Palajatka karaloʼuta Samuel
6 Akaratshi kashi chajatka oʼu namaʼana na filisteokana tü kojon shiyaawasekat süpansaajünüin pütchi nümaa Jehová. 2 Neenajinnaka natuma na filisteokana na sacerdotekana otta na ooʼulaküliikana, anuujeseʼe nanüiki na filisteokana namüin: «¿Kasache waaʼinrajatka süka tü kojon shiyaawasekat süpansaajünüin pütchi nümaa Jehová? Anasü jüküjale wamüin tü waaʼinrajatkat süpüla weiteʼerüin shia süchikuaʼa». 3 Anuukalaka nanüiki na sacerdotekana otta na ooʼulaküliikana: «Anashii jüsülajüle wanee kasa nümüin chi Maleiwakai jiiteʼerüinjatüle tü kojon shiyaawasekat süpansaajünüin pütchi nümaa Jehová, chi Namaleiwasekai na israelitakana. Anashii jüsülajüle wanee kasa nümüin nülatireetkalü aaʼujee jaainjala, jaawalaajeenaka jee jütüjaajeetka saaʼu kasain müliain anainjee jia nutuma». 4 «¿Kasa wasülajüinjatka nümüin chi Maleiwakai süpüla nülatirüinjatüin sooʼopünaa naaʼin waainjala?», namakalaka na filisteokana. Anuujeseʼe nanüiki na sacerdotekana otta na ooʼulaküliikana: «Jaʼraishii na wayuu aluwataakana naaʼu na filisteokana, shiaka anain aluʼu jüsülajüle nümüin chi Maleiwakai jaʼraisü shiyaakua tü ayuulii kanüliakat hemorroides otta jaʼraisü shiyaakua kookoocheʼerü, akumajünüinjatü tia süka ooro, jama wanaawain tü müliaa jiʼrakat namaa na aluwataakana jaaʼu. 5 Jukumajirüinjatü shiyaakua tü ayuulii kanüliakat hemorroides otta shiyaakua kookoocheʼerü, tü ajaʼttirakat jia otta tü ajaʼttirakat juumain. Kojutuinjachi jümüin chi Namaleiwasekai na israelitakana. Eeshijaʼa nuuʼulaajeechire suulia müliain jia nutuma, suulia müliain nutuma chi jümaleiwasekai jee suulia najaʼttirüin tü juumainkat. 6 Nnojoliinjana jia macheʼein maʼaka macheʼein faraón namaa na wayuu chajanakana Egipto. Najütaleein nachiki na israelitakana müliapa naya nutuma chi Namaleiwasekai na israelitakana. 7 Jukumajirüinjatü wanee kareeta otta jüchajaainjatü süchiki piamasü paaʼa jemeyunnuu, tü nnojoyütkalia eʼitaanüin anutpünaa wunuʼu, sajaralajeetka tü paaʼakat tü kareetakat otta jiʼikajaajeetka tü süchooinkalüirua suluʼumüin tü kulaalakat. 8 Joʼoteetkalaka suluʼu tü kareetakat, tü kojon shiyaawasekat süpansaajünüin pütchi nümaa Jehová, jiʼitaajeetka süʼütpaʼa tü kaaja kaluʼuinjatkat tü ooro jüsülajüinjatkat nümüin chi Maleiwakai süpüla nülatirüinjatüin sooʼopünaa naaʼin tü jaainjalakat. Jaʼtaleetka tü paaʼakat süpüla suʼunuin sümaa tü chisoouikat 9 otta jünajeetka saaʼu. Suʼunule tü paaʼakat suluʼupünaa tü wopu chaʼwatkat suluʼumüin tü mmakat Bet-Semes, wayaawateerü saaʼu niain kamaʼülapalain waya chi Namaleiwasekai na israelitakana. Eekajasaʼa nnojorüle suʼunuin suluʼupünaa tia wopukot, wayaawateerü saaʼu nnojolin niain kasirüin Maleiwa tü alatakat wamüin jee aleinjatüin shia».
