Tü nüshajalakat Mateo
12 Soʼu tü sükaliakalü eemerawaa, alatapünaashi Jesús süpaʼapünaa wanee suuʼulia trigo, outakalaka jamü na nikirajüinkana. Nasürüttapünaaka shiʼichi tia trigokat sümaa neküin shia. 2 Namaka na fariseokana nümüin Jesús neʼraiwaʼaya tia: «¿Piʼrayaainchejeʼe nala pikirajüinkana? Shia naaʼinraka neʼe wanee kasa apülajünaka soʼu sükalia eemerawaa». 3 Nusoutaka Jesús namüin: «¿Nnojotsükai jaashajeʼerüin süchiki tü naaʼinrakat David namaa na nümaajanakana soʼu outuin naya jamü? 4 Mataashi nikerotokoi suluʼumüin nipia Maleiwa namaʼaleeya na nümaajanakana, nekaka tü pan aapünajatkat nümüin Maleiwa. Nnojotpejeʼe müinjatüin sukuwaʼipa naashin Maleiwa, nayainjana neʼe ekaka tia na sacerdotekana. 5 ¿Nnojotsüsaʼa jaashajeʼerüin suluʼu tü Pütchi Aapünakat nümüin Moisés, süchiki tü naaʼinrakat na sacerdotekana suluʼu tü aʼwaajüleekat? Mataasü mojutukai namüin sükalia eemerawaa, nnojoliipejeʼe naya süsalain tia. 6 Aniipejeʼe wanee wayuu jaʼaka alanaʼaleekai suulia tü aʼwaajüleekat Maleiwa. 7 Nnojotsüjeʼe jiʼitaain naaʼu nala wayuukana kaainjalain naya jiyaawatülejeʼe saaʼu tü pütchi makat mayaa: ‹Shia tachekaka jümülialaain saalin wayuu, nnojotsü juʼutajatüin neʼe saaʼin mürüt tamüin›. 8 Eekajasaʼa chi Süchonkai Wayuu nia Laülaaka saaʼu tü sükaliakalü eemerawaa».
9 Süchikijee nuʼunuin Jesús chejee, nikerotoko suluʼumüin tü ekirajüleekat nüchiki Maleiwa. 10 Eejachika yala wanee wayuu joso ajapüchi, nayasaʼa na fariseokana nasakirayaaka Jesús süpüla nooʼulaküin naaʼin. Namayaaka nümüin: «¿Anasüchejeʼeya naawaleʼennüle wanee wayuu eekai ayuulin soʼu tü sükaliakalü eemerawaa?». 11 Nusoutaka namüin: «Sujutuule wanee jaʼanneetse suluʼu ishi soʼu sükalia eemerawaa, ¿aashin jiyuʼleerüin shia suluʼujee tü ishikat? 12 Kojutuleeshia wanee wayuu suulia wanee anneerü. Anakalaka saainjünüle wanee kasa anasü nüpüleerua wanee wayuu soʼu sükalia eemerawaa». 13 Nümaka Jesús nümüin chi wayuu joso ajapüchikai: «Piyurula pütüna». Anamaataka najapü chi wayuukai niyurutpa nütüna maʼaka anain tü wane najapükat. 14 Nayasaʼa na fariseokana, nojuʼinuwaakalaka süpüla naashajaajiraainjanain nikiira Jesús shiiʼiree noʼutajachin naaʼin. 15 Nuʼunaka Jesús chejee naapapa süchiki tia, suʼunaka watta saalii wayuu nüchiirua. Anakaʼa nutuma süpüshuaʼa tü wayuu eekai ayuulin. 16 Nüchiaapejeʼe naya suulia naküjaʼalüin nüchiki sümüin wayuu. 17 Shikeraajakalaka suluʼujee tia tü nümakat paala Isaías chi nünüikimaajachikai Maleiwa, tü makat mayaa:
18 «Anii chi aʼyataashikai tamüin, chi taneekajalakai, chi aishikai tapüla. Talatüshi maʼin taya nümaa. Teʼitaajeerü tapülain naaʼu, nüpansaajeerü sümüin wayuu maʼleekalia tü lotookalü akuwaʼipaa. 19 Nnojoleechi nia aaʼayajiraain sümaa wayuu jee nnojoleechi woottuin. Nnojoleerü jaralüin aapüin nikiisa suluʼupünaa kaaye. 20 Nnojoleerü nüsüʼüjeʼerüin wanee türiia eekai süshataain. Nnojoleerü niyokojeʼerüin wanee mechuuria eekai eiwaʼalüin achuwajaanaa. Waneʼereeya nunoutapa sukuwaʼipa wanee kasa eekai mojuin. 21 Saʼatapeerü wayuu maʼleekalia anainjatüin sukuwaʼipa nutuma».*
