Chiiruaajatka karaloʼuta Samuel
12 Nüjütünaka Natán nümaʼanamüin David nutuma Jehová, anuujeseʼe nünüiki Natán nümüin David nüntapa nümaʼanamüin: «Eejana piamashii wayuu suluʼu wanee mma, washirü wanee otta maʼletsesai chi wane. 2 Watta saalii anneerü jee paaʼa nümaʼana chi wayuu washitkai, 3 shiapejeʼe neʼe eejatüin nümaʼana chi wayuu maʼletsesaikai wanee anneetchon niyaʼlainkat paala. Naaʼinmajüin shia, kottusü shia nümaa namaʼaleeya na nüchooinkana sümaʼainruʼu sajaʼapülaain. Ekiʼraawaisü shia nümaa mayaainjeʼe palitchoin tü eküülü eejatka nümaʼana, asüsü shia suluʼu tü niitainkat otta atunkusü shia nutuʼu, müsü shia maʼaka wanee nüchon nümüin. 4 Shiasaʼa soʼu wanee kaʼi nüntakalaka wanee wayuu nümaʼanamüin chi wayuu washitkai, nnojotpejeʼe nüüjaweein niyaaluʼu tü anneerü jee tü paaʼa eejatkat nümaʼana. Shiakalaka nüüjaain niyaaluʼu chi niʼyoukai naʼanneetsechon chi wayuu maʼletsesaikai».
5 Naashichijaakalaka David naapaiwaʼaya tia jee nümakalaka nümüin Natán: «Shiimain maʼin tanüiki pümüin nuʼupala Jehová, chi Maleiwa matüjainkai outaa, anashi nuʼutunule aaʼin chi wayuu makai aainjala. 6 Aapajachi nia pienchisü anneerü saaʼu tü anneetchonkat, saaʼujee müin naainjala jee saaʼujee nnojoluin sümülialaain naaʼin».
7 Anuujeseʼe nünüiki Natán nümüin David: «Pia chi wayuu makai aainjala. Anuu nünüiki Jehová pümüin, chi Namaleiwasekai na israelitakana: ‹¿Aashin taneeküin pia süpüla puluwataainjachin naaʼu na israelitakana otta takaalinjain pia nuulia Saúl? 8 Taapajatiaa pümüin süpüshuaʼa nuwashirüin chi pülaamainkai, taapajanayaa pümüin na jieyuu nuʼwayuusekana. Taneeküin pia süpüla puluwataainjachin naaʼu na israelitakana otta naaʼu na nüikeyuukana Judá, wattajatiaa saalii tü kasa taaʼinrajatkat püpüleerua. 9 Mojutusat pümüin tü kasa nuluwataakalü anain Jehová müsüjeseʼe mojuin maʼin tü paaʼinrakat. Puʼuta aaʼinchi süka chajaruuta Urías, chi hititakai, paapaakalaka tü nuʼwayuusekat jee kasaatkalaka pia sümaa nuʼutunapa aaʼin Urías natuma na ammonitakana. 10 Watteerü saalii kasachiki alataka pümüin süka püsütüin nuʼwayuuse Urías otta kasaatshi pia sümaa. Mojutusai taya pümüin sükajee tia kasa paaʼinrakat›. 11 Anuu nünüiki Jehová: ‹Watteerü saalii tü kasachiki piʼrakat natuma na wayuu pipialujunakana. Piʼrajeena neʼe akua tasütirapa puulia na jieyuu puʼwayuusekana jee taapapa naya nümüin wanee wayuu otta ainkaajeechi nia namaa suʼupala wayuu. 12 Puunjula achikirü tü kasa paainjakat, eekajasaʼa tayakai taaʼinreerü tia noʼupala napüshuaʼa na israelitakana, natüjaajeetkalaka saaʼu›».
13 Anuujeseʼe nünüiki David nümüin Natán: «Kaainjalashi taya nuulia Jehová». Anuujeseʼe nünüiki Natán nümüin: «Nülatirüin Jehová sooʼopünaa naaʼin tü paainjalakat, nnojoleechikalaka pia outuin sünainjee tia. 14 Nieechipejeʼe outuin chi püchon eweetüichipakai, jama mojutuin maʼin pümüin Jehová».
