Génesis
39 Nayasaʼa na ismaelitakana namaashi José Egiptomüin, noikaka nia nümüin wanee egipcio kanüliashi Potifar, niʼipajachi nia chi aluwataashikai otta naʼlaülajana nia na surulaat aaʼinmajakana faraón. 2 Eejachipejeʼe Jehová nümaa José makalaka anain nukuwaʼipa, niʼitaanaka nutuma Potifar, chi nülaamainkai süpüla süʼlaülain nia tü nipiakat. 3 Niyaawataka saaʼu chi nülaamainkai eein Jehová nümaa José otta anain nutuma Jehová sukuwaʼipa süpüshuaʼa tü naaʼinrakat José.
4 Talatüshi Potifar nümaa José jee aʼyataashi nia nutuma niʼipajee, niʼitaain nia süpüla süʼlaülain tü nipiakat jee süpüshuaʼa tü kasa eekat nümaʼana. 5 Soʼujeʼereeya süʼlaülain José tü nipiakat Potifar otta süpüshuaʼa tü kasa eekat nümaʼana, anasü nutuma Jehová nakuwaʼipa na nipialujunakana Potifar nünainjee José. Anasü sukuwaʼipa nutuma Jehová süpüshuaʼa tü kasa eekat nümaʼana Potifar sümaʼaleeya nüʼttia. 6 Niʼitaain Potifar najapuluʼu José süpüshuaʼa tü kasa eekat nümaʼana, müsüjeseʼe nnojoluitpain shapaain naaʼin saaʼu tia, shia neʼe nüneeküinjatka tü niküinjatkat. Eekajasaʼa José, katchinshi maʼin nia, nia wanee wayuu anashi aaʼinchi maʼin.
7 Müliaka niiʼiree José tü nuʼwayuusekat chi nülaamainkai. «Püinkaa tamaa», sümaka nümüin. 8 Niyoutapejeʼe süchiki José nüinkaainjachin sümaa nuʼwayuuse chi nülaamainkai, anuu nünüiki sümüin: «Nnojotsü kasain shapaain atuma naaʼin chi talaamainkai süka niʼitaain tajapuluʼu süpüshuaʼa tü kasa eekat nümaʼana. 9 Tayaʼala neʼe süʼlaülaka nutuma tü kasa eekat nümaʼana, niʼitaain tajapuluʼu kasa süpüshuaʼa, piaʼala neʼe nnojotka niʼitaain tajapuluʼu süka nuʼwayuusein pia. ¿Jamataalainjachika taya süpüla taaʼinrüin wanee kasa eekai mojuin jee kaainjalain taya noʼuluʼu Maleiwa?».
10 Süpüleerua aaʼinchi nia soʼukaiwai shiiʼiree nüinkaain sümaa, niyoutapejeʼe José nüinkaain sümaa jee nümaakuʼu nümüin shia. 11 Shiasaʼa soʼu wanee kaʼi, ekerotushi José suluʼumüin nipia chi nülaamainkai sünain aʼyatawaa. Nnojoishii chajanain na achepchieekana soʼu tia. 12 Saʼüttaka nia süka tü nüsheʼinkat. «Püinkaa tamaa», sümaka nümüin, nüpantajaaka suulia jee nüpütapünaaka tü nüsheʼinkat sajapuluʼu. 13 Sünainjee nüpantajaain José suulia jee nüpütapünaain tü nüsheʼinkat sajapuluʼu, 14 emetutsü maʼin shikiisa namüin na achepchieekana, anuu sünüiki namüin shikiisaluʼu: «Eʼreesü wayumüin wamüin tü hebreowaʼata nüntirakat chi taʼwayuusekai yaamüin, ainkaweeshi nia tamaa. Emetutsüjeseʼe maʼin tekiisa. 15 Sünainjee taʼwaatüin jee emetuluin tekiisa, nüpantajaaka jee nüpütapünaaka nüsheʼin taʼütpaʼa». 16 Shiʼitaakalaka tü nüsheʼinkat José süʼütpaʼa jee saʼatapajaka nüntüin miichipaʼamüin chi suʼwayuusekai.
17 Süküjakalaka nümüin Potifar tü süküjakat namüin na achepchieekana. Anuu sünüiki nümüin: «Eʼreeshi wayumüin tamüin chi püchepchia hebreo püntirakai miichipaʼamüin. 18 Shiasaʼa sünainjee taʼwaatüin jee emetuluin tekiisa, nüpantajaaka jee nüpütapünaaka tü nüsheʼinkat taʼütpaʼa». 19 Naashichijaaka Potifar sünainjee tü sümakat tü nuʼwayuusekat soʼu sümüin nümüin: «Müsü naainjala tamüin chi püchepchiakai». 20 Nütaʼüninnaka José nutuma chi nülaamainkai. Nüpüreesajitka nia eere nasürünnüin na püreesakana nutuma chi aluwataashikai. Chajachikaʼaya José püreesain.
21 Ayatüshia eein Jehová nümaa José, ayatüshia alin nia nüpüla. Talatüshi chi süʼlaülakai tü kaatsetkat nümaa José süka nükaalinjain nia Maleiwa, eʼitaanüshiijeseʼe najapuluʼu José nutuma chi süʼlaülakai tü kaatsetkat napüshuaʼa na püreesashiikana. 22 Niʼitaaka José süpüla jülüjainjatüin naaʼin naaʼinrüle na püreesashiikana tü eʼitaanakat napüleerua. 23 Nnojotkaʼa shapaain naaʼin chi süʼlaülakai tü kaatsetkat saaʼu tü niʼitaakat najapuluʼu José süka eejachin Jehová nümaa. Akaalinjünüshi José nutuma Jehová süpüla anainjatüin süpüshuaʼa tü kasa naaʼinrakat.