalaka wattaʼa maalü Jonatán anuuipaʼamüin sünain tü pueulokot maʼaka nüküjatüjülin shia nümüin David. Nümaakalaka wanee jimaʼai aʼyataakai nümüin. 36 Anuujeseʼe nünüiki Jonatán nümüin chi jimaʼaikai: «Puwataa, püsaaja maa tü jatü tojutuinjatkat». Nuwataaka chi jimaʼaikai sünain asaajaa shia, nujutaka Jonatán wanee jatü wattamüin nüchikumüin chi jimaʼaikai. 37 Anuukalaka nünüiki Jonatán nümüin chi jimaʼaikai nüsaajapa tü jatü nujutakat: «Ichaa jatükat püpüleerua». 38 «Puuntawaata, puwataa», nümakalaka Jonatán nümüin chi jimaʼaikai. Naapaakalaka tü jatükat chi wayuu aʼyataakai nümüin, niʼikajaakalaka shia nümüin Jonatán. 39 Nnojotpejeʼe nütüjaain saaʼu chi jimaʼaikai kasain nüküjeein achiki Jonatán sükajee tia. Niaʼala neʼe Jonatán otta David atüjaaka saaʼu tia. 40 Naapakalaka Jonatán tü nütkaayakat nümüin chi jimaʼai aʼyataakai nümüin jee nümakalaka nümüin: «Anashi puʼunule pueulopaʼamüin, pülüʼüja tü tatkaayakat».
41 Nuʼunapa chi jimaʼai aʼyataakai nümüin Jonatán, nujuʼitaakalaka David eejachire nuunjulaain, pejesü eejachire nuunjulaain. Nüsapainkaka David nümülatuʼu Jonatán, naaʼinrüin tia apünüintua. Nutuʼlakalaka Jonatán nuwalapaʼa David, aʼyalajüshii maʼin naya. Niapejeʼe David aʼyalajüin maʼin. 42 Anuujeseʼe nünüiki Jonatán nümüin David: «Kasataalejeseʼe anain pukuwaʼipa, wapansaajüitpa wanüiki saaʼu nünülia Jehová. ‹Kasataalejeseʼe naapajüin Jehová waneepia tü pütchi tapansaajakat pümaa otta tü pütchi wapansaajakat napüleerua na wapüshikana›, mataashii wamüshinkakai».
Nuʼunakalaka David nümaʼanajee Jonatán jee nüleʼejaakalaka Jonatán pueulopaʼamüin.