ÉXODO

1 Anuukalaka joo nanülia na nüchonniikana Israel antakana nümaa Egiptomüin. Antüshii naya sümaa naʼwayuuse jee müshiʼiya nachonnii: 2 Rubén, Simeón, Leví jee müshia Judá. 3 Isacar, Zabulón jee müshia Benjamín. 4 Dan, Neftalí, Gad jee müshia Aser. 5 Akaratshishii nekii napüshuaʼa na nüikeyuukana Jacob, nia chatüjüika kepiain José Egipto. 6 Nünaajaaka mapa José namaʼaleeya napüshuaʼa na nuwalayuukana, anaajaashii napüshuaʼa naya wayuukana. 7 Wattakalaka naalii nachonnii na israelitakana, aʼwainmalaashiijeseʼe maʼin naya, mmotkalaka na egipciokana neema. Wattakalaka naalii na israelitakana suluʼu tia mmakat.

8 Shiasaʼa mapa nuluwataaka saaʼu Egipto wanee aluwataashi nnojoikai eʼraajüin José. 9 Anuukalaka nünüiki namüin na egipciokana: «Watta maʼin naalii na israelitakana woulia jee katchinjashii naya woulia. 10 Atüjeeshiisaʼa waya süpüleerua tü waaʼinrajatkat süpüla nnojoliinjanain naʼwainmalaakuʼu namüin. Jamüsüjaʼa eetaale wanee atkawaa, paaʼinweena naya namaa na waʼünüükana, atkaajeena naya wamaa jee noʼuneenakalaka yaajee».

11 Naʼyateʼennakalaka maʼin na israelitakana natuma na egipciokana, kekiipüʼüjanashii naya natuma jee naʼyateʼerüin naya sünain akumajaa tü pueulokot Pitom jee Raamsés eeinjatüle sünaajaanüin niküin faraón jee waneirua kasa. 12 Aʼwainmalaapejeʼe maʼin na israelitakana jee sainküinshii naya tia mmakat mayaainjeʼe müliain naya atumawaa, mmotkalaka maʼin na egipciokana neema na israelitakana. 13 Neʼraka maʼin namüliala na israelitakana natuma na egipciokana süka nachepchiain naya. 14 Müliaka maʼin naya natuma, naluwataain naya sünain ojoʼojaa pootshi jee sünain aainjaa ladrillo. Jawatüsü maʼin naʼyataain natuma chaa wünaʼapü, naʼlaülaajaaka na egipciokana naaʼu sümaa müliain naya natuma, naainjirüin naya wanee kasa naaʼinrawaika na achepchieekana.

15 Naashajaakalaka mapa chi aluwataashikai saaʼu Egipto sümaa piamasü wayuu hebreo eemeijüt shiairua, Sifrá sünülia wanee jee Pua sünülia tü wane. 16 Anuujeseʼe nünüiki namüin: «Anuu tü jaainjainjatkat jeemeijapa na jieyuu hebreokana jee jiʼrapa naʼalijaain: toolochonle chi nachonkai, juʼutajachi aaʼin nia, eekajasaʼa jietchonle shia, juuʼulaajeerü». 17 Kojutupejeʼe maʼin chi shiimainshikai suluʼu Maleiwain namüin na eemeijüliikana. Nnojoliikalaka jaa namüin nümüin chi aluwataashika saaʼu Egipto, nnojoishii noʼutuin aaʼin na tooloyuucheinkana. 18 Shiasaʼa mapa nuunejitkalaka chi aluwataashikai saaʼu Egipto na eemeijüliikana jee nümaka namüin: «¿Jamüshii nnojoliikaʼa juʼutuin naaʼin na tooloyuucheinkana?». 19 «Naata maʼin nakuwaʼipa na jieyuu hebreokana noulia na jieyuu egipciokana. Katchin aaʼinchii na jieyuu hebreokana, jemeyutshii naya süpülapünaa tü eemeijütkat», namakalaka nümüin faraón.

20 Neʼrakalaka anaa nutuma Maleiwa na eemeijüliikana jee ayatüshiʼiya aʼwainmalaain na israelitakana, mmotkalaka na egipciokana neema. 21 Shiasaʼa mapa, nakaaliinjünaka na eemeijüliikana nutuma chi shiimainshikai suluʼu Maleiwain. Nükaalinjain naya süpüla kachonniinjanain naya süka kojutuin maʼin nia namüin. 22 Anuukalaka joo nünüiki faraón namüin napüshuaʼa na egipciokana: «Anakajaʼa jujutüle shirokumüin tü süchikat Nilo napüshuaʼa na tooloyuuchein hebreo eiwaʼaliikana jemelin, naya nnojoliinjanaka juʼutuin aaʼin na jieyuucheinkana».

2 Soʼutpünaa tia eejachi wanee wayuu nüpüshi Leví, nuʼwayuusesü wanee nülüin Leví. 2 Ipuotkalaka tia wayuukat jee jemeyutsü shia nümaa wanee joʼuu. Suunjutkalaka chi süchonkai soʼu apünüin kashi süka anashin aaʼinchi maʼin nia. 3 Nnojoipa süpüla suunjulüin chi jintüikai, saapaakalaka wanee kanaasüta aainjuushi süka papiro, sushuletkalaka mena sutoutajee, sujulereʼetka chi jintüikai suluʼu, shiʼitaakalaka tü kanaasütakat sotpaʼa tü süchikat Nilo saʼaka suuʼulia kainñaruushi. 4 Süshaʼwalaakalaka nipaya chi jintüikai wattaluʼu nuulia süpüla shiʼrüinjatüin tü alatajatkat nümüin.

5 Suʼunakalaka tü nüchonkat faraón sünain oʼoojoo shirokumüin tü süchikat Nilo. Wanaa sümaa warai namüin na süchepchiakana sotpünaa tü süchikat, shiʼrakalaka wanee kanaasüta saʼakapünaa tü suuʼuliakat kainñaruushi, suluwataamaataka wanee süchepchia süpüla süsaajüinjatüin shia sümüin. 6 Wanaa sümaa sujutalüin tü kanaasütakat, shiʼrakalaka chi joʼuukai sümaa niʼyalajüin maʼin, amülialaasüjeseʼe shia naalin sümaa müin sünüiki: «Nia wanee nachon na hebreokana». 7 Sürütkaakalaka nipaya chi joʼuukai jee süsakitkalaka tü nüchonkat faraón sümaa sümüin sümüin: «¿Jamüsüche paashin tasaajüle wanee wayuu hebreo süpüla sutujeʼerajachin chi joʼuukai jee saaʼinmajüinjachin nia pümüin?». 8 «Püsaaja maala», sümakalaka tü nüchonkat faraón sümüin tü jintutkat, suʼunamaatakalaka tü jintutkat sünain asaajaa nii chi joʼuukai. 9 Anuukalaka sünüiki tü nüchonkat faraón sümüin tü wayuukot: «Anakajaʼa pülüʼüjale chi joʼuukai, putujeʼera nia jee paaʼinmaja nia, tawalaajeerü pia saaʼu tia». Sülüʼüjaka tü wayuukot chi joʼuukai, saaʼinmajaka nia jee sutujeʼeraka nia. 10 Nimiyoʼulaapa chi jintüikai, shiʼikajaain nia tü wayuukot sümüin tü nüchonkat faraón, süchoinchikalaka nia. Moisés nünülia sutuma süka süküjain shiyuʼluin nia shirokujee tü wüinkat.

11 Shiasaʼa mapa wayuupa miyoʼu Moisés, oʼunushi nia sünain anaʼlawaa namüin na nuwalayuu hebreokana süpüla niʼrüinjatüin jawatüin maʼin tü naʼyataainkat. Niʼrakalaka wanee egipcio sünain aʼyaajaa wanee hebreo. 12 Niirakawaain nümaka Moisés, nnojotkalaka jaralüin niʼrüin, nuʼutakalaka naaʼin chi egipciokai jee nojoitakalaka nia saʼaka jasai.

13 Nujuʼitakalaka waneemüin kaʼi, niʼrakalaka natkaain piamashii hebreo, anuujeseʼe nünüiki Moisés nümüin chi kasitkai tü alatakat: «¿Jamüshi piʼyaajakaʼa chi puwalakai?». 14 Anuukalaka nünüiki chi hebreokai nümüin: «¿Jarai eʼitaaka pia süpüla puluwataainjachin waaʼu jee süpüla punoutuin wanee kasa eekai sülatüin wamüin? ¿Puʼutajachi aaʼin taya maʼaka puʼutuin naaʼin chi egipciokai?». Nüinkuukalaka aaʼin Moisés. «Kachikitchipainjaʼa taya», maa müsü naaʼin.

15 Nuʼutuneeka aaʼin Moisés nutuma faraón naapapa süchiki tü alatakat, aʼluwataashijeseʼe Moisés nuulia faraón. Oʼunushi nia suluʼumüin tü mmakat Madián. Nüntapa chamüin, nüikalaakalaka sotpaʼa wanee ishi. 16 Eejachikalaka chaa Madián wanee wayuu sacerdoteshi, akaratshisü jieyuu nüchonnii. Oʼunusü tia nüchonniikalüirua sünain ajaʼitaa wüin jee sünain epirajaa tü anuwakat süpüla süsüinjatüin wüin naʼanneetse chi nashikai. 17 Nantapaataka waneinnua arüleejülii, najünajaaka na jieyuukana maʼakaapuʼu naainjain shia, nütamaakalaka Moisés sünain akaalinjaa na jieyuukana niʼraiwaʼaya tü aainjünakat naka, najaʼitaka wüin süsüin tü anneetkalüirua. 18 Naleʼejapa nipialuʼumüin Reuel* chi nashikai, patatakalaka naaʼin sümaa nüsakirüin naya: «¿Jamüshii jüleʼejamaatakaʼa maalü miichipaʼamüin?». 19 Nasoutakalaka nümüin chi nashikai sümaa müin nanüiki: «Nükaalinjain waya wanee egipcio noulia na arüleejüliikana. Ajaʼitüshi nia wüin wamüin jee nüsiʼrüin wüin tü waʼanneetsekalüirua». 20 Anuukalaka nünüiki sümüin tü nüchonkalüirua: «¿Jalakaʼa joo chia wayuukai? ¿Jamüshi jüpütakaʼa nia chayaa? Jüsaajapan nikaiwa wamaa». 21 Shiasaʼa mapa anashiikalaka nümüin Moisés makatajachin nia nümaʼana chia wayuukai, naapakalaka chi wayuukai nümüin Moisés Ziporá, tü nüchonkat süpüla nuʼwayuuseinjatüin shia. 22 Kachonkalaka shia mapa, Guersomkalaka nünülia nutuma Moisés, müsü nünülia nutuma süka müin nünüiki mayaa: «Kepiashi taya suluʼu wanee mma nnojotka toumain».

23 Shiasaʼa kakalia mapa, nünaajaakalaka chi aluwataashikai saaʼu Egipto, ayatapejeʼeya mojuin naaʼin na israelitakana saaʼujee achepchieein naya jee aʼyounalaashii naya saaʼujee tia. Naapakalaka chi shiimainshikai suluʼu Maleiwain tü nanüikikat sünain achuntaa kaalinwaa. 24 Naapakalaka Maleiwa mapa tü nanüikikat na israelitakana sünain mojuu aaʼin, sotokoloko naaʼin Maleiwa tü pütchi nüpansaajakat paala nümaa Abrahán, Isaac jee müshia Jacob. 25 Kachipünaakalaka naaʼin Maleiwa namüliala na israelitakana jee nümülialaakalaka naalin.

3 Nürüleejüitkalaka Moisés naʼanneetse Jetró chi nüshimiakai, chi sacerdotekai chaa Madián. Soʼu wanee kaʼi wanaa sümaa nikeʼerüin tü anneetkat wopumüin saaʼujee tü isashiipaʼakat, nüntakalaka Horebmüin, tü nuʼuuchisekat chi shiimainshikai suluʼu Maleiwain. 2 Niiʼiyalaakalaka nümüin Moisés wanee aapiee nümaʼanajeejachi Jehová saʼaka suchuwala wanee wunuʼu keipüsesü. Niirakaakalaka maʼin Moisés, niʼraka chuwatüin tü wunuʼu keipüsesükat nnojotpejeʼe shia jotuin. 3 Anuukalaka nünüiki Moisés: «¿Kasakajasaʼa wayu tüü? ¿Jamüsüche nnojotka jotuin tü wunuʼu keipüsesükat? Anashi tanaʼlaaiwa sümüin tatüjaaiwa saaʼu kasain wayu alatüin». 4 Niʼrakalaka Jehová nürütkaain Moisés süpüla niʼrüinjatüin tü wunuʼu keipüsesükat. Naashajaakalaka Maleiwa nümüin saʼakajee tü wunuʼu keipüsesükat sümaa nümüin nümüin: «Moisés, Moiséskalee». «Anii taya», nümakalaka Moisés nümüin. 5 Anuukalaka nünüiki Maleiwa: «Nnojo pürütkaain sooʼomüin sei pukua. Paakata tü pukoʼusüinkat* yaapa pia shaʼwatüin saaʼu mmakat tüü süka yaain taya saaʼu».

6 Anuukalaka nünüiki Maleiwa mapa nümüin: «Taya Nümaleiwaseka chi püshikai, Nümaleiwase taya Abrahán, Nümaleiwase taya Isaac jee Nümaleiwase taya Jacob». Nukoʼoloko nuʼupünaa Moisés süka mmoluin nia seema eirakawaa nümüin chi shiimainshikai suluʼu Maleiwain. 7 Ayatakalaka naashajaain Jehová sünain maa: «Teʼrüin müliain maʼin na israelitakana chaa Egipto, taapüin nanüiki sünain aküjaa müliain maʼin naya saaʼujee achepchieein naya. Tatüjaa aaʼulu tü namülialakat. 8 Müshijeseʼe tantüin süpüla tasaajüin naya namaʼanajee na egipciokana jee tamaajeena naya suluʼumüin wanee mma eekai anain, eekai miyoʼuin, wanee mma joutka aluʼu leechi jee müsia mapa. Tamaajeena naya suluʼumüin noumain na cananeokana, na hititakana, na amorreokana, na perizitakana, na heveokana jee müshiʼiya na jebuseokana. 9 Taapüin nanüiki sünain aʼyounalawaa na tachonniikana, na israelitakana, teʼrapejeʼe mojulaain maʼin na egipciokana namüin, müliashii maʼin naya natuma. 10 Anakajaʼa tajütüle pia nümaʼanamüin faraón, pieechi ayuʼlaka Egiptojee na tachonniikana, na israelitakana».

11 Anuupejeʼe nünüiki Moisés nümüin chi shiimainshikai suluʼu Maleiwain: «Nnojoishi tayain keraain süpüla toʼunajachin nümaʼanamüin faraón jee süpüla tayuʼlajanain na israelitakana Egiptojee». 12 Anuukalaka nünüiki Maleiwa nümüin: «Eejeechi taya pümaa. Anuu tü piyaawateetkalü akajee tayain kajünalain pia: piyuʼlapeena na israelitakana Egiptojee, anteena jia jüpüshuaʼa eemüin uuchikat tüü jee juʼwaajeechikalaka taya chi shiimainshikai suluʼu Maleiwain».

13 Anuupejeʼe nünüiki Moisés nümüin chi shiimainshikai suluʼu Maleiwain: «Toʼunataarüle namaʼanamüin na israelitakana sümaa tamüin namüin: ‹Nüjünala taya jümaʼanamüin chi Namaleiwasekai na jutuushinuukana›. ‹¿Kasaichi nünülia?›, namataarüle tamüin, ¿jameerü tanüiki namüin?». 14 Nusoutakalaka Maleiwa nümüin Moisés sümaa müin nünüiki: «Taaʼinreerü tü Anakat Saaʼin Tamüin süpüla Taaʼinrüin». Ayatakalaka naashajaain sünain maa: «Anuu tü pünüikinjatkat namüin na israelitakana: ‹Nia kajünalaka taya jümaʼanamüin chi Tounteerü Taaʼinrüin tü Anakat Saaʼin Tamüin makai anülia›». 15 Naashajaakalaka Maleiwa nüchikuaʼa nümüin Moisés sümaa nümüin nümüin:

«Anuu tü pünüikinjatkat namüin na israelitakana: ‹Nia Jehová kajünalaka taya jünainmüin, nia chi Namaleiwasekai na jutuushinuukana, Nümaleiwase nia Abrahán, Nümaleiwase nia Isaac jee Nümaleiwase nia Jacob›. Shia tanüliakaʼaya tia süpüla kaʼikat süpüshuaʼa jee shiʼraajeechi taya wayuu waneepia sükajee tia tanüliakat. 16 Anakajaʼa puʼunule puutkajaajeechikalaka namaa na laülaashiikana napüleerua na israelitakana sümaa pümüinjachin namüin: ‹Eeʼiyalaashi Jehová tamüin chi Namaleiwasekai na jutuushinuukana, chi Nümaleiwasekai Abrahán, Isaac jee müshia Jacob sümaa müin nünüiki tamüin: «Shiimain maʼin teʼrüin jia jee teʼrüin tü aainjünakat jümüin chaa Egipto. 17 Taapakalaka tanüiki jümüin süpüla takaalinjainjanain jia suulia müliakuʼu jümüin natuma na egipciokana. Tamaajeena jia suluʼumüin noumain na cananeokana, na hititakana, na amorreokana, na perizitakana, na heveokana jee müshiʼiya na jebuseokana, joutsü leechi jee müsia mapa suluʼu tia mmakat»›.

18 »Naapajeerü pünüiki na laülaashiikana. Puʼuneechikalaka nümaʼanamüin chi aluwataashikai saaʼu Egipto namaa na laülaashiikana napüleerua na israelitakana, anuujeetkalaka jünüiki nümüin: ‹Aashajaashi wamaa Jehová chi Namaleiwasekai na hebreokana, püjütaʼaya maa waya süpüla woʼunajaainjanain soʼu apünüin kaʼi isashiipaʼamüin, woʼuteenakalaka saaʼin mürüt süpüla waʼajüin shia nümüin Jehová chi Wamaleiwasekai›. 19 Tatüjaapejeʼe saaʼu nnojoleenain nüjütüin jia chi aluwataashikai saaʼu Egipto aluʼujasaʼa niʼrüle nümüliala tatuma sükajee taaʼinrüin kasa pülasü. 20 Müshijeseʼe taainjeechin kasa pülasü süpüla süsalainjanain naainjala tatuma na egipciokana, nüjüteenakalaka jia chi aluwataashikai saaʼu Egipto süchikijee tia. 21 Takaalinjeena jia israelitakana süpüla anain jüshoʼu namüin na egipciokana, kajapüipeenakalaka jia juʼunapeena. 22 Nachunteerü na jieyuukana waneʼewai nakua sümüin tü wayuu kepiakat naʼütpaʼa jee sümüin tü wayuu kepiakat namaa kasa aainjuushika süka pülaata, ooro jee müsia kuluulu. Jaʼateerü tia nanain na jüchonniikana, na tooloyuucheinkana jee na jieyuukana. Jüsüteerü noulia na egipciokana tü kasa namaʼanakat».

4 Nusoutakalaka Moisés nümüin Maleiwa: «¿Jama nnojoliire noonooin na israelitakana sümaa tanüiki? ‹Nnojoishi eeʼiyataain Jehová pümüin›, meenasaʼa naya tamüin». 2 Nüsakiraka Jehová Moisés: «¿Kasa türa pajapuluʼukat?». «Wanee waraarat», nümakalaka Moisés nümüin. 3 «Pujuta mmoluʼumüin», nümakalaka Maleiwa nümüin. Nujutaka shia Moisés mmoluʼumüin, wüijaaka tü waraaratkat, nükaaʼinraakalaka Moisés suulia. 4 Anuujeseʼe joo nünüiki Jehová nümüin Moisés: «Paapaa tü wüikat süka süsi». Naapaakalaka Moisés tü wüikat süka süsi, waraaratjaakalaka shia süchikuaʼa. 5 Nusoutakalaka Maleiwa sünain maa: «Nayaawateerü aaʼu na israelitakana sükajee tia, teeʼiyalaain pümüin tayakai Jehová, chi Namaleiwasekai na natuushinuukana, chi Nümaleiwasekai Abrahán, chi Nümaleiwasekai Isaac jee müshia chi Nümaleiwasekai Jacob».

6 Ayatakalaka yootuin Jehová sünain maa: «Puuʼutta maa pajapü suluʼu tü püsheʼin paaʼintoʼupünaakat». Nuuʼuttakaʼaya Moisés najapü suluʼu tü nüsheʼin naaʼintoʼupünaakat, niyuʼlapa tü najapükat, ayuuika shia sutuma tü ayuulii kanüliakat lepra,* kasuusü maʼin shia maʼaka saaʼin tü nievekat. 7 Anuuka nünüiki Maleiwa nümüin süchikijee tia: «Puuʼutta pajapü püchikuaʼa suluʼu tü püsheʼin paaʼintoʼupünaakat». Nuuʼuttaka najapü Moisés nüchikuaʼa suluʼu tü nüsheʼinkat, anaka tü najapükat suulia tü leprakat niyuʼlapa shia. 8 Anuu joo tü nümakat Maleiwa nümüin: «Nnojorüle nanoujain sünain tü pümakat jee noonooin pümüin neʼraiwaʼaya tü palajatkat kasa pülasü paainjaka, anoujeena naya neʼrapa tü chiiruaajatkat kasa pülasü. 9 Nnojorüle nanoujain sünain tia piamasükat kasa paainjaka jee nnojorüle naapajeein pünüiki, ajaʼiteechi pia wüin shirokujee tü süchikat Nilo jee piʼyoteerü shia mmoluʼu. Ishajaajeetka mmoluʼu tü wüin pajaʼitakat shirokujee tü süchikat Nilo».

