Génesis

1 Shia nukumajaka Maleiwa palajana tü sirumatuʼukat jee tü mmakat.

2 Nnojotsü kasain eejatüin süpaʼapünaa tü mmakat jee maaʼinñatuusü shia, kojosü maʼin piʼyuushi sooʼopünaa tü wüinkat jee yalejewaain müsü tü nüpülainkat Maleiwa sooʼopünaa tü wüinkat.

3 «Anasü warattuule», nümakalaka Maleiwa, warattuukalaka suluʼujee tia. 4 Niyaawataka saaʼu Maleiwa anain warattuulin, katataka shia nutuma suulia tü piʼyuushikat. 5 «Saʼwai», nümakalaka Maleiwa sümüin tü piʼyuushikat, «Soʼukai», nümakalaka sutuma warattuulin. Aliikakalaka shia jee wattaʼa maatkalaka shia. Alatüsü tia soʼu tü palajatkat kaʼi.

6 Anuujeseʼe nünüiki Maleiwa: «Anasü sükatajiraale tü wüinkat, eeinjatü wanee iipünaa jee eeinjatü wane wünaapünaa, nnojotkalaka kasain eejatüin pasanain sünain». 7 Shia sukuwaʼipaka tia nutuma Maleiwa, piamasü shiʼipa tü wüinkat nutuma, wanee wünaapünaa, wane iipünaa, nnojotkalaka kasain eein pasanain sünain. Müsüjaʼaya sukuwaʼipa tia. 8 «Sirumatuʼu», nümakalaka Maleiwa sümüin tia. Aliikakalaka shia jee wattaʼa maatkalaka shia. Alatüsü tia soʼu tü piamakat kaʼi.

9 Anuujeseʼe nünüiki Maleiwa: «Anakajaʼa sükotchojiraale tü wüin wünaapünaakat, shiiʼiyalaajeetka tü mmakat suluʼujee tia». Müsüjaʼaya sukuwaʼipa tia. 10 Anakalaka nümüin Maleiwa niʼrapa tü kasa nukumalakat. «Mma», nümakalaka sümüin tü eeʼiyalaakat soosojoopa tü wüinkat jee «Palaa», nümakalaka sümüin tü wüin akotchojookot. 11 Anuujeseʼe nünüiki Maleiwa: «Anakajaʼa iyotule iyoshi süpaʼa tü mmakat, eeiwa pünajüt eeka atuma waüyee sümaʼaleeya wunuʼulia eekai kachooin, naatayaa müinjatü shia. Kachooinjatü shia sümaa eeinjatüin waüyee sutuma». Müsüjaʼaya sukuwaʼipa tia. 12 Eekalaka iyoshi süpaʼa tü mmakat sümaa pünajüt eeka atuma waüyee jee müsia wunuʼulia eekai kachooin,* naatayaa müinjatü shia. Anakalaka nümüin Maleiwa niʼrapa tü kasa nukumalakat. 13 Aliikakalaka shia jee wattaʼa maatkalaka shia. Alatüsü tia soʼu tü apünüinkat kaʼi.

14 Anuukalaka nünüiki Maleiwa: «Anasü eere tü warattuukalü atuma chaa sirumatuʼupünaa. Sütüjaaneetka aaʼu soʼukaire jee saʼwaire, shiyaawatüneetka aaʼu sükalia wanee kasa,* shiyaawajüneetkalaka kaʼi jee müsia juya. 15 Chuwatuuinjatü tia chaa sirumatuʼu süpüla warattuulin mmapaʼakat sutuma». Müsüjaʼaya sukuwaʼipa tia. 16 Nukumajakalaka Maleiwa piamasü kasa chuwatuuinjatka, nukumajüin tü miyoʼukat maʼin süpüla chuwatüin shia soʼukai jee nukumajüin tü joʼuuchonkot süpüla chuwatüin shia saʼwai, nukumajaleeinña Maleiwa tü shüliwalakat. 17 Niʼitaain Maleiwa süpüshuaʼa tia chaa sirumatuʼu süpüla warattuulinjatüin tü mmakat sutuma. 18 Sütüjaanakalaka aaʼu soʼukaire jee saʼwaire. Katataka nutuma warattuulin wanee kasa suulia tü piʼyuushikat. Anakalaka nümüin Maleiwa niʼrapa tü kasa nukumalakat. 19 Aliikakalaka shia jee wattaʼa maatkalaka shia. Alatüsü tia soʼu tü pienchikat kaʼi.

