Naʼyataain na Aluwataaushikana

15 Nantapaataka waneinnua wayuu sejena Judeajee jee nekirajaka na anoujashiikana sünain maa: «Nnojoleena jia oʼtteʼennüin, müleka nnojorüle jüchoteʼerüin süta jukorolo maʼaka suluwataanüin suluʼu tü Pütchi Aapünakat nümüin Moisés». 2 Nnojotpejeʼe anashiin nümüin Pablo otta nümüin Bernabé tü namakat naya wayuukana. Shiasaʼa süchikijee naʼülüjiraain namaa, sukumajünaka sukuwaʼipa süpüla nüjütünajachin Pablo, Bernabé otta müshiʼiya waneinnua anoujashii chaa namaʼanamüin na aluwataaushikana jee namaʼanamüin na laülaashii chajanakana Jerusalén süpüla saashajaanajatüin süchiki tia.

3 Neʼikalaanakalaka suʼttiajee tü wopukot natuma na anoujashiikana. Noʼunakalaka yalejee suluʼupünaa tü mmakat Fenicia otta müsia Samaria. Talatakalaka maʼin naaʼin na anoujashiikana natuma naküjapa namüin nekeroluin sünain anoujaa wayuu nnojoliikana judíoin. 4 Nantapa Jerusalénmüin, kamaneekalaka na anoujashiikana namüin namaʼaleeya na aluwataaushikana jee na laülaashiikana. Nüküjakalaka Pablo otta müshia Bernabé süchiki tü kasa naaʼinrakat Maleiwa nakajee. 5 Nayasaʼa waneinnua anoujashii oʼunapuʼukana süchiirua tü nekirajakalü anain na fariseokana, natamaakalaka saaʼujee neinase sünain maa: «Choʼujaasü süchotoonojatüin süta nakorolo naya wayuukana sümaa naluwataanajanain sünain oonowaa sümaa tü Pütchi Aapünakat nümüin Moisés».

6 Noutkajaakalaka na aluwataaushikana otta müshiʼiya na laülaashiikana süpüla naashajaainjanain süchiki tia. 7 Süchikijee niʼrüin kamaʼainnain na anoujashiikana sünain yootirawaa, nütamaakalaka Pedro jee nümakalaka: «Tawalayuwaa, jütüjaa aaʼu sünain nüneekatüjülin taya Maleiwa jaʼakajee süpüla taküjainjachin tü pütchi anakat maʼin namüin na wayuu nnojoliikana judíoin süpüla nanoujainjanain. 8 Sutuma niain Maleiwa atüjaain saaʼu tü suluʼukat saaʼin wayuu, naapüin tü nüpülainkat namüin wayuu nnojoliikana judíoin süpüla sütüjaanajatüin aaʼu anain nümüin nanoujainjanain. Naapüin shia Maleiwa namüin maʼaka saapünüin wamüin. 9 Nnojotsü kasain naatain aluʼu nakuwaʼipa woulia nutuma, wuleka naaʼin nutuma sünainjee nanoujain. 10 ¿Jamakaʼa juchuntaka namüin na nikirajüinkana Jesús wanee kasa kapüleeka maʼin, isaka nachiki na watuushinuukana jee isaka wachiki wayakana? 11 Eekajasaʼa wayakana judíokana, wanouja anainrü woʼtteʼenneenain sükajee miyoʼuin maʼin nümanee chi Señotkai Jesús wamüin. Akaʼaya neʼe na anoujashii nnojoliikana judíoin, nanouja anainrü tia».

12 Naapaiwaʼaya tia na wayuukana, koʼutaka naya, naapajakalaka nünüiki Bernabé nümaa Pablo. Naküjaka namüin süpüshuaʼa tü kasa pülasü naainjakat nutuma Maleiwa suʼupala wayuu. 13 Kettaapa nanüiki, nusoutakalaka Santiago sünain maa: «Tawalayuwaa, jaapaja tanüiki. 14 Nüküjaitpa Symeón wamüin anashiin nümüin Maleiwa nanoujain na nnojoliikana judíoin. Eekalaka süpüla nüneeküin wayuu naʼakajee na nnojoliikana judíoin süpüla nünüliamaain naya. 15 Jee wanaawasü tia sümaa tü nashajakat na Nünüikimaajanakana Maleiwa, tü makat mayaa: 16 ‹Aleʼejeechi taya süchikijee tia, takumajeerü süchikuaʼa tü nipiakat David, tü ojuttakat paala. Takumajeerü jee tanouteerü shia 17 süpüla nüchajaanajachin maʼin achiki Jehová* natuma na wayuu apütaakana namaa na wayuu sainküinjeejanakana mma, na wayuu eʼraajünakana suluʼu tanüliamaain naya. Shia nüküjaka Jehová tia, chi aainjakai tü kasa 18 atüjaanatüjütkalia aaʼu sümaiwa paala›. 19 Suluʼujee tia, shia anaka saaʼin tamüin nnojoliire wekeʼejüin naaʼin na wayuu nnojoliikana judíoin, na anaa jooluʼu anoujain nünain Maleiwa. 20 Shiainjaʼa anain washajüle namüin nnojoliinjanain sünainpünaain naya wanee kasa eekai aapuushin sümüin shiyaakua maleiwayaasü, nnojoliinjanain naʼluwajiraain nakuwaʼipa,* nnojoliinjanain neküin mürüt eekai süülüüshin jee nayoutajatüin isha. 21 Eetüjüliʼiya sümaiwa paala suluʼu wanee pueulo wayuu aashajeʼerawaikana tü nüshajakat Moisés. Emetuluwaisü nanüiki sünain aashajeʼeraa tia karaloʼutakat sükalioʼu eemerawaa suluʼu tü ekirajüleekat nüchiki Maleiwa».

