Karaloʼuta namüinjatka na chajanakana Filipos
1 Karaloʼutakat tüü, tashajala tayakai Pablo, anii tamaa chi wawalakai Timoteo, nüchepchia waya Cristo Jesús, jümüinjatü jüpüshuaʼa jia anoujashii chakana Filipos, jia paaʼinwakana nümaa Cristo Jesús. Namüinjatü shiaya na laülaashiikana otta na neʼipajanakana.
2 Kasataalejeseʼe kamaneein jümüin chi Maleiwakai, chi Washikai otta jimatüin jaaʼin nutuma jee nutuma chi Señotkai Jesucristo.
3 Taapüin analuʼutkat waneepia nümüin Maleiwa sotowaipa jia taaʼin. 4 Talatüshi maʼin taya toʼuraajawaipa maʼin nümüin chi Maleiwakai jüpüleerua. 5 Talatüshireʼeya taya süka jiʼikajüin tü pütchi anakat maʼin* sümüin wayuu, soʼujeʼereeya tü palajatkat kaʼi jaapaka oʼu shia sünainmüinreʼeya maaʼulu yaa. 6 Shiimain maʼin nükaalinjeenain jia Maleiwa süpüla jikeraajüin tü aʼyatawaa naainjakat jüpüleerua, ayateeria naainjain tia süntaleepaʼaya nükalia Cristo Jesús. 7 Pansaasü tü jülüjakat taaʼin jüchiki süka alin maʼin jia tapüla. Jükaalinjain taya süka aniiyülinña taya püreesain taashajaainjachipa noʼupala na sülaülashiikana mma süpüla süküjünüinjatüin tü pütchi anakat maʼin. Weʼrüin nümanee Maleiwa suluʼujee tia.
8 Nütüjaa aaʼu Maleiwa teʼreein maʼin jia jee nütüjaa aaʼu alin jia tapüla maʼaka alin jia nüpüla Cristo Jesús. 9 Ayatüshia taya oʼuraajüin süpüla aijiraainjanain jia jee pansaainjatüin tü junoujakalü anain sümaa jiyaawatüin saaʼu sukuwaʼipa wanee kasa. 10 Achuntushi maʼin taya jüpüleerua süpüla jiyaawatüinjatüin saaʼu kasain maʼin choʼujaain süpüla jaaʼinrajatüin, nnojoleetka eein wanee kasa mojeetkalü aluʼu jukuwaʼipa jee jaainjain wanee kasa mojushiijeetka sümüin wayuu süntaleepaʼaya nükalia Cristo. 11 Achuntushi maʼin taya jüpüleerua nümüin Maleiwa süpüla anainjatüin jukuwaʼipa sünainjee süpüshuaʼa tü kasa naainjakat Jesucristo wakajee, kojuteechika jee nuʼwaajüneechika Maleiwa suluʼujee tia.
12 Tawalayuwaa, anasü jütüjaale saaʼu wattakuarüleeinña tü pütchi anakat maʼin sutuma tü kasa alatakat tamüin maaʼulu yaa. 13 Atüjaana aaʼuchi püreesain taya sünainjee toushikajaain süchiirua nukuwaʼipa Cristo, natüjaa aaʼu tia na surulaat aaʼinmajakana nipia chi aluwataashikai jee sütüjaa aaʼu tia wayuu. 14 Na anoujashii aʼyataakana nümüin chi Señotkai katchinreesia naaʼin sünainjee neʼrüin püreesain taya, yalayalaleesia naaʼin sünain aküjaa tü nünüikikat Maleiwa sümaa meimmoluin naya.