20 Anuujeseʼe nünüiki Maleiwa: «Anakajaʼa wattale saalii seʼe tü wüinkat jee waawataiwa wüchii chaa iipünapünaa». 21 Nukumajaka Maleiwa süpüshuaʼa tü seʼe palaa miyoʼuyuukat maʼin sümaʼaleeya süpüshuaʼa tü shirokujatkat wüin suluʼu naatayaa müin sukuwaʼipa. Nukumajüinña tü wüchii waawatakat suluʼu naatayaa müin sukuwaʼipa. Anakalaka nümüin Maleiwa niʼrapa tü kasa nukumalakat. 22 Nüküjain Maleiwa shiʼrüinjatüin anaa tia wüchiikalüirua sümaa nümüin sümüin: «Anakajaʼa kachonniire jia, wattaiwa jaalii jee pirataiwa tü palaakat jutuma jee wattainjatü saalii wüchii süpaʼapünaa tü mmakat». 23 Aliikakalaka shia jee wattaʼa maatkalaka shia. Alatüsü tia soʼu tü jaʼraikat kaʼi.

24 Anuukalaka nünüiki Maleiwa: «Anakajaʼa katüle soʼu wanee kasa süpaʼa tü mmakat suluʼu naatayaa müin sukuwaʼipa, eeinjatü mürüt, eeinjatü wüchii lemütüsü, eeinjatü wüchii wünaʼapüjatü süpaʼa tü mmakat suluʼu naatayaa müin sukuwaʼipa». Müsüjaʼaya sukuwaʼipa tia. 25 Nukumajakalaka Maleiwa tü wüchii wünaʼapüjatkat suluʼu naatayaa müin sukuwaʼipa nutuma, nukumajüinña tü mürütkat suluʼu naatayaa müin shia, akaʼaya tü wüchii lemütüsükat suluʼu naatayaa müin sukuwaʼipa nutuma. Anakalaka nümüin Maleiwa niʼrapa tü kasa nukumalakat.

26 Anuukaʼa joo nünüiki Maleiwa: «Anakajaʼa wakumajüle chi wayuukai suluʼu müin nukuwaʼipa maʼaka wakuwaʼipa, laülaweechika nia saaʼu tü seʼekat palaa, saaʼu tü wüchii waawatakalü iipünaapünaa, saaʼu mürüt, saaʼu süpüshuaʼa tü mmakat jee saaʼu tü wüchii lemütüsükat». 27 Nukumajaka Maleiwa chi wayuukai suluʼu müin nukuwaʼipa maʼaka nukuwaʼipa niakai, nukumajüin wayuu toolo sümaa wayuu jierü. 28 Nüküjain Maleiwa neʼreenain anaa na wayuukana sümaa nümüin namüin: «Anakajaʼa wainmale jüchonnii, watteenakalaka jaalii, pirateetka tü mmakat jutuma jee laülaweena jia saaʼu. Jieena laülaaka saaʼu tü seʼekat palaa, saaʼu tü wüchii waawatakalü iipünaapünaa jee saaʼu tü eekat süpaʼa tü mmakat».

29 Anuujeseʼe nünüiki Maleiwa: «Anuu joo taapüin jümüin süpüshuaʼa tü pünajüt mmapaʼajatkalü eeka atuma waüyee jee süpüshuaʼa tü wunuʼulia kachonkat, shia jiküinjatka tia. 30 Taapüinña tü wunuʼuliakat* süpüla shiküinjatüin shia süpüshuaʼa tü wüchii wünaʼapüjatkat, süpüshuaʼa tü wüchii waawatakalü iipünaapünaa, süpüshuaʼa tü eekat süpaʼa tü mmakat jee tü eekai katüin soʼu». Müsüjaʼaya sukuwaʼipa tia.

31 Süchikijee tia, niirakaaka Maleiwa sümüin süpüshuaʼa tü kasa nukumalakat, anakalaka maʼin shia. Aliikakalaka shia jee wattaʼa maatkalaka shia. Alatüsü tia soʼu tü aipiruakat kaʼi.