Tü nüshajalakat Mateo

13 Soʼu kaʼikat tia, nujuʼitaka Jesús paülüʼüjee, nüikalaaka sotpaʼa tü palaakat. 2 Antapaatüsü watta maʼin saalii wayuu nünainmüin Jesús. Noʼotooka suluʼu wanee anuwa jee nüikalaaka suluʼu. Eekajasaʼa na wayuukana, shaʼwashawatshii sotpaʼa tü palaakat. 3 Nikirajaka naya sünain wainma kasa sümaa kayaawasein shia nutuma. Nümaka namüin: «Jülüjataa jaaʼin tüü, eejaittaa wanee wayuu apünajüshi. 4 Shiʼipaʼaya nüpünajüin, ejituusü süpüshi tü waüyeekat sotpaʼa tü wopukot, shikaka shia wüchii. 5 Eesü tü ejituukat saaʼu tü ipa arülakalü aaʼu mma, susonuwaayaa sümaka süka arülain mma saaʼu tü ipakat. 6 Niweetapa chi kaʼikai, ojulujaasü tü pünajütkat süka nnojoluin oʼutuin tü suuralakat. 7 Eesü tü ejituukat saʼaka mojuui keipüsesü, sujulujaaka miyoʼupa tü mojuui keipüsesükat. 8 Eepejeʼe tü ejituukat saaʼu mma anasü, kachonkalaka shia. Eesü tü pünajüt polookat shikii süchon, eesü tü aipiruakat shikii süchon otta eesü tü apünüinkat shikii süchon. 9 Eekai kacheʼejüin sümüin tü pütchikat naapaainjatü amaa».

10 Narütkaaka na nikirajüinkana nünainmüin sümaa namüin nümüin: «¿Jamüsü kayaawaseka putuma tü pikirajakalü anain naya?». 11 Anuujeseʼe nünüiki Jesús namüin: «Jia ayaawataka saaʼu tü kasa nütüjaakalü aaʼu Maleiwa, jama nuluwataajeechin chejee iipünaajee, eekajasaʼa nayakana nnojotsü nayaawatüin aaʼu. 12 Chi wayuu eekai amaʼana wanee kasa, aapüneerü sooʼomüin nümüin, wainmaleejeetkaʼa kasa nümaʼana. Eekajasaʼa chi nnojoikai eein amaʼana wanee kasa, asütüneerü nuulia tü eekat nümaʼana. 13 Müsüjeseʼe kayaawasein tanüiki tekirajapa naya. Koʼushii naya, nnojotpejeʼe kasain neʼrüin. Kacheʼeshii naya, nnojotpejeʼe kasain naapüin otta nnojotsü kasain nayaawatüin aaʼu. 14 Shia jaʼyaka naaʼu tü nümatüjütkalia Isaías chi nünüikimaajachikai Maleiwa, tü makat mayaa: ‹Nnojoleerü kasain jiyaawatüin aaʼu mayaainjeʼe kacheʼein jia, nnojoleerü kasain jiʼrüin mayaainjeʼe koʼuin jia. 15 Wayuu iche aaʼinchii jia, jüsürülüin tü jücheʼekat sümaa tü joʼukot süpüla nnojoluinjatüin jiʼrüin wanee kasa, süpüla nnojoluinjatüin jaapüin shia, süpüla nnojoluinjatüin jiyaawatüin saaʼu jee süpüla nnojoliinjanain jüleʼejüin nünainmüin Maleiwa shiiʼiree anainjanain jia tatuma›.

16 »Anakuwaʼipalii jia süka jiʼrüin wanee kasa jee süka jaapüin wanee kasa. 17 Wainma na nünüikimaajanakana Maleiwa otta na wayuu lotokana akuwaʼipa eʼreekana tü kasa jiʼrakat maaʼulu yaa. Nnojotpejeʼe shia neʼrüin jee nnojotsü naapüin süchiki.

18 »Jülüjataa jaaʼin jamaluʼuluin tü tekirajakat nüchiki chi apünajüikai. 19 Chi wayuu mayaawatüinkai saaʼu tü pütchi naapakat süchiki nuluwataajeechin Maleiwa, müshi aka saaʼin tü waüyee ejituukat sotpaʼa tü wopukot. Asütünüsü tü pütchikat suluʼujee naaʼin chi wayuukai nutuma chi Yolujaakai. 20 Tü waüyee ejituukat saaʼu tü ipa arülakalü aaʼu mma, müsü aka naaʼin chi wayuu aapakai tü pütchikat sümaa talatüin maʼin naaʼin. 21 Nnojotpejeʼe shia ichein suluʼu naaʼin, motsomüin neʼe nunoujain. Sülatapa nümüin kasa mojusü jee nüpüleeruaanapa aaʼin saaʼujee nunoujain, ooʼulaashi nia suulia anoujaa. 22 Tü waüyee ejituukat saʼaka mojuui keipüsesü müsü aka naaʼin chi wayuu aapakai tü pütchikat, nnojotpejeʼe sütanalüin naaʼin süka shapaakuʼu sümüin naaʼin saaʼu tü kasa eekat maaʼulu otta sümalajaaka nunoula sutuma washireein nia. Müshi nia aka saaʼin wanee wunuʼu eekai machooin. 23 Tü waüyee ejituukat saaʼu mma anasü müsü aka naaʼin chi wayuu aapakai tü pütchikat sümaa niyaawatüin saaʼu. Müshi nia aka saaʼin wanee pünajüt eekai kachooin. Eesü tü pünajüt polookat shikii süchon, tü aipiruakalü shikii süchon otta eesü tü apünüinkat shikii süchon».

