Jonás
2 Nuchuntaka Jonás nümüin Jehová, chi Nümaleiwasekai, achuntushi nümüin süleʼeruʼujee tü jimekat, 2 anuukalaka nünüiki Jonás:
«Shapaasü maʼin taaʼin sünain achuntaa kaalinwaa nümüin Jehová jee nusoutaka tamüin.
Müshijaʼaya tachuntakai aaʼin kaalinwaa nümüin Amuuyuupaʼajee.*
Paapüinña tanüiki.
3 Soʼu pujutuin taya shiinaluʼumüin tü palaakat,
wattashi taya sülüʼüjain tü sütchinkat wünapümüin.
Alanüsü tooʼopünaa tü sümünakat palaa sümaa miyoʼuin maʼin shia.
4 ‹Wattalejeʼe taya puulia.
Süpülajattaa teʼraa piantua tü miichi eere puʼwaajünüin›, tamajiraaka.
5 Wattashi taya sülüʼüjain tü palaakat wünapümüin,
outataaichijeʼe taya. Sülüʼüjain taya shiinaluʼumüin.
Sükoʼojookalaka jimoʼula* sünain tekii.
6 Wattashi taya shiinaluʼumüin tü palaakat eere sukumajaain tü uuchikat.
Shimiralataaichejeʼe taya tü mmakat.
Jehovákalee, Tamaleiwasekai, piyuʼluin taya shiinaluʼujee tü mmakat.
7 Sotushi pia taaʼin Jehová wanaa sümaa tajachijain.
Paapüinjaʼaya tanüiki eere puʼwaajünüin.
8 Na wayuu aʼwaajakana shiyaakua maleiwayaasü, motushi naaʼin chi Maleiwakai, chi aikai apüla wayuu.
9 Eekajasaʼa tayakai tasülajeerü pümüin wanee kasa saaʼu taapüin analuʼulu pümüin.
Tekeraajeeriaʼaya tü pütchi tapansaajakat.
Nia Jehová oʼtteʼeraka wayuu».
10 Nüjütakalaka Jehová tü jimekat süpüla seetüinjachin Jonás sotpaʼamüin tü palaakat.