Génesis

18 Niiʼiyalaaka Jehová mapa nümüin Abrahán eekai tü wunuʼulia miyoʼuyuu chakat Mamré. Kaleʼujatü tia makat wanaa sümaa alin maʼin walatshi, joyotushi Abrahán soʼuluʼu tü nipia aainjuushikat süka loona. 2 Niirakaaka kayatamüin, niʼrakalaka apünüinshii wayuu shawashawalin. Niʼraiwaʼaya naya nütamaamaataka soʼuluʼujee tü nipiakat sünain apanapajaa naya, nüsapainkaka nia mmoluʼu. 3 Anuujeseʼe nünüiki Abrahán: «Jehovákalee, talatülejeʼe paaʼin tamaa, anashi pünaʼlaale tamüin tepialuʼupünaa. 4 Asaajireechi taya wüin suʼlojooya juuʼui, jeemerajeenakalaka neemioushi chira wunuʼukai. 5 Anaasaʼa jia antüin tamaʼanamüin, anakajaʼa tasaajülee kasa jiyaalü süpüla katchinjatüin jaaʼin, juʼuneenakalaka süchikijee». «Anakajaʼaya müleʼe shia putuma, püsaaja müsüjee», namakalaka nümüin.

6 Oʼunushijeseʼe Abrahán suluʼumüin tü nipiakat eemüin Sara sümaa nümüin sümüin: «Paapawaata poloo piamamüin kilo* ariina eekai anain maʼin, pümasaaja shia jee paainja pan süka». 7 Oʼunamaatüshijeseʼe Abrahán eere nümüʼlüin nüneekaka wanee paaʼachon nnojoyüikaiya ichein eʼirukuu, naapaka nia nümüin chi nüchepchiakai süpüla nüüjaainjachin nia jee nüʼlakajaainjatüin tü niʼirukukat. 8 Naapaaka mantequilla, leechi otta niʼiruku chi paaʼachon nüʼlakajeʼerakai, naapaka neküin na niʼiyoukana. Nüshaʼwalaaka naʼütpaʼa seemioushi tü wunuʼukot sujuunaluʼu nekaain.

9 «¿Jalasü Sara tü puʼwayuusekat?», namaka nümüin Abrahán. «Nna paülüʼü», nümakalaka namüin. 10 Anuujeseʼe nünüiki wanee naʼakajee: «Anteechi taya tachikuaʼa maaʼutpünaa yaa juyaka tüseena jee kachonjeetkalaka Sara, tü puʼwayuusekat». Yalajatü Sara aapajüin nünüiki chi wayuukai soʼuluʼu tü miichikat, jama yalajatüin tü miichikat nüchiiruajee chi wayuukai. 11 Wayuu laülaa Abrahán sümaa Sara soʼu tia, isaitpa süchiki Sara kachoinjatüin shia. 12 Süsirajaka Sara süleʼeruʼu sümaa sümüin: «Laülaairü taya, laülaaichi joo chi taʼwayuusekai,* ¿shiimainchejeʼeya kachonjeerüin taya?». 13 Anuukalaka nünüiki Jehová nümüin Abrahán: «¿Jamüsü süsirajakaʼa Sara? ¿Jamüsü machooinjatkaʼa shia saashin sutuma laülaairüin shia? 14 Nnojotsü kasain isain tachiki tayakai Jehová. Anteechi taya tachikuaʼa maaʼutpünaa yaa juyaka tüseena jee kachonjeetkalaka Sara». 15 Sainkuukalaka saaʼin Sara sümaa müin sünüiki: «Nnojotsü taya asirajüin». «Asirajüirüjaʼa pia», nümakalaka sümüin.

16 Natamajaakalaka na wayuukana süpüla noʼunajanain, niʼikajaaka naya Abrahán sümaa nüpütaain napüla. Neirakaakalaka sümüin tü mmakat Sodoma. 17 Anuujeseʼe nünüiki Jehová: «Nnojotsü süpüla tounjulajüin süchiki nuulia Abrahán tü kasa taaʼinrajatkat. 18 Watteerü maʼin saalii nüikeyuu Abrahán jee kojuteena naya atumawaa, aneerü sukuwaʼipa wayuu maʼleekalia nünainjee. 19 Teʼraajüinsa Abrahán, nuluwataajeena na nüikeyuukana otta na nüchonniikana sünain oonowaa tamüin tayakai Jehová, naaʼinrajatü kasa eekai lotuin akuwaʼipa jee kasa eekai anain. Tayakai Jehová, tekeraajeerü tü tamakat nümüin Abrahán».