22 Nüntinnakaʼa nümüin Jesús wanee wayuu moʼupaʼasai sümaa manülin nia jee kaleʼeruʼushi yolujaa. Kanüika chia wayuukai sümaa koʼuin nia nutuma. 23 Ponusü maʼin naaʼin na wayuukana tü naaʼinrakat jee namajiraaka: «¿Nnojoishiche niain Nüchon David chii?». 24 Anuujeseʼe nanüiki na fariseokana naapaiwaʼaya tia: «Eekajasaʼa wayuukai chii, ojuʼititshi yolujaa süleʼeruʼujee wayuu nükajee Belcebú,* chi sülaülashikai yolujaa». 25 Nütüjaapejeʼe saaʼu Jesús tü jülüjakat naaʼin naya wayuukana, nümakalaka namüin: «Mojujiraale wanee wayuuirua suluʼu wanee mma jee suluʼu wanee pueulo ajaʼlajaajiraweerü shia jee shiale mojujiraain wanee wayuu sümaa süpüshi ajaʼlajaajiraweerü. 26 Akaataajaʼa niale neʼe Satanás ojuʼitirüin tü yolujaa nümaajatkalüirua, nnojoleechi nia paaʼinwain sümaa. Nuuʼulaweechika suulia aluwatawaa suluʼujee tia. 27 Tojuʼitirülejeʼe yolujaa süleʼeruʼujee wayuu nükajee Belcebú, ¿jaraikaʼa nojuʼitirüin akajee yolujaa na jüchooinkana? Nayeena na jüchooinkana aküjaka alawaain neʼe tü jümakat. 28 Eekajasaʼa tojuʼitirüle yolujaa süleʼeruʼujee wayuu sükajee tü nüpülainkat Maleiwa, nnojotsüjaʼamata jiyaawatüin saaʼu shikeraajüitpain maaʼulu yaa süchiki niainjachin aluwataain Maleiwa saaʼu mmakat. 29 Jamüshijaʼa wanee wayuu eekai nüsaijeein nipia wanee wayuu katchinshi, nijinnajüinjachi palajana chi wayuu katchinshikai ¿aashi müin? Nüsaija nümeetka tü nipiakat süchikijee tia. 30 Chi nnojoikai wanaawain aaʼin tamaa, peʼipolooshi tamaa otta chi nnojoikai ekirajüin wayuu tamaa, nükaaʼinjüin wayuu toulia.
31 »Anuu tanüiki jümüin, alatinneerü saainjala wanee wayuu suulia jaʼitasü kasain saainjalain otta jaʼitasü mojuin sünüiki. Nnojoleetpejeʼe nülatirüin Maleiwa saainjala wanee wayuu müleka mojule sünüiki süchiki tü nüpülainkat. 32 Jamüsüjaʼa mojule nünüiki wanee wayuu nüchiki chi Süchonkai Wayuu, alatinneerü naainjala nuulia, eekajasaʼa chi mojukai anüiki süchiki nüpülain Maleiwa, nnojoleerü alatinnüin naainjala nuulia, nnojorüleejaʼa, jaʼitakajeʼe maaʼulu yaa jee müsia mapeena.*
33 »Analejeʼe wanee wunuʼu anasü tü süchonkat, mojulejeʼe wanee wunuʼu ittüsü tü süchonkat. Atüjaana aaʼulu anain wanee wunuʼu sutumajee tü süchonkat. 34 Jiakana süchooinkana wüi outasiroʼu, ¿jalapünaainjana jia aashajaain süchiki kasa anasü wayuule mojulaashii jia? Tü naashajaakalü achiki wanee wayuu shia tü suluʼukat naaʼin. 35 Wanee wayuu eekai anamiain, aashajaashi süchiki kasa anasü süka anain tü suluʼukat naaʼin. Wanee wayuu eekai mojulaain, aashajaashi süchiki kasa mojusü süka mojuin tü suluʼukat naaʼin. 36 Anuu tanüiki jümüin, soʼu tü Kaʼi Kasalajaneetkalü oʼu Saainjala Wayuu nutuma Maleiwa, asouteerü wayuu saaʼu wanee pütchi eekai mojuluʼuluin sutuma. 37 Ayaawatüneechi aaʼu wayuuin loto akuwaʼipachi pia piweetirüle pütchi analuʼut. Süsaleechipejeʼe pia piweetirüle pütchi mojuluʼut».
