Chiiruaajatka karaloʼuta nüshajalaka Pedro
3 Tawalayuu aishiikana tapüla, piamairü joo karaloʼuta taluwataaka jümüin süka tüü. Tasoʼirüin jaaʼin süpüla pansaainjatüin tü jülüjakat jaaʼin maʼaka tasoʼirüin jaaʼin suluʼu tü palajatkat karaloʼuta. 2 Taaʼinrüin tia süpüla sotuinjatüin jaaʼin tü naküjakat paala na nünüikimaajanakana Maleiwa jee tü nuluwataakalü anain chi Señotkai jee chi Oʼtteʼerakai waya, tü nüküjakat jümüin nakajee na aluwataaushikana. 3 Anuu tü jülüjainjatkat jaaʼin sülüʼütpa süpüla sajaʼttüin kasa mojusü: eejeerü wayuu emeeʼerajaaka süka tü kasa eekai anain jee shieerü neʼe naaʼinraka tü kasa suchuntaakat naaʼin. 4 Anuujeetkalaka nanüiki: «¿Jalapaʼa joo nia yaaichipalejeʼeya nia? Nnojotyülia kasain eeʼiratüin soʼujeʼereeya tü kaʼi nanaajaakalü oʼu na watuushinuukana, ayatüsiaʼaya sukuwaʼipa kasa maʼaka sukuwaʼipa niʼitaaiwaʼaya Maleiwa shikii wayuu».
5 Nnojotsü nanoujeein anain kakaliairüin sukumajuushin tü sirumatuʼukat jee sükatannüin tü mmakat suulia tü wüinkat, ayatakalaka pasanain shia sünain. Alatüsüjaʼaya tia süka nüküjalain shia Maleiwa 6 jee sükajee tia wüinsitkalaka na wayuu eejanakana soʼu kaʼikat tia. 7 Sükajee tü pütchi nujuʼitirakat Maleiwa, tü sirumatuʼukat jee tü mma eekat maaʼulu yaa akataluushi shia süpüla saʼajünüinjatüin süka siki jee akataluushi shia süpüla tü kaʼi süsalainjatkalü oʼu saainjala wayuu sümaʼaleeya tü kaʼi najaʼttinnüinjanakalü oʼu na wayuu mojutukana amüin Maleiwa.
8 Tawalayuu aishiikana tapüla, nnojo motuin jaaʼin pütchikat tüü, tü waneekat kaʼi müsü aka saaʼin miit juya nümüin Jehová* jee tü miitkat juya müsü aka neʼe saaʼin wanee kaʼi nümüin. 9 Eeshii waneinnua wayuu aküjakana kakaliain Jehová* süpüla nikeraajüin tü nümakat, nnojoipejeʼe nia kakaliain. Nnojoishi nia ashapajaain suulia amüloulin jia, aluʼu shiainjaʼa nücheküin shiyaawajaainjatüin wayuu süpüshuaʼa suulia saainjala. 10 Antalaʼa meerü tü nükaliakat Jehová* maʼaka naaʼin wanee kaʼruwarai antakai sünain aʼluwajaa. Nnojorülaʼa meerü tü sirumatuʼukat sutuma suʼloolo wanee kasa. Tü kasa akumajünakalü aka tü mmakat jee tü sirumatuʼukat, jaʼishaateerü maʼin sümaa sururuluin, sütüjaajeetka aaʼu wayuu süchiki tü mmakat jee süchiki tü kasa eekat suluʼu.
11 Sutuma sururuleerüin tia, jülüjeesü maʼin jaaʼin tü jukuwaʼipakat, wuleinjatü jukuwaʼipa jee jaaʼinrüinjatü wanee kasa ayaawatünaka akajee juʼwaajüin chi Maleiwakai. 12 Jaaʼinrüinjatü tia sümaʼainruʼu jaʼatapajüin jee jülüjain maʼin jaaʼin tü nükaliakat Jehová.* Soʼu kaʼikat tia, ajaʼttinneerü tü sirumatuʼukat süka siki jee aruruleerü tü kasa akumajünakalü aka tü mmakat jee tü sirumatuʼukat süka jaʼin maʼin shia. 13 Wacheka achikit jeketüinjatüin tü sirumatuʼukat sümaʼaleeya tü mmakat wanaapünaa sümaa tü nüküjatüjütkalia achiki Maleiwa. Loteerü sukuwaʼipa süpüshuaʼa tü kasa aaʼinnakat chaa sirumatuʼu jee yaa mmapaʼa.
14 Tawalayuu aishiikana tapüla, sutuma jaʼatapajüin tia, jaaʼinmaa maʼin wuleinjatüin jukuwaʼipa noʼuluʼu Maleiwa otta nnojoluinjatüin eein wanee kasa mojuka sünain sümaʼaleeya anajiraain jia. 15 Jülüjeesü jaaʼin nnojolin nüshapajaain chi Señotkai shiiʼiree juʼttaainjanain, müsüjaʼaya sukuwaʼipa tia maʼaka nüshajüin shia chi wawalakai Pablo, chi aikai maʼin wapüla. Nüshajüin tia sutuma kekiin maʼin nia nutuma chi Maleiwakai. 16 Shiaʼaya naashajaaka achiki Pablo tia suluʼu süpüshuaʼa tü karaloʼuta nüshajakat, eepejeʼe waneirua kasa kapüleeka süpüla nayaawatüin saaʼu na wayuu nnojoliikana ayaawatüin saaʼu wanee kasa. Na wayuu nnojoliikana pansaain anoula, neeʼiratüin sukuwaʼipa tia pütchikat jee müsiaʼaya neʼe sukuwaʼipa natuma tü Karaloʼuta Nüchikimaajatkat Maleiwa, ajaʼttinneenapejeʼe naya sünainjee tia naaʼinralakat.
17 Tawalayuu aishiikana tapüla, sutuma jütüjaaitpain saaʼu tia, eeja jaaʼin suulia jükayaleʼennüin suulia anoujaa maʼaka nakayaleʼennüin naya wayuukana natuma na aaʼinrakana kasa mojusü, sümatchinjaajeetka junoula sünainjee tia. 18 Suulialeʼeya sülatüin jümüin tia, shia anaka kamaneere chi Waseñotsekai Jesucristo jümüin, chi Oʼtteʼerakai waya jee ayataʼaya jikirajaain nüchiki. Kasataalejeseʼe nuʼwaajünüin maaʼulu yaa jee süpüla kaʼikat süpüshuaʼa. Amén.*