Génesis
3 Saʼakajee süpüshuaʼa tü wüchii wünaʼapüjatü nukumajakat Jehová, shia yalayatka maʼin tü wüikat. Anuujeseʼe sünüiki sümüin tü wayuukot: «¿Aashin nnojoluinjatüin jiküin naashin Maleiwa süchon süpüshuaʼaleeya tü wunuʼulia yaakat suluʼu tü yüüjakat?». 2 Susoutaka tü wayuukot shiʼipajee sünain maa: «Eesü süpüla weküin süchon tü wunuʼulia yaakat suluʼu tü yüüjakat. 3 Anuupejeʼe tü nümakat Maleiwa wamüin süchiki tü wunuʼu chakat pasanain sünain tü yüüjakat: ‹Nnojotsü jiküinjatüin süchon, nnojotsü jipettajatüin shia, outeena jia jaaʼinrüle tia›, müsüsa nünüiki wamüin». 4 Anuupejeʼe sünüiki tü wüikat sümüin: «Nnojoleena outuin jia. 5 Nütüjaa aaʼulu Maleiwa jiyaawateenain saaʼu jukuwaʼipa otta meenain jia maʼaka naaʼin soʼu tü kaʼi jikakalü oʼu süchon tia wunuʼukot, jütüjaajeerü aaʼu anale jee mojule wanee kasa».
6 Shiyaawataka tü wayuukolü anain süchon tü wunuʼukot süpüla ekünaa jee shikeetaa amüinrü shia, anasü maʼin shiyolojo süchon tia wunuʼukot. Saapaainjeseʼe süchon tü wunuʼukot jee shikakalaka shia. Nüntapa chi suʼwayuusekai sümaʼanamüin, saapakalaka süchon tü wunuʼukot nümüin jee nikakalaka shia. 7 Makaʼa sujutalaakai saaʼin tü noʼukot süchikijee tia, nayaawatüinjeseʼe saaʼu masheʼin naya. Nachajaaka süpana tü wunuʼu kanüliakat higuera süpüla nasheʼinñaainjatüin shia.
8 Warai nümakaʼa Jehová suluʼupünaa tü yüüjakat motsopa kaʼika.* Nuunjulaaka chi wayuukai sümaa tü nuʼwayuusekat nuulia Jehová naapapa nünüiki. Ounjulaashii naya saʼakapünaa tü wunuʼulia eejatkat suluʼu tü yüüjakat. 9 «¿Jalashi pia?», kojuyatuaka nümüin Jehová nümüin chi wayuukai. 10 Nusoutaka mapa chi wayuukai nümüin sünain maa: «Taapüinñaajeʼe pünüiki suluʼu tü yüüjakat, mmotpejeʼe neʼe taya jee tounjulaaka süka masheʼin taya». 11 «¿Jara aküjaka pümüin masheʼin pia? ¿Shiataaka neʼe piküin achon tü wunuʼu tapülajakat puulia?», nümakalaka Maleiwa nümüin. 12 Anuujeseʼe nünüiki chi wayuukai niʼipajee: «Shia ekiraka taya süchon tü wunuʼukot tü wayuu paapakat tamüin süpüla taʼwayuusein». 13 Anuukalaka nünüiki Jehová sümüin tü wayuukot: «¿Jamüsü makaʼa paainjala?». «Shia kasitka taya tü wüikat, shimeejüin taya süpüla teküinjatüin süchon tü wunuʼukot», sümakalaka nümüin.
14 Anuukalaka nünüiki Jehová sümüin tü wüikat: «Eʼreerü pia kasa mojusü sünainjee tü paainjalakat, pieerü mojuleeka maʼin akuwaʼipa saʼakajee süpüshuaʼaleeya tü kasa katakalü oʼu otta saʼakajee süpüshuaʼaleeya tü wüchii wünaʼapüjatkat, lemüteerü otta ekeerü neʼe pia mma waneepia. 15 Mojujiraajeerü pia tatuma sümaa tü jietkat, mojujiraajeena na püchooinkana* nümaa chi süchonkai.* Nuchuwerajaajeerü ekii pia otta püchoteerü shiineʼe nuuʼui».
16 Anuujeseʼe nünüiki Maleiwa sümüin tü wayuukot: «Kooʼomüinreejeeria maʼin tatuma saalin joʼu pümüin, mülieerü maʼin paaʼin jemeyutpa pia. Suchuntaajeerü maʼin paaʼin eeinjachin chi puʼwayuusekai pümaa otta nieechi laülaaka paaʼu».
17 Anuujeseʼe nünüiki Maleiwa nümüin Adán: «Sutumajee wanaawain pia sümaa tü puʼwayuusekat jee piküin süchon tü wunuʼu tapülajakat puulia, tü ‹Pikajayaai süchon› tamakat pümüin, mojuitpa maʼin tü mmakat suluʼujee tia, pümüliainjuteerü waneepia süpüla piküinjachin süchon püpünajüin. 18 Shieerü neʼe joutka süpaʼa tü mmakat jamücheʼe otta yosuʼulia. Shieerü pikaka süchon pünajüt jee süchon wunuʼulia. 19 Pirajuteerü tü pikeetkalü aaʼu mmaleepaʼaya pia püchikuaʼa, atüküüshi pia sünainjee pootshi, mmainjachikalakajaʼaya pia püchikuaʼa».
20 Shiasaʼa süchikijee tia, «Eva», nümakalaka Adán sümüin tü nuʼwayuusekat, jama shiainjatüin soushin wayuu maʼleekalia. 21 Miyoʼu maʼin nüsheʼin Adán sümaa Eva nutuma Jehová chi Maleiwakai, naainjain tia nasheʼinkat süka süta mürüt. 22 Anuuka nünüiki Jehová: «Müitpa nukuwaʼipa chi wayuukai maʼaka saaʼin wakuwaʼipa, niyaawatüitpa aaʼu anale jee mojule wanee kasa, shiasaʼa joo suulia nikajüin süchon tü wunuʼu katakalü atuma soʼu wayuu jee suulia katüin noʼu waneepia...». 23 Ajünajaanüshijeseʼe chi wayuukai nutuma Jehová suluʼujee tü yüüja kanüliakalü Edén süpüla nüpünajüinjachin süpaʼa tü mma akumajuushikalü anainjee nia. 24 Nüjünajaanakalaka chi wayuukai nutuma Maleiwa, niʼitaaka wüinpüjee sünain tü yüüja kanüliakalü Edén waneeinna querubín jee niʼitaainña wanee chajaruuta chuwatakat maʼin, leeyataka waneepia. Shia sukuwaʼipaka tia nutuma süpüla süsürünnajatüin tü wopu chaʼwatkat sünainmüin tü wunuʼu katakalü atuma soʼu wayuu.