10 Anuujeseʼe nünüiki Moisés nümüin Jehová: «Jalia jashichijayaai pia tamüin Jehová, isatüjülia tachiki yootoo, matüjülia takuwaʼipa jee majachiaʼaya taya paashajaaiwaʼaya tamaa. Kajasü maʼin tanüiki jee matüjainsai taya süpüleerua tanüiki». 11 Nüsakirakalaka nia Jehová sünain maa: «¿Jara kanüikika atuma wanee wayuu? ¿Jarai ountaka manülin atuma wanee wayuu jee macheʼein nia? ¿Jarai koʼupaʼaka atuma wanee wayuu jee moʼupaʼaka atuma nia? ¿Aashin tayain Jehová ountakai tia? 12 Puʼuna maa Egiptomüin, eejeechi taya pümaa yootopa pia jee tekirajeechi pia sünain tü pünüikinjatkat». 13 Anuujeseʼe nünüiki Moisés nümüin: «Jalia jashichijayaai pia tamüin Jehová, anashi puluwataale wanee wayuu naata toulia, chi eekai anain saaʼin pümüin». 14 Jashichika maʼin Jehová nümüin Moisés sümaa müin nünüiki nümüin: «¿Nnojoishijasaʼa puwalain Aarón chi levitakai? Tatüjaa aaʼuchi mapüleein nümüin yootoo, iseeichi nia wopuluʼu süpüla nüntiraain pümaa, talateechi maʼin nia niʼrapa pia. 15 Püküja nümüin tü taküjaitpakat pümüin süpüla niyaawatüin saaʼu tü nünüikinjatkat. Eejeechi taya jümaa yootopa jia jee taküjeerü jümüin tü jaaʼinrüinjatkat. 16 Yooteechi nia püpüleerua namüin na israelitakana jee nieechi pünüikeʼejachika, tanüikimaajeechi pia nümüin. 17 Pajapüʼipeerü tü waraaratkat jee aainjeechi pia kasa pülasü süka».

18 Nüleʼejaka Moisés nümaʼanamüin Jetró, chi nüshimiakai sümaa nümüin nümüin: «Püjüta maa taya. Aleʼejeeshi taya Egiptomüin süpüla tatüjaain saaʼu ichaayüliire na tawalayuukana». «Puʼuna süka anaka akuwaʼipa», nümakalaka Jetró nümüin Moisés. 19 Anuuka nünüiki mapa Jehová nümüin Moisés chaa Madián: «Püleʼejaa Egiptomüin, outuinnapa na wayuu oʼuteepuʼukana paaʼin».

20 Noʼotoka Moisés nuʼwayuuse jee na nüchonniikana saaʼu wanee püliikü jee nüleʼejaka Egiptomüin, najapüʼipasü tü nuwaraaratsekat chi shiimainshikai suluʼu Maleiwain. 21 Anuuka nünüiki Jehová nümüin Moisés: «Chapa pia Egipto, paaʼinra nuʼupala faraón tü kasa pülasü eeitpakat süpüla paaʼinrüin süka pülaichipain pia tatuma, tooʼulaajeechika macheʼein nia sümüin tü pümakat jee nnojoleena nuuʼulaain noʼunuin na israelitakana. 22 Anuu tü pümüinjatkat nümüin faraón: ‹Tüü shia tü nümakat Jehová: «Tachon Israel, nia chi teʼirumakai. 23 Müsüjeseʼe müin tanüiki pümüin: puuʼulaa nuʼunaiwa chi tachonkai süpüla nuʼwaajüinjachin taya. Püpülajüle nuulia oʼunaa, toʼuteechi aaʼin chi püchonkai, chi piʼirumakai»›».

24 Wanaa sümaa wopuluʼuin naya Egiptomüin, ashaʼwalaapünaashii eeinjanale natunkuin, niiʼiyalaaka Jehová nümüin jee nuʼutee aaʼinchi nia. 25 Saapaaka Ziporá wanee ipa kasasü maʼin, shiʼyotooko süta nukorolo chi süchonkai, shipettaka nuuʼui süka tia sütakat sümaa sümüin nümüin: «Sükajee ishakat tüü tacheküin süchiki piain taʼwayuusein». 26 Nuuʼulaaka Maleiwa nuʼunuin. Anuuka sünüiki soʼu tia süka süchotooin süta nukorolo chi süchonkai: «Sükajee ishakat tüü tacheküin süchiki piain taʼwayuusein».

27 Anuuka nünüiki Jehová nümüin Aarón: «Puʼuna sünain apanapajaa Moisés isashiipaʼa». Nuʼunakalaka Aarón sünain apanapajaa Moisés saaʼumüin tü nuʼuuchisekat chi shiimainshikai suluʼu Maleiwain, nüsakaka Moisés sümaa nutuʼluin nuwalapaʼa. 28 Nüküjaka Moisés nümüin Aarón süpüshuaʼaleeya tü nüküjakat Jehová chi ajütakai nia. Nüküjainña nümüin süpüshuaʼa tü kasa pülasü naainjirakat nia. 29 Nuʼunakalaka Moisés nümaa Aarón süchikijee tia süpüla noutkajaain namaa na laülaashiikana napüleerua na israelitakana. 30 Nüküjaka Aarón namüin süpüshuaʼa tü nüküjakat Jehová nümüin Moisés jee naaʼinrüin tü kasa pülasükat noʼupala na israelitakana. 31 Nanoujaka na israelitakana nünüiki. Natüjaaiwaʼaya saaʼu na israelitakana nükaalinjeenain naya Jehová jee nütüjaain saaʼu namüliala, nasapainkaka naya sümaa nejepülaain.

5 Shiasaʼa mapa, nuʼunaka Moisés nümaa Aarón eemüin faraón, anuukalaka nanüiki nümüin: «Anuu tü nümakat Jehová chi Namaleiwasekai na israelitakana: ‹Puuʼulaa noʼunaiwa na israelitakana noutkajaaiwa isashiipaʼa süpüla naʼwaajüin taya›». 2 Nusoutakalaka faraón namüin: «¿Jaraikai chi kanüliakai Jehová süpüla toonooinjachin sümaa nünüiki jee tajütüinjanain na israelitakana? Nnojoishi teʼraajüin chi kanüliakai Jehová, nnojoleena tajütüin na israelitakana yaajee». 3 Anuukalaka nanüiki nümüin: «Aashajaashi wamaa chi Wamaleiwasekai waya hebreokana. Püjüta maa waya woʼunajaaiwa soʼu apünüin kaʼi isashiipaʼa süpüla woʼutuin saaʼin mürüt jee waʼajüin shia nümüin Jehová chi Wamaleiwasekai. Nnojoliire püjütüin waya, nüjüteerü wooʼomüin wanee ayuulii aika maʼin outeenaka atuma waya jee nuuʼulaajeena outuin waya natuma na waʼünüükana süka chajaruuta». 4 Nusoutakalaka chi aluwataakai saaʼu Egipto sünain maa namüin: «¿Jamüshikai pia Moisés nümaa Aarón juuʼuleereekaʼa na israelitakana suulia aʼyatawaa? ¡Jüleʼeja neʼe jüpüshuaʼa sünain aʼyatawaa!». 5 Ayatakalaka naashajaain faraón sünain maa: «¿Nnojotsükai jiʼrüin wattain naalii na wayuu aʼyataakana suluʼu mmakat tüü? Antüshii neʼe jia yaamüin shiiʼiree jüshaʼwaleʼerüin tü naʼyataainkat».

6 Soʼuleʼeya kaʼikat tia nuluwataain faraón na nekiipüʼükana na aʼyataashiikana jee na neʼipajanakana sümaa müin nünüiki namüin: 7 «Nnojoliinjana joo jia aapüin alama namüin na israelitakana süpüla naainjain ladrillo, nayainjana joo achajaaka tia. 8 Juchuntajatü namüin ayatajatüin tü ladrillo naaʼinrawaikat soʼukai, nnojoluinjatü paliʼirüin shia natuma. Shokulajüsaʼata neʼe shiairua. ‹Oʼuneeshii waya, oʼuteeshii waya saaʼin mürüt süpüla waʼajüinjatüin shia nümüin chi Wamaleiwasekai›, shiajaʼa mayaaka nanüiki. 9 Anakajaʼa jawatüle maʼin tü naʼyataakalü anain jutuma, aʼyataainjana naya waneepia suulia naapajakuʼu namüin tü alawaa aküjünakat namüin».

10 Anuujeseʼe nanüiki nekiipüʼü na aʼyataashiikana jee na neʼipajanakana namüin na israelitakana: «Anuu nünüiki chi faraónkai jümüin: ‹Ooʼulaainjachi taya suulia aapaa alama jümüin. 11 Jiainjana joo achajaaka tü alamakat eepünaale jüntüin sünain, ayatüinjatü jaaʼinrüin tü ladrillo jaaʼinrawaikat soʼukaiwai›». 12 Noʼunakalaka na israelitakana sainküinpünaa tü mmakalü Egipto sünain akotchojoo tü alama apütaakat mmoluʼu. 13 Napüleeruaanaka aaʼin na israelitakana natuma nekiipüʼü na aʼyataashiikana sümaa namüin namüin: «Ayatajatia jaaʼinrüin tü ladrillo jaaʼinrawaikat soʼukaiwai maʼakaapuʼu saapünaiwaʼaya alama jümüin». 14 Nayasaʼa na nekiipüʼükana na aʼyataashiikana nümüin faraón naʼyaajüin na israelita neʼipajanakana, na aneekünakana süpüla jülüjain naaʼin naʼyataain na israelitakana. Nasakirüin naya sünain maa: «¿Jamüsü nnojotkaʼa jaaʼinrüin waneekalinka jee müsia soʼukai tü ladrillo jaaʼinrapuʼukat paala?».

15 Nayasaʼa na israelita neʼipajanakana na nekiipüʼükana na aʼyataashiikana, oʼunushii naya eemüin faraón sümaa namüin nümüin: «¿Jamüshii müliakaʼa putuma waya püchepchiakana? 16 Nnojotsü aapünüin wamüin alama. ‹Ayataʼaya jaainjain ladrillo›, münapejeʼe waya. Aʼyaajünüshii waya. Naya kasitka tia nekiipüʼü na aʼyataashiikana pümüin». 17 Anuujeseʼe nünüiki namüin: «Shokulashii neʼe jia, nnojoishii jia aʼyataweein. ‹Oʼuneeshii waya, oʼuteeshii waya saaʼin mürüt süpüla waʼajüin shia nümüin Jehová›, mayaashii neʼe jia. 18 ¡Juʼuna yaajee! ¡Jiʼyataa jümaala! Nnojotsü aapünajatüin alama jümüin. Ayatajatpejeʼe jaaʼinrüin tü ladrillo jaaʼinrapuʼukat soʼukaiwai».

19 Nayasaʼa na israelita neʼipajanakana na nekiipüʼükana na aʼyataashiikana isasü nachiki tü naaʼinrajatkat, jama müin pütchi namüin: «Nnojotsü apaliʼirajüinjatüin tü ladrillo jaainjakat soʼukaiwai». 20 Süchikijee tia, noutkajaaka na israelita neʼipajanakana na shikiipüʼükana tü aʼyatawaakat nümaa Moisés jee nümaa Aarón, naʼatapajüin naya nojuʼitajanain nümaʼanajee faraón. 21 Anuumaataka nanüiki nümüin Moisés jee nümüin Aarón: «Kasataalejeseʼe niʼrüin Jehová tü jaaʼinrakat jee süsalaiwa jia nutuma saaʼujee. Nüʼürülashii waya faraón jutuma jee naʼürülashii waya na aʼyataakana niʼipajee, müshii jiʼitaakai aaʼin chajaruuta najapuluʼu süpüla noʼutajanain waaʼin». 22 Anuujeseʼe nünüiki Moisés nümüin Jehová: «Jehovákalee, ¿jamüshii müliakaʼa putuma na israelitakana? ¿Jamüshi püjütakaʼa taya nanainmüin? 23 Soʼujeʼereeya taashajaain nümaa faraón pünülialuʼu, mülialeeshiʼiya maʼin na israelitakana nutuma, nnojotsü kasayaain paaʼinrüin süpüla taashinjanain naya».

6 Nusoutakalaka Jehová nümüin Moisés sünain maa: «Piʼreerü tü taaʼinreekat nümüin faraón. Nuuʼulaajeena noʼunuin na israelitakana süka niʼreechin nümüliala saaʼujee taaʼinrüin kasa pülasü, nüjüteena naya nuumainpaʼajee saaʼujee taaʼinrüin kasa pülasü nuʼupala».

2 Anuuka joo nünüiki Maleiwa nümüin Moisés: «Tayasa chi kanüliakai Jehová. 3 Eeʼiyalaashi taya nümüin Abrahán, nümüin Isaac jee nümüin Jacob suluʼu tayain chi Maleiwa Pülashikai maʼin, nnojotpejeʼe taküjain namüin jamaluʼuluin maʼin Jehováin tanülia.* 4 Tapansaajüinña tanüiki süchiki taapajatüin namüin tü mmakat Canaán eepuʼule nooʼonooin. 5 Taapüin nanüiki na israelitakana sünain mojuin naaʼin, nachepchiashii naya na egipciokana, müsüjeseʼe sotuin taaʼin tü pütchi tapansaajakat.

6 »Anuukalaka tü pünüikinjatkat namüin na israelitakana: ‹Taya chi kanüliakai Jehová, taasheena jia tatuma suulia tü aʼyatawaa jawatakat maʼin naʼyateʼeraka anain jia na egipciokana jee taasheena jia tatuma suulia nachepchiain jia. Aainjeechi taya kasa pülasü jüpüleerua jee süsaleena maʼin naya naainjala tatuma. 7 Tapüsheena jia jee Jümaleiwaseechi taya. Shiimain jütüjaajeerüin saaʼu tayain chi kanüliakai Jehová chi Jümaleiwasekai, chi taasheechikai atuma jia suulia tü aʼyatawaa jawatüsü aʼyateʼennakalü anain jia yala Egipto. 8 Tamaajeena jia suluʼumüin tü mma taküjatüjütkalia achiki paala nümüin Abrahán, Isaac jee müshia Jacob. Taapeerü shia jümüin süpüla juumainjatüin shia. Tayasa chi kanüliakai Jehová›».

9 Nüküjakalaka Moisés mapa tia pütchikat namüin na israelitakana, nnojoliipejeʼe naya jaa müin nümüin Moisés süka matchin naaʼin jee müliain maʼin naya saaʼujee achepchieein naya.

10 Anuukalaka nünüiki Jehová nümüin Moisés: 11 «Puʼuna nümaʼanamüin faraón chi aluwataashikai saaʼu Egipto, püma nümüin najütajanain na israelitakana nuumainpaʼajee». 12 Nusoutakalaka Moisés nümüin Jehová sünain maa: «Eetaayaai jaa namüin tamüin na israelitakana, nieematataaka jaa müin faraón kajale tanüiki». 13 Ayatapejeʼe nüküjain Jehová nüchikuaʼa nümüin Moisés jee nümüin Aarón tü nuluwataakalü anain süpüla naküjain shia namüin na israelitakana jee nümüin faraón chi aluwataashikai saaʼu Egipto, aainjünajatü tia süpüla nayuʼnnajanain na israelitakana suluʼujee tü mmakalü Egipto.

14 Anuu nanülia na shikiipüʼükana napüshi na israelitakana. Kachonshi Rubén, chi niʼirumakai Israel, anuu nanülia na nüchonniikana: Hanok, Palú, Hezrón jee müshia Carmí. Nüpüshi Rubén naya makana.

15 Naya nüchonniika Simeón Jemuel, Jamín, Ohad, Jakín, Zóhar jee müshia Shaúl, süchon nia wanee wayuu chejeʼewat Canaán. Nüpüshi Simeón naya makana.

16 Anuu nanülia na nüchonniikana Leví wanaapünaa sümaa napüshi, nia Guersón, Cohat jee müshia Merarí. 137 nuuyase Leví soʼu nünaajaain.

17 Anuu nanülia na nüchonniikana Guersón wanaapünaa sümaa napüshi, nia Libní nümaa Simeí.

18 Naya nüchonniika Cohat Amram, Izhar, Hebrón jee müshia Uziel. 133 nuuyase Cohat soʼu nünaajaain.

19 Naya nüchonniika Merarí Mahlí jee müshia Musí.

Napüshi na levitakana naya makana wanaapünaa sümaa jaralin kapüshin naya.

20 Shiakalaka Jokébed nuʼwayuusein Amram, wanee nüpüshi* chi nüshikai. Anuukalaka nanülia mapa na süchonniikana nümüin: nia Aarón jee müshia Moisés. 137 nuuyase Amram soʼu nünaajaain.

21 Naya nüchonniika Izhar Coré, Néfeg jee müshia Zicrí.

22 Naya nüchonniika Uziel Misael, Elzafán jee müshia Sitrí.

23 Shiakalaka Eliseba nuʼwayuusein Aarón, nüchon shia Aminadab jee nushunuu shia Nahsón. Anuukalaka nanülia na süchonniikana nümüin Aarón: Nadab, Abihú, Eleazar jee müshia Itamar.

24 Naya nüchonniika Coré Asir, Elcaná jee müshia Abiasaf. Naya makana naya na nüpüshikana Coré.

25 Niasaʼa Eleazar chi nüchonkai Aarón, nuʼwayuusesü wanee nüchon Putiel. Kachonkalaka shia mapa nümüin, Finehás nünülia chi süchonkai.

Naya makana naya na nekiipüʼükana napüshi na levitakana wanaapünaa sümaa jaralin kapüshin naya.

26 Nia Moisés nümaa Aarón na achuntunakana anülia naʼaka naya wayuukana, na naashajaakana amaa Jehová soʼu nümüin namüin: «Jiyuʼla suluʼujee tü mmakalü Egipto na israelitakana suluʼu nnojoluin walakatüin naya». 27 Nia Moisés jee müshia Aarón aashajaaka nümaa faraón, chi aluwataashikai saaʼu Egipto. Naaʼinrüin tia süpüla nayuʼluinjanain na israelitakana Egiptojee.

28 Soʼu naashajaain Jehová nümaa Moisés suluʼu tü mmakalü Egipto, 29 nüküjain Jehová wanee pütchi nümüin Moisés sümaa nümüin nümüin: «Taya chi kanüliakai Jehová. Püküja nümüin faraón chi aluwataashikai saaʼu Egipto, süpüshuaʼa tü tamüitpakat pümüin». 30 Anuukalaka nünüiki Moisés nümüin Jehová: «¿Jamakuwaʼipai süpüla jaa nümüinjachin faraón tamüin kajale tanüiki?».

7 Anuuka nünüiki Jehová nümüin Moisés: «Anii joo pülain pia tatuma süpüla tanüikimaainjachin pia nümüin faraón otta nieechi Aarón chi puwalakai chi pünüikeʼeinjachikai. 2 Püküjeerü nümüin Aarón chi puwalakai süpüshuaʼaleeya tü taluwataajeechikalü anain pia, nieechika aküjain shia nümüin faraón, nüjüteenaka mapa faraón na israelitakana suluʼujee mmakat tüü. 3 Tooʼulaajeechi macheʼein faraón sümüin tü pümakat nümüin jee wainmeerü maʼin tü kasa taainjakat suluʼu tü mmakalü Egipto. 4 Nnojoleechipejeʼe jaa müin faraón sümüin tü pümakat. Taainjeechika kasa pülasü* süpüla müliainjanain na egipciokana, tayuʼleenaka yalejee yala na tachonniikana, na israelitakana, na wattakana maʼin naalii maʼaka saaʼin surulaannuu. Süsaleena naainjala na egipciokana tatuma süpüla tayuʼluinjanain na israelitakana Egiptojee. 5 Natüjaajeerü aaʼu na egipciokana tayain chi kanüliakai Jehová taainjapa kasa pülasü süpüla müliainjanain naya jee tayuʼlapa na israelitakana namaʼanajee». 6 Naainjaka Moisés nümaa Aarón tü nuluwataakalü anain naya Jehová, ayatüsia natuma tü nümakat namüin. 7 Mekiisat shikii nuuyase Moisés otta mekiisat shikii apünüinmüin nuuyase Aarón soʼu naashajaain nümaa faraón.

