Karaloʼuta namüinjatka na chajanakana Roma
2 Nnojoishi piyoujainjachin wanee wayuu. Paaʼinrülejeʼeya tia piyaawata aaʼu mojuin tü paainjakat, shia piyoujaka neʼe tü pukuwaʼipakat. 2 Watüjaa aaʼu süsaleenain nutuma Maleiwa na makana akuwaʼipa, jama lotuin sukuwaʼipa* nutuma Maleiwa tü kasa naainjakat.
3 Süsalale wanee wayuu putuma saalinjee tü kasa paainjakaliajaʼa, ¿isajeeiche pia paaʼinruʼu soʼu tü kaʼi kasalajanainjatkalü oʼu saainjala wayuu nutuma Maleiwa? 4 ¿Nnojotsükai piyaawatüin saaʼu kamaneein Maleiwa pümüin jee nnojolin naashichijaamaatüin pümüin? ¿Nnojotsükai piyaawatüin saaʼu nükaalinjain pia Maleiwa süpüla piyaawajaainjachin suulia paainjala? 5 Soʼu tü kaʼi süsalainjatkalü oʼu saainjala wayuu nutuma Maleiwa, aashichijaweechi nia pümüin jee süsaleechi pia paainjala nutuma süka ayatüin macheʼein pia jee nnojolin puuʼulaweein suulia paainjala. 6 Anale nukuwaʼipa wanee wayuu eʼreechi nia kasa anasü, naainjale kasa eekai mojuin süsaleechi nia naainjala nutuma Maleiwa. 7 Na wayuu achajaakana sukuwaʼipa süpüla kojutuin naya noʼuluʼu Maleiwa jee na ayatakana aaʼinrüin tü kasa eekai anain, kateerü noʼu süpüla kaʼikat süpüshuaʼa, nnojoleerü ittüin neʼiruku. 8 Aluʼu jashicheechinjaʼa Maleiwa namüin na keejiakana amüin atkawaa jee na nnojoliikana aapaain sümaa tü pütchi shiimain nümaʼanajeejatkat. 9 Wainmeerü kasa mojusü alatakat nümüin chi wayuu aaʼinrakai tü kasa mojusükat otta eʼreechi nia müliaa, jaʼitashi chira eekai judíoin jee chira eekai griegoin. 10 Nayeenainjaʼa kojutuin nutuma Maleiwa na wayuu aaʼinrakana kasa anasü jee aneerü nakuwaʼipa nümaa. Nayeena eʼraka tia nutuma palajana na judíokana jee mapa na griegokana. 11 Nnojotsü koʼuin nukuwaʼipa Maleiwa sümüin wayuu.
12 Chi eekai kaainjalain sümaa nnojoluin nütüjaain saaʼu tü nuluwataakalü anain Maleiwa, outeechi jaʼitasü nnojoluin nütüjaain saaʼu. Niasaʼa chi eekai kaainjalain sümaa nütüjaain saaʼu tü nuluwataakalü anain Maleiwa, süsaleechi nia naainjala wanaapünaa sümaa tü nuluwataakalü anain Maleiwa. 13 Nnojotsü lotuin nukuwaʼipa wanee wayuu noʼuluʼu Maleiwa naapüle neʼe tü pütchi nuluwataakalü anain. Naya lotoko akuwaʼipa noʼuluʼu Maleiwa na aaʼinrakana tü nuluwataakalü anain. 14 Na wayuu nnojoliikana judíoin nnojotsü natüjaain saaʼu tü nuluwataakalü anain Maleiwa, naaʼinrapejeʼeya neʼe tia aluwataanakalü anain. Mayaapejeʼe nnojoluin natüjaain saaʼu, suluʼusü shia naaʼin. 15 Natüjaa aaʼu tü nuluwataakalü anain Maleiwa. Nayaawata aaʼu suluʼu naaʼin* jee suluʼu nekii anale jee mojule wanee kasa natuma. 16 Alateerü tia kasalajanapa nutuma Maleiwa tü kasa mojusü naainjakat na wayuukana ojuunaa. Nia nüneekaka Cristo Jesús süpüla niainjachin kasalajanain atuma saainjala wayuu. Tia shia soʼutku tü pütchi anakat maʼin taküjakat sümüin wayuu.
