Palajatka karaloʼuta Samuel
16 Anuukalaka nünüiki mapa Jehová nümüin Samuel: «¿Jamüsü mojukuʼu sümakaʼa paaʼin naalinjee Saúl? Tayoutuin nia süpüla niainjachin aluwataain naaʼu na israelitakana. Anashi piʼyotule seita suluʼu türa suʼuwakat mürüt, puʼuneechika nümaʼanamüin wanee wayuu kanüliashi Jesé, chejeʼewai nia Belén. Taneeküin wanee nüchon süpüla nuluwataainjachin». 2 Anuujeseʼe nünüiki Samuel nümüin Maleiwa: «¿Jamataalainjatü takuwaʼipa sünain oʼunaa? Naapüle Saúl tachiki nuʼuteechi aaʼin taya». Anuujeseʼe nünüiki Jehová nümüin: «Anashi pümaale wanee paaʼachon, ‹antüshi taya yaamüin süpüla toʼutajatüin saaʼin paaʼakat tüü jee taʼajüinjatüin nümüin Jehová›, pümeechikalaka. 3 Puunejaajeechika Jesé, taküjeechikalaka pümüin jaralinjachin püneeküin».
4 Naaʼinrakalaka Samuel tü nümakat Jehová nümüin. Oʼunushijeseʼe nia Belénmüin, shiasaʼa nüntapa chamüin neimmolojooyoo namaka napüshuaʼa na laülaashiikana suluʼu tia mmakat. Kutkuttaʼatshii neʼe naya jee namakalaka nümüin: «Jaman, ¿kasa paapayaaka achiki?». 5 Anuujeseʼe nünüiki Samuel namüin: «Yüüü, nnojotsü kasain eein achiki. Antüshi taya yaamüin süpüla toʼutajatüin saaʼin jee taʼajüinjatüin wanee kasa nümüin Jehová. Anashii yapajüle jia,* juʼunaiwa tamaa sünainmüin tia». Yapajapa* nutuma Samuel Jesé namaʼaleeya na nüchooinkana, nuutkajeʼerakalaka naya süpüla eein naya sünain tü kasa aaʼinnajatkat nümüin Maleiwa. 6 Nüntapa chamüin Jesé namaʼaleeya na nüchooinkana, «aluʼu niainjaʼa wayuukai chii nüneeküin Jehová», nümakalaka Samuel suluʼu naaʼin niʼraiwaʼaya Eliab. 7 Anuujeseʼe nünüiki Jehová nümüin Samuel: «Nnojo kapülain paaʼin chira wayuukai sutumajee neʼe anain maʼin niyolojo jee sutumajee miyoʼusenuuin nia, nnojoishi niain taneeküinjachin süpüla aluwatawaa. Naata maʼin tü kasa niʼrakat Maleiwa suulia tü shiʼrakat wayuu. Jamüshijaʼa wanee wayuu shia neʼe jülüjaka naaʼin tü kasa shiʼrakat wayuu, eekajasaʼa Jehová shia jülüjaka naaʼin tü suluʼukat saaʼin wayuu». 8 Nuunejinnakalaka Abinadab nutuma Jesé, nümaakalaka nia nümaʼanamüin Samuel, anuupejeʼe nünüiki Samuel nümüin: «Nnojoishi aneekünüin chii nutuma Jehová süpüla aluwatawaa». 9 Antinnüshijeseʼe Samá nümaʼanamüin Samuel nutuma Jesé, anuupejeʼe nünüiki Samuel nümüin: «Nnojoishi aneekünüin chii nutuma Jehová süpüla aluwatawaa». 10 Akaratshishii na nüchonnii Jesé nüntirakana nümaʼanamüin Samuel. Anuupejeʼe nünüiki Samuel nümüin Jesé: «Nnojoishii nüneeküin naya Jehová süpüla aluwatawaa».
11 «¿Nayainnaʼaya neʼe napüshuaʼaleʼeya na püchonniikana naainnua?», nümakalaka Samuel nümüin Jesé. Anuujeseʼe nünüiki Jesé nümüin: «Nnojoishii nayain napüshuaʼa, nia nnojoika yaain chi emülieekai naʼaka, chashi arüleejüin anneerü». Anuujeseʼe nünüiki Samuel nümüin: «Puunejirapan, waneʼereesaʼaya waikaajaain sünain ekawaa nüntaleepaʼaya». 12 Asaajinnüshijeseʼe David nutuma Jesé jee nüntinnakalaka nümüin. David nia wanee jintüi wulekai maʼin ata, anacheeinsü maʼin noʼu jee anashi aaʼinchi nia. «Aniinjaʼa chi taneekajachikai süpüla aluwatawaa», nümakalaka Jehová nümüin Samuel. 13 Naapaainjeseʼe Samuel tü suʼuwa mürüt kalujutkat seita, niʼyotokoloko shia saaʼu nikii David noʼupala na nuwalayuukana. Antüsü nüpülain Jehová naaʼu David soʼujeʼereeya kaʼikat tia, nuʼunakalaka mapa Samuel suluʼumüin tü mmakat Ramá.
14 Nüsünneʼeraka Jehová tü nüpülainkat nuulia Saúl. Nüntirawaika Jehová nikiiruʼumüin Saúl wanee kasa mmotka eema nia. 15 Anuujeseʼe nanüiki na nüchepchiakana Saúl nümüin: «Nia Maleiwa eʼitaaka wanee kasa pikiiruʼu süpüla mmolojochin pia seema. 16 Anashii puluwataale na püchepchiakana süpüla nachajaainjachin wanee wayuu atüjakai maʼin atalejaa tü kanüliakat arpa. Shiasaʼa nüntirapa Maleiwa pikiiruʼumüin tü kasa mmotkalü eema pia, nütalejeerü chia wayuukai tü kanüliakat arpa, jutateetkalaka paaʼin paapapa tü shiʼirakat». 17 «Anashi jüchajaale tamüin wanee wayuu atüjakai maʼin atalejaa tü kanüliakat arpa», nümakalaka Saúl namüin na nüchepchiakana.
18 Anuujeseʼe nünüiki wanee nüchepchia Saúl nümüin: «Eeshisa wanee nüchon Jesé chi chejeʼewaikai Belén, atüjashi maʼin atalejaa arpa. Wayuu katchinshi nia, yalayala aaʼinchi, atüjashi aashajawaa, anashi aaʼinchi otta eeshi Jehová nümaa». 19 Nuluwataakalaka Saúl wayuu nünüikimaajana nümaʼanamüin Jesé sünain maa: «Anashi puluwataale tamüin David, chi püchonkai, chi arüleejüikai». 20 Noʼotookoloko Jesé naaʼu wanee püliikü, pan, süta mürüt kaluʼukat wiino otta wanee kaaʼulachon. Najapüipasü tia David nutuma nümüin Saúl. 21 Niʼyataakalaka David nümüin Saúl. Aishi maʼin David nüpüla Saúl otta nia David alüʼüjawaika tü nütkaayakat Saúl. 22 Nuluwataakalaka Saúl nünüiki nümüin Jesé sünain maa: «Talatüshi maʼin taya nümaa David, anashi puuʼulaale niʼyataain tamüin». 23 Nütalejawalin David tü kanüliakat arpa, nüntirawaipa Maleiwa nikiiruʼumüin Saúl tü kasa mmotkalü eema nia. Jutatüsü naaʼin Saúl naapapa shiʼira tü arpakat jee yüüʼülaa müsü nuulia tia.