Jonás

1 Anuukalaka nünüiki Jehová nümüin Jonás,* chi nüchonkai Amitái: 2 «Puʼuna chaa Nínivemüin suluʼumüin tü pueulo miyoʼukat, püküja tü kasa alatajatkat namüin na wayuu kepiakana chayaa süka mojulaain maʼin naya».

3 Nnojoika noonooin Jonás sümaa nünüiki Jehová, nuʼunaka neʼe suluʼumüin tü pueulokot Jope. Naapaaka wanee anuwa chainjatka Tarsismüin, nuwalaajaka nüsapia, noʼotookoloko suluʼu tü anuwakat namaa na anuwapüʼükana, nnojoishi nia oonooin sümaa nünüiki Jehová.

4 Süchikijee tia nüjütaka Jehová wanee joutai miyoʼu maʼin shirokupünaa tü palaakat, süʼitaka wanee juya wawaimaajatü ojuʼichijaataairüjeʼe tü anuwakat sutuma. 5 Mmotkalaka maʼin na anuwapüʼükana jee nachuntakalaka waneʼewai nakua namüin na namaleiwasekana. Nojunaka tü chisooui sulujutkat tü anuwakat süpüla jamaamainjatüin shia, eekajasaʼa Jonás chajachi shiinaluʼu tü anuwakat sünain atunkaa. 6 Niasaʼa chi sülaülakai tü anuwakat nuʼunaka nünainmüin Jonás jee nümakalaka nümüin: «¿Kasakai paaʼinraka putunkakaʼa? Pütamaa, puchunta nümüin pümaleiwase, kamaʼa nükaalinjeenale waya suulia outaa chi shiimainshikai suluʼu Maleiwain».

7 Namajiraakalaka na anuwapüʼükana waneʼewai nakua: «Anashii washantanajiraale süpüla watüjaain saaʼu jaralin kasirüin tü alatakat wamüin». Nashantanajiraakalaka saaʼu tia jee nayaawataka saaʼu niain Jonás kasirüin shia. 8 Anuukalaka nanüiki nümüin: «Püküjaʼaya wamüin, ¿jarai maʼin kasitka tü alatakat wamüin? ¿Kasa piʼyataaka anain? ¿Jalejeejachi pia? ¿Kasaichi sünülia puumain? ¿Jarat tü pueulo kaluʼujeejachikai pia?».

9 Nusoutakalaka Jonás namüin: «Wayuu hebreo taya, taʼwaajüin Jehová, chi Maleiwa chakai sirumatuʼu, chi kakumainkai tü palaakat sümaa tü mmakat».

10 Mmotkalaka maʼin na anuwapüʼükana süka nüküjain paala Jonás nnojoluin noonooin sümaa nünüiki Jehová. Nasakiraka nia: «¿Jamüshii makaʼa waya putuma?», jama nüküjain shia namüin paala. 11 Namakalaka nümüin: «¿Kasa waaʼinrajatka püka süpüla shiimalaainjatüin tü palaakat?». Müsü nanüiki nümüin süka jashichireein maʼin tü palaakat. 12 Nümakalaka namüin: «Jüpanaajaa taya, jujuta taya shirokumüin tü palaakat, shiimalaajeetkalaka, jama tayain kachiiruajachin tü wawai antakat jünainmüin». 13 Nayasaʼa na anuwapüʼükana, nooʼulakaka noʼunirüin tü anuwakat chaa sotpaʼamüin tü palaakat, isakalaka shia nachiki, jama jashichireein maʼin tü palaakat.

14 Nachuntakalaka maʼin nümüin Jehová sünain maa: «Jehovákalee, alatüsü tüü süka aleinjatüinjaʼa shia putuma. Jehovákalee, nnojo süsalain waya putuma shiimainrejeʼeya maainjalain wayuukai chii». 15 Napanaajiraakaʼa Jonás jee nojutakalaka nia shirokumüin tü palaakat. Eimalaa müsüjaʼa tü palaakat. 16 Kojutukalaka Jehová namüin sünainjee tia. Nasülajaka wanee kasa nümüin Jehová jee napansaajaka nanüiki nümüin.

17 Nuluwataaka Jehová wanee jime miyoʼu süpüla shimiralüinjachin Jonás. Apünüin kaʼi sümaa apünüin ai Jonás süleʼeruʼu tü jimekat.