24 Nikirajaka naya sünain wane kasa sümaa kayaawasein shia nutuma, nümaka namüin: «Aluwataajeechi Maleiwa chejee iipünaajee. Tia müsü aka saaʼin nukuwaʼipa wanee wayuu apünajakai wanee waüyee suluʼu niyüüjain. 25 Wanaa sümaa natunkajüin na wayuukana, antüshi chi naʼünüükai nooʼopünaa. Nüpünajaka mojuui saʼaka tü trigokat, oʼunaajaʼa nümüin süchikijee tia. 26 Susonuwaapa tü trigokat sümaa keʼichijain shia, shiweenuwaaka tü mojuuikat saʼakapünaa. 27 Nantapaaka na achepchieekana sümaa namüin nümüin chi nalaamainkai: ‹Walaamainkale, ¿aashin püpünajüin trigo suluʼu tü yüüjakat?, ¿jamakaʼa susonuwaaka neʼe mojuui?›. 28 ‹Wayuusa kasitka tüü, niajaʼa wanee taʼünüü›, nümaka chi nalaamainkai namüin. ‹¿Jameetka sukuwaʼipa?›, ‹¿wasüʼüjaainjatü?›, namaka nümüin. 29 Nusoutakalaka chi nalaamainkai namüin: ‹Nnojo, müleka jüsüʼüjaale shia, eesüjaʼa süpüla shiyuunaʼaleein tü trigokat wanaa sümaa. 30 Juuʼulaa miyoʼuiwa shia piamaleʼeya. Soʼu tü kaʼi sükotchojünajatkalü oʼu, taluwataajeena na tachepchiakana süpüla nasholojuin tü mojuuikat, nakaülajeerü sümaa nojotuin shia soʼu siki. Mapa taluwataajeena naya süpüla nakotchojüin tü trigokat jee nanaajaain shia suluʼu tü anaajüleekat süchon pünajüt›».

31 Nikirajaka naya sünain wane kasaya sümaa kayaawasein shia nutuma. Nümaka namüin: «Aluwataajeechi Maleiwa chejee iipünaajee. Tia müsü aka saaʼin süʼü ‹mostaza› nüpünajaka wanee wayuu suluʼu niyüüjain. 32 Mayaainjeʼe joʼuuchon maʼin tü süʼükat ‹mostaza›, miyoʼu maʼin shia süpünajünapa suulialeʼeya tü wunuʼulia suluʼukat tü yüüjakat. Sukumajüin shipia wüchii saaʼu sütüna tia wunuʼukat».

33 Nikirajaka naya sünain wane kasaʼaya sümaa kayaawasein shia nutuma. Nümaka namüin: «Aluwataajeechi Maleiwa chejee iipünaajee. Tia müsü aka saaʼin soolojia pan süpalirajaaka wanee wayuu sümaa poloo kilo ariina. Soolojooko tü ariinakat sutuma».

34 Kayaawasesü nutuma Jesús süpüshuaʼa tü nikirajakalü anain wayuu, nnojotsü eein wanee kasa mayaawaseka nutuma. 35 Sünainjee tia ekeraajüsü tü nümakat chi nünüikimaajachikai Maleiwa, tü makat mayaa: «Kayaawaseerü tatuma tü tekirajakalü anain, taküjeerü tü nnojoyütkalia atüjaanüin aaʼu soʼujeʼereeya shiʼitaanüin shikii wayuu».*