8 Anuuka joo nünüiki Jehová nümüin Moisés jee nümüin Aarón: 9 «‹Jaainja wanee kasa pülasü›, nümüle jümüin chi faraónkai, ‹Paapaa tü waraaratkat jee pujuta shia nümülatuʼu faraón›, pümeechi amüin Aarón. Wüijaajeetkalaka miyoʼu tü waraaratkat». 10 Nuʼunaka Moisés nümaa Aarón nümaʼanamüin faraón jee naainjaka süpüshuaʼa tü nuluwataakalü anain Jehová naya. Nujutaka Aarón tü waraaratkat nümülatuʼu faraón jee namülatuʼu na aʼyataakana nümüin, wüijaaka miyoʼu shia. 11 Nuunejiraka faraón na wayuu atüjakana maʼin jee na ouutshiikana, nashataka na sacerdote ooʼulaküliikana tü naainjakalü Aarón. 12 Nayasaʼa naya wayuukana nojutuin mmoluʼumüin nawaraaratse, wüijaakalaka miyoʼu shia. Shiasaʼa tü nüwaraaratsekalü Aarón shimiralüin nawaraaratse na waneinnua. 13 Macheʼekalaka faraón sümüin tü nümakat Moisés jee tü nümakalü Aarón. Nnojotsü naainjain tü namakat maʼaka nüküjatüjülin shia Jehová.

14 Anuujeseʼe nünüiki Jehová nümüin Moisés: «Nnojoishii nüjüteein faraón na israelitakana, wayuu iche aaʼinchi nia. 15 Puʼuna wattaʼa wattaʼa maalü nümaʼanamüin faraón, oʼuneechi nia eemüin tü süchikat Nilo, cheechika pia sotpaʼa tia süchikat süpüla püntiraain nümaa, pülüʼüjeetka tü waraarat wüijaakat paala. 16 Anuu tü pünüikinjatkat nümüin faraón: ‹Nuluwataain taya Jehová chi Namaleiwasekai na hebreokana sünain maa pümüin: «Puuʼulaa noʼunaiwa na israelitakana süpüla naʼwaajüinjachin taya isashiipaʼa». Nnojoipejeʼe pia oonooin sümaa tü nümakat. 17 Anuu tü nümakat Jehová: «Piyaawateerü aaʼu tayain chi kanüliakai Jehová sükajee tü taaʼinrajatkat. Tataʼiteerü tü süchikat Nilo süka tü waraarat tajapuluʼukat, ishajaajeetka shia. 18 Outeerü tü jime shirokukat tü süchikat Nilo jee keejuujeerü maʼin tü wüinkat. Iseetkalaka nachiki na egipciokana nasüin shia»›».

19 Anuu tü nümakat Jehová mapa nümüin Moisés: «Anuu tü püküjainjatkat nümüin Aarón: ‹Paapaa tü waraaratkat jee piyurula pütüna sooʼopünaa tü wüin eekalü Egipto, sooʼopünaa tü süchikat, tü sütünakat tü süchikat, tü lamuunakat jee tü wüin eekat namaʼana. Ishajaajeerü süpüshuaʼaleeya tia wüinkat›. Jouleerü isha suluʼu tü mmakalü Egipto, eejeerü isha suluʼupünaa tü süpülajanakat wüin aainjuushika süka ipa jee süka wunuʼu». 20 Naaʼinramaataka Moisés nümaa Aarón süpüshuaʼa tü nuluwataakalü anain naya Jehová. Niyaleraka Aarón tü waraaratkat jee nütaʼitüin tü süchikat Nilo nuʼupala faraón jee noʼupala na aʼyataakana nümüin, ishajaaka tü süchikat. 21 Outakalaka tü jimekalüirua, keejuuka maʼin tü süchikat, nnojotkalaka süpüla nasüin na egipciokana tü wüin shirokujatkat tü süchikat Nilo. Joutkalaka maʼin isha suluʼupünaa tü mmakalü Egipto.

22 Nayasaʼa na sacerdote ooʼulakülii sulujunakana tü mmakalü Egipto, nashatüin tü naainjakalü Aarón sükajee tü napülainkat. Ayatakalaka macheʼein faraón sümüin tü münakat nümüin jee nnojoishi oonooin sümüin tü nümakat Moisés jee tü nümakalü Aarón maʼaka nüküjatüjülin shia Jehová. 23 Nüleʼejaka faraón nipialuʼumüin, nnojotka jamajatüin nümüin tü kasa alatakat. 24 Nnojotsü süpüla nasüin na egipciokana tü wüin shirokujeejatkat tü süchikat Nilo, napotoko süʼütpünaa tü süchikat süchiirua tü wüin nasüinjatkat. 25 Alatüsü akaratshi kaʼi süchikijee ishajaain nutuma Jehová tü süchikat Nilo.

8 Anuukalaka tü aluwataanakalü anain Moisés nutuma Jehová: «Puʼuna nümaʼanamüin faraón jee püma nümüin: ‹Anuusa nünüiki Jehová: «Püjüta nachiki na israelitakana süpüla naʼwaajüin taya. 2 Ayatülejeʼeya paʼalijirüin naya, watteerü saalii iperüʼüi tantireetka suluʼupünaa tü puumainkat. 3 Watteerü saalii iperüʼüi shirokupünaa tü süchikat Nilo, ojuʼiteerü shia shirokujee tü wüinkat, ekeroteerü shia pipialuʼu, eere putunkuin jee awateerü shia saaʼu pücamain. Ekeroteerü shia nepialuʼu na püchepchiakana jee pasanainjeena sünain na wayuu yaakana puumainpaʼa, ekeroteerü shia suluʼu ‹horno› jee suluʼu tü iita amasaajiakat. 4 Mülieechi maʼin pia sutuma iperüʼüi, mülieena maʼin sutuma na püchepchiakana jee napüshuaʼa na wayuu eekana süpaʼa tü mma eere pia»›».

5 Anuu tü nümakat Jehová mapa nümüin Moisés: «Anuu tü püküjainjatkat nümüin Aarón: ‹Paapaa tü waraaratkat jee piyurula pütüna sooʼopünaa tü süchikat, tü sütünakat tü süchikat Nilo jee tü lamuunakat. Püjüta iperüʼüi nooʼomüin na wayuu yalakana Egipto müliaiwa naya sutuma›». 6 Niyurutkalaka Aarón nütüna sooʼopünaa tü wüin eekalü Egipto, sujuʼitaka iperüʼüi shirokujee tü wüinkat jee wainmaka iperüʼüi süpaʼapünaa tü mmakalü Egipto. 7 Nashataka tia na sacerdote ooʼulaküliikana sükajee tü napülainkat, nojuʼitirüin iperüʼüi shirokujee tü wüinkat jee wainmakalaka shia natuma sainküinpünaa tü mmakalü Egipto. 8 Shiasaʼa süchikijee tia, nuunejitkalaka faraón Moisés jee müshia Aarón jee nümaka namüin: «Juchuntaʼaya maa nümüin Jehová nüshaʼleʼeraiwa toulia tü iperüʼüikat jee noulia na wayuu yaakana toumainpaʼa. Aluʼu tajüteenainjaʼa jooluʼu na israelitakana noʼutaiwa saaʼin mürüt süpüla naʼajüin shia nümüin Jehová». 9 Anuujeseʼe nünüiki Moisés nümüin faraón: «Piasaʼa neʼe taʼatapajaka anüiki süpüla tachuntuinjachin nümüin Maleiwa süpüla nüshaʼleʼerüinjatüin puulia tü iperüʼüikat, noulia na püchepchiakana, noulia na wayuu yaakana puumainpaʼa jee suulia tü jipiakat. Shieerü neʼe apütaaka tü iperüʼüikat shiroku tü süchikat Nilo». 10 «Shia anaka aluʼu wattaʼa», nümaka faraón nümüin. Anuujeseʼe nünüiki Moisés nümüin: «Shieerü aainjünaka tü pümakat pütüjaaiwa saaʼu nnojolin eein wanee maleiwa eekai müin aka naaʼin Jehová chi Wamaleiwasekai. 11 Nnojoleetka eein iperüʼüi jipialuʼu, ashaʼleʼenneerü shia puulia, noulia na püchepchiakana jee noulia na wayuu yaakana suluʼu tü mmakalü Egipto. Shieerü neʼe apütaaka tü iperüʼüikat shiroku tü süchikat Nilo».

12 Nuʼunakalaka Moisés jee müshia Aarón nümaʼanajee faraón, nuchuntaka maʼin Moisés nümüin Jehová nüshaʼleʼerüinjatüin tü iperüʼüi nuluwataakat paala nooʼomüin faraón. 13 Naaʼinrakalakaʼaya Jehová tü nuchuntakat Moisés nümüin, outayaa sümakalaka tü iperüʼüi eejatkat nepialuʼu na egipciokana, eejatka suluʼu napaatiase jee tü eejatkat suluʼu noumain. 14 Nakotchojaka shia na egipciokana sümaa neichijain shia. Keejuusü maʼin tü mmapaʼakat sutuma. 15 Niʼrapa faraón sajaʼlajaain tü iperüʼüikat, macheʼeka nia sümüin tü nümakat Moisés jee sümüin tü nümakat Aarón, nnojoishi jaa müin nia namüin maʼaka nüküjatülin shia paala Jehová.

16 Anuukalaka joo nünüiki Jehová nümüin Moisés: «Anuu tü püküjainjatkat nümüin Aarón: ‹Piyalera tü waraaratkat, pütaʼiteetka tü mmakat süka, sukumajaajeetka shipe sünainjee tü sükalirakat mma, wainmeetkalaka shia süpaʼapünaa tü mmakalü Egipto›». 17 Shia naaʼinrakaʼaya tia. Niyaletkalaka Aarón tü waraaratkat, nütaʼitaka tü mmakat süka. Sushutakalaka tü shipekat naaʼu na wayuukana jee saaʼu mürüt. Akumajaasü tü shipekat sünainjee sükalira tü mmakat, wainmakalaka shia süpaʼapünaa tü mmakalü Egipto. 18 Nayasaʼa na sacerdote ooʼulaküliikana nashateein sükajee tü napülainkat tü naainjakat Aarón, eejeesü shipe natuma, nnojotpejeʼe nountuin shia. Sushutakalaka tü shipekat nooʼomüin na wayuukana jee sooʼomüin mürüt. 19 Anuujese nanüiki na sacerdote ooʼulaküliikana nümüin faraón: «¡Aainjünüsü tia sükajee tü nüpülainkat Maleiwa!».* Ayatakalakaʼaya macheʼein nia sümüin tü münakat nümüin, nnojoishi jaa müin nia maʼaka nüküjatülin paala Jehová.

20 Nuluwataanaka Moisés nutuma Jehová sümaa nümüin nümüin: «Pütamaa wattaʼa maalü, oʼunajachi pia süpüla püntiraainjachin nümaa faraón. Oʼuneechisaʼa nia eemüin tü süchikat, anuujeetkalaka pünüiki nümüin: ‹Anuu nünüiki Jehová: «Püjüta na israelitakana süpüla naʼwaajüinjachin taya. 21 Nnojoliire püjütüin na israelitakana ajüteechi taya pooʼomüin wanee merüle aikalü ataʼa, tajüteerü shia nooʼomüin na püchepchiakana, nooʼomüin na wayuu kepiakana suluʼu tü mmakalü Egipto jee tajüteerü shia jipialuʼumüin. Watteerü saalii tia merüle aikalü ataʼa suluʼu tü miichi yaakalü Egipto jee jouleerü shia sainküinpünaa tü mma kaluʼukat jia. 22 Shiapejeʼe nnojoleerüin jamüin soʼu kaʼikat tia tü mmakat Gosén, chaa eere kepiain na israelitakana. Nnojoleerü antüin chamüin tü merüle aikalü ataʼa, pütüjaajeetkalaka saaʼu yaain taya suluʼu tü mmakalü Egipto, tayakai chi kanüliakai Jehová. 23 Naateerü tü taaʼinreetkat napüleerua na tachonniikana, na israelitakana suulia tü taaʼinreetkat namüin na egipciokana. Alateerü tia wattaʼa»›».

24 Shiaʼaya naaʼinraka Jehová tia. Watta maʼin saalii merüle aikalü ataʼa antayaa maka sooʼomüin nipia faraón, sooʼomüin nepia na nüchepchiakana jee sooʼomüin süpüshuaʼa tü mmakalü Egipto. Müliashii maʼin na egipciokana sutuma tia merüle aikalü ataʼa. 25 Neenajirakalaka faraón Moisés nümaa Aarón sümaa nümüin namüin: «Anakajaʼa juʼutule saaʼin mürüt süpüla jaʼajüinjatüin shia nümüin Maleiwa suluʼu mmakat tüü». 26 Asoutapejeʼe Moisés nümüin sünain maa: «Nnojotsüsaʼa anain waaʼinrüle tia, nalerajüin na egipciokana woʼutuin saaʼin mürüt süpüla waʼajüin shia nümüin Jehová chi Wamaleiwasekai. ¿Aashin naʼinaʼaleenain waya süka ipa woʼutule saaʼin mürüt noʼupala sümaa waʼajüin shia? 27 Müshiijeseʼe woʼunajaajeenain soʼu apünüin kaʼi isashiipaʼamüin, woʼuteenakalaka saaʼin mürüt chamüin süpüla waʼajüinjatüin shia nümüin Jehová chi Wamaleiwasekai maʼaka nuchuntuin shia wamüin».

28 Anuukalaka nünüiki faraón: «Tajüteena jia isashiipaʼamüin süpüla juʼutuinjatüin saaʼin mürüt jaʼajüinjatka nümüin Jehová chi Jümaleiwasekai. Nnojoliipejeʼe wattakualiinjanain maʼin jia. Juchunteenaka tapüleerua». 29 Anuukalaka nünüiki Moisés nümüin: «Anakajaʼa toʼunule pümaʼanajee, tachunteechikalaka nümüin Jehová püpüleerua piakai faraón, napüleerua na püchepchiakana jee napüleerua na yaakana puumainpaʼa süpüla süshaʼwalaainjatüin wattaʼa juulia müliain jia sutuma tü merüle aikalü ataʼa. Nnojoliipejeʼe pimeejüinjanain waya wachikuaʼa piakai faraón jee nnojoishii paʼalijirüinjanain na israelitakana suulia noʼunuin sünain oʼutaa saaʼin mürüt süpüla naʼajüin shia nümüin Jehová». 30 Nuʼunakalaka Moisés nümaʼanajee faraón jee nuchuntaka nümüin Jehová. 31 Naaʼinrakalaka Jehová tü nuchuntakat Moisés nümüin. Nnojolichipaka müliain faraón sutuma tü merüle aikalü ataʼa, nnojoishii müliain na nüchepchiakana namaʼaleeya na wayuu sulujunakana tia mmakat. Nnojotsü apütaain waneesiaakaijeʼe merüle aikalü ataʼa suluʼu tü mmakalü Egipto. 32 Macheʼepejeʼe faraón nüchikuaʼa, nnojoliikalaka nüjütüin na israelitakana.

9 Anuu tü nuluwataakalü anain Jehová Moisés: «Anashi puʼunule nümaʼanamüin faraón sümaa pümüin nümüin: ‹Anuu tü nümakat Jehová, chi Namaleiwasekai na hebreokana: «Püjüta na israelitakana süpüla naʼwaajüinjachin taya. 2 Eekajasaʼa nnojoliire püjütüin naya sümaa ayatüinña paʼalijirüin naya, 3 tayakai Jehová toʼuteerü aaʼin tü pümüʼlüinkat sükajee tü tapülainkat, anteerü wanee ayuulii outasiroʼu sünain paʼamain, sünain püpüliiküse, sünain pükameeyase, sünain püpaaʼase jee sünain paʼanneetse. 4 Naateerü tü taaʼinreetkat tayakai Jehová süpüleerua tü namüʼlüinkat na israelitakana suulia tü taaʼinreetkat sümüin tü namüʼlüinkat na egipciokana, nnojoleerü outuin waneesiaakalüjeʼe neʼe namüʼlüin na israelitakana»›». 5 Nüküjain Jehová joujainjatüin sülatüin tia soʼu nümüin: «Taainjeerü tia wattaʼa tayakai Jehová suluʼu tü mmakalü Egipto».

6 Shiaʼaya naaʼinraka Jehová tia waneemüin kaʼi. Outusü süpüshuaʼa namüʼlüin na egipciokana, nnojotpejeʼe outuin waneesiaakaijeʼe namüʼlüin na israelitakana. 7 Nuluwataapa faraón na nüchepchiakana sünain anaʼlawaa sümüin tü alatakat, niyaawata aaʼu nnojoluin outuin waneesiaakaijeʼe namüʼlüin na israelitakana. Mayaainjeʼe sülatüin tia ayatüshia wayuuin iche aaʼinchi nia.

8 Anuujeseʼe nünüiki Jehová nümüin Aarón jee nümüin Moisés süchikijee tia: «Jajapata paliʼi suluʼujee tü hornokot süka tü piamasükat jajapü jee nieechika Moisés ejitüin shia iipünaamüin nuʼupala faraón. 9 Yütchonjeerü maʼin tü paliʼikat sainküinpünaa tü mmakalü Egipto maʼaka saaʼin sümamüla mma, yooijeerü süta wayuu sutuma jee süta mürüt sainküinpünaa tü mmakalü Egipto».

10 Najapataka tü paliʼikat suluʼujee tü hornokot jee ashaʼwalaashii naya nümülatuʼu faraón. Naapaaka Moisés tü paliʼikat jee nijitüin shia iipünaamüin, yooikalaka süta wayuu jee süta mürüt sutuma. 11 Isakalaka nachiki na sacerdote ooʼulaküliikana noʼunuin nümaʼanamüin faraón süka yoolin nata maʼaka naaʼin napüshuaʼa na egipciokana. 12 Nuuʼulaaka Jehová macheʼein nüchikuaʼa faraón sümüin tü münakat nümüin jee nnojoishi jaa müin nia namüin maʼaka nüküjatüjülin Jehová nümüin Moisés.

13 Anuujeseʼe nünüiki Jehová nümüin Moisés: «Pütamaa wattaʼa maalü, oʼunajachi pia süpüla püntiraain nümaa faraón, meetka pünüiki nümüin: ‹Anuu nünüiki Jehová chi Namaleiwasekai na hebreokana: «Püjüta na israelitakana süpüla naʼwaajüinjachin taya. 14 Wainmeerü kasa mojusü piʼreetka tatuma, neʼreerü shia na püchepchiakana jee na wayuu yaakana puumainpaʼa süpüla pütüjaainjatüin saaʼu nnojolin eein wanee maleiwa makai aka taaʼin sainküinpünaa tü mmakat. 15 Piʼrayülüjeʼe poʼukajatü tatuma sükajee tapülain süpüla süsalainjachin pia paainjala jee süsalayüliijeʼe naainjala na wayuu yalakana puumainpaʼa süka wanee ayuulii outasiroʼu, toʼutayüijeʼe aaʼin pia. 16 Katayütpejeʼe poʼu tatuma süpüla pütüjaain saaʼu pülashin maʼin taya jee süpüla saapüinjatüin wayuu tachiki sainküin mmakat. 17 Ayatapejeʼe yaletüin maʼin paaʼin makaʼa püpülajüin noulia na israelitakana püjütüin naya. 18 Wattaʼa maaʼutpünaa yaa, taluwataajeerü pünainmüin tü shiʼichiisekat juya keemakat maʼin, nnojotyülia alatüin makalü aka saaʼin tia suluʼu tü mmakalü Egipto soʼujeʼereeya pueuloin shia sünainmüinreʼeya maaʼutpünaa. 19 Anakajaʼa puutkajeʼerüle tü pümüʼlüinkat suupünaa wanee luma jee süpüshuaʼa tü kasa pümaʼanakat chaa wünaʼapü. Nüpütaale wanee wayuu jee shiale wanee mürüt chaa wünaʼapü sümaa nnojolin suupünaain nia wanee luma, outeechi nia sutuma tü shiʼichiisekat juya»›».

20 Nayasaʼa napüshuaʼa na aʼyataashiikana nümüin faraón jaa makana sümüin tü nümakat Jehová, nantiramaatüin nachepchia jee tü namüʼlüinkat nepialuʼumüin. 21 Eekajasaʼa na nnojoliikana jaa müin sümüin tü nümakat Jehová, napütüin nachepchia jee tü namüʼlüinkat chaa wünaʼapü.

22 Anuukalaka nünüiki Jehová nümüin Moisés: «Piyurula pütüna iipünaamüin eejeetkalaka tü shiʼichiisekat juya sainküinpünaa tü mmakalü Egipto, ojutuujeerü shia saaʼu wayuu, saaʼu mürüt jee saaʼu tü pünajüt eekat suluʼu tü mmakalü Egipto». 23 Niyaletkalaka Moisés iipünaamüin tü waraaratkat, nuluwataaka Jehová sütürüla juya sümaa shiʼichiise juya, sujutuuka siki* saaʼu tü mmakat. Ayatüsia keʼichiisein juya nutuma Jehová saaʼu tü mmakalü Egipto. 24 Keʼichiisesü tü juyakat sümaa siki, kayaasü maʼin shia. Nnojotyülia eein wanee juya keʼichiiseka maʼin suluʼu tü mmakalü Egipto soʼujeʼereeya pueuloin shia. 25 Ajaʼttaleesia süpüshuaʼa tü eejatkat süpaʼapünaa tü mmakalü Egipto sutuma tü shiʼichiisekat juya, ajaʼttüsü wayuu sümaa mürüt, ajaʼttaleesia tü pünajütkat otta tü wunuʼulia eejatkat chayaa. 26 Shia neʼe nnojotka keʼichiisein aluʼu juya tü mmakat Gosén, eejanale kepiain na israelitakana.

