Palajatka karaloʼuta namüinjatka na chajanakana Corinto
8 Ashajüinjachi jooluʼu taya jümüin süchiki tü eküülü aapünakat sümüin shiyaakua tü maleiwayaasükalüirua. Watüjaa aaʼu wapüshuaʼa süchiki tia, eepejeʼe yaletüle waaʼin sutuma watüjaain saaʼu wanee kasa. Akaajasaʼa aire wayuu wapüla akatchinraasü saaʼin watuma. 2 Nütüjale wanee wayuu nüküjainruʼu süchiki wanee kasa, nnojotsüjaʼamata niyaawatüin saaʼu süpüshuaʼa tia. 3 Eere wanee wayuu aikai apüla Maleiwa, eʼraajünüshijaʼamata wayuukai chia nutuma Maleiwa.
4 Anashii yootule waya jooluʼu süchiki ekaa tü eküülü aapünakat sümüin shiyaakua maleiwayaasü. Watüjaa aaʼu nnojoluin maleiwain tia ayaakuaakat, waneeshia neʼe chi Maleiwakai. 5 Watta saalii tü maleiwayaasükalüirua. Eesü shia chaa sirumatuʼu jee eesü shia yaa mmapaʼa, akaataʼaya jooluʼu watta saalii tü «maleiwa» jee «señot» sümakalü amüin wayuu. 6 Wamüin wayakana waneeshia neʼe chi Maleiwakai, nia chi Washikai. Nia kakumalaka kasa süpüshuaʼa. Nukumala waya süpüla waainjain tü nuluwataakalü anain. Jee waneeshia neʼe chi Señotkai, nia Jesucristo, chi kanainjeejachikai kasa süpüshuaʼa. Akaʼaya wayakana, wayuushii waya nünainjee.
7 Nnojotpejeʼe shiyaawatüin saaʼu wayuu süpüshuaʼa tia makat. Eeshii wayuu aʼwaajapuʼukana tü shiyaakuakat maleiwayaasü. Neküle wanee eküülü aapünaka sümüin tü shiyaakuakat maleiwayaasü, müshi niakaijaʼa naʼwaajüin chi maleiwa kayaakuakai tia. Sumojujaakalaka tü naaʼinkat* saaʼu nnojoluin nayaawatüin saaʼu wanee kasa eekai anain jee eekai mojuin. 8 Nnojoishii arütkaain maʼin waya nünainmüin Maleiwa sutuma tü weküinkat. Meküinre waya nnojoleerü mojuleein maʼin tü wakuwaʼipakat. Akaataajaʼa joo weküle nnojoleerü anaʼleein maʼin tü wakuwaʼipakat suluʼujee tia. 9 Eejeepejeʼe jaaʼin suulia jüneeküin wanee kasa eekai kaainjalain atuma chi isayüikai achiki niyaawatüin saaʼu tü kasa eekai anain jee tü kasa eekai mojuin. 10 Pütüjaa aaʼu nnojoluin kasain anain apüla tü shiyaakuakat maleiwayaasü. Eepejeʼe süpüla piʼnnüin sünain ekawaa suluʼu tü aʼwaajüleekat shiyaakua maleiwayaasü nutuma wanee wayuu eekai isayülüin nüchiki niyaawatüin saaʼu wanee kasa eekai anain jee eekai mojuin. Eekalaka süpüla anain nüküjainruʼu chia wayuukai ekaa tü eküülü aapünakat sümüin shiyaakua maleiwayaasü. 11 Mayaainjeʼe pütüjaain saaʼu nnojoluin mojuin ekaa tia eküütkat, pumojujain neʼe nunoula chi anoujashi isayüikai achiki ayaawataa saaʼu wanee kasa eekai anain jee eekai mojuin. Soto paaʼin naapajiraain nikii Cristo naaʼu chia puwalakai. 12 Kaainjaleena jia nuulia Cristo müle tü jaainjalakat namüin na juwalayuukana jee jaainjirüle naya wanee kasa eekai mojuin, jama isayülüin nachiki nayaawatüin saaʼu wanee kasa eekai anain jee eekai mojuin. 13 Nnojoireejaʼa teküinjachin asalaa piantua, jama sumojujaain nunoula chi tawalakai sutuma tia. Nnojoireejaʼa taya aaʼinrajachin wanee kasa eekai sümalajaain atuma nunoula wanee tawala.