Karaloʼuta namüinjatka na chajanakana Colosas
1 Karaloʼutakat tüü tashajala tayakai Pablo. Anii tamaa chi wawalakai Timoteo. Aneekuushi taya nutuma Maleiwa süpüla taluwataaushinjachin nutuma Cristo Jesús. 2 Karaloʼutakat tüü namüinjatü na aneekuushikana jee na wawalayuu waneepiakana sünain paaʼinwaa nümaa Cristo, na chakana Colosas:
Kasataalejeseʼe kamaneein jümüin chi Washikai Maleiwa jee jimatüin jaaʼin nutuma.
3 Woʼuraajawaipa jüpüleerua waapawalin tü analuʼutkat waneepia nümüin Maleiwa, chi Nüshikai chi Waseñotsekai Jesucristo, 4 jama waapüin süchiki kanoulain jia nünain Cristo Jesús jee alin jüpüla napüshuaʼa na anoujashiikana. 5 Müsü jukuwaʼipa mayaa süka jaʼatapajüin tü kasa aapünajatkat jümüin chaa sirumatuʼu. Jaapa achikit tia kasa jaʼatapajakat süka süküjünüin jümüin tü pütchi shiimainkat, shiajaʼa tü pütchi anakat maʼin,* 6 tü anuu jooluʼu eʼikajünüin jümüin. Maʼaka eein kasa anasü sutuma tü pütchi anakat maʼin otta sütüjaanüin aaʼu sainküinpünaa mmakat, müsiaʼaya neʼe jukuwaʼipa sutuma soʼujeʼereeya tü kaʼi jaapakalü oʼu jee jütüjaakalü oʼu tü shiimainkat süchiki nümanee Maleiwa. 7 Shiaʼaya jütüjaka tia nünainjee Epafras, aishi nia wapüla jee achepchiee nia wanaa wamaa. Aʼyataashi nia waneepia wooʼopünaa nümüin Cristo. 8 Nüküjainña wamüin jükaalinjünüin nutuma Maleiwa sükajee tü nüpülainkat süpüla aijiraainjanain jia.
9 Müshiijeseʼe nnojoliin wooʼulaain suulia woʼuraajüin jüpüleerua soʼujeʼereeya tü kaʼi waapakalü oʼu tia jee achuntushii waya süpüla jütüjaainjatüin maʼin saaʼu tü kasa nuchuntakat Maleiwa sümaa kekiinjanain jia jee jiyaawatüinjatüin saaʼu wanee kasa nutuma chi Maleiwakai sükajee tü nüpülainkat. 10 Jaaʼinrajatü tia süpüla laülaainjatüin jaaʼin wanaapünaa sümaa tü nüchekakat Jehová.* Talateechikalaka nia jümaa sünainjee süpüshuaʼa tü kasa jaaʼinrakat. Jaʼyainjatü jaaʼu jaaʼinrüin süpüshuaʼa kasa anasü otta sükooʼomüinraain tü jütüjaakalü aaʼu nüchiki Maleiwa. 11 Wachuntuinña nümüin Maleiwa süpüla naapüinjatüin jümüin tü nüpülainkat, katchinjeetkalaka jaaʼin süpüla jüchecherüin jaaʼin soʼunnaa tü alatakat jümüin sümaa nnojoliin jüshapataain aaʼin jee sümaa talatüin jaaʼin. 12 Jee jaapa analuʼutkat nümüin chi Washikai, chi ekirajakai jia süpüla saapünajatüin jümüin tü aapünakat namüin na aneekuushikana, na makana warattuuikai saaʼin luusa naaʼu.
