Karaloʼuta namüinjatka na chajanakana Galacia
4 Tamüshii paala jia, jintüire chi eʼipünaanajachikai apüla wanee kasa, nnojotsü eein wanee kasa naataka aluʼu nukuwaʼipa nuulia wanee achepchiee, jaʼitashi niain sülaülajanain kasa süpüshuaʼa, 2 jama niʼrajünüin aaʼu natuma na kajapuluʼushiikana aʼyatawaa otta na sülaülajanashiikana miichi. Ayateeria müin nukuwaʼipa waneʼereeya sujutaain tia nuulia soʼu tü kaʼi nüneekatüjütkalia chi nüshikai. 3 Akaataajaʼa neʼe wakuwaʼipa, jamüshiijaʼa tepichiiwaʼaya waya, süchepchiashii waya tü kasa jülüjakat saaʼin wayuu otta tü sukuwaʼipapalakat. 4 Shiasaʼa kettaapa tü kaʼi aneekünakat paala, nüjütüin Maleiwa chi Nüchonkai, chi joʼuushikai sünainjee wanee wayuu otta naaʼinrüin tü sümakat tü Pütchi Aapünakat nümüin Moisés 5 süpüla müin niyaʼlajakai naaʼin na wayuu aaʼinrakana tü sümakat tü Pütchi Aapünakat nümüin Moisés jee taashinjanain naya nutuma. Nüchooinnaka waya Maleiwa suluʼujee tia.
6 Süka nüchooinnapain waya Maleiwa, naapüin wamüin tü nüpülain eekat naaʼu chi Nüchonkai. Shiasaʼa sutuma tia nüpülainkat Maleiwa, eeinnapa süpüla wamüin nümüin: «¡Abba, Tashikalee!». 7 Nnojolitchipaka nüchepchiain pia Maleiwa, nüchooinchipa pia. Nüchonlejeʼeya pia Maleiwa, naapeechi amüin pia kasa anasü.
8 Nnojoliiwaʼaya jütüjaain saaʼu nüchiki Maleiwa, nachepchiapuʼushii jia na nnojoliikana maleiwain. 9 Nnojolitchipa neʼe jiʼraajüin chi Maleiwakai, jiainnapa eʼraajünaka nutuma. ¿Jamakaʼa shiaka jaaʼinreein süchikuaʼa tü saaʼinrakat wayuu, tü nnojotkat kasain anain apüla? ¿Süchepchieeshii jia süchikuaʼa? 10 Aainjashii jia miʼiraa shikiira kaʼi, shikiira kashi, shikiira sükalia wanee kasa jee shikiira juya. 11 Wainmajüsü taaʼin jaaʼu, jama amülaleere neʼe taʼyataain jüpüleerua.
12 Tawalayuwaa, tachuntuin jümüin müinjatüin jukuwaʼipa maʼaka takuwaʼipa tayakai, jama mapuʼuin takuwaʼipa maʼaka jukuwaʼipa jiakana, nnojoishi müliain taya jutuma. 13 Jütüjaa aaʼu ayuulin taya soʼu tü palajatkat takua jümaʼanamüin, taküjaichikalaka jümüin tü pütchi anakat maʼin.* 14 Mayaainjeʼe wainmain jiʼyataain tamaa saaʼujee ayuulin taya, nnojoishi mojutuin taya jümüin jee nnojoishi jülerajüin taya. Kamaneeshii jia tamüin, müshi taya jümüin maʼaka naaʼin wanee aapiee nümaʼanajeejachi Maleiwa, maʼaka naaʼin Cristo Jesús. 15 ¿Jamüshii nnojoliinnapakaʼa talatüin jia? Shiimain maʼin tatüjaain saaʼu jiyuʼluinjeʼe tü joʼukot tapüleerua shiiʼiree jaapüin shia tamüin choʼujaalejeʼeya tia. 16 ¿Jüʼünüüitchipakalaka joo taya saaʼujee taküjain tü shiimainkat jümüin? 17 Naya wayuukana nemeejeein neʼe jia, nnojotsü anain tü nachekakat jüpüleerua. Nakataleein neʼe jia toulia shiiʼiree juushikajaweein süchiirua nakuwaʼipa. 18 Nnojotsü mojuin eere wanee wayuu aaʼinmaakai maʼin aneein jukuwaʼipa nutuma. Naaʼinrajatü tia waneepia, nnojotsü naaʼinrajatüin neʼe shia chapa taya jümaʼana. 19 Tachonniwaa anii joo taya müliain jaaʼujee jiakana, tia müsü aka saaʼin saalin joʼuu sümüin wanee wayuu eekai saʼalijaain. Ayateeria saalin tia tamüin, waneʼereeya mapa jukuwaʼipa maʼaka nukuwaʼipa Cristo. 20 Kasataalejeseʼe chain taya jümaa müinmaʼa yaa jee naatain sukuwaʼipa tü tanüikikat jümüin, jama nnojoluin tatüjaain saaʼu tü jukuwaʼipainjatkat tatuma.