27 Nuunejiraka faraón Moisés nümaa Aarón sümaa nümüin namüin: «Tayaawata aaʼulu kaainjalain taya, lotusü nukuwaʼipa Jehová, mojupejeʼe maʼin tü taainjakat namaʼaleeya na wayuu yaakana toumainpaʼa. 28 Puchunta maʼin nümüin Jehová najaʼttiraiwa tü sütürülakat juya jee tü shiʼichiisekat juya, tooʼulaajeenaka juʼunuin yaajee, nnojoleena taʼalijirüin jia». 29 Nusoutaka Moisés nümüin: «Tojuʼitapa suluʼujee mmakat tüü, tayuruleerü tatüna nuʼupala Jehová, piyaawateetka saaʼu niain Jehová kakorotka tü mmakat sajaʼttapa tü sütürülakat juya jee tü shiʼichiisekat juya. 30 Tatüjaapejeʼe saaʼu nnojoleechin jaa müin pia nümüin Jehová chi Maleiwakai jee nnojoleena jaa müin na püchepchiakana».

31 Ajaʼttaleesia süpüshuaʼa tü linokot jee tü cebadakat, alüʼütpejeʼe tü cebadakat süpüla jeʼwein shia otta tü linokot kasiisü shia. 32 Nnojotpejeʼe ajaʼttüin tü suuʼuliakalüirua trigo süka jeʼwein shia mapa. 33 Nujuʼitapa Moisés suluʼujee tü mma eejachire faraón, niyuruluin nütüna nuʼupala Jehová, sojoʼlooka tü sütürülakat juya jee tü shiʼichiisekat juya, ajaʼttüsü tü juyakat. 34 Niʼrapa faraón sojoʼlooin tü juyakat jee sajaʼttüin tü sütürülakat juya sümaa tü shiʼichiisekat juya, kaainjalashi nia nüchikuaʼa jee macheʼesai nia sümüin tü münakat nümüin, müsiaʼaya neʼe tü naaʼinrakat na nüchepchiakana. 35 Ayatüshia macheʼein faraón sümüin tü münakat nümüin jee nnojoishii nüjütüin na israelitakana maʼaka nüküjatüjülin shia Jehová paala nükajee Moisés.

10 Anuukalaka nünüiki Jehová nümüin Moisés: «Anakajaʼa puʼunule nümaʼanamüin faraón, tooʼulaainsaʼa wayuuin iche aaʼinchi nia namaʼaleeya na nüchepchiakana, müsü sukuwaʼipa tia tatuma süpüla taaʼinrüin kasa pülasü nuʼupala. 2 Tooʼulaain müin sukuwaʼipa süpüla püküjain shia namüin püchonnii jee namüin püikeyuu süchiki jamüin sukuwaʼipa süpüla süsalainjanain naainjala na egipciokana tatuma jee süpüla püküjain süchiki tü kasa pülasü taaʼinrakat naʼaka. Jütüjaajeetkalaka saaʼu sükajee tia tayain chi kanüliakai Jehová».

3 Nuʼunakalaka Moisés nümaa Aarón nümaʼanamüin faraón sümaa namüin nümüin: «Anuusa nünüiki Jehová chi Namaleiwasekai na hebreokana: ‹¿Joujaleechikai ooʼulaain pia suulia achecheraa paaʼin süpüla poonooinjachin sümaa tanüiki? Anakajaʼa püjütüle na israelitakana süpüla naʼwaajüinjachin taya. 4 Ayatüleʼeya paʼalijirüin na israelitakana, antireechi taya kaashapa wattaʼa puumainpaʼamüin. 5 Watteerü saalii tü kaashapakat süpaʼapünaa tü mmakat, nnojoleerü jaʼyain tü mmapaʼakat sutuma. Ajaʼtteerü shiküin süpüshuaʼaya tü kasa apütaakat süchikijee tü shiʼichiisekat juya, ajaʼtteerü shiküin süpüshuaʼa tü wunuʼulia eekai iyotuin wünaʼapü. 6 Watteerü saalii tü kaashapakat pipialuʼu, nepialuʼu na püchepchiakana jee suluʼupünaa tü miichi eekalü Egipto. Nnojotsü neʼrüirüin tia na wayuu kachonkana pia jee na kaikeyuukana pia soʼujeʼereeya katüin noʼu suluʼu mmakat tüü›». Nujununtaakalaka Moisés nümaa Aarón sümaa noʼunuin nümaʼanajee faraón.

7 Süchikijee tia naashajaakalaka na nüchepchiakana faraón nümüin sümaa namüin nümüin: «¿Joujaleechikai maʼin ooʼulaain wayuukai chii suulia naaʼinrüin kasa mojusü wamüin? Anakajaʼa püjütüle nala wayuukana süpüla naʼwaajüinjachin Jehová chi Namaleiwasekai. ¿Nnojotsükai piʼrüin sajaʼttüin kasa süpüshuaʼa yaa Egipto?». 8 Nuunejinnakalaka nüchikuaʼa Moisés nümaa Aarón nümaʼanamüin faraón. Anuujeseʼe nünüiki faraón namüin: «Anakajaʼa juʼunule sünain aʼwaajaa Jehová chi Jümaleiwasekai. ¿Jaraliikaʼa maʼin na oʼunajanakana jümaa?». 9 Nusoutakalaka Moisés sünain maa: «Aainjainjana waya wanee miʼiraa nümüin Jehová, woʼuneenakalaka namaa na jimaʼaliikana jee na majayünnüükana, na wayuu miyoʼuyuukana, namaa wachonnii, wakoʼulireerü waʼanneetse jee müsia wapaaʼase». 10 Nusoutakalaka faraón sünain maa: «Jaʼyasü jaaʼu jaaʼinreein kasa mojusü. ¿Eejeechijasaʼaya Jehová jümaa jaaʼinruʼu tajütüle jia namaa jüchonnii? 11 ¡Nnojottaa! Naya neʼe oʼunajanakana sünain aʼwaajaa Jehová na tooloyuukana, jama shiain juchuntuin paala tia tamüin». Najünajaanakalaka nümaʼanajee faraón.

12 Naashajaakalaka Jehová nümaa Moisés sümaa nümüin nümüin: «Piyurula pütüna sooʼopünaa tü mmakalü Egipto süpüla süntajatüin tü kaashapakat sooʼopünaa süpüshuaʼaya tia mmakat, sajaʼttireetkalaka süpüshuaʼa tü pünajütkat, süpüshuaʼa tü apütaakat süchikijee tü shiʼichiisekat juya». 13 Niyaleramaatakalaka Moisés tü waraaratkat sooʼopünaa tü mmakalü Egipto. Suwawatkalaka wanee joutai wüinpüjeekuat nutuma Jehová, siraaka kaʼikat sümaa tü joutaikat jee siraasü aikat sümaa. Shiasaʼa waneemüin kaʼi, süntakalaka tü kaashapakat sutuma tü joutai wüinpüjeekuatkat. 14 Sushutakalaka tü kaashapakat saaʼu tü mmakalü Egipto, wattakalaka maʼin saalii suluʼupünaa tia mmakat. Keemasü maʼin tia makat. Nnojotsü maajüin wattain maʼin saalii tü kaashapakat jee nnojoleerü alatüin tia piantua. 15 Wattakalaka maʼin saalii kaashapa suluʼu Egipto jee shipiʼyuushijaakalaka tü mmapaʼakat sutuma. Ajaʼttaleesia tü pünajüt eejatkat suluʼu tia mmakat jee ajaʼttaleesia süpüshuaʼa tü süchon wunuʼulia apütaakat süchikijee tü shiʼichiisekat juya. Nnojotsü apütaain waneesiaakalüjeʼe süpana wunuʼu eekai wüittüin jee nnojotsü waneesiaakalüjeʼe alama apütaaka suluʼu tü mmakalü Egipto.

16 Nuunejinnamaatakalaka Moisés nümaa Aarón nutuma faraón sümaa nümüin namüin: «Kaainjalashi taya nuʼupalamüinreʼeya Jehová chi Jümaleiwasekai jee eesia tü kasa mojusü taainjakat jümüin. 17 Jülatiraʼaya maa sooʼopünaa jaaʼin tü taainjalakat uwatuayaakaijeʼe neʼe jee juchuntaʼaya maa nümüin Jehová chi Jümaleiwasekai nüshaʼleʼeraiwa toulia tü kasa keemasü ajaʼttakalü atuma kasa». 18 Nuʼunakalaka Moisés nümaʼanajee faraón jee nuchuntakalaka nümüin Jehová. 19 Nuʼwanajeʼerakalaka Jehová sukua tü joutaikat, suwawatkalaka nutuma wanee joutai katchinsü maʼin wopujeekuat, sülüʼüjakalaka tü kaashapakat, sujutuukalaka shirokumüin tü palaa Ishosükat. Nnojotsü apütaain waneesiaakaijeʼe kaashapa suluʼu tü mmakalü Egipto. 20 Nuuʼulaapejeʼe Jehová macheʼein faraón, nnojoliikalaka nüjütüin faraón na israelitakana.

21 Anuukalaka nünüiki Jehová mapa nümüin Moisés: «Piyurula pütüna iipünaamüin süpüla shipiʼyuushijaainjatüin tü mmakalü Egipto. Kojoinjatü maʼin piʼyuushi saaʼu tia mmakat». 22 Niyurulamaatakalaka Moisés tü nütünakat iipünaamüin, shipiʼyuushijaakalaka tü mmakalü Egipto, kojosü maʼin shia soʼu apünüin kaʼi. 23 Nnojoishii eʼrajiraain na egipciokana jee nnojoishii atamaain naya chaa eejanale naya soʼu apünüin kaʼi. Warattuuipejeʼe chaa eejanale kepiain na israelitakana. 24 Nuunejinnakalaka Moisés nutuma faraón sümaa nümüin nümüin: «Anakajaʼa juʼunule sünain aʼwaajaa Jehová. Eeshiʼiya süpüla juʼunuin namaa na jüchonniikana, shiapejeʼe jüpütajatüin tü jaʼanneetsekat sümaa tü jüpaaʼasekat». 25 Nusoutakalaka Moisés nümüin sünain maa: «Nnojottaa, piainjachijaʼamata aapaka wamüin tü mürüt woʼutajatkalü aaʼin süpüla waʼajüinjatüin shia nümüin Jehová chi Wamaleiwasekai. 26 Oʼunajatiaʼaya tü wamüʼlüinkat wamaa, nnojoleerü wapütüin waneesiaakaijeʼe mürüt süka waapaajeerüin süpüshi süpüla waʼwaajüinjachin Jehová chi Wamaleiwasekai, watüjaajeerü aaʼu chamüinreeya tü woʼutajatkalü aaʼin nümüin Jehová chi Wamaleiwasekai». 27 Nuuʼulaapejeʼe Jehová macheʼein faraón nüchikuaʼa, nnojoliikalaka nüjütüin na israelitakana. 28 Anuuka nünüiki faraón nümüin: «¡Puʼuna yaajee! Jalia püntajayaai püchikuaʼa tamaʼanamüin, toʼuteechi aaʼin pia paaʼinrüle tia». 29 Nusoutakalaka Moisés sünain maa: «Meerüjaʼaya, eejeerü taaʼin suulia taleʼejüin pümaʼanamüin».

11 Anuujeseʼe joo nünüiki Jehová nümüin Moisés: «Tantireerü wanee kasa mojusü nooʼomüin faraón jee nooʼomüin na egipciokana. Nüjüteenakalaka jia yaajee süchikijee tia. Nüjünajaajeena jia nuuʼulaapa juʼunuin. 2 Paashajaa namaa napüshuaʼa na israelitakana, püma namüin na tooloyuukana namaʼaleeya na jieyuukana nachuntaiwa namüin na wayuu kepiakana naʼütpünaa kasa aainjuushika süka pülaata jee aainjuushika süka ooro». 3 Anakalaka nashoʼu na israelitakana namüin na egipciokana nutuma Jehová. Jamüshijaʼa Moisés kojutushi maʼin nia atumawaa suluʼu süpüshuaʼaleeya tü mmakalü Egipto, kojutushi nia natuma na nüchepchiakana faraón jee natuma na egipciokana.

4 Anuukalaka nünüiki Moisés nümüin faraón: «Anuusaʼa tü nümakat Jehová: ‹Alateechi taya sooʼopünaa tü mmakalü Egipto süseʼeruʼupünaa aikat. 5 Outeena napüshuaʼa na shiʼirumakana wayuu eekana suluʼu tü mmakalü Egipto, outajachi niʼiruma faraón chi aluwataashikai nümaʼaleeya chi shiʼirumakai tü achepchiee aʼyataakat sünain ayüüjawaa. Outeeria shiʼiruma namüʼlüin. 6 Saapüneetkalaka shikiisa wayuu suluʼupünaa tü mmakalü Egipto sutuma mojuin maʼin saaʼin. Nnojotyülia aapünüin wanee ekiisaa eekai müin aka saaʼin tia, nnojorüleejeerü aapünüin shia piantua. 7 Nnojoireejaʼa nootojochin wanee erü namüin na israelitakana jee sümüin namüʼlüin. Jütüjaajeetkalaka saaʼu naatain tü naaʼinrakat Jehová namüin na egipciokana suulia tü naaʼinrakat napüleerua na israelitakana›. 8 Noʼuneenakalaka napüshuaʼa na püchepchiakana tamaʼanamüin, nasapainkeena naya tamülatuʼu sümaa namüin tamüin: ‹Pujuʼita yaajee namaa napüshuaʼa na wayuu pümaakana›. Tojuʼiteechikalakajaʼaya süchikijee tia». Nuʼunakalaka Moisés sümaa jashichin maʼin nia eejee faraón süchikijee nüküjain tia nümüin.

9 Anuukalaka nünüiki Jehová mapa nümüin Moisés: «Nnojoleechi jaa müin faraón shiiʼiree wainmainjatüin tü kasa pülasü taainjakat suluʼu tü mmakalü Egipto». 10 Süpüshuaʼa tü kasa pülasü naainjakat Moisés nümaa Aarón naaʼinrüin shia nuʼupala faraón, nuuʼulaapejeʼe Jehová macheʼein faraón sümüin tü münakat nümüin jee nnojoliika nüjütüin faraón na israelitakana nuumainpaʼajee.

12 Anuukalaka nünüiki Jehová nümüin Moisés jee nümüin Aarón suluʼu tü mmakalü Egipto: 2 «Oʼtteerü wanee juya sükajee kashikat tüü, tüü shieerü tü palajatkat kashi. 3 Jaashajaa namüin na israelitakana sümaa müin jünüiki namüin: ‹Jüneeka wanee anneetchon soʼu polooin sükalia kashikat tüü süpüla jiküinjatüin niʼiruku sümaa jüpüshi jee namaa na jipialujunakana. 4 Nnojorüle kojuyain jüpüshi süpüla jiküinjatüin niʼiruku chi anneetchonkai, jikiʼraainjatü shia jipialuʼu nümaa chi wayuu kepiakai jüʼütpaʼa. Jiitajüinjatü shia wanaapünaa sümaa jeʼrashiin na wayuu eküinjanakana otta jeʼrainjatüin neküin. 5 Tooloinjachi chi anneerü jüneekakai, nnojolinjachi ayuulin nia jee nnojolinjachi kamojulain nia, waneeinjachi juya nia. Eeshii süpüla jüneeküin wanee anneetchon jee niale wanee kaaʼulachon. 6 Yalainjachi nia jümaʼana waneʼereeya nuʼutunuin aaʼin soʼu polooin pienchimüin sükalia kashikat tüü, oʼutunuinjachi aaʼin nia natuma na israelitakana soʼu tia kaʼikat shipiʼyuushijaapa. 7 Jütülittirüinjatü tü nüshakat sotpünaa sot tü puettoʼukot jee iipünaapünaa sünain tü sotkat, jaaʼinrüinjatü tia sünain soʼu tü miichi eere jikaainjanain.

8 »›Jiküinjatü tü niʼirukukat soʼu aikat tia, jüsijaainjatü shia, jiküinjatü sümaa pan maʼakaka soolojia otta süpana wunuʼu eekai ishin. 9 Nnojotsü jiküinjatüin wanee shiʼipa eekai iyain jee eekai sutulujuushin, jüsijaainjatü shia süpüshuaʼa, tü shikiikat, tü suuʼuikat jee tü shiyüülainkat. 10 Nnojotsü jünaajaainjatüin tü asalaakat süpüla waneemüin kaʼi. Süpütaale süpüla waneemüin kaʼi jaʼajüinjatü shia. 11 Eküinjana jia sümaa jünain tü jüseʼeruupünaainjatkat, jünainjatü tü jükoʼusüinkat jee jajapuluʼuinjatü tü waraaratkat. Kajaalapüinjana jia sünain ekaa, müinjatü sukuwaʼipa tü Pascuakat süpüla taʼwaajünüinjachin tayakai Jehová. 12 Alateechi taya soʼu aikat tüü sooʼopünaa Egipto jee toʼuteena aaʼin neʼiruma napüshuaʼa na wayuukana jee shiʼiruma wayuu yaakat suluʼu tü mmakalü Egipto, süsaleena naainjala tatuma namaleiwase na egipciokana. Taya chi kanüliakai Jehová. 13 Tü isha eekat sünain soʼu tü miichikat shiyaawase nnojoleenain jamajüin jia tatuma. Teʼrapa tia ishakat alateechi neʼe taya jüʼütpünaa, nnojoleena outuin jia süsalapeena naainjala na egipciokana tatuma.

14 »›Jaaʼinrüinjatü wanee miʼiraa tamüin tayakai Jehová süpüla sotuinjatüin jaaʼin kaʼikat tüü. Ayatüinjatü naaʼinrüin shia na jüikeyuukana. Tüü shia wanee kasa jaaʼinrüinjatka waneepia. 15 Eküinjana jia pan maʼakakat soolojia soʼu akaratshi kaʼi, jiyuʼluinjatü soʼujee tü palajatkat kaʼi tü maasa jashüʼükat yalaka jipialuʼu. Chi wayuu ekakai wanee kasa eekai kaʼakain soolojia soʼujeʼereeya tü palajatkat kaʼi sünainmüinreʼeya tü akaratshikat kaʼi, oʼutunajachi aaʼin nia naʼakajee na israelitakana. 16 Soʼu tü palajatkat kaʼi, outkajaainjana jia süpüla juʼwaajüinjachin chi Maleiwakai, müinjatiaʼaya neʼe shia jutuma soʼu tü akaratshikat kaʼi, nnojoishi aʼyataainjachin wanee wayuu soʼu tia, shia neʼe jüʼlakajaainjatka tü jiyaalujutkat.

17 »›Jaaʼinrüinjatü tü Miʼiraa Saainjünakalü oʼu tü Pan Maʼakasatkat Soolojia süka tayuʼleenain jia jüpüshuaʼa soʼu kaʼikat tüü suluʼujee tü mmakalü Egipto, naaʼinrüinjatiaʼaya tia miʼiraakat na jüikeyuukana. Tüü shia wanee kasa jaaʼinrüinjatka waneepia. 18 Eküinjana jia pan maʼakakat soolojia soʼu tü palajatkat kashi poloopa pienchimüin sükalia kashikat, aliikajeeinjatü tia sünainmüinreʼeya piamain shikii waneemüin sükalia kashikat, aliikainjatü tia. 19 Nnojotsü eeinjatüin jipialuʼu soʼu akaratshi kaʼi maasa eekai jashüʼüin. Wanee wayuu ekakai wanee kasa kaʼakakat soolojia outajachi nia, jaʼitaichi wayuuin israelita nia jee nnojoire israelitain nia. 20 Nnojoishii eküinjanain jia wanee kasa kaʼakakat soolojia, eküinjana jia jipialuʼu pan maʼakaka soolojia›».

21 Nuunejiramaataka Moisés na laülaashiikana napüleerua na israelitakana sümaa nümüin namüin: «Anashii juʼunule jee jüneeka wanee mürüt saʼakajee jümüʼlüin* süpüla jikaainjachin nia sümaa jüpüshi. Juʼuteechika aaʼin nia süpüla jikaainjatüin niʼiruku soʼu tü miʼiraa kanüliakat Pascua. 22 Jaapaajeetka sütüna tü wunuʼu kanüliakat hisopo, jüchüʼtteetka shia shiroku tü isha suluʼukat tü iitakat, jushulereetka shia sotpünaa sot tü puettoʼukot jee iipünaapünaa sünain tü sotkat. Nnojoishi jaralinjachin ojuʼitüin nipialuʼujee, ojuʼitaleeinjachia nia waneemüin kaʼi. 23 Nülatapa Jehová süpüla süsalainjanain naainjala na egipciokana nutuma jee niʼrapa tü ishakat sotpünaa sot tü puettoʼukot jee iipünaapünaa sünain tü sotkat, nülatireerü neʼe Jehová tia miichikat, nnojoleena outuin nutuma na wayuu sulujunakana tia miichikat.