10 Ayatüsüjaʼa naaʼinrüin na filisteokana tü münakat namüin, nantirüin piamasü paaʼa jemeyunnuu otta najaralajirüinjeseʼe tü paaʼakat tü kareetakat. Kulaalaluuka natuma tü süchooinkalüirua. 11 Noʼotoko suluʼu tü kareetakat tü kojon shiyaawasekat süpansaajünüin pütchi nümaa Jehová sümaʼaleeya tü kaaja kalujutkat shiyaakua kookoocheʼerü otta shiyaakua tü ayuulii kanüliakat hemorroides, tü akumajuushikat süka ooro. 12 Suʼunakalaka tü paaʼakat suluʼupünaa tü wopu chaʼwatkat suluʼumüin tü mmakat Bet-Semes, lotusü suluʼupünaa tü wopukot sümaa shiʼyalajüin maʼin. Oʼunushiijeseʼe naʼlaülajana na filisteokana süchiirua tü paaʼakat, nantakalaka eere sülüjüle tü mmakat Bet-Semes. 13 Chajana ashanüin trigo na wayuu chajanakana suluʼu tü mmakat Bet-Semes, chajana naya patajatshii. Talataka maʼin naya neʼraiwaʼaya tü kojonkot. 14 Süntakalaka tü kareetakat suluʼumüin nuumain Josué, chi chejeʼewaikai Bet-Semes, süshaʼwalaaka tü paaʼakat süʼütpaʼa wanee ipa miyoʼu. Sikikalaka natuma tü kareetakat, noʼutaka saaʼin tü paaʼakat sümaa naʼajüin shia nümüin Jehová.
15 Nashakatiraka na nüikeyuukana Leví tü kojon shiyaawasekat süpansaajünüin pütchi nümaa Jehová sümaʼaleeya tü kaaja kalujutkat tü oorokot, neʼitaakalaka shia saaʼu tü ipa miyoʼukat. Soʼu kaʼikat tia, na wayuu chajanakana kepiain suluʼu tü mmakat Bet-Semes, aʼajüshii waneirua kasa nümüin Jehová, oʼutushii saaʼin mürüt sümaa naʼajüin shia.
16 Neʼraiwaʼaya tia na jaʼraishiikana wayuu, na aluwataakana naaʼu na filisteokana, naleʼejaakalaka nachikuaʼa suluʼumüin tü mmakat Ecrón soʼuleʼeya kaʼikat tia. 17 Jaʼraisü shiyaakua tü ayuulii kanüliakat hemorroides, tü akumajuushikat süka ooro. Naluwataain na filisteokana tia nümüin Jehová süpüla nülatirüinjatüin sooʼopünaa naaʼin tü naainjalakat. Naluwataain wanee saaʼu tü mmakat Asdod, saaʼu tü mmakat Gaza, saaʼu tü mmakat Asquelón, saaʼu tü mmakat Gat otta saaʼu tü mmakat Ecrón. 18 Tü shiyaakua kookoocheʼerü asülajünakat nümüin Maleiwa, aapünüsü saaʼu tü pueulo eekai kasepüin otta saaʼu tü mma pejepünaakat sünain tü mma naluwataakalü aaʼu na jaʼraishiikana wayuu aluwataakana naaʼu na filisteokana.
Ichaayülia suluʼu nuumain Josué, chi chejeʼewaikai Bet-Semes, tü ipa eejatüle shiʼitaanüin tü kojon shiyaawasekat süpansaajünüin pütchi nümaa Jehová. Ayatayülia eein tia ipakat süpüla sotuinjatüin naaʼin na wayuukana tü kasa alatakat namüin. 19 Nuʼuta aaʼinchii Maleiwa na wayuu chajanakana suluʼu tü mmakat Bet-Semes süka neirakaain sümüin tü kojon shiyaawasekat süpansaajünüin pütchi nümaa Jehová. Nuʼuta aaʼinchii 50.070 wayuu, naʼyalajaka maʼin na wayuukana, jama wattain naalii na wayuu nuʼutakana aaʼin Jehová. 20 Anuukalaka nanüiki na wayuu chajanakana suluʼu tü mmakat Bet-Semes: «¿Jaraleena na wayuu arütkaajeenakana nümülatuʼu Jehová, chi Maleiwa wulekai akuwaʼipa? Kasataalejeseʼe nuʼunuin woulia sümaʼanamüin wayuu naata». 21 Naapirüinjeseʼe na wayuu chajanakana suluʼu tü mmakat Quiryat-Jearim sünain maa: «Neiteʼerüin na filisteokana tü kojon shiyaawasekat süpansaajünüin pütchi nümaa Jehová, anasü jüsaajüle shia yaajee».