15 Shiimain eein waneinnua wayuu aküjakana pütchi nüchiki Cristo süka nayoujireʼerüin neʼe tü nakuwaʼipakat jee achunjiraashii neʼe naya. Eepejeʼe na aküjakana tü pütchikat sünainjee eein kasa anasü suluʼu naaʼin. 16 Naya wayuu aküjakana pütchi nüchiki Cristo, naainjain tia süka alin nia napüla, jama natüjaain saaʼu taneekuushin süpüla asoutaa saaʼu tü pütchi anakat maʼin. 17 Eekajasaʼa na waneinnua aküjashii neʼe pütchi süpüla eeinjatüin mojujirawaa natuma, mojusü tü kasa suluʼukat naaʼin. Shia neʼe keeʼireeka naaʼin teʼrüinjachin tamüliala sümaʼainruʼu püreesain taya. 18 ¿Kasakaʼa eein suluʼujee tia? Shia eeka süküjünüin pütchi nüchiki Cristo sümüin wayuu, jaʼitasüjaʼa nüküjain shia wanee wayuu süka naaʼin jee nnojorülejeʼe müin shia nutuma. Talatapejeʼe taaʼin sünainjee tia jee ayateeria talatüin taaʼin. 19 Tatüjaa aaʼu toʼtteʼenneechin sükajee tü nüpülainkat Maleiwa, tü naapakat wamüin Jesucristo jee sükajee juchuntuin maʼin tapüleerua. 20 Pansaasü tia sümaa tü tachekakalü achiki jee nnojoleechi taya eʼrüin japülii sünainjee. Nnojotsü eein wanee kasa ataʼülajatka takuwaʼipa süpüla taküjain pütchi jee suluʼujee tia kojuteechi tatuma Cristo maʼakaapuʼu shia, jaʼitasü katüin toʼu jee outulejeʼeya taya.
21 Katüle toʼu kojuteechi Cristo tatuma jee outulejeʼeya taya, eʼreechi taya anaa suluʼujee tia. 22 Ayatüinjachirejeʼeya katüin toʼu,* ayateeria taaʼinrüin tü taʼyataapüʼükalü anain, nnojotpejeʼe tatüjaain saaʼu kasain anain tamüin, outulejeʼeya taya jee katülejeʼeya toʼu. 23 Wainmajüsü taaʼin saaʼu tü taneekajatkat, shia tachekaka taashinjatüin takuwaʼipa süpüla chainjachin taya nümaa Cristo, shia anaʼleeka maʼin tia. 24 Aneetpejeʼe jukuwaʼipa ayatüle katüin toʼu. 25 Tatüjaa aaʼu meerüinña takuwaʼipa, eejeechikalaka taya jümaa shiiʼiree sükooʼomüinraainjatüin junoula jee shiiʼiree talatajatüin jaaʼin sünain anoujaa. 26 Chapeena taya tachikuaʼa jümaʼanamüin, akooʼomüinraajeerü jümüin talatüin jaaʼin tanainjee saaʼujee juushikajaain süchiirua nukuwaʼipa Cristo Jesús.
27 Anakajaʼa pansaale jukuwaʼipa wanaapünaa sümaa tü pütchi anakat maʼin nüchiki Cristo, jaʼitashi chain taya jümaa jee nnojoirejeʼeya chain taya jümaa, kasataalejeseʼe taapüin süchiki anain jukuwaʼipa jee ichein tü junoulakat sümaa paaʼinwain jia sünain aküjaa tü pütchi anakat maʼin. 28 Nnojo mmoluin jia neema na jiʼipolokana. Sutuma yalayalain maʼin jaaʼin, natüjaajeerü aaʼu naya wayuukana najaʼttinneenain, oʼtteʼenneenapejeʼe jia, nükajeejatü Maleiwa tia makat. 29 Nnojoishii neʼe aneekünüin jia süpüla junoujainjanain nünain Cristo, aneekünüshiʼiya jia süpüla jiʼrüin müliaa saaʼujee junoujain nünain. 30 Müshiijeseʼe jiʼrüin müliaa maʼaka tü müliaa teʼrapuʼukat, jütüjaa aaʼulu ayatüinña teʼrüin tia müliaakat.