Karaloʼuta namüinjatka na Hebreokana
3 Tawalayuu, jia wulekana akuwaʼipa jee aneekünakana nutuma Maleiwa süpüla aluwatawaa chaa iipünaa, anakajaʼa jüsakireʼerüle jaaʼin nünain Jesús, watüjaa aaʼuchi aluwataaushin nia jee laülaashin nia napüleerua na sacerdotekana. 2 Oonooshi nia waneepia sümaa nünüiki Maleiwa maʼaka noonooin Moisés wanaa sümaa chajachin nia nipialuʼu Maleiwa. 3 Kojutuleeshia maʼin Jesús nuulia Moisés, jama niain kojutuleʼeinña chi wayuu akumajakai wanee miichi suulia tü miichi nukumajakat. 4 Nnojotsü akumajaain sümüiwaʼa wanee miichi, eeshi chi akumajakai shia jee müshia Maleiwa nia kakumalaka kasa süpüshuaʼa. 5 Oonooshi Moisés sümaa nünüiki Maleiwa wanaa sümaa niʼyataain nipialuʼu Maleiwa, shiyaawasekalaka nia tü kasa naaʼinrajatkat Maleiwa. 6 Cristo, chi Nüchonkai Maleiwa oonooshi nia waneepia sümaa nünüiki Maleiwa, jama sülaülajanain nia nipia Maleiwa. Shiimain müin waya maʼaka saaʼin nipia Maleiwa wachecheraale süchiirua taashinjanain waya sünain aashajawaa jee waʼwaataainjanain suluʼu tü kasa waʼatapajakat.
7 Anuu tü sümakat tü pütchi ashajuushikat sükajee nüpülain Maleiwa: «Jaapaale sümaa tanüiki soʼu kaʼikat tüü, 8 nnojoliinjana jia macheʼein maʼaka macheʼein tamüin na jutuushinuukana wanaa sümaa taashichijaain natuma jee nooʼulaküin taaʼin soʼu chajanain naya isashiipaʼa. 9 Chajachi taya nooʼulaküin aaʼin na jutuushinuukana jee najuyaajüin taya mayaainjeʼe taainjain kasa anasü napüleerua soʼu pienchi shikii juya. 10 Jashichijaashi taya namüin jee tamakalaka: ‹Akatalaashii naya toulia suluʼu naaʼin jee nnojoishi neʼraajüin taya›. 11 Anuujeseʼe tanüiki sümaa jashichin taya: ‹Nnojoleena naya eemeraain soʼu tü kaʼi teemeraakalü oʼu›».
12 Eeja jaaʼin tawalayuu suulia sümojujaʼalaain tü suluʼukat jaaʼin jee suulia manoujain jia saalinjee jükatalaain nuulia chi Maleiwa matüjainkai outaa. 13 Aluʼu shiainjaʼa anain ayatüle jükatchinjiraain jaaʼin eeiwaʼaya tü kaʼi «soʼu kaʼikat tüü» münakat, nnojoleenaka jimeejünüin jee ichein jaaʼin sutuma kaainjalain jia. 14 Aapüneerü wamüin tü aapünakat nümüin Cristo wachecheraale süchiirua tü kasa wanoujakalü anain sümaiwa paala. 15 Anuu tü sümakat tü Karaloʼuta Nüchikimaajatkat Maleiwa: «Jaapaale sümaa tanüiki soʼu kaʼikat tüü, nnojoliinjana jia macheʼein maʼaka macheʼein tamüin na jutuushinuukana wanaa sümaa taashichijaain natuma».
16 ¿Jaralii na wayuu aapajakana nünüiki Maleiwa sümaa jashichijaain nia natuma mapa? ¿Aashin nayayaain na wayuu nümaakana Moisés Egiptojee? 17 ¿Jaralii na wayuu jashichijaakana amüin Maleiwa soʼu pienchi shikii juya? ¿Aashin nayayaain na wayuu kaainjalakana jee na outakana chaa isashiipaʼa? 18 ¿Jaralii na wayuu nüpansaajakana amüin Maleiwa nnojoleenain neemeraain soʼu tü kaʼi neemeraakalü oʼu niakai? ¿Aashin nayayaain na wayuu nnojoliikana oonooin sümaa nünüiki? 19 Wayaawataka saaʼu nnojoliin neemeraain soʼu tü kaʼi neemeraakalü oʼu Maleiwa süka manoulain naya.