Génesis
22 Süchikijee tia, suuʼulakünaka naaʼin Abrahán nutuma chi shiimainshikai suluʼu Maleiwain, anuu nünüiki: «Abrahánkalee». «Anii taya», nümakalaka Abrahán nümüin. 2 Anuukalaka nünüiki Maleiwa nümüin: «Pümaa Isaac, chi waneeshikai püchon, chi aikai maʼin püpüla jee puʼuna nümaa eemüin tü mmakat Moria, puʼuteechikalaka naaʼin chamüinña sümaa paʼajeechin nia saaʼu wanee uuchi teeʼiyateetka pümüin».
3 Nütamaakalaka Abrahán wattachon maalü, yapajaka nutuma nüpüliiküse, nuchuntakalaka namüin piamashii nüchepchia süpüla noʼunajanain nümaa jee nümaa Isaac, chi nüchonkai. Nüshottaka siki sukuwainjatü tü nüsülajüinjatkat nümüin Maleiwa, nuʼunakalaka chai nukua eere nüjütüin nia chi shiimainshikai suluʼu Maleiwain. 4 Apünüinpa naya kaʼi süchikijee noʼunuin, niʼrüin Abrahán kaʼyatajee tü mma eeinjanale naya. 5 Anuukalaka nünüiki Abrahán namüin na nüchepchiakana: «Sejeeshi paa taya nümaa chi tachonkai, aʼwaajüinjana waya Maleiwa, yaashii paa jia nümaa chi püliikükai, aleʼejeena joo waya wachikuaʼa».
6 Noʼotoko Abrahán tü siki sukuwainjatkat tü nüsülajüinjatkat nümüin Maleiwa nunuloʼu Isaac. Niaka alüʼüjain tü sikemechikat otta tü rüikat, noʼunakalaka piamaleʼeya. 7 Anuukalaka nünüiki Isaac nümüin Abrahán: «Tashikalee». «¿Kasa wayu tachee?», nümakalaka Abrahán nümüin. Nüsakitkalaka joo nia Isaac: «Anuusaʼa tü sikemechikat otta tü sikikat, ¿jalakaʼa joo tü anneerü woʼutajatkalü aaʼin süpüla waʼajüin nümüin Maleiwa?». 8 «Tachee, nnaweerüjaʼa nutuma Maleiwa tü anneerü woʼutajatkalü aaʼin süpüla waʼajüin nümüin», nümakalaka Abrahán nümüin. Ayatakaʼaya naya sünain waraittaa.
9 Nantakalaka mapa suluʼumüin tü mma eeʼewaliire naya maʼaka nüküjatüjülin chi shiimainshikai suluʼu Maleiwain nümüin Abrahán, nukumajaka joo yala wanee aʼajülee jee niʼitaaka tü sikikat saaʼu, nijittaa nümüsüjaʼa nuuʼui otta najapü Isaac, niʼitaaka nia saaʼu tü sikikat. 10 Naapaa nümüsüjaʼa Abrahán tü rüikat süpüla nuʼutajachin naaʼin chi nüchonkai. 11 Nuunejünaka joo Abrahán chaa iipünaajee nutuma wanee aapiee nümaʼanajeejachi Jehová sümaa nümüin nümüin: «Abrahán, Abrahánkalee». «Anii taya», nümakalaka nümüin. 12 Anuu nünüiki chi aapieekai nümüin Abrahán: «Nnojo puʼutuin naaʼin chi püchonkai, nnojo jamajüin nia putuma, tatüjaaitpa aaʼu kojutuin pümüin Maleiwa, nnojoishi paʼalijirüin chi püchonkai suulia outaa mayaainjeʼe waneeshin nia pümüin». 13 Niʼrakalaka Abrahán kaʼyatajee wanee anneerü toolo akoʼojookai oʼuwa sünain sütüna wunuʼu joʼuuchon, nüsaajakalaka chi anneetkai süpüla nuʼutuin naaʼin jee naʼajüin nia nümüin Maleiwa niiʼirakaluʼu chi nüchonkai. 14 «Nieechi Jehová aapaka wanee kasa»* müsü sünülia tia mmakat nutuma Abrahán. «Nieechi Jehová aapaka wanee kasa eekai choʼujaain wamüin saaʼu nuʼuuchise», mayülia sünüiki wayuu maaʼulu.
15 Ounejünüshi joo Abrahán nüchikuaʼa chaa iipünaajee nutuma chi aapiee nümaʼanajeejachikai Jehová 16 sümaa nümüin nümüin: «Anuu nünüiki Jehová: ‹Saaʼu paaʼinrüin tia jee saaʼu nnojolin paʼalijirüin suulia puʼutuin naaʼin chi waneeshikai püchon, tapansaajüin tanüiki pümüin taaʼujiraa, 17 shiimain maʼin aneerüin pukuwaʼipa tatuma jee wainmeena maʼin na püikeyuukana maʼaka tü shüliwala chakalü iipünaa jee maʼaka saaʼin jasai eeka sotpünaa palaa. Aʼlaülaajaweena na püikeyuukana saaʼu napueulose na naʼünüükana. 18 Aneeriaʼaya sukuwaʼipa wayuu maʼleekalia nanainjee na püikeyuukana, meerü shia saaʼujee poonooin sümaa tanüiki›».
19 Nüleʼejaka Abrahán mapa eemüin na nüchepchiakana, naleʼejaka nachikuaʼa napüshuaʼaya Beer-Sebamüin eere ayatüin kepiain Abrahán.
20 Süküjünaka mapa nümüin Abrahán: «Kachonsüsaʼa Milcá nümüin Nacor, chi puwalakai. 21 Uz nünülia chi epayaakai, Buz nünülia chi nutujeejachikai, eeshiaʼaya Quemuel chi nüshikai Aram. 22 Anaa nooʼomüin na süchonniikana Milcá: Késed, Hazó, Pildás, Jidlaf jee müshia Betuel». 23 Niaka süshin Rebeca Betuel. Mekiisatshii na süchonniikana Milcá nutuma Nacor, chi nuwalakai Abrahán. 24 Eekalaka wane suwalaʼata nuʼwayuuse Nacor, Reumá sünülia, anuuka nanülia na süchonniikana: Tébah, Gaham, Tahas otta müshia Maacá.