Palajatka karaloʼuta Samuel

21 Nuʼunakalaka mapa David suluʼumüin tü mmakat Nob eejachire Ahimélec, chi sacerdotekai. Kutkuttaka neʼe Ahimélec niʼraiwaʼaya David jee nümakalaka nümüin: «¿Kasa alataka pümüin makaʼa pümüiwaʼain? ¿Jalashii na wayuu pümaapuʼukana?». 2 Anuukalaka nünüiki David nümüin Ahimélec: «Nuluwataain taya chi laülaashikai sünain aaʼinraa wanee kasa. ‹Nnojotsü jaralüinjatüin atüjaain saaʼu tü taluwataakalü anain pia jee tü paaʼinrajatkat›, müshi nia tamüin. Taküjainjeseʼe namüin na tasurulaatsekana jalainjachin tantiraain namaa. 3 Eere jaʼraisü pan pümaʼana, anasü püsülajüle shia tamüin jee shiale püsülajeein tamüin wanee kasa eekai pümaʼanain». 4 Anuukalaka nünüiki Ahimélec nümüin David: «Shiaʼala neʼe eeka tamaʼana tü pan akataluushikat nümüin Maleiwa. Taapeerü pümüin tia pankat nnojoliire nainkaain paala sümaa jieyuu na pusurulaatsekana». 5 Anuukalaka nünüiki David nümüin Ahimélec: «Nnojoiwaishii waya ainkaain sümaa jieyuu woʼunapa sünain atkawaa, shieematataaka wainkaweein sümaa jieyuu shiʼitaanüle aʼyatawaakat tüü wapüleerua». 6 Naapakalaka Ahimélec nümüin David tü pan akataluushikat nümüin Maleiwa, shiaʼala neʼe eejatka nümaʼana tia pankat. Nnojotsü chajatüin tia pankat suluʼu tü miichi aʼwaajüleekat Jehová. Antinnüsü wanee shiiʼiraka soʼu tü kaʼi suʼwanajaanüinjatkalü oʼu.

7 Soʼu kaʼikat tia chajachi wanee wayuu suluʼu tü miichi eere nuʼwaajünüin Jehová, Doeg nünülia, nülüin nia Edóm, nüchepchia nia Saúl jee naʼlaülajana nia na arüleejüliikana nümüin Saúl.

8 Anuukalaka nünüiki David nümüin Ahimélec: «¿Nnojotsü eein pümaʼana wanee lanza jee shiale wanee chajaruuta? Tapütüin tü chajaruutakat jee müsia tü kasa tatkaayakat sutuma taaʼinramaatüinjatüin tü nuluwataakalü anain waya chi aluwataashikai». 9 Anuukalaka nünüiki Ahimélec nümüin David: «Nnaʼaya tamaʼana tü chajaruuta eepuʼukat nümaʼana Goliat, chi filisteo puʼutakai aaʼin chaa eekai tü nasapüshii chajatkat Elá. Koʼoyoosü shia süka wanee kuluulu jee shiyaamaʼasü shia tü kuluulu kanüliakat efod, shiaʼala neʼe eeka tamaʼana. Pülüʼüjeerejeʼeya shia, paapaapan». «Icheʼeran, talüʼüjeerün, eeka joo wanee chajaruuta makalü aka saaʼin tia», nümakalaka David.

10 Nuʼunakalaka David suluʼujee tia mmakat soʼuleʼeya kaʼikat tia, ayatüshia nia ounjulaain nuulia Saúl. Nüntakalaka mapa David nümaʼanamüin Akís, chi aluwataakai saaʼu tü mmakat Gat. 11 Anuukalaka nanüiki na aʼyataakana nümüin Akís: «¿Nnojoishisa niain David chii, chi aluwataakai naaʼu na israelitakana?

12 Nüsakireʼerakalaka naaʼin David sünain tü naküjakat naya wayuukana, mmotkalaka maʼin nia neema Akís, jamajaleere nia nutuma chi aluwataakai saaʼu tü mmakat Gat. 13 Mamainnayaakalaka David noʼupala na wayuukana, nejeerajüin soʼu tü pueulokot jee süparalaka tü nuwaakat saʼakapünaa tü nüliimakat. 14 Anuukalaka nünüiki Akís namüin na wayuu aʼyataakana nümüin: «Mamainnashisa wayuukai chii. ¿Kasajachikai nia tamüin? 15 ¿Jamüsü jüntirakaʼa tamüin wayuu eekai mamainnain? Watta saalii wayuu mamainnasü eeka yaʼayaa. Nnojoishisa tekerotirüinjachin wayuukai chii tepialuʼumüin».