Apocalipsis
17 Eekalaka wanee aapiee naʼakajachi na akaratshishiikana aapiee kajapulujunakana tü akaratshisükat iita, arütkaashi nia tanainmüin jee nümakalaka tamüin: «Jalaichi teeʼiyatai pümüin tü alatajatkat sümüin tü wayuu maaʼinsatkat maʼin, tü aikalaakat shiroku wüin eekai miyoʼuin maʼin. 2 Aʼluwajiraasü sukuwaʼipa tia wayuukat namaa na sülaülakana mma jee müshiʼiya na wayuu kepiakana sainküinpünaa tü mmakat, müshii nepeʼrakai aaʼin süka nasüin wiino, naaʼinrüin tia süka naʼluwajiraain nakuwaʼipa* sümaa tia wayuukat».
3 Tamaanaka isashiipaʼamüin nutuma chi aapieekai, nümaashi taya sükajee tü nüpülainkat Maleiwa. Teʼraka wanee wayuu joyotuin saaʼu wanee wüchii wünaʼapüjatü, ishotot tia wüchiikat, akaratshisü shikii, poloosü suʼuwa otta eejatü ashajuushin sutoutajee anülieeirua mojutuka atuma Maleiwa. 4 Jepisiiyaa sünoʼu süsheʼin tia wayuukat jee ishosü maʼin shia, eejatü ooro sünain tia wayuukat, eejatü ipa eekai anain maʼin sünoʼu otta eejatü kaaʼürüla.* Kajapulujutü tia wayuukat wanee iita aainjuushi süka ooro, piratüsü tia iitakat sümaa kasa eekai kashüülain maʼin jee piratüsü shia sümaa tü kasa yarüttüsü eeka sünainjee suʼluwajiraain sukuwaʼipa tia wayuukat. 5 Ashajuushi shiʼipoʼunain wanee anüliee matüjaajuka aaʼu jamaluʼuluin shia, «Babilonia tü kojutukalü atumawaa, shii wayuu maaʼinsat jee kasa eekai kashüülain maʼin sainküinpünaa tü mmakat» münüsü shia. 6 Teʼraka epeʼrüin tia wayuukat süka süsüin nasha na aneekuushikana jee süsüin nasha na aküjaliikana pütchi nüchiki Jesús.
Ponokoloko maʼin shia taaʼin teirakaaiwaʼaya sümüin. 7 Anuujeseʼe nünüiki chi aapieekai tamüin: «¿Jamüsü ponoko paaʼin shia? Taküjeerü pümüin wanee kasa nnojotkalü atüjaanüin aaʼu süchiki tia wayuukat jee süchiki tü wüchii wünaʼapüjatü kaaʼukat shia, tü akaratshikat ekii jee polooka oʼuwa. 8 Ajaʼttinnajatü tia wüchii wünaʼapüjatü piʼrakat, eepuʼusü shia nnojoluitpapejeʼe shia, alüʼütsü shia süpüla sujuʼitüin suluʼujee tü ishi oʼutakat maʼin. Poneerü naaʼin na wayuu kepiakana sainküinpünaa tü mmakat neʼrapeena tia wüchii wünaʼapüjatkalü eepuʼuka sümaa nnojoluitpain shia, eejeetpejeʼe shia süchikuaʼa. Naya wayuu eʼrakana shia naya na nnojoliikana ashajünüin anülia suluʼu tü karaloʼuta nanüliamaajatkat na katüinjanakana oʼu. Mashajuuyülia tia soʼujeʼereeya shiʼitaanüin shikii wayuu.*
9 »Kekiinjachi wanee wayuu süpüla niyaawatüin saaʼu tia. Tü akaratshisükat shikii tü wüchii wünaʼapüjatkat shiyaawasesü akaratshisü uuchi, aikalaasü tü wayuukat saaʼu tia uuchikat. 10 Akaratshishii na aluwataashiikana, jaʼraishii na nnojoliinnapakana, eeshi chi aluwataakai maaʼulu otta eejeechi wanee mapeena, nüntapeena chia motsoʼopünaajeerü nümaʼa sünain aluwatawaa. 11 Tü wüchii wünaʼapüjatü eepuʼukat sümaa nnojoluitpain shia, aluwataasiaʼaya shia, mekiisatshii joo na aluwataashiikana süka, ojuʼitüsü shia naʼakajee na akaratshishiikana aluwataashii, alüʼütsü süpüla sajaʼttinnüin.
12 »Poloosü suʼuwa tü wüchii wünaʼapüjatü piʼrakat, nayaawase shia polooshii aluwataalii nnojoyüliikana aapünüin amüin laülawaa, aluwataajeenapejeʼe naya soʼu wanee oora sümaa tü wüchii wünaʼapüjatkat. 13 Wanaawasü tü kasa nounteekalü amüin, müsüjeseʼe kapülain namüin tü wüchii wünaʼapüjatkat jee naapüin laülawaa sümüin. 14 Atkaajeena naya aluwataashiikana nümaa chi Anneetchonkai, akanajuweenapejeʼe naya nutuma chi Anneetchonkai, jama Naseñotsein nia na sülaülakana mma jee Aluwataashi nia naaʼu na aluwataashiikana, akanajeenaʼaya na nümaajanakana chi Anneetchonkai, ounejuushi naya, aneekuushi jee oonooshii waneepia nümüin Maleiwa».
15 Anuujeseʼe nünüiki chi aapieekai tamüin: «Tü wüin piʼrakat joyotuin eroku tü wayuu maaʼinsatkat, shiyaawase shia watta saalii wayuu, shiyaawase pueulo, wayuu sainküinpünaa tü mmakat jee wayuu naatayaa makalü anüiki. 16 Tü wüchii wünaʼapüjatü piʼrakat sümaʼaleeya tü poloosükat suʼuwa, süʼürüleerü tü wayuu maaʼinsatkat. Sajaʼttiraleejeeria tü kasa eejatkat sümaʼana jee süpüteerü shia masheʼin, shikeerü tü shiʼirukukat jee saʼajeerü shia süka sikoʼu. 17 Niʼitaain Maleiwa suluʼu saaʼin tü wüchii wünaʼapüjatkat sümaʼaleeya tü suʼuwakat saaʼinrajatüin tü jülüjakat naaʼin Maleiwa. Nekeraajeerü na aluwataashiikana tü kasa wanaawakalü achiirua naya, naapajatüin laülawaa sümüin tü wüchii wünaʼapüjatkat waneʼereeya shikeraajapa nünüiki Maleiwa. 18 Tü wayuu piʼrakat shiyaawase tü pueulo miyoʼukat, aluwataasü shia naaʼu na sülaülakana mma».