Chiiruaajatka karaloʼuta Samuel
10 Outaka mapa Nahás, chi aluwataashikai naaʼu na ammonitakana. Niakalaka aluwataain nüchikumüin wanee nüchon kanüliashi Hanún. 2 Anuujeseʼe nünüiki David: «Amülialaajeerü taaʼin naalin Hanún, chi nüchonkai Nahás maʼaka sümülialaain naaʼin chi nüshikai taalin». Nüjütüinjeseʼe David na nüchepchiakana süpüla namülialajatüin naaʼin Hanún saaʼujee nünaajaain chi nüshikai. Shiasaʼa nantapa na nüchepchiakana David suluʼumüin noumain na ammonitakana, 3 namakalaka na aʼyataakana niʼipajee Hanún nümüin: «¿Nüjütüinche saaʼin pümüin David na nüchepchiakana süpüla namülialajatüin paaʼin saaʼujee kojutuin chi püshikai nümüin? ¿Nüjütataapa neʼe naya süpüla nanajüinjanain waaʼu jee süpüla nanajüinjanain saaʼu tü woumainkat shiiʼiree nashutajatüin saaʼu?». 4 Nütaʼüliraka Hanún na nüchepchiakana David, nüüjakalaka saʼata naʼliima, nüchotookoloko nasheʼin wanaapünaa sümaa neinnaluʼu jee nüjünajaainjeseʼe naya. 5 Aküjünüsüjeseʼe tia nümüin David, shiasaʼa sutuma nütüjaain saaʼu japülin naya wayuukana saalinjee tü aainjünakat namüin, nuluwataakalaka wayuu napanapa süpüla namüinjanain namüin: «Anashii makatüle jia Jericó, waneʼereeya jüleʼejüin shimiyoʼulaapa süchikuaʼa tü jüʼliimakat».
6 Nayaawataka saaʼu na ammonitakana naʼürülaanüin nutuma David saaʼujee tü kasa naainjakat, naluwataainjeseʼe wayuu suluʼumüin tü mmakat Bet-Rehob jee suluʼumüin tü mmakat Zobá süpüla nasakajüinjanain na wayuu sirio kepiakana suluʼu tia mmakat. Nasakajaka 20.000 surulaat, nasakajüinña chi aluwataashikai saaʼu tü mmakat Maacá namaʼaleeya 1.000 surulaat otta 12.000 surulaat chejeʼewalii suluʼujee tü mmakat Istob. 7 Nuluwataanakalaka Joab nutuma David naapapa süchiki tia, nuluwataain nia namaʼaleeya napüshuaʼa na surulaatkana, eejana naʼaka naya surulaatkana na yalayalakana maʼin aaʼin sünain atkawaa. 8 Noutkajaakalaka na ammonitakana soʼuluʼu tü pueulokot süpüla atkawaa, nayakajasa chajanain patajatshiipaʼa na wayuu sirio chejeʼewaliikana Zobá otta Rehob namaʼaleeya na wayuu chejeʼewaliikana Istob otta na wayuu chejeʼewaliikana Maacá.
9 Shiasaʼa niʼrapa Joab sejenain na siriokana nüpanapejee jee nüchiiruajee, nüneeküin waneinnua surulaat israelita atüjakana maʼin atkawaa, nuutkajeʼerakalaka naya süpüla atkawaa namaa na siriokana. 10 Niakalaka nüneeküin Abisái, chi nuwalakai süpüla niainjachin nekiipüʼüin na wane surulaat atkaainjanakana namaa na ammonitakana. 11 Anuujeseʼe nünüiki Joab nümüin: «Takanaluʼule piʼrüin natuma na siriokana, anashi püntüle sünain akaalinjaa taya, shiasaʼa teʼrüle pükanaluuin natuma na ammonitakana, takaalinjeechi pia. 12 Yalayalainjatü waaʼin jee meimmoluinjatü waaʼin süpüla watkaain naaʼujee na israelitakana jee saaʼujee tü mma nüpaajaakat wapüla chi Wamaleiwasekai. Naaʼinreeriaʼaya Jehová tü anakat saaʼin nümüin».
13 Nushutakalaka Joab namaa na wayuu nümaajanakana naaʼu na siriokana, napantajaakalaka na siriokana napüleerua. 14 Shiasaʼa neʼrapa tia na ammonitakana napantajaaka nüpüleerua Abisái, nekerotokoloko suluʼumüin tü pueulokot. Nüleʼejakalaka Joab Jerusalénmüin süchikijee atkawaa namaa na ammonitakana.
15 Noutkajaakalaka nachikuaʼa na siriokana sutuma nakanajuuin natuma na israelitakana. 16 Nuutkajeʼerakalaka Hadadézer na wayuu sirio chajanakana kepiain süʼütpaʼa tü Süchikat,* nantaka suluʼumüin tü mmakat Helam. Nia nekiipüʼüka Sobac, chi nekiipüʼükai nusurulaatse Hadadézer.
17 Süküjünapa tia nümüin David, nuutkajeʼerüinjeseʼe napüshuaʼa na surulaat israelitakana. Nülataka tü süchikat Jordán jee nüntakalaka suluʼumüin tü mmakat Helam. Noutkajaayaa namaka na siriokana süpüla atkawaa nümaa David. 18 Apantajaapejeʼe na siriokana napüleerua na israelitakana. Nuʼuta aaʼinchii David 700 wayuu oʼunirakana tü kareeta atkaayakat namaʼaleeya 40.000 sirio amaajuna. Oʼutuna aaʼinchi nutuma David nekiipüʼü na surulaatkana, chi kanüliakai Sobac. 19 Nachuntakalaka anajirawaa namaa na israelitakana na wayuu aluwataakana suluʼu tü mma nuluwataakalü aaʼu Hadadézer. Naaʼinrüin tia süka nakanajuuin natuma na israelitakana jee naʼyataakalaka namüin. Nnojoishii akaalinjünüin piantua na ammonitakana natuma na wayuu siriokana.