13 Müshii niyuʼlakai waaʼin saʼakajee piʼyuushi jee müsü nuʼunirakai saaʼin wakuwaʼipa soʼunnaa nuluwataain chi Nüchon aishikai maʼin nüpüla. 14 Taashishii waya nünainjee jee alatinnüsü waainjala woulia. 15 Müsü nukuwaʼipa maʼaka nukuwaʼipa chi Maleiwa meʼrujusaikai, nia akumajünaka nutuma Maleiwa palajana süpülapünaa kasa süpüshuaʼa. 16 Nükajee niakai akumajünüsü kasa süpüshuaʼa chaa sirumatuʼu jee yaa mmapaʼa, tü kasa eekai shiʼnnüin jee tü kasa eekai meʼrujuin, jaʼitashii nayain na ekiipüʼükana, na aluwataashiikana jee na sülaülakana mma. Akumajünüsü kasa süpüshuaʼa nükajee jee nia laülaaka saaʼu tia. 17 Eetüjüiya nia süpülapünaa kasa süpüshuaʼa jee nia eeka akajee kasa süpüshuaʼa. 18 Jamüshijaʼa wanee wayuu eesü nikii nünain, akaʼaya neʼe na anoujashiikana nia Cristo nekiika. Nia palajachika, nia asoʼiraaka aaʼin palajana naʼakajee na outushiikana süpüla niainjachin palajanain sünain kasa süpüshuaʼa. 19 Anashiisü nümüin chi Maleiwakai jaʼyainjatüin süpüshuaʼa tü nukuwaʼipakat sünain nukuwaʼipa chi Nüchonkai. 20 Nükajee Cristo, anajiraaitpa nutuma Maleiwa kasa süpüshuaʼa nümaa, tü kasa chakat sirumatuʼu jee tü kasa yaakat mmapaʼa. Müitpa sukuwaʼipa tia sükajee tü nüsha amülakat soʼu nükachennüin sünain wanee wunuʼu* süpüla outaa.
21 Wattapuʼushii jia nuulia Maleiwa jee nüʼünüüpuʼu jia süka shiain jülüjapuʼuin jaaʼin kasa eekai mojuin. 22 Anajiraainnapapejeʼe jia nümaa sükajee niʼiruku chi aapajiraakai nikii süpüla outaa, wuleitpakalaka jukuwaʼipa, nnojotsü kasain mojuin jünain jee nnojotsü mojuin sünüiki wayuu jüchiki nuʼupala. 23 Juunteerü tia ayatüleʼeya jia sünain anoujaa jee ichere maʼin tü junoulakat sümaa nnojoliin juuʼulaain suulia tü pütchi anakat maʼin, tü jaapakalü achiki paala jee tü jiʼreetkalü akajee kasa anasü, tü anuu aküjünüin sainküinpünaa tü mmakat sümüin wayuu süpüshuaʼa. Tayakai Pablo, aʼyataashi taya sünain eʼikajaa tia pütchi anakat maʼin.
24 Talatüsü taaʼin maaʼulu yaa sükajee müliain taya jaaʼujee jee müliashi taya maʼaka müliain Cristo. Choʼujaayütpejeʼe tapüleerua teʼrüinjatüin sooʼomüin tamüliala napüleerua na anoujashiikana nünain Cristo. 25 Aʼyataashi taya shiiʼiree aneein na anoujashiikana nünain Maleiwa. Niʼitaain taya süpüla taʼyataain sünain tia, müshijeseʼe teʼikajüin maʼin tü nünüikikat Maleiwa, 26 tü nütüjaakalü aaʼu Maleiwa, tü nnojotkalü aapünüin achiki paala,* nnojotka sütüjaain aaʼu wayuu sümaiwa. Natüjaaitpa aaʼu tia na anoujashiikana. 27 Naya nüneekaka Maleiwa saʼakajee wayuu süpüla natüjaainjatüin saaʼu tü kasa anasü maʼin nütüjaakalü aaʼu Maleiwa. Tia nütüjaakalü aaʼu Maleiwa shia nüchiki Cristo, paaʼinwashi nia jümaa. Shia jaʼatapajaka kojutuinjanain jia wanaa nümaa. 28 Nia waküjaka achiki pütchi, waapirüin wayuu süpüshuaʼa jee wekirajüin wayuu süpüshuaʼa sümaa kekiin waya süpüla wantirajatüin nünainmüin Maleiwa wayuu eekai suushikajaain süchiirua nukuwaʼipa Cristo jee eekai katsüin maʼin sunoula. 29 Aʼyataashi maʼin taya shiiʼiree tountajatüin tia. Nükaalinjain maʼin taya chi Maleiwakai sükajee tü nüpülainkat, katchinsü maʼin taaʼu tia nüpülainkat.