24 »Jaaʼinrawalinjatü tia miʼiraakat. Tüü shia wanee kasa aluwataanaka anain pia waneepia namaʼaleeya püchonnii. 25 Ayatüinjatü jaaʼinrüin miʼiraakat tüü jikerotapeena suluʼu tü mma aapüneetkat jümüin nutuma Jehová maʼaka nüküjatüjülin süchiki paala. 26 ‹¿Jamüsü jaainjakaʼa miʼiraakat tüü?›, namataarüle jümüin na jüchonniikana, 27 anuujeerü jünüiki namüin: ‹Tüü shia tü miʼiraa kanüliakat Pascua süpülajatka nuʼwaajünüin Jehová. Alatüshi nia süʼütpünaa nepia na israelitakana chaa Egipto jee taashisü nutuma wapüshi soʼu süsalain naainjala na egipciokana›».

Nejepülaaka na israelitakana sümaa nasapainkain naya. 28 Naaʼinramaataka na israelitakana tü nuluwataakalü anain naya Jehová nükajee Moisés otta Aarón. Naaʼinrüin wanaapünaa maʼin sümaa tü nümakat.

29 Nuʼuta aaʼinchii Jehová süseʼeruʼupünaa aikat napüshuaʼa na shiʼirumakana wayuu chajanakana Egipto, nuʼuta aaʼinchi chi niʼirumakai faraón chi aluwataashikai nümaʼaleeya niʼiruma chi wayuu püreesakai. Nuʼuta aaʼinriaʼaya shiʼiruma mürüt. 30 Nütamaaka faraón soʼu aikat tia namaʼaleeya na nüchepchiakana jee napüshuaʼa na egipciokana, saapünaka shikiisa wayuu suluʼupünaa tü mmakalü Egipto sümaa mojuin maʼin saaʼin. Nnojotsü eein waneesiaakalüjeʼe miichi eere nnojoluin outuin wanee wayuu. 31 Nuunejiramaataka faraón Moisés nümaa Aarón soʼu aikat tia sümaa nümüin namüin: «Juʼuna jümaala, juʼuna namaʼanajee na wayuu toumainpaʼakana. Juʼuna sünain aʼwaajaa Jehová maʼaka juchuntapuʼuin shia tamüin. 32 Jümaa jaʼanneetse jee jüpaaʼase maʼaka juchuntuin shia tamüin. Juchuntaleʼeya anaa tapüleerua».

33 Napüleeruaanaka aaʼin na israelitakana natuma na egipciokana süpüla nojuʼitamaatüin suluʼujee tü mmakalü Egipto. «Outeena waya wapüshuaʼa nnojoliire noʼunamaatüin», namaka na egipciokana. 34 Naapaaka na israelitakana tü maasa maʼakakat soolojia jee tü iita amasaajiakat nakoʼoyotka paala süka tü nasheʼinkat, nalüʼüjaka shia nanuloʼu. 35 Naaʼinrüinña na israelitakana tü nümakat Moisés namüin, nachuntuin namüin na egipciokana kasa aainjuushika süka pülaata, kasa aainjuushika süka ooro otta kuluulu. 36 Anaka nashoʼu na israelitakana namüin na egipciokana nutuma Jehová, müsüjeseʼe saapünüin namüin süpüshuaʼa tü nachuntakat namüin na egipciokana. Nasütüin na israelitakana noulia na egipciokana tü kasa namaʼanajatkat.

37 Noʼunaka na israelitakana suluʼujee tü mmakat Ramesés chai nakua suluʼumüin tü mmakat Sucot. Eeshii maʼaka 600.000 na wayuu keraakana süpüla surulaalüin naya, katata noulia na tepichikana. 38 Oʼunushiʼiya namaa watta naalii wayuu naatakana oumain. Nakoʼulirüin naʼanneetse sümaa napaaʼase, wainma maʼin tü namüʼlüinkat. 39 Naainjaka pan arülachonsü sümaa lakayaain shia süka tü maasa maʼakakat soolojia nalüʼüjakat chejee Egipto. Maʼakasat soolojia tü pan naainjakat süka najünajaain naya na egipciokana, nnojotka yapain natuma tü nemiainjatkat.

40 Cuatrocientos treinta juya kepiaka oʼu na israelitakana suluʼu tü mmakalü Egipto. 41 Soʼu tü kaʼi shikeraajakalü oʼu tia juyakat, ojuʼitüshii suluʼujee tü mmakalü Egipto napüshuaʼa na wayuu eejanakana nümaa Jehová. 42 Aainjainjana wanee miʼiraa soʼu aikat tüü süpüla sotuin naaʼin niyuʼluin naya Jehová suluʼujee tü mmakalü Egipto. Naaʼinrüinjatü tia miʼiraakat waneepia na israelitakana süpüla naʼwaajüinjachin Jehová.

43 Anuukalaka tü nümakat Jehová nümüin Moisés jee nümüin Aarón: «Tüü shia tü aainjünüinjatkat soʼu tü kanüliakat Pascua. Nnojotsü niküinjatüin wanee wayuu nnojoikai israelitain tü ekaanakat soʼunnaa tü Pascuakat. 44 Niyaʼlajüle paala wanee wayuu nüchepchia acheküsü niʼyoteʼerüin süta nükorolo chi nüchepchiakai, nikeechika chi achepchieekai tü ekaanakat soʼunnaa tü Pascuakat. 45 Nnojoishi süpüla niküinjachin tü ekaanakat soʼunnaa tü Pascuakat chi wayuu akolojookai naʼakamüin na israelitakana jee chi aʼyataakai saaʼu nneerü. 46 Ekünajatü niʼiruku chi anneetchonkai suluʼu wanee miichi, nnojotsü ayuʼnnajatüin niʼiruku suluʼujee tü miichikat jee nnojotsü ashateʼennajatüin niipüse. 47 Naaʼinrüinjatü napüshuaʼa na israelitakana tü miʼiraa kanüliakat Pascua. 48 Kepiale jaʼaka wanee wayuu nnojoikai israelitain jee naaʼinreere tü miʼiraa kanüliakat Pascua süpüla nuʼwaajüin Jehová, niʼyoteʼerüinjatü süta nakorolo napüshuaʼa na tooloyuu eekana nipialuʼu, eekalaka süpüla nürütkaain sünainmüin tü miʼiraakat naaʼinrüle tia jee meechika nia maʼaka naaʼin wanee israelita. Nnojoishi süpüla niküinjachin wanee wayuu tü ekaanakat soʼunnaa tü Pascuakat nnojorüle niʼyoteʼerüin süta nükorolo. 49 Naaʼinrüinjatü tia aluwataanakalü anain chi wayuu eekai israelitain nümaʼaleeya chira eekai nnojolin israelitain kepiakai jaʼaka».

50 Naaʼinrüinña na israelitakana süpüshuaʼa tü nuluwataakalü anain Jehová naya nükajee Moisés nümaa Aarón. Naaʼinrüin wanaapünaa maʼin sümaa tü nümakat. 51 Niyuʼluin Jehová soʼu tia kaʼikat napüshuaʼa na israelitakana* suluʼujee tü mmakalü Egipto.

13 Ayatakalaka naashajaain Jehová nümaa Moisés sümaa nümüin nümüin: 2 «Pükatala tamüin na tooloyuu neʼirumakana na israelitakana. Taya kamüinjachika na tooloyuu neʼirumakana na israelitakana jee taya kamüinjachika tü tooloyuuchein shiʼirumakat namüʼlüin».

3 Anuukalaka nünüiki Moisés mapa namüin na israelitakana: «Soto jaaʼin kaʼikat tüü, tü kaʼi jujuʼitakalü oʼu Egiptojee chaa eejanale achepchieein jia, sotuinjatü jaaʼin tia süka niyuʼluin jia Jehová sükajee naaʼinrüin kasa pülasü jüpüleerua. Nnojoliikalaka jiküinjanain wanee kasa eekai kaʼakain soolojia. 4 Ojuʼitajana jia soʼukai soʼu kashika abib.* 5 Naapüin nünüiki Jehová namüin na jutuushinuukana süchiki naapajatüin jümüin noumain na cananeokana, na hititakana, na amorreokana, na heveokana jee müsia noumain na jebuseokana, joutsü leechi sümaa mapa suluʼu tia mmakat. Nümaapeena jia Maleiwa chamüin, ayatajatiaʼaya sotuin jaaʼin kaʼikat tüü soʼu tü kashikalü abib. 6 Eküinjana jia pan maʼakaka soolojia soʼunnaa akaratshi kaʼi, shiasaʼa soʼu tü akaratshikat kaʼi, aaʼinnajatü wanee miʼiraa süpüla nuʼwaajünüin Jehová. 7 Ekünajatü tü pan maʼakakat soolojia soʼunnaa tia akaratshisükat kaʼi, nnojotsü eeinjatüin jümaʼana wanee kasa eekai kaʼakain soolojia jee nnojotsü eeinjatüin sainküinpünaa juumain wanee maasa eekai jashüʼüin. 8 Anuuinjatkalaka jünüiki namüin na jüchonniikana soʼu tia kaʼikat: ‹Taaʼinrüin tüü süpüla sotuin taaʼin tü naaʼinrakat Jehová tapüleerua soʼu toʼunuin Egiptojee›. 9 Tia miʼiraakat meerü shia maʼaka saaʼin shiyaawase wanee kasa sünain jajapü jee sünain jiʼipoʼu, süsoʼireerü jaaʼin sünain jaashajaainjanain süchiki tü nuluwataakalü anain Jehová jee süsoʼireerü jaaʼin niain Jehová ayuʼlaka jia suluʼujee tü mmakalü Egipto sükajee naaʼinrüin kasa pülasü jüpüleerua. 10 Jaaʼinrawalinjatü juyawai tia aluwataanakalü anain, wanaapünaa sümaa tü kaʼi aneekünakat süpüla saaʼinnajatüin.

11 »Nümaapeena jia Jehová suluʼumüin noumain na cananeokana, tü mma naapajatkat jümüin jee naapajatka namüin na jutuushinuukana, tü nüküjatüjütkalia achiki paala, 12 jükatalüinjana nümüin Jehová napüshuaʼa na tooloyuuchein jiʼirumakana sümaʼaleeya süpüshuaʼa tü tooloyuuchein shiʼirumakat jümüʼlüin. Nümüinjana naya Jehová napüshuaʼa. 13 Awalaajüinjana jia wanee anneerü süpüla jaakajirüinjachin chi shiʼirumakai jüpüliiküse. Nnojorüle juwalaajüin tia naaʼu, jiʼyaatajachi anutpünaa chi shiʼirumakai jüpüliiküse süpüla outajachin nia. Awalaajüinjanaʼaya jia süpüla jaakajirüinjanain napüshuaʼaya na tooloyuuchein jiʼirumakana.

14 »‹¿Jamüsü jaaʼinrakaʼa miʼiraakat tüü?›, nümataarale chi jüchonkai jümüin mapeena, anuu tü jüküjainjatkat nümüin: ‹Niyuʼluin waya Jehová Egiptojee süka naaʼinrüin kasa pülasü wapüleerua soʼu chajanain waya achepchieein suluʼu tia mmakat. 15 Nuʼuta aaʼinchii Jehová napüshuaʼa neʼiruma na wayuu chajanakana Egipto sümaʼaleeya süpüshuaʼa tü shiʼirumakat namüʼlüin süka nnojoliin nüjüteein waya faraón suluʼujee tia mmakat. Müshiijeseʼe woʼutuin saaʼin süpüshuaʼa tü tooloyuu süchonniikat wamüʼlüin süpüla waʼajüinjatüin shia nümüin Jehová jee awalaajüshii waya süpüla waakajirüinjanain na tooloyuuchein weʼirumakana›. 16 Tia miʼiraakat müinjatü aka saaʼin shiyaawase wanee kasa sünain jajapü jee sünain jiʼipoʼu süka niyuʼluin waya Jehová Egiptojee sümaa naaʼinrüin kasa pülasü wapüleerua».

17 Soʼu najütünüin na israelitakana nutuma faraón Egiptojee, nnojoishii nümaain naya Maleiwa suluʼupünaa tü wopu chaʼwatkat suluʼumüin noumain na filisteokana mayaainjeʼe pejein mmakat chapünaa. Müsüleʼeya sukuwaʼipa nutuma Maleiwa süka müin nünüiki: «Aʼwanajaʼalaa meerü naaʼin na israelitakana jee aleʼejeena naya Egiptomüin nantiraapa sümaa wayuu eekai atkaweein namaa». 18 Müshiijeseʼe nujununteʼerüin Maleiwa na israelitakana suluʼupünaa tü wopu chakalü isashiipaʼa sotpünaaka tü paala Ishosükat. Ojuʼitüshii na israelitakana suluʼujee tü mmakalü Egipto suluʼu kottuin naya maʼaka naaʼin surulaat eekai yapain süpüla atkawaa. 19 Nülüʼüjakalaka Moisés tü niipüsekat José. Nuchuntatüjülia paala José namüin na nüchonniikana Israel naapüinjatüin nanüiki nümüin sümaa napansaajüin shia sümaa nümüin namüin: «Nükaalijeenaʼaya jia Maleiwa, jiyuʼlai maa teipüse yaajee». 20 Noʼunakalaka na israelitakana suluʼujee tü mmakat Sucot, nooʼonoopünaakalaka suluʼu tü mmakalü Ezam eejeere sukumajaain tü isashiipaʼakat.

21 Nia Jehová oʼunaka napüleerua na israelitakana. Nuʼunirüin naya soʼukaiwai suluʼupünaa tü napünakat sükajee wanee siruma jee chuwatüsü wanee sikoʼu napüleerua saʼwai. Eekalaka süpüla waraittüin naya soʼukaiwai jee müsia saʼwai. 22 Matüjainsat nnojoluu tü sirumakat, eesü soʼukaiwai naaʼu na israelitakana, akaataʼaya neʼe tü sikoʼukat chuwatawaisü waneepia saʼwai naaʼu.

14 Anuukalaka nünüiki Jehová nümüin Moisés: 2 «Püma namüin na israelitakana nouyantaiwa jee nooʼonooiwa shiʼipoʼujee Pihahirot, pasanain sünain Migdol sümaa tü palaakat, eere jaʼyashiin tü mmakat Baal-Zefón. Chainjana naya ooʼonooin shiʼipoʼujee Baal-Zefón süʼütpaʼa palaakat. 3 ‹Maaʼawashiisaʼa naya, walekuʼu müshii süpaʼapünaa tü mmakat, ataʼülüüshii naya chayaa isashiipaʼa›, meetkalaka nünüiki faraón nachiki na israelitakana. 4 Tooʼulaajeechika macheʼein faraón, nuʼuneechikalaka nachiirua na israelitakana, aʼwaajüneechipejeʼe taya saaʼujee nükanajuuin faraón tachiki namaʼaleeya na surulaat nümaajanakana. Nayaawateetkalaka saaʼu na egipciokana tayain chi kanüliakai Jehová». Naaʼinrakalaka na israelitakana wanaapünaa maʼin sümaa tü aküjünakat namüin.

5 Süküjünakalaka mapa nümüin chi aluwataashikai saaʼu Egipto naʼluwataain na israelitakana. Shiiʼiranajaamaataka naaʼin faraón namaa na nüchepchiakana saaʼujee tü naainjakat, anuukalaka nanüiki: «¿Jamüsü waainjakaʼa tia? ¿Jamüshii taashikaʼa watuma na israelitakana suulia wachepchiain naya?». 6 Nuluwataakalaka faraón yapajüinjatüin atumawaa tü kareeta atkaayakat, nuʼunakalaka namaa na nusurulaatsekana. 7 Nuʼunakalaka faraón sümaa 600 kareeta anajaka maʼin jee sümaa waneirua kareeta eeka Egipto, kaluʼujasü surulaat tia kareetakalüirua waneʼewai sukua. 8 Nuuʼulaakalaka Jehová macheʼein faraón chi aluwataashikai saaʼu Egipto, müshijeseʼe nuushikajaain faraón nachiirua na israelitakana. Jee müshia na israelitakana oʼunushii naya Egiptojee sümaa meimmoluin naaʼin. 9 Neipiijünakalaka na israelitakana natuma na egipciokana, arütkaasü nooʼomüin na israelitakana tü kareeta neʼejenakat faraón sümaʼaleeya tü amakalüirua, na amaajunakana jee müshiʼiya na surulaatkana soʼu chajanain na israelitakana ooʼonooin sotpaʼa tü palaakat süʼütpaʼa Pihahirot, shiʼipoʼujee Baal-Zefón.

10 Nülüʼülaapa faraón nanainmüin na israelitakana, neʼrüin nia namaa na egipciokana sünain arütkawaa nooʼomüin. Nayoʼujaakalaka aaʼin na israelitakana, emetutkalaka nekiisa sünain achuntaa kaalinwaa nümüin Jehová. 11 Anuukalaka nanüiki na israelitakana nümüin Moisés: «¿Nnojotsükai eein mma chaa Egipto süpüla pojoitüinjanain waya makaʼa püntirüin waya isashiipaʼa süpüla outuinjanain waya yaamüin? ¿Jamüsü makaʼa paainjala wamüin? ¿Jamüshii pümaakaʼa waya Egiptojee? 12 ¿Aashin shiain waküjain tia chaiwaʼaya waya Egipto? ‹Nnojo pikeʼejüin waaʼin, anashii puuʼulaale waya süpüla nachepchiain waya na egipciokana›, mataashii wamakai pümüin. Shia anaʼleeka aluʼu nachepchiale waya na egipciokana suulialeʼeya outuin waya isashiipaʼa». 13 Anuupejeʼe nünüiki Moisés namüin na israelitakana: «Nnojo jiyoʼujaain aaʼin. Ayataʼaya jüchecherüin jaaʼin jiʼreetkalaka nükaalinjain jia Jehová soʼukai. Eekajasaʼa na egipcio jiʼrakana soʼukai nnojoliireejeena jiʼrüin naya piantua. 14 Nieechi atkaaka Jehová jüpüleerua jee müshiʼiya jiakana, jimatajana neʼe jia».

15 Naashajaakalaka Jehová nümüin Moisés sünain maa nümüin: «¿Jamüshi ayatakaʼa emetuluin pikiisa sünain achuntaa kaalinwaa tamüin? Püma namüin na israelitakana ayatüinjanain naya sünain oʼunaa. 16 Anakajaʼa piyalerüle püwaraaratse, piyuruleetka pütüna sooʼopünaa tü palaakat süpüla sujutajaain, piameetkalaka süʼülia. Nalateenaka na israelitakana waneemüin saʼata tü palaakat süpaʼapünaa mma eekai jososhiin. 17 Eekajasaʼa tayakai tooʼulaajeena macheʼein na egipciokana, noʼuneenakalaka nachiirua na israelitakana. Aʼwaajüneechi taya sükajee nükanajuujeechin faraón tachiki namaʼaleeya na nusurulaatsekana, tü kareeta natkaayakat jee müshiʼiya na amaajunakana. 18 Natüjaajeetkalaka maʼin saaʼu na egipciokana tayain chi kanüliakai Jehová taʼwaajünapeena sükajee nükanajuuin faraón tachiki, tü kareeta natkaayakat jee müshiʼiya na amaajunakana».

19 Niasaʼa chi aapiee nümaʼanajeejachikai chi shiimainshikai suluʼu Maleiwain oʼunakai napüleerua na israelitakana, alataashi nia nachiiruajee jee müsia tü siruma oʼunakat napüleerua alataasia shia nachiiruajee, ayatakalaka shia nachiirua. 20 Süshaʼwalaaka tü sirumakat napüleerua na egipciokana jee nachiiruajee na israelitakana, akojojoosü tü sirumakat wanee saʼata eere na egipciokana jee tü waneekat saʼata eere na israelitakana chuwatuuisü süpüla warattuuinjatuin saʼwai. Nnojoliika süpüla narütkaain na egipciokana soʼu aikat tia nanainmüin na israelitakana.

21 Niyurutkalaka nütüna Moisés sooʼopünaa tü palaakat, sujutalaakalaka tü palaakat nutuma Jehová sükajee suwawalüin wanee joutai katsüinsü maʼin wüinpüjeekuat, siraasü aikat sümaa waawatüin tia joutaikat. Soosojookoloko shiinaluʼu tü palaakat jee piamakalaka süʼülia. 22 Nalataka na israelitakana waneemüin saʼata tü palaakat sümaa jososhiin tü mmakat napüleerua. Shaʼwatüsü neʼe tü wüinkalü iipünaamüin, eesü wanee nekialuʼujee jee eesü wanee nepeʼeruʼujee. 23 Neipiijünakalaka na israelitakana natuma na egipciokana. Ekerotusü pasanainpünaa sünain tü palaakat nachiirua na israelitakana süpüshuaʼa tü amakalüirua, tü kareeta atkaayakat jee müshiʼiya na amaajuna nümaajanakana faraón. 24 Shiasaʼa eeiwaʼaya aikat,* niʼrakalaka Jehová na egipciokana saʼakajee tü siruma chuwatakat, niimolojeʼerakalaka na egipciokana. 25 Naakajeʼerüin Maleiwa suuʼui neʼejena na egipciokana süpüla isainjatüin nachiki nawateʼerüin shia. «Anashii waleʼejaale noulia na israelitakana süka nütkaain Jehová napüleerua wamaa», müshii na egipciokana.

