Palajatka karaloʼuta nümüinjatka Timoteo
1 Karaloʼutakat tüü tashajala tayakai Pablo, aluwataaushi taya nutuma Cristo Jesús, jama shiain nuluwataain anain tia chi Maleiwakai, chi oʼtteʼerakai waya jee shia nuluwataaka anain Cristo Jesús, chi weʼreechikai anainjee kasa anasü. 2 Karaloʼutakat tüü pümüinjatü piakai Timoteo. Shiimainña müin pia maʼaka naaʼin wanee tachon tamüin sünain tü anoujaakat:
Kasataalejeseʼe kamaneein pümüin chi Washikai Maleiwa jee nümülialaain naaʼin paalin otta jimatüin paaʼin nutuma jee nutuma Cristo Jesús, chi Waseñotsekai.
3 Wanaa sümaa yapajüin taya süpüla toʼunajachin Macedoniamüin, tachuntuin pümüin makatajachin pia chaa Éfeso. Tachuntuinña pümüin jooluʼu puluwataainjanain waneinnua wayuu süpüla nooʼulaainjanain suulia nekirajüin sünain wanee kasa naata suulia tü wekirajakalü anain. 4 Nnojoliinjana kacheʼejüin naya sümüin wanee alawaa jee sümüin tü ashajünakat süchiki nanülia natuushinuu. Nnojotsü kasain saamüin tia, shiʼyounnain neʼe wayuu. Nnojotsü shiain wanee kasa anaka atuma junoula, jama nnojoluin nümaʼanajeejatüin shia Maleiwa. 5 Tü taluwataakalü anain jia süpülajatü shiimainjatüin maʼin aijiraain waya, wuleinjatüin tü suluʼukat waaʼin* jee kanoulainjanain waya sümaa nnojoluin piamain woʼupünaa. 6 Eeshii waneinnua anoujashii nnojoliikana jamajanain amüin tia. Shia neʼe jülüjaka naaʼin naʼülüjiraain süchiirua wanee kasa nnojotka kasain anain apüla. 7 Ekirajeeshii naya sünain nünüiki Maleiwa, nnojotpejeʼe nayaawatüin aaʼu tü kasa naashajaakalü achiki jee tü kasa macheʼekalü achiirua naya.
8 Watüjaa aaʼu anain sukuwaʼipa tü Pütchi Aapünakat nümüin Moisés müleka lotule sukuwaʼipa atumawaa. 9 Tü pütchi nuluwataakalü anain Maleiwa nnojotsü nüpülajatüin chi wayuu lotokoi akuwaʼipa, namüinjatü na wayuu nnojoliikana oonooin sümaa tü nuluwataakalü anain Maleiwa, na eʼrüliikana wayumüin, na aainjakana kasa mojusü, na kaainjaraliikana, na nnojoliikana waneepiain namaa na waneinnua,* na mojutukana amüin tü kasa nümaʼanajeejatkat Maleiwa, napülajatü shia na wayuu oʼutakana naaʼin nashi jee oʼutakana saaʼin nei, napülajatü na oʼunuliikana saaʼin wayuu, 10 napülajatü na wayuu aʼluwajiraakana nakuwaʼipa,* na wayuu jaleetshiikana, na achuntakana nneerü saaʼu wayuu eekai nataʼülüin, na aküjakana naʼalain, na nnojoliikana ekeraajüin nanüiki jee süpülajatü wayuu eekai nnojoluin saaʼinrüin tü sümakat tü pütchi anasü ekirajünakalü anain, 11 tü pansaakat maʼin sümaa tü pütchi anakat maʼin* nümaʼanajeejatka chi Maleiwa talatakai aaʼin, tü anuu joo eʼitaanüin tajapuluʼu.
12 Taapüin analuʼut nümüin chi Waseñotsekai Cristo Jesús, katchinsü taaʼin nutuma, nütüjaa aaʼuchi keraain taya süpüla taaʼinrajatüin wanee kasa eekai shiʼitaanüin tajapuluʼu, müshijeseʼe naapüin wanee aʼyatawaa tamüin. 13 Mojutupuʼusai Maleiwa tamüin, müliapuʼushii tatuma na anoujashiikana jee eʼrüitpuʼu taya wayumüin. Amülialaapejeʼe naaʼin Maleiwa taalin, jama taaʼinrüin tia sümaa nnojoluin tatüjaain saaʼu mojuin shia jee manoulapuʼusai taya. 14 Kamaneepejeʼe maʼin tamüin chi Waseñotsekai jee kanoulashi taya nutuma Cristo Jesús sümaa alin taya nüpüla. 15 Anuu wanee pütchi anoujunuinjatka anain jee aapaanajatka amaa: antüshi Cristo Jesús saʼakamüin wayuu süpüla nuʼtteʼerajatüin wayuu eekai kaainjaralüin. Taya kaainjaraireekajaʼa maʼin naʼakajee. 16 Amülialaapejeʼe naaʼin Maleiwa taalin mayaainjeʼe mojuin maʼin tü takuwaʼipakat. Eʼitaanüshi taya süpüla süshatünajatüin takuwaʼipa natuma na wayuu kanoulakana nünain Cristo Jesús, nnojoleechikalaka naashichijaain namüin jee kateetkalaka noʼu süpüla kaʼikat süpüshuaʼa.
17 Kasataalejeseʼe kojutuin atumawaa jee nuʼwaajünüin waneepia chi Aluwataakai süpüla kaʼikat süpüshuaʼa, chi matüjainkai outaa, chi meʼrujusaikai, chi waneeshikai suluʼu Maleiwain. Amén.*
18 Timoteo, tachonchee, taküjain tia pümüin wanaapünaa sümaa tü pütchi aküjünatüjütkalia paala püchiki süpüla ayatajachin pia maʼaka nukuwaʼipa wanee surulaat eekai atüjain atkawaa. 19 Ayataʼaya katsüin punoula jee anain tü suluʼukat paaʼin, eeshii na wayuu ayoutakana süchiki tia jee suluʼujee tia, amojujaasü tü nanoulakat maʼaka wanee anuwa eekai sumojujaain sutuma süsheʼetuuin sünain ipa eekai shiinaluʼuin palaa. 20 Müsü nukuwaʼipa Himeneo nümaa Alejandro, taapa ekiichii naya nümüin Satanás, jama mojutuin chi Maleiwakai namüin, kamaʼa nooʼulaajeenale suulia mojutuin Maleiwa namüin sükajee nanüiki.