Palajatka karaloʼuta nüshajalaka Juan
3 Aitaʼaleeshiijaʼa maʼin waya nüpüla chi Washikai Maleiwa, weʼraajünakalaka suluʼu nüchonniin waya. Shiimainjaʼaya müin sukuwaʼipa tia. Müshiijeseʼe nnojoliin neʼraajüin waya na manoujainsaliikana, jama nnojolin neʼraajüin chi Maleiwakai. 2 Tawalayuu aishiikana tapüla, nüchonniʼiya waya Maleiwa, nnojoyütpejeʼe watüjaain saaʼu jameerüin maʼin wakuwaʼipa mapeena. Watüjaa aaʼu meerüin wakuwaʼipa maʼaka nukuwaʼipa niiʼiyalaapeena, jama weʼraleejeechin nia. 3 Wulesü nukuwaʼipa, müsüjeseʼe wüleerüin nukuwaʼipa chi wayuu anoujakai nünain.
4 Chi wayuu aaʼinrakai kasa mojusü, nnojoishi oonooin sümaa tü pütchi aapünakat nümüin Moisés, kaainjalashi wanee wayuu nnojoire noonooin sümaa tia pütchikat. 5 Jütüjaa aaʼu niiʼiyalaainkain süpüla sülaʼajaanajatüin waainjala woulia otta nnojoishi kaainjalain nia. 6 Chi wayuu paaʼinwakai nümaa nnojoishi aaʼinrüin kasa mojusü, niasaʼa chi wayuu aaʼinrakai kasa mojusü nnojoishi niʼrüitchin nia jee nnojoishi niʼraajüin nia. 7 Tachonniichein, jalia shimeejaʼalayaai jia wayuu, chi wayuu lotokoi atuma sukuwaʼipa wanee kasa, lotusü nukuwaʼipa maʼaka naaʼin chi lotokoi akuwaʼipa. 8 Chi wayuu aaʼinrakai kasa mojusü, nia nüshataka akuwaʼipa chi Yolujaakai, jama kakaliaichin* chi Yolujaakai sünain aaʼinraa kasa mojusü. Eeʼiyalaashi chi Nüchonkai Maleiwa süpüla nujuʼichijeʼerüinjatüin tü kasa naainjakat chi Yolujaakai.
9 Chi wayuu eekai nüchooin Maleiwa nnojoishi aaʼinrüin kasa eekai mojuin, jama eein tü nüpülainkat Maleiwa naaʼu, nnojoishi kaainjalain nia, jama nüchooin nia Maleiwa. 10 Anuu tü ayaawatünakalü akajee na nüchonniikana Maleiwa jee na nüchonniikana chi Yolujaakai: nnojoishi nüchooin Maleiwa chi wayuu nnojoikai aaʼinrüin tü kasa eekai lotuin akuwaʼipa, akaʼaya chi wayuu maalinkai apüla nuwala, nnojoishi nüchooin Maleiwa. 11 Jülüja jaaʼin tü pütchi jaapakat nüchiki Maleiwa, tü makat mayaa: aijiraainjana waya wapüshuaʼa. 12 Majayaai wakuwaʼipa maʼaka naaʼin Caín, chi ashatakai nukuwaʼipa chi Yolujaakai,* nuʼutakalaka naaʼin chi nimüliakai. Nuʼuta aaʼinchi nia süka mojulaain Caín, eekajaʼa chi nimüliakai lotusü sukuwaʼipa tü kasa naaʼinrakat.
13 Tawalayuwaa, nnojo ponuin jaaʼin naʼürülale jia na manoujainsaliikana. 14 Watüjaa aaʼulu müin outapuʼukai waaʼin, katüitpapejeʼe woʼu maaʼulu süka alin wapüla na wawalayuukana. Chi wayuu nnojoikai alin apüla wayuu müshijaʼaya outakai naaʼin. 15 Chi wayuu eekai üttüin naaʼin nünain nuwala, oʼunui saaʼin wayuu jee jütüjaa aaʼulu nnojoluin süpüla katüin noʼu wanee wayuu süpüla kaʼikat süpüshuaʼa nuʼunuire saaʼin wayuu. 16 Watüjaaitpa aaʼu jamüinjatüin saalin wayuu wapüla, jama naapajiraain nikii* Jesucristo waaʼu, müshiijeseʼe waapajiraainjanain wekii naaʼu na wawalayuukana. 17 Kaʼletsere wanee wayuu sümaa niʼrataalain müliain wanee nuwala jee nnojoire nümülialaain naalin, ¿jamakuwaʼipalinjachi süpüla alin Maleiwa nüpüla? 18 Tachonniichein, nnojotsü waküjainjatüin neʼe alin wayuu wapüla, jaʼyainjatü tia waaʼu sükajee tü kasa waaʼinrakat jee shiimainjatü shia.
19 Sütüjaaneetkalaka aaʼu woʼunirüin wakuwaʼipa wanaapünaa sümaa tü pütchi shiimainkat* jee nnojoleerü wainmajüin waaʼin nuʼupala chi Maleiwakai. 20 Müle waaʼin sutuma waneirua kasa, soto waaʼin nülanaʼaleeinña chi Maleiwakai suulia tü waaʼinkat jee nütüjaa aaʼu kasa süpüshuaʼa. 21 Tawalayuu aishiikana tapüla, nnojorüle mojuin waaʼin sutuma waneirua kasa, eeshii süpüla waashajaain nümaa chi Maleiwakai sümaa nnojoluin wainmajüin waaʼin. 22 Naapüin wamüin süpüshuaʼa tü kasa wachuntakat nümüin, jama woonooin sümaa tü nuluwataakalü anain waya jee waaʼinrüin tü kasa talatakalü atuma naaʼin. 23 Nuluwataain waya sünain kanoulainjanain waya nünain Jesucristo,* chi waneeshikai Nüchon Maleiwa jee aijiraainjanain waya, jama shiain nuluwataain anain waya tia. 24 Chi oonookai sümaa nünüiki Maleiwa paaʼinwashi nia nümaa jee paaʼinwakalaka chi Maleiwakai nümaa chia wayuukai jee saaʼujee naapüin wamüin tü nüpülainkat, paaʼinwashii waya nümaa.