22 Nayasaʼa na aluwataaushikana jee müshiʼiya na laülaashiikana namaʼaleeya na anoujashiikana, naneeküin waneinnua wayuu süpüla najütajanain naya Antioquíamüin nümaa Pablo jee nümaa Bernabé. Niakalaka najütüin Judas, chi Barsabás münakai jee müshia Silas, wayuu nemiyoʼuse naya anoujashiikana. 23 Anuu tü nashajakat jee tü naluwataakat namaa:

«Anuu nanüiki na aluwataaushikana jee na laülaashiikana namaʼaleeya na juwalayuukana, jümüinjatü jiakana chakana Antioquía, Siria jee müsia Cilicia, jia nnojoliikana judíoin wasaküin jia. 24 Waapa achikirü eein waneinnua wayuu waʼaka nnojoliikana wajünalain, oʼunushii naya jümaʼanamüin jee nekeʼeja aaʼinchii jia süka tü namakat jümüin süpüla wainmajüinjatüin jaaʼin. 25 Müshiijeseʼe paaʼinwain waya sünain aneekaa waneinnua wayuu jee wajütüin naya chaa jümaʼanamüin namaa na wayuu aikana wapüla, niajaʼa Bernabé nümaa Pablo. 26 Nayouta achikirü katüin noʼu süpüleerua nünüliamaain naya chi Señotkai Jesucristo. 27 Müshijeseʼe wajütüin Judas nümaa Silas süpüla jaapüinjatüinña natuma tü pütchi wajütirakat jümüin. 28 Sükajee tü nüpülainkat Maleiwa wayaawata aaʼu nnojoluinjatüin woʼotuin jaaʼu wanee kasa eekai kapüleein maʼin, shiajaʼa neʼe wachuntaka jümüin jaaʼinrajatüin tü makat mayaa: 29 Jiyoutajatü wanee kasa eekai saapuushin sümüin shiyaakua maleiwayaasü, jiyoutajatü isha, jiyoutajatü jiküin mürüt eekai süülüüshin jee jiyoutajatü juʼluwajiraain jukuwaʼipa. Jiyoutulejeʼe süpüshuaʼa tia, aneerü jukuwaʼipa. Kasataalejeseʼe anain jia».

30 Napütaakalaka naya wayuukana jee noʼunakalaka Antioquíamüin, noutkajeʼeraka na anoujashiikana chamüin sümaa naapüin tü karaloʼuta aluwataaushikat namüin. 31 Saashajeʼennapa tia karaloʼutakat, talatüsü maʼin naaʼin süka sütütülaain naaʼin sutuma tü pütchi aluwataanakat namüin. 32 Saaʼujee nünüikimaajachin Maleiwa Judas nümaa Silas, natütüleʼerüin naaʼin na anoujashiikana sükajee naküjain kojuyasü pütchi namüin otta nakatsüinrüin naaʼin. 33 Eekalaka nakalia chayaa. Shiasaʼa noʼunajanapa nachikuaʼa namaʼanamüin na wayuu kajünalakana naya, napütaakalaka na nawalayuukana napüla. 34 * 35 Eekajasaʼa Pablo nümaa Bernabé, makatüshii naya chaa Antioquía namaa kojuyashii nawalayuu, ekirajüshii jee aküjashii naya tü pütchi anakat maʼin süchiki nünüiki Jehová.*

36 Maʼaka jeʼra kaʼi süchikijee tia, nümakalaka Pablo nümüin Bernabé: «Anashii waleʼejamaatüle namaʼanamüin na wawalayuu chakana kepiain suluʼu tü pueulo waküjakalü aluʼu tü nünüikikat Jehová* süpüla watüjaain saaʼu anale naya». 37 Niakalaka nümaweein Bernabé Juan, chi Marcos münakai. 38 Mojushiipejeʼe nümüin Pablo namaainjachin nia süka nükatalaain noulia soʼu chajanain naya Panfilia jee nnojoishi nia oʼunuin namaa sünain aküjaa pütchi. 39 Naʼülüjiraaka maʼin suluʼujee tia, nakatajiraayaa namaka. Anuwaluʼukalaka Bernabé sünain oʼunaa Chipremüin nümaa Marcos. 40 Niakalaka aneekünüin Silas nutuma Pablo. Nachuntakalaka na anoujashiikana nüpüleerua süpüla anainjatüin nakuwaʼipa nutuma Jehová* jee süchikijee tia nuʼunakalaka. 41 Nülatapünaaka Siriapünaa jee Ciliciapünaa sünain akatsüinraa nanoula na anoujashiikana.