17 Juʼutku jiakana aʼwaataashii suluʼu judíoin jia otta eein jümaʼana tü Pütchi Aapünakat nümüin Moisés,* akaʼaya joo jiaya, aʼwaataashii suluʼu aleewain jia nümaa Maleiwa. 18 Jütüjaa aaʼulu tü nüchekakat Maleiwa jüpüleerua jee jaapaa amaat tü kasa eekai lotuin akuwaʼipa, jama jütüjaain saaʼu tü kasa nuluwataakalü anain. 19 Juuntuin jaajüin müin juʼunirakai saaʼin nukuwaʼipa wanee wayuu eekai moʼupaʼain jee müin jia maʼaka saaʼin wanee luusa namüin na wayuu kojokana aaʼu piʼyuushi. 20 Jaajüin jiakana eesü süpüla junoutuin nukuwaʼipa wanee wayuu mayaawajaainkai saaʼu nukuwaʼipa. Eeshii süpüla jikirajüin tepichi jaajüin mayaapejeʼe nnojoluin jiyaawatüin maʼin saaʼu tü shiimainkat nüchiki Maleiwa, tü ashajünakat suluʼu tü Pütchi Aapünakat nümüin Moisés. 21 Pikirajülejeʼeya wayuu paajüin, ¿jamakaʼa nnojotka paaʼinrüin tü pikirajakalü anain? Püchiaalejeʼeya wayuu suulia aʼluwajaa, ¿jamakaʼa puʼluwajaka? 22 Püküjalejeʼeya nümüin wanee wayuu nnojoluinjatüin kawalaʼatain nutuma nuʼwayuuse,* ¿jamakaʼa kawalaʼataka putuma puʼwayuuse? Püʼürülalejeʼeya shiyaakua maleiwayaasü suʼwaajakana wayuu, ¿jamakaʼa puʼluwajaka tü kasa eekat suluʼu eere naʼwaajünüin? 23 Aʼwaataashi pia suluʼu pütüjain süpüleerua tü nuluwataakalü anain Maleiwa, mojutupejeʼe nia pümüin sutuma nnojoluin paapaain sümaa tü nuluwataakalü anain. 24 Mojusü pütchi nüchiki Maleiwa* sainküin mmakat sünainjee tia jaaʼinrakat maʼaka süshajünüin suluʼu tü Karaloʼuta Nüchikimaajatkat Maleiwa.
25 Nüchoteʼerüle wanee wayuu süta nükorolo,* aneerü nukuwaʼipa naaʼinrüle tü nuluwataakalü anain Maleiwa. Nnojorüle naaʼinrüin tü nuluwataakalü anain Maleiwa, müshijaʼa nnojoikai nüchoteʼerüin saaʼin süta nükorolo. 26 Naaʼinrüle wanee wayuu tü nuluwataakalü anain Maleiwa mayaainjeʼe nnojoluin nüchoteʼerüin süta nükorolo, meechi nüchoteʼerakai saaʼin süta nükorolo süka naaʼinrüin tü nuluwataakalü anain Maleiwa. 27 Shiasaʼa sutuma noonooin chi wayuu nnojoikai achoteʼerüin süta nükorolo atüjaana aaʼu nnojoluin joonooin sümaa tü nuluwataakalü anain Maleiwa, eerejeʼe jiain kamüin tü Pütchi Aapünakat nümüin Moisés sümaa jüchoteʼerüin süta jukorolo. 28 Chi wayuu judíokai nnojoishi niain neʼe chi «judío taya» makai neʼe, nnojotsü kasain saamüin nümüin nüchoteʼerüle neʼe süta nükorolo. 29 Shia judíoka anainjee wanee wayuu tü suluʼukat naaʼin jee tü ayaawatünakalü anainjee nia shia tü eekat suluʼu naaʼin sükajee tü nüpülainkat Maleiwa. Nnojotsü shiain sükajee tü Pütchi Aapünakat nümüin Moisés, chi wayuu makai akuwaʼipa kojutushi nutuma Maleiwa, nnojoishi kojutuin neʼe sutuma wayuu.