Tü nüshajalakat Juan

14 Anuujeseʼe sooʼomüin nünüiki Jesús: «Nnojo shapaain jaaʼin, kanoula jia nünain Maleiwa otta tanain tayakai. 2 Miyoʼu maʼin nipia chi Tashikai, nnojorüleje shiimain tia nnojotsüje taküjain shia jümüin. Oʼunushi paala taya süpüla yapainjatüin shia tatuma jüpüla. 3 Toʼunapeena jee yapapeena tü miichikat tatuma, aleʼejeechi taya tachikuaʼa jee tamaajeenaka jia süpüla chainjanain jia tamaa. 4 Jiʼraajüin tü wopu juʼunuinjatkalü aluʼupünaa chaa eeʼewaire taya».

5 Anuujeseʼe nünüiki Tomás nümüin Jesús: «Señotkalee, ¿jamüsü süpüla watüjaainjatüin saaʼu tü wopu woʼunajatkalü aluʼupünaa nnojorüle watüjaain saaʼu jalaʼwalin pia?».

6 Nusoutakalaka Jesús nümüin: «Müshi taya maʼaka saaʼin wanee wopu, tayaʼaya chi shiimainkai otta taya kataka atuma soʼu wayuu. Nnojoishi süpüla nürütkaain wanee wayuu nünainmüin chi Tashikai, aluʼusaʼa tayale arütkeʼerüin nia. 7 Jiʼraajüle taya jiʼraajeechia chi Tashikai, jiʼraajüichipa nia jee jiʼrüichipa müinmaʼa yaa».

8 Anuujeseʼe nünüiki Felipe: «Señotkalee, piiʼiyata wamüin chi Püshikai, aneetkalaka waaʼin sümaa tia».

9 Nusoutakalaka Jesús nümüin: «¿Nnojoiyüiya piʼraajüin taya Felipe? Kakaliaichipejeʼe taya jümaa, chi eʼrakai taya müshijaʼa niʼrakai naaʼin chi Tashikai. ¿Jamaluʼutka putuma ‹Piiʼiyata wamüin chi Püshikai› pümaka tamüin? 10 ¿Nnojotsüsaʼa punoujain paaʼinwain chi Tashikai tamaa? Tü kasa taküjakat jümüin nnojotsü tekiiruʼujeejatüin neʼe. Tü nüchekakalü achiki chi Tashikai, naainjain shia takajee, jama paaʼinwain nia tamaa. 11 Junouja sünain paaʼinwain chi Tashikai tamaa. Nnojorülejeʼe junoujain sünainjee tia, junoujamata sünainjee tü kasa taaʼinrakat. 12 Chi wayuu kanoulakai tanain, naainjeeria tü kasa taainjakat, alanaʼaleejeeria tü kasa naainjakat. Eekajasaʼa tayakai chainjachi taya nümaʼanamüin chi Tashikai. 13 Jaʼitasü kasain juchuntuin saaʼu tanülia, taainjeeriaʼaya süpüla kojutuinjachin atumawaa chi Tashikai tanainjee tayakai chi Nüchonkai. 14 Juchuntule wanee kasa saaʼu tanülia, taainjeerü.

15 »Aire taya jüpüla, jaaʼinreerü tü taluwataakalü anain jia. 16 Achunteechi maʼin taya nümüin chi Tashikai jee nüjüteetkalaka tü akaalinjainjanakat jia süpüla kaʼikat süpüshuaʼa. 17 Shia tü nüpülainkat Maleiwa, tü aküjakat tü shiimainkat. Nnojotsü aapünüin tia namüin na manoujainsaliikana süka nnojoluin neʼrüin shia jee nnojotsü shia neʼraajüin. Jiʼraajapejeʼe shia süka eein shia jüleʼeruʼu otta ayateeria shia jümaa. 18 Nnojoleena jia tapütüin jümüiwaʼa, aleʼejeechi taya tachikuaʼa jünainmüin. 19 Soʼu palit kaʼi müichia nnojolin shiʼrüin taya wayuu, jieenainjaʼa eʼrüin taya, jama katüin toʼu, akaʼaya jiakana kateerü joʼu. 20 Soʼu kaʼikat tia jütüjaajeerü aaʼu paaʼinwain taya nümaa chi Tashikai otta müshiʼiya jiakana paaʼinwashii jia tamaa. 21 Chi wayuu aapaakai sümaa tü taluwataakalü anain jee chi oonookai sümaa tanüiki, shiimain alin taya nüpüla. Chi wayuu aikai apüla taya, aijeechiaʼaya nüpüla chi Tashikai jee aijeechi nia tapülaya sümaa niʼraajüin maʼin taya».

22 Anuujeseʼe nünüiki Judas, nnojoipejeʼe niain Judas Iscariote, nia chi wane: «Señotkalee, ¿jamüshii wayainjanaka neʼe eʼraajüin maʼin pia suulialeʼeya wayuu?».

23 Nusoutakalaka Jesús nümüin: «Chi wayuu aikai apüla taya naaʼinreerü tü taluwataakalü anain nia jee aijeechiaʼaya nia nüpüla chi Tashikai. Woʼuneenakalaka piamaleʼeya nümaʼanamüin, kepieenakalaka waya nipialuʼu. 24 Chi wayuu maalinkai apüla taya, nnojotsü naaʼinrüin tü taluwataakalü anain nia. Tü pütchi taküjakat jümüin nnojotsü tekiiruʼujeejatüin neʼe, nüküjala shia tamüin chi Tashikai, chi Kajünalakai taya.

25 »Taküjain jümüin tüü sümaʼainruʼu yaain jia tamaa. 26 Akaalinjüneena jia sutuma tü nüpülainkat Maleiwa, tü nüjüteetkat jümüin chi Tashikai tanülialuʼu. Shikirajeena jia sünain kasa süpüshuaʼa jee süsoʼireerü jaaʼin sünain süpüshuaʼa tü tamüitpakat jümüin. 27 Ayateeria jimatüin jaaʼin maʼaka jimatüin jaaʼin müinmaʼa yaa süka aniiyülin taya jümaa. Nnojotsü süpüla jimatüin jaaʼin sutuma wayuu, nnojo shapaain jaaʼin jee nnojo mmoluin jia. 28 Soto jaaʼin tü tamakalinkat jümüin sünain maa: ‹Oʼuneechi taya, aleʼejeechipejeʼe taya tachikuaʼa jünainmüin›. Airejeʼeya taya jüpüla, talateerü jaaʼin süka toʼunajachin eemüin chi Tashikai, jama niain miyoʼuin toulia. 29 Taküjain jümüin tüü süpülapünaa shikeraajüin tü tamüitpakat jümüin, shiasaʼa shikeraajapeena junoujeerü anain tü taküjaitpakat jümüin. 30 Nnojoleechi yootuin maʼin taya jümaa, jama nünteechin chi aluwataakai saaʼu wayuu, nnojoipejeʼe nia laülaain taaʼu. 31 Süpüla sütüjaain saaʼu wayuu alin tapüla chi Tashikai, taainjain süpüshuaʼa tü nuluwataakalü anain taya. Jütamaa jümaala, jooʼuya yaajee.