36 Nüjütapa Jesús na wayuukana, ekerotushi nia suluʼumüin tü miichikat. Nüsakinnaka natuma na nikirajüinkana, namaka nümüin: «Püküja wamüin kasain kayaawasein putuma tü mojuui pikirajakalü achiki». 37 Nümaka Jesús namüin: «Chi wayuu apünajakai waüyee nia chi Süchonkai Wayuu. 38 Tü yüüjakat naya na wayuu manoujainsaliikana. Tü waüyeekat naya na wayuu ounejaanakana nutuma Maleiwa süpüla aluwatawaa. Tü mojuuikat naya nüchonnii chi Yolujaakai. 39 Chi apünajakai tü mojuuikat nia chi Yolujaakai. Sukotchojunapa tü pünajütkat shia sülüʼülaapa sükalia süpüla sajaʼttajatüin tü kasa alatakat sainküin mma otta na akotchojüliikana naya na aapieekana. 40 Maʼaka süsüʼütünüin tü mojuuikat jee saʼajünüin soʼu siki, meeria neʼe sukuwaʼipa tü alatakat sülüʼülaapa sükalia süpüla sajaʼttajatüin tü kasa alatakat sainküin mma. 41 Ajütüneena na aapieekana nutuma chi Süchonkai Wayuu süpüla nasünneʼerüinjatüin tü kaainjalakalü atuma wayuu otta na wayuu aainjakana kasa mojusü. Alateerü tia nuluwataapeena Maleiwa. 42 Meena nojutunakai aaʼin soʼu siki. Cheena aʼyalajüin naya sümaa kepisaneerüin nai. 43 Nuluwataapeena Maleiwa, meena warattuuikai naaʼin na wayuu oonookana sümaa nünüiki chi Nashikai maʼaka warattuuin wanee kasa nutuma chi kaʼikai. Eekai kacheʼejüin sümüin tü pütchikat naapaainjatü amaa.

44 »Aluwataajeechi Maleiwa chejee iipünaajee. Tia müsü aka saaʼin wanee korolo nüntaka anain wanee wayuu suluʼu wanee mma, nuunjulaka shia süchikuaʼa. Talatüsü maʼin naaʼin chia wayuukai, nüiküinjeseʼe süpüshuaʼa tü kasa eejatkat nümaʼana süpüla niyaʼlajüin tü mma eejatüle nuunjulüin tia korolokot.

45 »Aluwataajeechi Maleiwa chejee iipünaajee. Tia müsü aka naaʼin wanee oikaai oʼunajaakai wattamüin sünain achajawaa kaaʼürüla* eekai anain maʼin. 46 Nüntapa sünain wanee kaaʼürüla anasü maʼin, nuikanajaain süpüshuaʼa tü kasa eejatkat nümaʼana süpüleerua niyaʼlajüin shia.

47 »Aluwataajeechi Maleiwa chejee iipünaajee. Tia müsü aka saaʼin wanee kusu ojutünakat shiroku palaa, wattakaʼa maʼin saalii jime süsirü. 48 Shipirajaapa tü kusukot najarattüin shia na olojuliikana sotpaʼamüin tü palaakat. Nakatajayaa namaka tü jimekat, tü eekai anain neʼitaain suluʼu tü süpülajanakat, tü eekai mojuin nojutuin. 49 Meerüjaʼa neʼe sukuwaʼipa sülüʼütpa sükalia süpüla sajaʼttajatüin tü kasa alatakat sainküin mma. Akatanneena natuma na aapieekana na wayuu lotokana akuwaʼipa noulia na mojulaashiikana. 50 Meena nojutunakai aaʼin soʼu siki. Cheena aʼyalajüin naya sümaa kepisaneerüin nai.

51 »¿Jiyaawata aaʼu süpüshuaʼa tü tekirajüinnapakalü anain jia?». «Aa, wayaawata aaʼu», namakalaka nümüin. 52 Anuujeseʼe nünüiki Jesús namüin: «Jiyaawatülejeʼe saaʼu tia, jülüja jaaʼin tü tamüinjatkat jümüin. Chi wayuu ekirajüi atüjaakai saaʼu nuluwataainjachin Maleiwa chejee iipünaajee, müshi aka naaʼin wanee wayuu laülaakai saaʼu nipia. Niyuʼluin saʼakajee tü korolo kojutusü eekat nümaʼana kasa eekai jeketüin jee kasa eekai laülaairüin».

53 Süchikijee kayaawasein nutuma Jesús tü nikirajakalü anain, nuʼunaka yalejee. 54 Nüntapa chaa nuumainpaʼamüin, nikirajaka wayuu suluʼu tü ekirajüleekat nüchiki Maleiwa. Ponusü maʼin naaʼin na wayuukana tü nümakat, namajiraaka: «¿Jaraiche kekiikai atuma wayuukai chii? ¿Jaraiche pülaka atuma nia süpüla nuuntajatüin naaʼinrüin kasa pülasü? 55 ¿Aashin niayaain nüchon chi kuʼyamaikai süka taapüla? ¿Nnojoishi niain süchon María? ¿Aashin niayaain chi nuwalakai Santiago, José, Simón jee müshia Judas? 56 Anuupejeʼe tü nushunuukalüirua kottuin wamaa. ¿Jalejeekuwat maʼin nüpüla tia makat?». 57 Manoujainkalaka wayuu nünain sünainjee tia. Nümaka Jesús namüin: «Chi nünüikimaajachikai Maleiwa kojutushi atumawaa suluʼupünaa wanee mma naatajatü. Eekajasaʼa nuumainpaʼa jee nipialuʼu mojutusai atumawaa». 58 Nnojotka wainmain kasa pülasü naainjaka chayaa sutuma manoulain naya.