26 Anuukalaka nünüiki Jehová nümüin Moisés: «Piyurula pütüna sooʼopünaa tü palaakat süpüla sujutuuinjatüin tü wüinkat naaʼu na egipciokana, saaʼu tü kareeta natkaayakat jee naaʼu na amaajunakana». 27 Niyurulamaataka Moisés tü nütünakat sooʼopünaa tü palaakat, shiasaʼa wanaa sümaa sülüʼülüin süpüla suwasajaain aikat shiitaakalaka tü wüinkalü eejatüle paala shia. Isajeeshii na egipciokana suulia tü wüinkat, nujutapejeʼe naya Jehová shiinaluʼumüin tü palaakat. 28 Shiitaapa tü wüinkalü eejatüle paala shia, sülataka sooʼopünaa tü kareeta atkaayakat, nooʼopünaa na amaajunakana jee nooʼopünaa napüshuaʼa na nusurulaatsekana faraón, na ekerotokana paala nachiirua na israelitakana. Nnojoishi apütaain waneeshiaakaijeʼe naʼakajee.

29 Eekajasaʼa na israelitakana alatüshii naya pasanainpünaa sünain tü palaakat sümaa jososhiin tü mmakat napüleerua, shaʼwatüsü tü wüinkalü iipünaamüin, eesü wanee nekialuʼujee jee eesü wanee nepeʼeruʼujee. 30 Shia naaʼinraka Jehová tia süpüla nükaalinjain na israelitakana soʼu tia kaʼikat suulia jamajüin naya natuma na egipciokana. Neʼrüin na israelitakana palasuuinain na egipciokana sotpünaa tü palaakat. 31 Neʼrakalaka na israelitakana naaʼinrüin maʼin Jehová kasa pülasü süpüla müliain na egipciokana nutuma. Kojutukalaka maʼin Jehová namüin na israelitakana jee kanoulashii naya nünain Jehová jee nünain Moisés chi aʼyataakai nümüin.

15 Niiʼirajakalaka Moisés namaa na israelitakana nümüin Jehová, anuu tü neeʼirainkat:

«Eeʼirajüshi taya nümüin Jehová süka kojutuin nia atumawaa.

Nujutirüin chi amaajuchikai sümaa tü naʼamainkat shirokumüin tü palaakat.

 2 Nia Jah* katchinka atuma taya, niaʼaya oʼtteʼeraka taya.

Niaʼaya chi Tamaleiwasekai jee taʼwaajeechi nia. Nümaleiwase nia chi tashikai jee kojuteechi nia tatuma.

 3 Atüjashi atkawaa Jehová sümaa pülashin maʼin nia. Jehová nünülia.

 5 Alatüsü palaa nooʼopünaa sümaa jashichin maʼin shia, emerotushii naya shiinaluʼu maʼaka saaʼin wanee ipa.

 9 Anuu nünüiki chi waʼünüükai: ‹¡Teipiijeena naya! ¡Tasaʼwajeena naya!

Tasüteerü tü nawashirüinkat, taapaajeetkalaka wanee kasa eekai taapaweein amüin.

Ayuʼleechi taya tachajaruutse, ayamüleena naya tachiki›.

11 Jehovákalee, nnojoishi eein wanee maleiwa müin aka paaʼin.

Nnojoishi eekai miyoʼuin maʼin maʼaka paaʼin piakai sümaa wulein nukuwaʼipa.

Pia chi kojutuinjachikai maʼin atumawaa jee aʼwaajünüinjachi pia sükajee piiʼirajünüin amüin, piaʼaya chi aaʼinrakai kasa ponokot maʼin saaʼin wayuu.

12 Piyuruluin tü pajapü pikiakat, shimirajaakalaka naya tü mmakat.

Ooʼulaajeena suulia yalayalain naaʼin na wayuu chakana kepiain Canaán.

16 Ainkuujeerü naaʼin jee apatanajaajeerü naaʼin.

18 Aluwataajeechi Jehová süpüla kaʼikat süpüshuaʼa.

20 Shiasaʼa Míriam tü nünüikimaajatkat Maleiwa, tü nuwalakalü Aarón, saapaakalaka wanee «pandereta», natamaayaa namaka napüshuaʼa na jieyuukana süchiirua, natalejaka tü panderetakat sümaa nayonnojuin. 21 Susoutaka Míriam neʼipajee na tooloyuukana sümaa müin sünüiki shiiʼirainruʼu:

«Jiiʼiraja nümüin Jehová süka kojutuin nia atumawaa.

Nujutirüin chi amaajuchikai sümaa tü naʼamainkat shirokumüin tü palaakat».

22 Nümaakalaka Moisés mapa na israelitakana sotpaʼajee tü palaa Ishosükat. Oʼunushii naya eemüin tü isashiipaʼa chakat Sur, waraittüshii naya soʼu apünüin kaʼi isashiipaʼapünaa sümaa nnojoluin wüin napüla. 23 Nantakalaka na israelitakana eemüin tü mma kanüliakat Mará nnojotpejeʼe nasüin tü wüin chajatkat Mará süka ishin shia. Müsüjeseʼe Mará müin sünülia tia mmakat nutuma Moisés. 24 Naʼyounalaaka na israelitakana nüchiki Moisés sümaa müin nanüiki: «¿Kaseetkalaka joo wasüin?». 25 Nuchuntakalaka maʼin Moisés kaalinwaa nümüin Jehová, nuʼunirüinjeseʼe nia Jehová eemüin wanee wunuʼu joʼuuchon. Nutuʼutaka Moisés tia wunuʼukot sümaa nujutuin shia shirokumüin tü wüinkat, wüinjaakalaka jemetüsü shia.

Nüikaleʼerüin Maleiwa chayaa shikii wanee pütchi jee niʼitaain Maleiwa napüleerua na israelitakana tü sukuwaʼipainjatkat, nuuʼulaka aaʼinchii Maleiwa na israelitakana chayaa. 26 Anuu nünüiki Maleiwa namüin: «Kacheʼejüle maʼin jia sümüin tanüiki tayakai Jehová chi Jümaleiwasekai jee jaaʼinrüle wanee kasa eekai anain tamüin sümaa jüüjüüin jia sümüin tü taluwataakalü anain jee joonoole sümüin tü tachuntakat jümüin, nnojoleerü oʼotuin jünainmüin tü ayuulii oʼotokot nanain na egipciokana, süka jamüin, tayakai Jehová taya chi anakai atuma jia».

27 Nantakalaka na israelitakana süchikijee tia eemüin tü mma kanüliakalü Elim, eejatüle poloo piamamüin shikii wüin eejeere süparalüin sümaʼaleeya akaratshi shikii suuʼulia alana. Nooʼonookalaka chayaa sotpaʼa tü wüinkat.

16 Noʼunakalaka mapa na israelitakana suluʼujee tü mmakalü Elim, nantaka mapa eemüin tü isashiipaʼa kanüliakat Sin, pasanainsü shia sünain tü mmakalü Elim jee sünain tü mmakat Sinaí. Antüshii naya chamüin piama kashi süchikijee nojuʼitüin Egiptojee soʼu polooin jaʼralimüin sükalia kashikat tia.

2 Nantapa isashiipaʼamüin naʼyounalaaka napüshuaʼa na israelitakana nüchiki Moisés nümaa Aarón. 3 Anuukalaka nanüiki na israelitakana namüin: «Anashiije outule waya nutuma Jehová suluʼu tü mmakalü Egipto. Aikalaʼawaishii waya chayaa süʼütpaʼa tü wayeeta kaluʼukalü asalaa, eküshii waya pan emiraleepaʼaya waya. Jüntirüin neʼe waya yaamüin isashiipaʼa süpüla outuin waya sutuma tü jamükat».

4 Anuujeseʼe nünüiki Jehová nümüin Moisés: «Aluwataajeechi taya pan iipünaajee, nakotchojeerü shia weinshi na israelitakana. Tooʼulakeena aaʼin naya sükajee tia jee teʼreerüjaʼa noonoole sümaa tü taluwataakalü anain naya. 5 Shiasaʼa soʼu tü aipiruakat kaʼi jüʼlakajaajeerü tü jükotchojüinkat, tü jiküinjatkat soʼu piama kaʼi».

6 Anuuka nünüiki Moisés nümaa Aarón namüin na israelitakana: «Jütüjaajeerü aaʼu aliika niain Jehová chi ayuʼlakai jia suluʼujee tü mmakalü Egipto. 7 Jiʼreetka wattaʼa tü nüpülainkat Jehová süka naapüin Jehová tü jiʼyounainkat nüchiki. ¿Jaraliikaʼa joo waya süpüla jiʼyounnalaain wachiki?». 8 Ayatakalaka yootuin Moisés sünain maa: «Naapapa Jehová jümüin asalaa aliika jee naapapa pan jümüin wattaʼa maalü süpüla emirainjanain jia, jiyaawateerü aaʼu naapüin Jehová tü jiʼyounainkat nümüin. ¿Jaraliikaʼa joo waya süpüla müinjatüin jünüiki wamüin? Nnojoishii wayain jiʼyounnalaain amüin. Nia Jehová jiʼyounalaaka amüin».

9 Anuuka nünüiki Moisés mapa nümüin Aarón: «Anuu tü püküjainjatkat namüin na israelitakana: ‹Naapüin Jehová tü jiʼyounainkat nümüin, müsüjeseʼe nuchuntuin jümüin jüntüin yaamüin›». 10 Keraapa nünüiki Aarón namüin na israelitakana ouyantaashii naya, neirakaaka wanaapünaa sümaa tü isashiipaʼakat, neʼraka tü nüpülainkat Jehová warattüin saʼaka wanee siruma.

11 Ayataka naashajaain Jehová nümüin Moisés sümaa nümüin nümüin: 12 «Taapüin nanüiki na israelitakana sünain naʼyounalaain. Anuu pünüikinjatka namüin: ‹Ekeena jia asalaa shipiʼyuushijaapa jee ekeena jia pan watta maalü emiraleepaʼaya jia. Jiyaawateetkalaka saaʼu tayain Jehová chi Jümaleiwasekai›».

13 Shiasaʼa soʼu aliikakat tia, antüsü wainma maʼin wüchii joʼuucheinnii* eejanale nooʼonooin na israelitakana jee müsia wattachon eejatü wanee joojotshi süʼütpünaa nepia na israelitakana. 14 Soosojoopa tü joojotshikat, shia apütaaka süpaʼapünaa tü isashiipaʼakat wanee kasa arülachonsü maʼin makalü aka saaʼin suukala eekai kasuuin maʼin. 15 Neʼraka tia na israelitakana sümaa nnojoluin natüjaain aaʼu kasain wayu tia, nasakireʼeraka naaʼin sünain maa: «¿Kasakajasaʼa wayu tüü?». Anuukalaka nünüiki Moisés namüin: «Shia tü pan naapakat Jehová jümüin süpüla jiküinjatüin. 16 Anuu tü nuluwataakalü anain Jehová: ‹Anakajaʼa jukotchojule waneʼewai jukua tü jiküinjatkat. Jaapaainjatü wanee iita süpülajatka piama litro,* jukotchojeetka suluʼu neküin waneʼewai nakua na wayuu kepiakana jümaa›». 17 Shiaʼaya naaʼinraka tia na israelitakana. Eeshii na wainmakana akotchojuin otta eeshii na paliʼitkana akotchojuin. 18 Chi wayuu wainmakai akotchojuin, nnojotsü alanaʼaleein tü nukotchojuinkat shijitünapa suluʼu tü iita kaluʼukat piama litro, akaʼaya chi wayuu paliʼitkai akotchojuin, nnojotsü palitchonleein tü nukotchojuinkat. Shia nakotchojaka waneʼewai nakua tü neküinjatkat.

19 Anuuka nünüiki Moisés namüin: «Nnojotsü jaralüinjatüin anaajaain shiküin süpüla waneemüin kaʼi». 20 Nnojoliipejeʼe jaa müin naya nümüin Moisés. Jokomasü tü neküinkat sümaa keejuuin shia nanaajaapa shia süpüla waneemüin kaʼi. Naashichijaaka Moisés nooʼomüin. 21 Nakotchojowalin wattachon waneʼewai nakua tü neküinjatkat, shiasaʼa naaʼayulaapa chi kaʼikai aʼwüinjaasü tü apütaakat mmoluʼu.

22 Soʼu tü aipiruakat kaʼi, nakotchojüin na israelitakana tü neküinjatkat soʼu piama kaʼi, piamasü iita süpülajatka piama litro. Noʼunakalaka na nekiipüʼükana na israelitakana nünainmüin Moisés jee naküjakalaka tia nümüin. 23 Anuujeseʼe nünüiki Moisés namüin: «Anuu tü nümakat Jehová. Sükalia eemerawaa wattaʼa, tü kaʼi süpülajatkalü aʼwaajaa Jehová. Anakajaʼa jüʼlakajaale suluʼu ‹horno› tü jiküinjatkat jee sutulujuushire jutuma. Jünaajaainjatü süpüla wattaʼa tü eküülü apütaakat». 24 Nanaajaaka shia süpüla waneemüin kaʼi maʼaka nüküjain shia Moisés namüin, nnojotka jokomain shia jee nnojotsü keejuuin shia. 25 Anuuka nünüiki Moisés: «Anasü jiküle shia soʼukai süka shiain tü kaʼi süpülajatkalü aʼwaajaa Jehová. Nnojoleerü wayatüin shia mmoluʼu soʼukai. 26 Jukotchojeerü shia soʼu aipirua kaʼi, shiasaʼa soʼu tü akaratshikat kaʼi, tü kaʼi süpülajatkalü eemerawaa, nnojoleerü wayatüin shia jüpüla». 27 Shiasaʼa soʼu tü akaratshikat kaʼi, ojuʼitüshii waneinnua israelita süpüla nakotchojüinjatüin shia, nnojotka kasain eein napüla.

28 Anuujeseʼe nünüiki Jehová nümüin Moisés: «¿Joujaleenakai jia ooʼulaain suulia ayoutaa tü taluwataakalü anain? 29 Soto jaaʼin eein tatuma tayakai Jehová tü sükaliakalü eemerawaa, müsüjeseʼe naapüin soʼu tü aipiruakat kaʼi tü jiküinjatkat soʼu piama kaʼi. Shiasaʼa soʼu tü akaratshikat kaʼi jimatüinjana neʼe jia, nnojoishi jaralinjachin ojuʼitüin». 30 Neemeraakalaka na israelitakana soʼu tü aipiruakat kaʼi.

31 Maná* sümünaka tia pankat natuma na israelitakana. Kasuusü shia maʼaka saaʼin süʼü cilantro jee müsü seʼejü maʼaka saaʼin galleta kaʼakaka mapa. 32 Anuujeseʼe nünüiki Moisés: «Anuu tü nuluwataakalü anain Jehová: ‹Jaapaa wanee iita süpülajatka piama litro, jukotchojeetka maná suluʼu. Jünaajaajeetka shia süpüla neʼrüinjatüin na jüikeyuukana tü jikakat tatuma chaa isashiipaʼa soʼu tayuʼluin jia suluʼujee tü mmakalü Egipto›». 33 Anuuka nünüiki Moisés nümüin Aarón: «Paapaa wanee jaara, pijiteetka maná suluʼu süka wanee iita süpülajatka piama litro piʼitaajeetka shia nümülatuʼu Jehová, pünaajaajeetka shia jee nanaajaajeerü shia na püikeyuukana». 34 Niʼitaaka shia Aarón sümülatuʼu tü kojon kojutukat* süpüla sünaajaanüinjatüin maʼaka nuluwataain shia Jehová nümüin Moisés. 35 Eküshii maná na israelitakana soʼu pienchi shikii juya nantaleepa suluʼumüin wanee pueulo. Eküshii naya maná nantaleepaʼaya eemüin sülüjüle tü mmakat Canaán. 36 Nemeriijapuʼuin na israelitakana tü neküinjatkat sükajee wanee iita kaluʼuka piama litro.*

17 Noʼunakalaka napüshuaʼa na israelitakana eejee tü isashiipaʼa chakat Sin. Ooʼonoopünaʼawaishii naya suluʼu wanee mma maʼaka nüküjain shia Jehová namüin. Nooʼonooka mapa suluʼu tü mmakat Refidim, nnojotpejeʼe wüin chayaa süpüla nasüinjatüin na israelitakana.

2 Naʼülüjiraakalaka na israelitakana nümaa Moisés sümaa müin nanüiki nümüin: «¡Püsiʼra waya wüin!». Asoutapejeʼe Moisés namüin sünain maa: «¿Jamüshii jüʼülüjiraakaʼa tamaa? ¿Jamüshii ayatakaʼa juuʼulaküin naaʼin Jehová?». 3 Müliapejeʼe maʼin naaʼin na israelitakana chayaa sutuma wüinñaasü. Ayatakalaka naya aʼyounalaain nümüin Moisés sümaa müin nanüiki: «¿Jamüshii piyuʼlakaʼa waya Egiptojee? ¿Piyuʼluin waya süpüla outuinjanain waya sutuma wüinñaasü namaʼaleeya wachonnii jee müsia wamüʼlüin?» 4 Nuchuntakalaka mapa kaalinwaa Moisés nümüin Jehová sümaa nümüin nümüin: «¿Jamüinjatü maʼin nakuwaʼipa na israelitakana tatuma? Choʼujaʼalaa neʼe motsoʼo süpüla neʼinaʼalüin taya süka ipa».

5 Anuukalaka nünüiki Jehová nümüin Moisés: «Puʼuna napüleerua na israelitakana, pümaainjana noʼutku na laülaashiikana napüleerua na israelitakana, pülüʼüjainjatü tü waraarat pütaittakalü aka tü süchikat Nilo. Oʼunajachi pia sümaa pajapüitpain shia. 6 Eejeechi taya püpüleerua chayaa saaʼu tü ipakat chaa Horeb. Pütaittüinjatü tü ipakat, sujuʼiteetkalaka wüin suluʼujee süpüla nasüinjatüin shia na israelitakana». Shiaʼaya naaʼinraka Moisés tia noʼupala na laülaashiikana napüleerua na israelitakana. 7 Masá* sümaa Meribá* müsü sünülia nutuma Moisés tia mmakat süka naʼülüjiraain na israelitakana nümaa chayaa jee süka nooʼulaküin naaʼin Jehová sümaa müin nanüiki: «¿Yaashichijeʼeya Jehová waʼaka nnojoittaapa neʼe nia?».

8 Nashutaka mapa na amalequitakana naaʼu na israelitakana chaa Refidim. 9 Anuujeseʼe nünüiki Moisés nümüin Josué: «Püneeka waneinnua wayuu waʼakajee jee puʼuneechikalaka sünain atkawaa namaa na amalequitakana, cheechi taya wattaʼa saaʼu tü namünakat sümaa tajapüluʼuin nuwaraaratse chi shiimainshikai suluʼu Maleiwain». 10 Noonookalaka Josué sümaa tü nuluwataakalü anain nia Moisés, oʼunushijeseʼe nia sünain atkawaa namaa na amalequitakana. Niakalaka oʼunuin Moisés nümaa Aarón jee müshia Hur saaʼumüin tü namünakat.

11 Akanajüshii na israelitakana iipünaale nütüna Moisés, eekajasaʼa nüshakatirüle tü nütünakat, naya akanajaka na amalequitakana. 12 Aijapa nütüna Moisés, shiʼitaanakalaka wanee ipa nüpüla jee nüikalaakalaka saaʼu. Nüshaʼwalaaka Aarón nümaa Hur naʼatoʼu Moisés wanee nipeʼeruʼujee jee wanee nikialuʼujee, najapuluʼujakalaka tü nütünakat. Ayatakalakaʼaya iipünaain nütüna Moisés motsoleepaʼaya kaʼikat. 13 Suluʼujee tia nakanajuukalaka na amalequitakana nutuma Josué.

14 Anuujeseʼe joo nünüiki Jehová nümüin Moisés: «Püshaja süchiki tia suluʼu tü karaloʼutakat süpüla sotuin shia saaʼin wayuu jee püküja shia süchikuaʼa nümüin Josué sümaa müin pünüiki nümüin: ‹Tajaʼttiraleeinjanaʼaya na amalequitakana süpaʼajee tü mmakat,* nnojoleerü jaralin sotuin aaʼin naya›». 15 Süchikijee tia, nüpaʼawajaakalaka ipa Moisés, Jehová-Nisí* müsü sünülia nutuma tü ipa nüpaʼawajaakat 16 sümaa müin nünüiki: «Atkaajeechi Jehová waneepia namaa na amalequitakana jee namaa na naikeyuukana sükajee mojutuin namüin sukuwaʼipa aluwatawaa nutuma Jah».

