Palajatka karaloʼuta namüinjatka na chajanakana Corinto
3 Tawalayuwaa, nnojoishii oʼuninnüin akuwaʼipa jia nutuma chi Maleiwakai sükajee tü nüpülainkat. Yootushijeseʼe taya jümaa süka müin juʼuninnakai aaʼin akuwaʼipa sutuma wayuu, jama joʼuweein jaaʼin sünain anoujaa. 2 Tü kasa tekirajakalü anain jia müsü aka saaʼin leechi, nnojotsü müin aka saaʼin eküülü eekai kaʼüin. Nnojoishii keraain jia süpüla ekaa eküülü eekai kaʼüin otta ayatayüliijaʼa jia nnojoliin keraain süpüla tia. 3 Ayatayülia wanaawain tü jülüjakat jaaʼin sümaa tü jülüjakat saaʼin wayuu. Achunjiraashii jia otta atkaajiraashii jia, wanaawasü neʼe jukuwaʼipa sümaa wayuu. 4 «Nümaajachi taya Pablo» eeshi chi makai, «Nümaajachi taya Apolos» eeshi joo chi makaʼiya. ¿Nnojotsüjasaʼa shiain jüshatüin sukuwaʼipapala wayuu wanaa sümaa jaaʼinrüin tia?
5 ¿Jamüshi kojutuinjachikaʼa maʼin Apolos? ¿Jamüshi kojutuinjachikaʼa maʼin Pablo? Aʼyataalii neʼe waya, shia waʼyataaka anain tü aʼyatawaa niʼitaakat wapüleerua chi Señotkai, akaalinjashii neʼe waya shiiʼiree junoujainjanain nünain Maleiwa. 6 Müshi taya maʼaka naaʼin chi apünajakai otta müshi Apolos maʼaka naaʼin chi oʼyonokai wüin saaʼu tia pünajütkat, niapejeʼe Maleiwa miyoʼuin atuma shia. 7 Nnojoikalaka niainjachin kojutuin atumawaa chi wayuu apünajüshikai otta chi wayuu oʼyonushikai saaʼu tia pünajütkat. Nia kojutuinjachika atumawaa Maleiwa, jama niain miyoʼuin atuma shia. 8 Paaʼinwashi sünain aʼyatawaa chi apünajüshikai nümaa chi oʼyonushikai saaʼu tü pünajütkat, walaweenaka naya waneʼewai nakua saaʼu tü naʼyataainkat. 9 Aʼyanaajiiraashii waya nümaa Maleiwa. Müshii jia maʼaka saaʼin wanee yüüja nüpünajaka aluʼu Maleiwa otta müshii jia maʼaka saaʼin wanee miichi nukumajaka Maleiwa.
10 Saaʼu kamaneein tamüin chi Maleiwakai, taya aikaleʼeraka suuʼui tia miichikat maʼaka naaʼin wanee akumajüi miichi.* Eepejeʼe na wayuu akumajakana saaʼu suuʼui tia miichikat, eejeeka jaaʼin waneʼewai jukua süpüla jütüjaainjatüin saaʼu kasain jukumajüin saaʼu suuʼui tia miichikat. 11 Nüneeküin Maleiwa Jesucristo süpüla müinjachin nia maʼaka saaʼin suuʼui tia miichikat, nnojoikalaka nüneekünüinjachin wanee wayuu naata nuulia. 12 Eejeechi chi wayuu akumajakai saaʼu suuʼui tia miichikat süka ooro, pülaata, ipa eekai anain maʼin sünoʼu, taapüla, rerechi jee alama eekai juluin. 13 Sütüjaaneetka aaʼu jamüin maʼin naʼyataain naya wayuukana soʼu tü kaʼi ooʼulaküneetkalü oʼu naaʼin. Atüjaaneerü aaʼu tia süka siki, shiyaawatüneetka saaʼu anale otta mojule naʼyataain naya wayuukana. 14 Ayatüle shaʼwatüin suuʼui tü miichi nukumajakat wanee wayuu, eʼreechi nia kasa anasü sünainjee tia. 15 Jotule tü miichi nukumajakat wanee wayuu, nnojoleerü kasain apütaain nüpüla. Mayaainjeʼe nuʼttaajeechin, meechi nia maʼaka naaʼin wanee wayuu ajachijuukai sutuma siki.
16 Müshii jia maʼaka saaʼin tü miichi aʼwaajüleekat Maleiwa otta eesü tü nüpülainkat Maleiwa suluʼu jaaʼin. 17 Najaʼttirüle wanee wayuu tü miichi aʼwaajüleekat Maleiwa, ajaʼttinneechi nia nutuma Maleiwa. Akataluushi nüpüla Maleiwa tü miichi eere nuʼwaajünüin otta müshii jia maʼaka saaʼin tia miichi aʼwaajüleekat.
18 Nnojo jimeejiraain aaʼin, chi wayuu kekiikai nüküjainruʼu maaʼutpünaa yaa, anashi müle nia maʼaka naaʼin wanee wayuu nnojoikai ayaawatüin saaʼu wanee kasa, kekiijeechikalaka nia suluʼujee tia. 19 Nnojotsü kasain saamüin nümüin Maleiwa tü kasa sütüjakalü apüleerua wayuu maʼaka süküjünüin suluʼu tü Karaloʼuta Nüchikimaajatkat Maleiwa, tü makat mayaa: «Müshii nataʼünnakai aaʼin nutuma Maleiwa na wayuu kekiikana naküjainruʼu süka mojuin tü jülüjakat naaʼin». 20 Anuu tü süküjakaliaʼaya tü Karaloʼuta Nüchikimaajatkat Maleiwa: «Nütüjaa aaʼu Jehová* nnojoluin kasain anain apüla tü jülüjakat naaʼin wanee wayuu eekai kekiin nüküjainruʼu». 21 Nnojotkalaka anain juʼwaataale suluʼu tü kasa saaʼinrakat wayuu, jama naapüin chi Maleiwakai kasa süpüshuaʼa jümüin. 22 Naapüin jümüin Pablo, Apolos, Cefas, na wayuu manoujainsalii kaʼakakana jia, katüin joʼu, outuin jia, tü kasa eekat maaʼulu otta tü kasa eejeetkat mapeena. Naapüin jümüin kasa süpüshuaʼa. 23 Aʼyataashii jia nümüin Cristo otta Cristo aʼyataashi nümüin Maleiwa.