21 Jia wayuu oonoweekana sümaa tü Pütchi Aapünakat nümüin Moisés, ¿nnojotsükai jaapüin tü sümakat tü Pütchi Aapünakat nümüin Moisés? 22 Jamüsüjaʼa saashin tü Karaloʼuta Nüchikimaajatkat Maleiwa, piamashii na nüchonniikana Abrahán, wanee nüchon sümüin tü nüchepchiakat otta chi wane nüchon sümüin tü nuʼwayuusekat, tü nnojotkalü achepchieein. 23 Chi süchonkai tü achepchieekat, joʼuushi suluʼu wayuuin neʼe nia, eekajasaʼa chi süchonkai tü nuʼwayuusekat Abrahán, joʼuushi suluʼujee tü pütchi nüküjatüjütkalia Maleiwa. 24 Tia kasa alatakat eesüjaʼa shiyaawasere shia tü kasa alatajateetkat. Tia piamasükat jieyuu shiyaawasesü piamasü pütchi apansaajünaka. Wanee pütchi apansaajünüsü saaʼu tü uuchi kanüliakat Sinaí, achepchieeshii na wayuu chajanakana. Shiyaawasesü Agar tia pütchi apansaajünakat. 25 Agar shiyaawasesü Sinaí, tü uuchi chakat Arabia jee shiyaawasesü shia tü Jerusalén eekat maaʼulu, tü makalü aka saaʼin wanee wayuu achepchiee jee na wayuu chakana Jerusalén müshii aka saaʼin süchooin, achepchiee joo nayaya. 26 Eekajasaʼa tü Jerusalén chakat sirumatuʼu, nnojotsü achepchieein jee müsü shia maʼaka saaʼin wanee wei.
27 Anuu tü sümakat tü Karaloʼuta Nüchikimaajatkat Maleiwa: «Talata paaʼin pia wayuu maratkat, talata paaʼin sümaa puʼwaatüin, pia wayuu nnojotkat eʼraajüin saaʼu saalin joʼuu, süka jamüin, na süchonniikana tü wayuu ooʼulaaushikat wattaleʼeya naalii noulia na süchonniikana tü wayuu kaʼwayuusesükat». 28 Tawalayuwaa, eekajasaʼa jiakana joʼuushii suluʼujee tü pütchi nüküjatüjütkalia Maleiwa maʼaka naaʼin Isaac. 29 Chaa sümaiwa paala, chi joʼuushikai sükajee tü nüpülainkat Maleiwa müliapuʼushi nutuma chi joʼuushikai suluʼu wayuuin neʼe nia. Akaataajaʼa neʼe sukuwaʼipa tia maaʼulu. 30 ¿Jamüsü sünüiki tü Karaloʼuta Nüchikimaajatkat Maleiwa? «Püjünajaa yaajee tü achepchieekat nümaʼaleeya chi süchonkai. Chi süchonkai tü wayuu nnojotkat achepchieein, nnojotsü nüpaajiraainjatüin nümaa chi süchonkai tü achepchieekat tü kasa eʼipünaanakat nüpüla». 31 Tawalayuu, nnojoishii süchonniin waya wanee achepchiee, süchonnii waya wanee wayuu nnojotkat achepchieein.