38 Narütkaakalaka waneinnua karaloʼutamaajana nünainmüin Jesús namaʼaleeya waneinnua fariseo, namaka nümüin: «Ekirajüikalee, anashi paaʼinrüle wanee kasa pülasü woʼupala». 39 Nusoutakalaka Jesús namüin: «Wayuu mojulaashii jia jee nnojoishii jia oonooin nümüin Maleiwa, shia neʼe jiʼreeka amüin kasa pülasü, nnojoleetpejeʼe jiʼrüin tia. Shia neʼe jiʼreetka tü kasa pülasü aainjünakat nüpüleerua Jonás chi nünüikimaajachikai Maleiwa. 40 Maʼaka süleʼeruʼuin Jonás wanee jime apünüin kaʼi otta apünüin ai, meerüjaʼa neʼe nukuwaʼipa chi Süchonkai Wayuu, apünüinjeechi kaʼi otta apünüinjeechi ai mmapüin. 41 Kasalajanapeena saainjala wayuu nutuma Maleiwa, asoʼiraajeerü jaaʼin wanaa namaa na wayuu chajanakana Nínive, naküjeetka wayuuin mojulaashii jia. Ayaawajaashii naya suulia naainjala nüküjapa pütchi Jonás namüin, aniipejeʼe wanee wayuu jaʼaka alanaʼaleekai nuulia Jonás. 42 Kasalajanapeena saainjala wayuu nutuma Maleiwa, asoʼiraajeerü saaʼin wanaa jümaa tü aluwataasü uuchijeʼewatkat, süküjeetka wayuuin mojulaashii jia. Antüsü shia wattajee süpüla saapajüinjatüin nünüiki Salomón. Aniipejeʼe wanee wayuu jaʼaka alanaʼaleekai nuulia Salomón.
43 »Sujuʼitapa wanee yolujaa nüleʼeruʼujee wanee wayuu, alatüsü isashiipaʼapünaa sünain achajawaa eeinjatüle seemeraain, nnojotpejeʼe süntüin anain jalainjatüin shia. 44 Müsüjeseʼe sümüin: ‹Anainjaʼa taleʼejüle tachikuaʼa nüleʼeruʼumüin chi wayuu kaleʼerujachikai taya paala›. Niasaʼa chi wayuukai müshi aka saaʼin wanee miichi maluʼusat eekai wulein otta anain shiyolojo. 45 Oʼuna müsüjaʼa tü yolujaakat, süsaapünaaka akaratshisü yolujaa mojulaʼaleesia maʼin suulia, shikerotoko nüleʼeruʼumüin chi wayuukai, yalairüleeka shia. Keemaleejeeria tü alatakat nümüin chia wayuukai suulia tü kasa alatakat nümüin paala. Meerüjaʼa neʼe tü alatakat jümüin jia wayuu mojulaajüshiikana».
46 Sümaʼainruʼu yalajachin nia yootuin namaa na wayuukana, süntakalaka tü niikat namaa na nuwalayuukana. Yalajana naya anooipaʼa shiiʼireejana aashajawaa nümaa. 47 Nümakalaka wanee wayuu nümüin: «Isaa tü piikat namaa na puwalayuukana anooipaʼa, aashajaweeshii pümaa». 48 Nümaka Jesús nümüin chi aapitshikai nia: «¿Pütüjaa aaʼulu jaralüin tü teikat namaa na tawalayuukana?». 49 Niiʼiyatakalaka na nikirajüinkana sümaa nümüin nümüin chi wayuukai: «Nnaaʼasa tei namaa tawalayuu. 50 Na aaʼinrakana tü nuluwataakalü anain chi Tashi iipünaajachikai müshii aka naaʼin tawalayuu, tashunuu jee tei tamüin».