15 Nuʼunakalaka Natán nipialuʼumüin.
Ayuuijaaka nutuma Jehová chi nüchonkai David sümüin tü nuʼwayuusekat Urías. 16 Oʼuraajüshi maʼin David nümüin Maleiwa nüpüleerua chi jintüikai. Naamajaka maʼin, nüsürülaaka otta juʼletüshi nia mmoluʼu saʼwai. 17 Narütkaaka nünainmüin David na nüchepchia laülaayuuinnakana, natameʼereein nia mmoluʼujee niyoutapejeʼe süchiki tia otta niyoutuin süchiki ekaa namaa. 18 Outaka chi jintüikai soʼu tü akaratshikat kaʼi, mmotpejeʼe na nüchepchiakana David seema aküjaa süchiki tia nümüin. «Nnojotsü naapajeein wanüiki chi laülaashikai kataiwaʼaya noʼu chi jintüikai, ¿jamataalainjatkaʼa joo wanüiki nümüin süpüla waküjainjatüin nümüin outuichipain nia? Eeshi süpüla jamajiraain neʼe nia», namajiraaka.
19 Niyaawatakalaka saaʼu David outuin chi jintüikai sutuma niʼrüin nejejiraakuʼu namüin na nüchepchiakana. Anuujeseʼe nünüiki namüin: «¿Outuichipa chi jintüikai?». «Aa, outushin», namakalaka nümüin. 20 Nütamaaka David mmoluʼujee, noʼoojoko, nushuletka seita nünain, nuʼwanajaaka nüsheʼin jee nuʼunakalaka suluʼumüin tü miichi eere nuʼwaajünüin Jehová süpüla nuʼwaajüinjachin nia. Nüleʼejaka nipialuʼumüin, nuchuntaka süntinnajatüin niküin, nikakalaka. 21 Anuujeseʼe nanüiki na nüchepchiakana nümüin: «Naatakatche maʼin pukuwaʼipa, aamajüshi pia jee aʼyalajüshi maʼin pia kataiwaʼaya noʼu chi jintüikai, eekajasaʼa süka outuichipain nia atamaashi pia mmoluʼujee otta eküichipa pia». 22 Anuujeseʼe nünüiki David namüin: «Aamajüshi taya otta aʼyalajüshi maʼin taya kataiwaʼaya noʼu chi jintüikai. ‹Eeshijaʼa nümülialaajeechire Jehová taalin jee kateetkalaka noʼu chi jintüikai nutuma›, müshi taya suluʼu taaʼin. 23 Nnojoluitpa kasain saamüin tamüin aamajaa, jama outuichipain nia, nnojoleechi eitaain nüchikuaʼa tatuma sünainjee taaʼinrüin tia. Tayeechi neʼe oʼunaka nünainmüin, nnojoleechipejeʼe nia aleʼejüin tanainmüin».
24 Nümülialaka David saaʼin Bat-Seba, nüinkaaka sümaa. Jemeyutkalaka shia mapa nümaa wanee joʼuu Salomónkai anülia natuma, aishi maʼin nia nüpüla Jehová. 25 Aluwataanüshi Natán nutuma Maleiwa süpüla shiʼitaanajatüin tü anülieekat Jedidías* nünain chi jintüikai süka alin maʼin nia nüpüla Jehová.
26 Eejiraakalaka maʼin Joab namaa na wayuu chajanakana suluʼu tü mmakat Rabá, tü noumainkat na ammonitakana. Nushutaleeka saaʼu eejatüle nipia chi aluwataashikai. 27 Nuluwataakalaka Joab wayuu nünüikimaajana nümaʼanamüin David, anuujeseʼe tü nüküjirakat nümüin: «Ashutushi taya naaʼu na wayuu kepiakana suluʼu tü pueulokot Rabá, ashutaleeshia taya shikiinainjee tü wüin eekat suluʼu tia pueulokot.* 28 Anashii puutkajeʼerüle napüshi na surulaatkana, pushuteechikalaka saaʼu tü pueulokot suulia joo ‹nia Joab ashutaka saaʼu tü pueulokot›, sümajüin wayuu tachiki».
29 Nuutkajeʼerakalaka David napüshuaʼa na surulaatkana. Nuʼunakalaka suluʼumüin tü mmakat Rabá, nushutaka naaʼu na wayuu chajanakana suluʼu. 30 Naakatüinjeseʼe David tü corona eejatkat sünain nikii Malcam, apünüin shikii pienchimüin kilo* saawain tia coronakat, aainjuushi shia süka ooro otta süka ipa anakat maʼin anoʼu, saʼatünaka sünain nikii David. Watta saalii tü kasa nüsütakat David noulia na wayuu sulujunakana tia pueulokot. 31 Nütaʼülakalaka na wayuu sulujunakana tia pueulokot. Niʼyateʼeraka naya süka tü oʼyonoojiakat ipa, niʼyateʼerüin naya süka kachueera kasakat maʼin jee süka polu. Niʼyateʼerüinña naya sünain aainjaa ladrillo. Shia niʼyateʼeraka anain tia napüshuaʼa na wayuu sulujunakana noumain na ammonitakana. Nüleʼejaka mapa David Jerusalénmüin namaʼaleeya napüshuaʼa na nusurulaatsekana.