18 Niasaʼa Jetró chi sacerdotekai chaa Madián, chi nüshimiakai Moisés, naapa achikirü tü naaʼinrakat Maleiwa nüpüleerua Moisés jee napüleerua na israelitakana. Naapa achikirü tü naaʼinrakat Jehová napüleerua na israelitakana süpüla niyuʼluin naya Egiptojee. 2 Nüjütüin paala Moisés Ziporá tü nuʼwayuusekat nipialuʼumüin Jetró, chi nüshimiakai Moisés jee naapüin Jetró tü kasa choʼujaakat sümüin 3 jee müsia tü kasa choʼujaakat namüin na piamashiikana süchonnii. Guersom nünülia nutuma Moisés wanee nüchon süka müin nünüiki: «Kepiashi taya suluʼu wanee mma nnojotka toumain». 4 Eliezer nünülia chi wane nüchonkai nutuma süka müin nünüiki: «Nükaalinjain taya chi Nümaleiwasekai chi tashikai, nuʼtteʼerüin taya suulia outaa nutuma faraón süka chajaruuta».

5 Nuʼunakalaka Jetró sümaa tü nuʼwayuusekat Moisés namaʼaleeya na süchonniikana süpüla nantiraain nümaa Moisés chaa isashiipaʼa eejachire nooʼonooin, süʼütpaʼa tü nuʼuuchisekat chi shiimainshikai suluʼu Maleiwain. 6 Nuluwataakalaka nünüiki nümüin Moisés sünain maa: «Eekajasaʼa tayakai Jetró chi püshimiakai, ichaaichi taya sünain anaʼlawaa pümüin sümaa tü puʼwayuusekat jee namaa na piamashiikana püchonnii». 7 Nuʼunamaatakalaka Moisés sünain apanapajaa chi nüshimiakai, nejepülaaka nümülatuʼu sümaa nutuʼluin nuwalapaʼa. Nasakiraaka jee süchikijee nekerotaka suluʼu tü miichi aainjuushikat süka loona.

8 Nüküjakalaka Moisés nümüin chi nüshimiakai süchiki süpüshuaʼa tü kasa naainjakat Jehová nümüin faraón jee tü naaʼinrakat namüin na egipciokana süpüla nükaalinjain na israelitakana. Nüküjainña nümüin süchiki tü kasa alatakat namüin wopuluʼu jee müsia süchiki tü naaʼinrakat Jehová süpüla taashin naya nutuma. 9 Talatakalaka maʼin Jetró naapapa süchiki süpüshuaʼa tü naaʼinrakat Jehová napüleerua na israelitakana süpüla niyuʼluinjanain naya suluʼujee tü mmakalü Egipto. 10 Anuujeseʼe nünüiki Jetró: «Kasataalejeseʼe nuʼwaajünüin Jehová chi ayuʼlakai jia Egiptojee, chi alejakai jia nuulia faraón jee chi taashikai atuma na israelitakana suulia nachepchiain naya na egipciokana. 11 Tatüjaaichipa aaʼu pülaleeinña maʼin Jehová noulia napüshuaʼa na maleiwakana, tatüjaa aaʼu tia sünainjee naaʼinmajüin na israelitakana noulia na naʼünüü mojulaakana maʼin jee na yaletakana aaʼin». 12 Niasaʼa Jetró, chi nüshimiakai Moisés, nuʼuta aaʼinrü wanee mürüt süpüla naʼajüin shia jee nülüʼüjain waneirua mürütya süpüla nuʼutuin saaʼin jee naʼajüin shia nümüin Maleiwa. Niasaʼa Aarón namaa napüshuaʼa na laülaashiikana napüleerua na israelitakana oʼunushii naya süpüla nekaainjanain nümaa chi nüshimiakai Moisés nuʼupala chi shiimainshikai suluʼu Maleiwain.

13 Shiasaʼa waneemüin kaʼi, aikalaashi Moisés maʼakaapuʼu naaʼinrüin shia süpüla nunoutuin wanee kasa alataka namüin na israelitakana. Ayatüshiʼiya antüin na israelitakana eemüin Moisés wattaʼajee maalü sünainmüinreʼeya aliika. 14 Niasaʼa chi nüshimiakai Moisés, nünanajaa nümaka tü naaʼinrakat Moisés napüleerua na israelitakana sümaa nümüin nümüin: «¿Jamüsü paaʼinrakaʼa tüü napüleerua na israelitakana? ¿Jamüshi piakaʼa yaain joyotuin pümüiwaʼa jee ayatakalaka nantüin pünainmüin na wayuukana wattaʼajee maalü sünainmüinreʼeya aliika?». 15 Anuujeseʼe nünüiki Moisés nümüin chi nüshimiakai: «Yaashireʼe taya süpüla taküjain namüin na israelitakana tü nümakat Maleiwa. 16 Mojujiraale piamashii wayuu antüshii naya tanainmüin jee naküjain shia tamüin. Tayainjachi aneekaka jaralin aküjain tü shiimainkat jee taküjainjatü namüin tü nüneekakat chi shiimainshikai suluʼu Maleiwain sümaa tü nuluwataakalü anain».

17 Anuukalaka nünüiki chi nüshimiakai Moisés nümüin: «Nnojotsüsaʼa anain tü paaʼinrakat. 18 Akulajaajeetsa paaʼin sünainjee, akulajaajeeria naaʼin na wayuu pümaakana. Nnojoleerü puuntuin pümüiwaʼa punoutuin süpüshuaʼa tü kasa alatakat namüin nala wayuukana. 19 Paapaja maa tanüiki. Anuu wanee kasa taküjainjatka pümüin otta eejeechi chi Maleiwakai pümaa. Nanüikeʼejana pia na israelitakana nümüin chi shiimainshikai suluʼu Maleiwain jee püküjainjatü tü alatakat namüin nümüin chi shiimainshikai suluʼu Maleiwain. 20 Pikirajüinjana naya sünain tü nuchuntakat Maleiwa jee sünain tü nuluwataakalü anain, püküjainjatü namüin tü nakuwaʼipainjatkat jee tü kasa naaʼinrüinjatkat. 21 Aneekeechi pia naʼakajee na israelitakana wayuu eekai kekiin, kojutuin amüin Maleiwa, eekai nanoujunuin anüiki jee nnojoliikana aapaain nneerü shimeejuushika aka wayuu. Nekiipüʼüinjana naya putuma na israelitakana, shikiipüʼüinjana naya 1.000 wayuu, shikiipüʼüinjana naya poloo shikii wayuu, shikiipüʼüinjana naya jaʼrai shikii wayuu jee shikiipüʼüinjana naya poloosü wayuu. 22 Nanoutajatü sukuwaʼipa tü kasa alatakat namüin na israelitakana. Tü kasa eekai kapüleein punouteerü shia, shieetka nanoutuin tü kasa eekai mapüleein. Aʼyataajiraajeena naya pümaa, mapüleejeetka pümüin tü piʼyataainkat. 23 Paaʼinrüle tia jee nücheküle shia Maleiwa, puunteerü tü piʼyataainkat jee noʼuneenakalaka na wayuukana sümaa anain naaʼin nepialuʼumüin».

24 Naapaakalaka Moisés sümaa tü nümakat chi nüshimiakai nümüin, naaʼinrüin süpüshuaʼa tü nüküjakat nümüin. 25 Nüneekakalaka Moisés naʼakajee na israelitakana wayuu eekai kekiin. Nekiipüʼükalaka naya na israelitakana nutuma, shikiipüʼüshii naya 1.000 wayuu, shikiipüʼüshii naya poloo shikii wayuu, shikiipüʼüshii naya jaʼrai shikii wayuu jee shikiipüʼüshii naya poloosü wayuu. 26 Nanoutawaikalaka tü mojujirawaa alatakat namüin na israelitakana, tü eekai kapüleein naküjain süchiki nümüin Moisés süpüla nunoutuin shia, eekajasaʼa tü eekai mapüleein nanoutuin nayakana. 27 Shiasaʼa süchikijee tia nüpütaakalaka chi nüshimiakai Moisés nüpüla, nüleʼejakalaka nuumainpaʼamüin.

19 Antüshii na israelitakana eemüin tü isashiipaʼa chakat Sinaí apünüin kashi süchikijee nojuʼitüin suluʼujee tü mmakalü Egipto. 2 Nantaka eemüin tü isashiipaʼa chakat Sinaí soʼuleʼeya tü kaʼi nojuʼitakalü oʼu Refidimjee, nooʼonooka süʼütpaʼa tü uuchikat Sinaí.

3 Nüliikajaakalaka Moisés saaʼumüin tü uuchikat süpüla naashajaainjachin nümaa chi shiimainshikai suluʼu Maleiwain. Nuunejaka nia Jehová saaʼujee tü uuchikat sümaa nümüin nümüin: «Anuu tü püküjainjatkat namüin na nüikeyuukana Jacob jee tü püküjainjatkat namüin na israelitakana: 4 ‹Jiʼrüinña tü taaʼinrakat namüin na egipciokana, taaʼinrüin shia süpüla müinjanain talüʼüjakai jaaʼin saaʼu sütüna wüchii kanüliaka águila jee tarütkeʼerüin jia tanainmüin. 5 Joonoole maʼin sümaa tü tanüikikat jee jikeraajüle tü pütchi tapansaajakat jümaa, kojuteena maʼin jia tatuma naʼakajee napüshuaʼa na wayuu suluʼujeejanakana tü pueulokalüirua, süka jamüin, süʼlaülajanain taya tü mmakat. 6 Taneekeena jia süpüla juluwataain sümaa sacerdotein jia, takataleena jia tamüin›. Shia püküjainjatka tia namüin na israelitakana».

7 Nüshakataka Moisés saaʼujee tü uuchikat, nuutkajeʼerüin na laülaashiikana napüleerua na israelitakana jee nüküjain namüin süpüshuaʼa tü nuluwataakalü anain Jehová. 8 Anuukalaka nanüiki napüshuaʼa na israelitakana: «Waaʼinreeria süpüshuaʼa tü nümakat Jehová». Nuʼunamaataka Moisés sünain aküjaa nümüin Jehová tü namakat na israelitakana. 9 Anuuka nünüiki Jehová nümüin Moisés: «Anteechi taya pünainmüin saʼaka wanee siruma kojoka maʼin süpüla naapajüinjanain na israelitakana tü taküjainjatkat pümüin jee nanoujainjanain waneepia pünain sünainjee tia». Nüküjakalaka Moisés nümüin Jehová tü namakat na israelitakana.

10 Ayatakalaka naashajaain Jehová nümaa sümaa müin nünüiki: «Puʼuna eemüin na israelitakana jee yapainjana naya putuma soʼukai otta wattaʼa süpüla naʼwaajüinjachin taya, nashijaainjatü tü nasheʼinkat. 11 Yapainjana naya soʼu tü apünüinkat kaʼi süka tashakateechin tayakai Jehová soʼu tia kaʼikat saaʼumüin tü uuchikat Sinaí noʼupala napüshuaʼa na israelitakana. 12 Piʼitaainjatü sülüjüle tü uuchikat suulia noʼotooin saaʼu na israelitakana sümaa pümüin namüin: ‹Nnojoliinjana jia aliikajaainjanain saaʼu tü uuchikat jee nnojoliinjana jia alatüin süchikumüin tü sülüjülekat. Outeechi chi wayuu aliikajaakai saaʼu tü uuchikat. 13 Nnojoishi jipettajachin nia, jujutajatü ipa nooʼomüin sümaa jüʼitüin nia. Jaʼitashi niain wanee wayuu jee shiale wanee mürüt outajachiaʼaya nia›. Arütkaajeena na israelitakana süʼütpaʼamüin tü uuchikat shiʼyalajinnapa tü suʼuwakat anneerü».

14 Nüshakataka mapa Moisés saaʼujee tü uuchikat, yapajakalaka nutuma na israelitakana süpüla naʼwaajüinjachin Maleiwa, nashijaakalaka nasheʼin. 15 Anuujeseʼe nünüiki Moisés namüin: «Yapajüinjana jia süpüla tü apünüinkat kaʼi, nnojoishii ainkaainjanain jia».

16 Shiasaʼa wattaʼa maalü soʼu tü apünüinkat kaʼi, katürülasü maʼin tü juyakat sümaa kayaain shia. Eejatkalaka wanee siruma kojokot maʼin saaʼu tü uuchikat, saapünakalaka shiʼira tü suʼuwakat anneerü sümaa emetuluin maʼin shia. Kutkuttaʼalaka neʼe na wayuukana eejanale nooʼonooin. 17 Nuchuntaka Moisés namüin na israelitakana noʼunajanain eejeere nooʼonooin süpüla nantiraainjanain nümaa chi shiimainshikai suluʼu Maleiwain, nashaʼwalaakalaka süʼütpaʼa tü uuchikat. 18 Kaittuukalaka sümüsain sooʼopünaa tü uuchikat Sinaí, alatüsü tia süka nüntüin Jehová saʼakapünaa sikoʼu saaʼumüin tü uuchikat. Tü sümüsain kaittakat müsü aka saaʼin sümüsain wanee «horno», sukutkujaakalaka tü uuchikat sümaa emetuluin maʼin shia. 19 Yootokalaka Moisés emetut emetut sümapa tü shiʼirakat suʼuwa anneerü, niakalaka asoutuin niʼipajee chi shiimainshikai suluʼu Maleiwain.*

20 Nüshakatakalaka Jehová saaʼu tü uuchikat Sinaí, ashakatüshi nia shiʼichinain tü uuchikat. Nuchuntaka Jehová nümüin Moisés nüliikajaainjachin saaʼu tü uuchikat, nüliikajaakalaka Moisés saaʼu tü uuchikat. 21 Anuu tü nuluwataakalü anain Jehová Moisés: «Püshakata jee püküja namüin na israelitakana nnojoliinjanain naliikajaain saaʼumüin tü uuchikat süpüla neʼrüinjachin tayakai Jehová, wainmeenasaʼa na outakana naaʼinrüle tia. 22 Jamüshiijaʼa na sacerdote arütkaʼawaikana tanainmüin tayakai Jehová, wuleinjana naya süpüla naʼwaajüinjachin tayakai Jehová suulia outajüin naya tatuma». 23 Anuujeseʼe nünüiki Moisés nümüin Jehová: «Nnojoishii süpüla naliikajaainjanain na israelitakana saaʼumüin tü uuchikat Sinaí süka püküjaitpain shia wamüin wanaa sümaa müin pünüiki tamüin: ‹Kalüjüle putuma tü uuchikat jee kojutajatü shia atumawaa›». 24 Anuupejeʼe nünüiki Jehová nümüin: «Anakajaʼa püshakatüle jee püleʼejeechika nümaa Aarón. Püpülajüinjatü noulia na sacerdotekana jee noulia na israelitakana naliikajaain yaamüin eere tayakai Jehová suulia outajüin naya tatuma». 25 Nüshakataka Moisés saaʼujee tü uuchikat, nüntaka eejanale na israelitakana jee nüküja tia namüin.

20 Anuukalaka tü nuluwataakalü anain Maleiwa mapa:

2 «Tayasa Jehová chi Pümaleiwasekai, chi ayuʼlakai pia suluʼujee tü mmakalü Egipto, tü mma eejachire achepchieein pia. 3 Nnojoishi juʼwaajüinjachin wanee maleiwa naata toulia.

4 »Nnojotsü pukumajüinjatüin shiyaakua wanee maleiwayaasü jee nnojotsü pukumajüinjatüin wanee kasa süpüla puʼwaajüinjatüin shia makalü aka saaʼin tü kasa chakat sirumatuʼu, tü yaakat mmapaʼa jee tü chakat shiinaluʼu wüin. 5 Nnojoishi püsapainkainjachin pia sümülatuʼu tia kasakalüirua, nnojoishi oonooinjachin pia sümaa wayuu eekai suchuntuin pümüin puʼwaajüinjatüin tia ayaakuaakalüirua süka jamüin, tayakai Jehová chi Pümaleiwasekai taya wanee Maleiwa achuntakai sümüin wayuu tayainjachin neʼe aʼwaajünüin tamüiwaʼa. Kaainjarale tamüin wanee wayuu eekai üttüin naaʼin tanain, tachekajeerü tia namüin na nüchonniikana, namüin na nüikeyuukana jee namüin nachonnii na nüikeyuukana. 6 Aluʼusaʼa na wayuu aikana apüla taya jee na oonookana sümaa tü taluwataakalü anain, ayateechia taya amülialaain naalin jee naalin na naikeyuukana soʼu watta maʼin saalii juya.*

7 »Nnojotsü puchuntuinjatüin tanülia tayakai Jehová chi Pümaleiwasekai sümaa mojutuin taya putuma süka süsaleenain naainjala tatuma tayakai Jehová na wayuu achuntakana tanülia sümaa mojutuin taya natuma.

8 »Soto paaʼin tü sükaliakalü eemerawaa süpüla ayatüin kojutuin shia pümüin. 9 Aʼyataainjachi pia soʼu aipirua kaʼi jee paaʼinrajatü wanee kasa eekai choʼujaain pümüin soʼunnaa tia. 10 Eekajasaʼa tü akaratshikat kaʼi, sükalia eemerawaa süpüla puʼwaajüin tayakai Jehová chi Pümaleiwasekai. Nnojoishii jia aʼyataainjanain sünain wanee kasa, nnojoishi aʼyataainjachin püchon, nnojoishi aʼyataainjachin püchepchia, nnojotsü piʼyateʼerajatüin pümüʼlüin jee nnojoishi aʼyataainjachin chi wayuu nnojoikai israelitain kepiakai suluʼu pupueulose. 11 Müsü sukuwaʼipa tia süka takumajüin tayakai Jehová soʼu aipirua kaʼi tü palaakat, tü sirumatuʼukat, tü mmakat jee müsia süpüshuaʼa tü kasa eekat suluʼu, eemeraapejeʼe taya soʼu tü akaratshikat kaʼi. Müsüjeseʼe tacheküin tayakai Jehová anaa soʼu tü sükaliakalü eemerawaa jee kojutusü shia tatuma.

12 »Kojuta pümüin püshi sümaa pii süpüla kakaliainjatüin katüin poʼu süpaʼa tü mma taapeetkat pümüin tayakai Jehová chi Pümaleiwasekai.

13 »Nnojo puʼutuin saaʼin wayuu.

14 »Nnojo kawalaʼatain putuma puʼwayuuse.

15 »Nnojo puʼluwajüin.

16 »Nnojo püküjain paʼalain nüchiki wanee wayuu püsakinnüle süchiki tü kasa naaʼinrakat.

17 »Nnojo suchuntaain paaʼin pipiainjatüin nipia wanee wayuu. Nnojo suchuntaain paaʼin puʼwayuuseinjatüin nuʼwayuuse, nnojo suchuntaain paaʼin püchepchiain nüchepchia, nüpaaʼase, nüpüliiküse jee wanee kasa eekai nümaʼanain wanee wayuu».

18 Naapakalaka napüshuaʼa na israelitakana tü sütürülakat juya jee neʼrüin tü shiyaakat juya, naapüinña shiʼira tü suʼuwakalü anneerü* jee neʼrüin kaittüin sümüsain wanee kasa saaʼu tü uuchikat. Kutkuttakalaka neʼe naya jee wattaluʼukalaka naya suulia uuchikat neʼraiwaʼaya tia jee naapaiwaʼaya shia. 19 Anuukalaka nanüiki na israelitakana nümüin Moisés: «Anashi piale aashajaain wamaa, waapajeetkalaka pünüiki nnojoipejeʼe niainjachin aashajaain Maleiwa wamüin outaleere joo waya nutuma». 20 Anuukalaka nünüiki Moisés namüin na israelitakana: «Nnojo mmoluin jia, antüshire chi shiimainshikai suluʼu Maleiwain süpüla nuuʼulaküinjanain jaaʼin, kojuteechikalaka nia waneepia jümüin jee nnojoleena jia kaainjalain». 21 Wattaluʼukalaka na israelitakana, niakalaka arütkaain Moisés sooʼomüin tü siruma kojokot maʼin eejachire chi shiimainshikai suluʼu Maleiwain.

22 Naashajaakalaka Jehová nümaa Moisés sünain maa: «Anuusa tü püküjainjatkat namüin na israelitakana: ‹Aashajaashi taya juʼupala sirumatuʼujee. 23 Nnojoishii jia aainjainjanain shiyaakua maleiwayaasü süka pülaata süpüla juʼwaajüinjatüin shia toulialeʼeya tayakai jee nnojoishii jia aainjainjanain shiyaakua maleiwayaasü süka ooro. 24 Anashii jukumajüle tamüin wanee aʼajülee aainjuushika süka mma, jiʼitaajeetkalaka saaʼu tü jaʼajüinjatkat tamüin, jüsülajeeria tamüin tü anajiraainjatkalü aaʼujee jia tamaa, asülajeena jia tamüin anneerü sümaa paaʼa. Oʼuneechi taya jünainmüin jee eʼreena jia anaa tatuma eere taneeküin süpüla taʼwaajünüinjachin. 25 Jukumajüle tamüin wanee aʼajülee aainjuushika süka ipa, jaainjainjatü shia süka ipa eekai nnojoluin susolojuushin süka cincel. Jusolojüle shia süka cincel mojuteerü jümüin tia aʼajüleekat. 26 Nnojoishii jia akumajüinjanain kaleera sünain tü aʼajüleekat wanee kasa tamüin, jaʼyaleere joo jia* joʼotoopa sooʼopünaa›.