20 Anuukalaka nünüiki Jehová: «Taapa achikirü sutuma wayuu, mojuin maʼin tü kasa naaʼinrakat na wayuu chakana Sodoma otta Gomorra. 21 Anainjaʼa tashakatüle tatüjaaiwa saaʼu shiimainrejeʼeya tü aküjünakat nachiki naya wayuukana jee shiimainre naaʼinrüin kasa mojusü, tatüjaajeeriaʼaya aaʼu alawaale tü aküjünakat nachiki».

22 Noʼunaka na wayuukana nümaʼanajee Abrahán chai nakua Sodomamüin, niaka makatüin Jehová nümaa Abrahán. 23 Nürütkaaka Abrahán nünainmüin Maleiwa sümaa nümüin nümüin: «¿Shiimainña pajaʼlajeʼerüinjatüin wayuu anamia sümaʼaleeya wayuu mojulaasü? 24 ¿Jama eere jaʼrai shikii wayuu anamia suluʼu tia pueulokot? ¿Ayateeria neʼe pajaʼttirüin wayuu süpüshuaʼa? ¿Puuʼulaataajeetpa katüin soʼu wayuu suluʼu tia pueulokot naaʼujee na jaʼraikana shikii wayuu anamia? 25 Nnojorüleejaʼa süpüla paaʼinrajatüin tia, nnojoishi süpüla puʼutuin naaʼin chi eekai anamiain saaʼujee naainjala chi eekai mojulaain. Nnojotsü süpüla paaʼinrüin tia namüin piamaleʼeya, nnojotsü maajüin sukuwaʼipa tia putuma. ¿Aashin shiain paaʼinrüin wanee kasa eekai lotuin akuwaʼipa, jama piain kasalajanain atuma saainjala wayuu maʼleekalia?». 26 Anuukalaka nünüiki Jehová nümüin: «Nnojoleerü tajaʼttirüin tü pueulokot Sodoma, eere jaʼrai shikii wayuu anamia suluʼu». 27 Asoutushijeseʼe Abrahán nümüin sünain maa: «Jehovákalee, shiimainña müin te’rüikai aaʼin wayumüin pümüin, asouteepejeʼe taya tachikuaʼa, shiimainsaʼaya wayuʼulaain neʼe taya.* 28 ¿Jama eere pienchi shikii jaʼralimüin wayuu suluʼu tia pueulokot? ¿Ayateeria pajaʼttirüin shia saaʼujee choʼujaain na jaʼraishiikana wayuu anamia?». «Nnojoleerü tajaʼttirüin shia eere pienchi shikii jaʼralimüin wayuu anamia», nümakalaka Maleiwa nümüin.

29 Nüsakitkalaka Abrahán nüchikuaʼa: «¿Jama eere pienchi shikii wayuu anamia?». «Nnojoleerü tajaʼttirüin tü pueulokolü eere pienchi shikii wayuu anamia», nümakalaka Maleiwa nümüin. 30 Asoutushijeseʼe Abrahán nümüin sünain maa: «Jashichijaya pia tamüin Jehová, asouteeshi taya tachikuaʼa. ¿Jama eere apünüin shikii wayuu anamia suluʼu tia pueulokot?». «Nnojoleerü tajaʼttirüin tü pueulokolü eere apünüin shikii wayuu anamia» nümakalaka Maleiwa nümüin. 31 Asoutushijeseʼe Abrahán nümüin sünain maa: «Jehovákalee, shiimainña müin te’rüikai aaʼin wayumüin pümüin, asouteepejeʼe taya tachikuaʼa. ¿Jama eere piama shikii wayuu anamia suluʼu tia pueulokot?». «Nnojoleerü tajaʼttirüin tü pueulokolü eere piama shikii wayuu anamia» nümakalaka Maleiwa nümüin. 32 Asoutushijeseʼe Abrahán nümüin sünain maa: «Jashichijaya pia tamüin Jehová, asouteeshi taya tachikuaʼa uwatuayaakalujeʼe neʼe. ¿Jama eere poloo wayuu anamia suluʼu tia pueulokot?». «Nnojoleerü tajaʼttirüin tü pueulokolü eere poloosü wayuu anamia», nümakalaka Maleiwa nümüin. 33 Nuʼunakalaka Jehová kettaapa naashajaain nümaa Abrahán jee nüleʼejakalaka Abrahán eemüin tü nipia aainjuushikat süka loona.