21 »Püküjaleʼeya namüin tü taluwataakalü anain, tü makat mayaa:

2 »Piyaʼlajüle wanee wayuu hebreo süpüla püchepchiainjachin nia, püchepchiainjachi nia soʼu aipirua juya, shiasaʼa soʼu tü akaratshikat juya taashinjachi nia putuma sümaa nnojoluin kasain nuwalaajüin pümüin. 3 Maʼwayuusere nia soʼu piyaʼlajüin nia, oʼuneechi nümüiwaʼa, eekajasaʼa kaʼwayuusere nia oʼuneerü tü nuʼwayuusekat nümaa. 4 Kaʼwayuusere nia nutuma chi nülaamainkai jee kachonle nia sümüin tü nuʼwayuusekat, niainjachi laülaaka chi nülaamainkai saaʼu nuʼwayuuse chi nüchepchiakai jee naaʼu na nüchonniikana, nnojoleena nümaain naya nuʼunule. 5 ‹Nnojoishi taya taasheein, aishi tapüla chi talaamainkai, aisü tapüla taʼwayuuse jee aishii tapüla na tachonniikana›, nümüle kojuyatua chi achepchieekai, 6 nülaʼinreechi nia chi nülaamainkai sünain puettoʼu jee shiale sünain sot puettoʼu, noototeetka tü nücheʼekat süka oʼojia nuʼupala chi shiimainshikai suluʼu Maleiwain, niʼyataajeechika waneepia nümüin chi nülaamainkai.

7 »Nuiküle nüchon wanee wayuu süpüla achepchieeinjatüin shia, nnojoleerü taashin shia maʼaka taashin wanee achepchiee eekai tooloin. 8 Nnojorüle suwalaʼatain shia tü nuʼwayuusekat chi sülaamainkai süka nnojoluin nücheküin shia jee nuikeere shia nümüin wanee wayuu, nnojotsü süpüla nuikajatüin shia nümüin wanee wayuu nnojoikai israelitain süka nnojoluin lotuin sukuwaʼipa tü naaʼinrakat chi sülaamainkai sümüin. 9 Naapüinjatüle tü nüchepchiakat süpüla nuʼwayuuseinjatüin shia chi nüchonkai, müinjatü sujutu nümüin maʼaka saaʼin sujutu wanee nüchon. 10 Kawalaʼatale shia nutuma,* nnojotsü apaliʼirajüinjatüin shiküin tü palajatkat nuʼwayuuse, ayatajatia naapüin süsheʼin jee ayatüinjachia nia ainkaain sümaa. 11 Nnojorüle naaʼinrüin tia apünüinsükat kasa süpüleerua, taasheerü shia sümaa nnojoluin suwalaajüin nneerü nümüin.

12 »Outajachi wanee wayuu eekai jamajüin atuma wane sümaa nuʼutuin naaʼin. 13 Nuʼutule naaʼin sümaa nnojoluin naaʼinjeein shia jee tooʼulaale sülatüin tia tayakai chi shiimainshikai suluʼu Maleiwain, eeshi süpüla nuʼluwataain suluʼumüin wanee mma taküjeetka achiki nümüin. 14 Naashichijaale wanee wayuu nooʼomüin wane jee nuʼutule naaʼin sümaa naaʼinjeein shia, juʼutajachi aaʼin chi wayuu uwomuyuushikai jaʼitashi ounjulaain nia eere saʼajünüin wanee kasa tamüin. 15 Outajachi wanee wayuu aʼyaatakai nüshi jee aʼyaatakai nii.

16 »Nütaʼünüle wanee wayuu nutuma wane otta nuiküle nia jee nüntünüle aaʼu sünain oikaa nia, oʼutunajachi aaʼin chi makai aainjala.

17 »Outajachi chi eekai nuʼulejüin nüshi sümaa nii.

18 »Natkaale piamashii wayuu jee niʼitünüle wanee nutuma chi wane süka ipa otta nüsheʼetünüle sümaa juʼletaleein nia saaʼu cama saaʼujee mayein nia nutuma, 19 naawalaale mapa chi eʼikaashikai jee nukoyorüle sümaa kapüjiain nia, nnojoleerü kasalajanain tia nümüin chi makai aainjala nümüin. Shiajaʼa neʼe nuwalaajüinjachin nümüin saaʼujee maʼyataain nia, naaʼinrajatü tia waneʼereeya naawalaapa.

20 »Pasalaainjachi atumawaa wanee achepchiee niʼyaajünüle süka wunuʼu sümaa nuʼutunuin aaʼin nutuma nülaamain. 21 Nnojoleechipejeʼe pasalaain atumawaa chi achepchieekai outule nia waneemüin kaʼi jee shiale piama kaʼi süchikijee niʼyaajünüin, jama niyaʼlajuushin nutuma chi nülaamainkai saaʼu nneerü.

22 »Amaliale wanee wayuu ipuolu natuma piamashii wayuu atkaakana jee jemeyurüle shia süpülapünaa tü kaʼi jemeyuluinjatkalü oʼu shia sümaa nnojoluin jaralüin outuin, awalaajüinjachi chi wayuu makai aainjala wanaapünaa sümaa tü nuchuntakat suʼwayuuse tü wayuukot, awalaajüinjachi nia wanaapünaa sümaa tü namakat na laülaashiikana. 23 Outule tü wayuukat jee niale outuin chi süchonkai, outajachi chi uwomuyuushikai saaʼu tia. 24 Shiyuʼnnule noʼu wanee wayuu, ayuʼnnajatü noʼu chi makai atuma nia. Sujuttinnüle nai wanee wayuu, ojuttinnajatü nai chi makai atuma nia. Süshataanüle najapü wanee wayuu ashataanajatü najapü chi makai atuma nia. Süshataanüle nuuʼui wanee wayuu, ashataanajatü nuuʼui chi makai atuma nia. 25 Ishale wanee wayuu nutuma wane, ishainjachi atumawaa chi makai atuma nia. Eʼikaale wanee wayuu nutuma wane, eʼikaainjachi atumawaa chi makai atuma nia. Niʼyaatünüle wanee wayuu nutuma wane, aʼyaatünajachi chi makai atuma nia.

26 »Eere wanee wayuu asheʼetakai noʼu nüchepchia jee moʼuleere nia nutuma, acheküshi taashin nutuma chi nüchepchiakai saaʼujee moʼuleein nia nutuma. 27 Sujutuʼuleere nai wanee achepchiee saaʼujee nüsheʼetüin nia chi nülaamainkai, taashinjachi nutuma chi nüchepchiakai saaʼujee sujutuuin tü naikat.

28 »Nusotunule wanee wayuu jee shiale wanee jierü nutuma wanee paaʼa jee outule naya nutuma, aʼinaʼannajachi chi paaʼakai süka ipa outaleepa nia otta nnojotsü ekünajatüin tü niʼirukukot. Nnojoleetpejeʼe kasalajanain tia nümüin chi kapaaʼaseshikai. 29 Wainmatuwairüle nusotuin wayuu chi paaʼakai sümaa nnojolin jülüjain nia naaʼin chi kapaaʼaseshikai mayaainjeʼe nüchiaanüin paala, nuʼutataarüle naaʼin chi paaʼakai wanee wayuu jee shiale wanee jierü, eʼinaʼannajachi chi paaʼakai süka ipa outaleepa nia jee outajachia chi kapaaʼaseshikai. 30 Suchuntunule nneerü nümüin chi kapaaʼaseshikai süpüla nnojolinjachin outuin nia, nuwalaajüinjatü tü nneerü achuntunakat nümüin. 31 Shiaʼaya aaʼinnajatka nümüin chi kapaaʼaseshikai tü taluwataakalü anain nusotule chi paaʼakai wanee jintüi jee shiale wanee jintut. 32 Nusotunule wanee achepchiee nutuma wanee paaʼa, awalaajüinjachi chi kapaaʼaseshikai apünüin shikii nneerü aainjuushika süka pülaata* nümüin nülaamain chi achepchieekai, aʼinaʼanna münüinjachia chi paaʼakai outaleepaʼaya nia.

33 »Naakatüle wanee wayuu shiʼrouse wanee ishi keʼrouseka paala nüpüla jee nupotule wanee jeketü, nnojorüle niʼitaain tü shiʼrousekat süchikuaʼa, nujutuule wanee paaʼa jee niale wanee püliikü suluʼu tü ishikat, 34 awalaajüinjachi chi kasülekai tü ishikat, awalaajüinjachi sülia nümüin chi kamüʼlüinshikai tü mürütkat, nieechi kamüinka tü mürüt outusükat chi kasülekai tü ishikat. 35 Nusotunule nüpaaʼase wanee wayuu nutuma nüpaaʼase wane, outule nia nutuma, noikajachi chi paaʼa katakai oʼu napaajiraa namüinjatia tü nüliakat. Napaajiraainjatia niʼiruku chi paaʼa outakai. 36 Sütüjaanüle aaʼu nusotuitchin chia paaʼakai waneirua mürüt sümaa nnojolin jülüjain nia naaʼin chi kapaaʼaseshikai, aapüinjachi wanee paaʼa chi kapaaʼaseshikai niiʼiraka chi paaʼa outakai, naapüneechika nümüin chi paaʼa outakai.

22 »Eere wanee wayuu aʼluwajakai wanee paaʼa toolo jee shiale wanee anneerü, nuʼutule saaʼin jee nuiküle shia, aapüinjachi nia jaʼraisü paaʼa tooloyuu niiʼiraka chi paaʼa nuʼluwajakai otta aapüinjachi pienchisü anneerü shiiʼiraka tü anneerü nuʼluwajakat.

2 »(Nüntünüle aaʼu wanee kaʼruwarai sünain ekerotoo saʼwai suluʼu wanee miichi, kalioʼule nia sümaa nuʼutunuin aaʼin, nnojoleechi niain kasirüin nia chi wayuu oʼutakai naaʼin. 3 Nuʼutunule aaʼin chi kaʼruwaraikai jaʼyuupa, niajaʼamata kasitka chi oʼutakai naaʼin).

»Awalaajüinjachi chi kaʼruwaraikai saaʼu naainjala. Nnojorüle kasain nümaʼanain, oikünüinjachi nia süpüla suwalaajünüin tü nuʼluwajakat. 4 Sütüjaanüle saaʼu katayülüin soʼu tü mürüt nuʼluwajakat niale wanee paaʼa, wanee püliikü jee shiale wanee anneerü, eeyürüle shia nümaʼana, aapüinjachi nia piamasü mürüt shiiʼiraka tü nuʼluwajakat.

5 »Nikajeʼerüle wanee wayuu nümüʼlüin suluʼu niyüüjase jee shiale suluʼu tü mma nüpünajakalü aluʼu, nuuʼulaataale joo shikajaain nümüʼlüin suluʼu nuumain wanee wayuu, acheküshi nuwalaajüinjachin süka saʼanasia süchon nüʼttia saaʼujee naainjain tia.

6 »Naʼajüle wanee wayuu mojuui jee jotoʼleere nutuma tü trigo eekat suluʼu nuumain wanee wayuu jee jotule süpüshuaʼa tü nüpünajakat, acheküshi nuwalaajüinjachin saaʼu tü jotokot nutuma.

7 »Naapüle wanee wayuu nneerü jee wanee kasa nümüin wanee wayuu süpüla nünaajaainjatüin shia, suʼluwajünataarale nuulia nipialuʼujee, nüntünüle aaʼu chi wayuu aʼluwajakai shia, niiteʼerüinjatü tü nuʼluwajakat sümaa naapüin wanee sooʼomüin. 8 Nnojoire nüntünüin anain chi kaʼruwaraikai, amaanüinjachi chi kepiakai tü miichikat namaʼanamüin na laülaashiikana süpüla nüküjain Maleiwa nialejeʼeya aapaain tü kasa anaajeʼennakat nia paala. 9 Nülirajünüle wanee wayuu sünain naapaain wanee kasa nnojotka nükoroloin maʼaka naaʼin wanee paaʼa toolo, wanee püliikü, wanee anneerü, wanee kuluulu jee shiale wanee kasa amülouika paala, «taya kamüinka», nümataarale joo wanee wayuu sümüin tia, oʼunajana eemüin na laülaashiikana chi alirajakai nümaa chi alirajünüshikai, nüküjeetkalaka Maleiwa jaralin chi aküjakai naʼalain. Niasaʼa chi wayuu aapaakai tia, nuwalaajüinjatü tü naapaakat otta naapüinjatü wanee sooʼomüin.

10 »Nuchuntule wanee wayuu nümüin wane naaʼinmajüinjachin nüpüliiküse, nüpaaʼase, naʼanneetse jee shiale wanee mürüt eekai eein, outataarale tü mürütkat, eʼikaale maʼin shia jee suʼluwajünüle sümaa nnojoluin jaralüin atüjaain saaʼu sukuwaʼipa, 11 chi wayuu aaʼinmajakai tü mürütkat nüküjainjatü nuʼupala Jehová nnojoluin jamajüin nutuma tü eʼitaanakat najapuluʼu. Chi kamüʼlüinshikai nunoujainjatü nünüiki chi aaʼinmajüshikai, nnojotka kasainjatüin nuwalaajüin chi aaʼinmajüshikai. 12 Suʼluwajünataarale nuulia tü mürütkat, awalaajüinjachi nia nümüin chi kamüʼlüinshikai. 13 Shikünüle tü mürütkat sutuma wüchii jashichi, acheküsü nüntirüinjatüin tü süpütanajaainkat süpüla sütüjaanüin aaʼu shiimainre tia. Nnojoleetka choʼujaain nuwalaajüinjatüin saaʼujee shikünüin tü mürütkat sutuma wüchii jashichi.

14 »Nuchuntule wanee wayuu nümüin wane naʼanapajirüinjachin nia wanee nümüʼlüin, eʼikaale tü mürütkat jee outule shia wanaa sümaa nnojolin chi kamüʼlüinshikai, chi wayuu aʼanapajüshikai awalaajüinjachi nia nümüin chi kamüʼlüinshikai. 15 Sülatüle tia nuʼupala chi kamüʼlüinshikai, nnojoishi awalaajüinjachin chi aʼanapajüshikai. Saʼanapajünüle tü mürütkat saaʼu nneerü, shieerü awalaajünaka tü nneerü aʼanapajünakalü aaʼu shia.

16 »Nusokojule wanee wayuu sümüin wanee majayülü maʼwayuusekat jee nüinkaale sümaa, kapaʼünainjatü shia nutuma süpüla nuʼwayuuseinjatüin shia. 17 Nnojorüle saapüneein nümüin tü wayuukot nutuma chi süshikai ayatüinjachia neʼe awalaajüin tü wanaapünaakat sümaa tü süpaʼünakat.

18 »Oʼutunajatü aaʼin wanee ooʼulaküt.

19 »Oʼutunajachi aaʼin wanee wayuu eekai nuʼluwajiraain nukuwaʼipa sümaa wanee mürüt.

20 »Oʼutunajachiaʼaya aaʼin wanee wayuu eekai nuʼutuin saaʼin wanee mürüt sümaa naʼajüin shia nümüin wanee maleiwayaasü suulialeʼeya naʼajüin shia tamüin tayakai Jehová.

21 »Nnojo müliain putuma wanee wayuu eekai naatain suumain süka kepiapuʼuin pia suluʼu tü mmakalü Egipto sümaa nnojolin chejeʼewalin pia.

22 »Nnojo müliain putuma na outakana aʼwayuuse jee na outakana ashi. 23 Müliale naya putuma jee nachuntule maʼin tamüin kaalinwaa, takaalinjeena maʼin naya. 24 Jashicheechika maʼin taya pümüin jee toʼuteechi aaʼin pia süka chajaruuta. Maʼwayuuseerü tü puʼwayuusekat jee mashinjana na püchonniikana.

25 »Paʼanapajirüle nneerü wanee wayuu eekai müliain naʼakajee na israelitakana, nnojotsü müinjatüin sukuwaʼipa putuma makaʼa sukuwaʼipa natuma na wayuu aʼanapajirakana nneerü. Nnojotsü püchekajüinjatüin süchon tü nneerü paʼanapajirakat nia.

26 »Saapünüle pümüin nutuma wanee wayuu tü saajunakat nüsheʼin saaʼu tü nneerü paʼanapajirakat nia, acheküsü püleʼejirüin tü nüsheʼinkat nümüin süpülapünaa nikerotüin chi kaʼikai. 27 Shia neʼe eeka nümaʼana tia süpüla nukoʼoyolooin süka, shia tü naanalakat suulia nukuruluin. ¿Kaseetka nukoʼoyolooin aka nutunkapa? Takaalinjeechi nia nuchuntapa maʼin tamüin kaalinwaa süka amüliajülin taya.

28 »Nnojo puʼulejüin tayakai Maleiwa jee nnojo puʼulejüin na laülaashiikana napüleerua na israelitakana.

29 »Nnojo wainmajüin paaʼin püsülajüinjachipa süchon püʼttia tü wainmakat maʼin jee tü amülakat sünainjee tü achüüjüleekat uuwa sümaa seita. Paapüinjachi tamüin chi püchon piʼirumakai. 30 Anuu tü paaʼinrajatkat nüka püpaaʼasechon jee nüka paʼanneetsechon: puuʼulaainjachi nia sümaa tü niikat soʼu akaratshi kaʼi, shiasaʼa soʼu tü mekiisatkat kaʼi paapüinjachi nia tamüin.

31 »Jaʼyainjatü jaaʼu taneekajalain jia sümaa wulein jukuwaʼipa tatuma. Jüntüle sünain wanee mürüt chaa wünaʼapü eekai süsirüin wüchii jashichi nnojotsü jiküinjatüin shiʼiruku, jaapüinjatü shia sümüin erü.

23 »Nnojo püküjain süchiki wanee kasa eekai alawaain. Nnojo pükaalinjain wanee wayuu mojulaashi sümaa püküjain süchiki wanee kasa amojujeʼereetka sukuwaʼipa wayuu. 2 Nnojotsü paaʼinrajatüin wanee kasa eekai mojuin saaʼujee saaʼinrüin neʼe shia watta saalii wayuu. Püküjainjachipa süchiki wanee kasa, nnojotsü püküjainjatüin wanee kasa eekai alawaain süpüla wanaawain paaʼin sümaa watta saalii wayuu, paaʼinrüle tia meechi piyoutakai saaʼin tü kasa lotokalü akuwaʼipa. 3 Nnojo kojutuin pümüin wanee wayuu eekai maʼletsein süsalapa nia naainjala atumawaa saaʼujee neʼe maʼletsein nia.

4 »Püntüle nünain nüpaaʼase wanee püʼünüü jee niale wanee nüpüliiküse eekai amüloulin nuulia, piʼikajaainjachi nia nümüin. 5 Nunnajaale puʼupala wanee püliikü sümaa nüchise, nüpüliiküsere nia wanee wayuu eekai üttüin naaʼin pünain, nnojoishi piirakaainjachin amüin neʼe chi püliikükai. Pükaalinjainjachi chia wayuukai sünain atameʼeraa chi nüpüliiküsekai.

6 »Jalia pumojujayaai sukuwaʼipa wanee kasa nüpüleerua chi wayuu eekai maʼletsein süsalapa nia atumawaa tü naainjalakat.

7 »Nnojo wanaawain paaʼin sünain aküjaa alawaa süpüla nuʼutunajachin aaʼin chi wayuu eekai maainjalain jee chi wayuu lotokai akuwaʼipa, süka nnojoleechin taküjain wayuuin loto akuwaʼipachi chi mojulaashikai.

8 »Nnojo paapaain wanee kasa eekai saapünüin pümüin shiiʼiree nnojoluin lotuin sukuwaʼipa wanee kasa. Chi wayuu atüjakai süpüleerua nukuwaʼipa meechi moʼupaʼakai naaʼin naapaale sümaa tia jee aʼwanajaajeerü suluʼujee tia tü kasa nüneekakat wanee wayuu eekai lotuin nukuwaʼipa.

9 »Nnojo müliain jutuma wanee wayuu eekai naatain nuumain. Jütüjaa aaʼu jamüin nukuwaʼipa wanee wayuu kepiakai suluʼu wanee mma nnojotka nuumain süka chajanain jia kepiain suluʼu tü mmakalü Egipto.

10 »Apünajüinjachi pia suluʼu puumain jee akotchojüinjachi pia süchon püʼttia soʼunnaa aipirua juya. 11 Nnojoliipejeʼe jia apünajüinjanain soʼu tü akaratshikat juya, juuʼulaainjatü tü mmakat maaʼaya neʼe. Eküinjana na maʼletsesalii eekana jaʼaka süchon tü wunuʼulia süpaʼakat tia mmakat jee tü apütaakat süchikijee tia, shiküinjatü shia tü wüchii wünaʼapüjatkat. Müinjatiaʼaya neʼe sukuwaʼipa putuma tü mma püpünajakalü aluʼu uuwa jee müsia olivo.

12 »Aʼyataainjachi pia soʼunnaa aipirua kaʼi, nnojolinjachipejeʼe pia aʼyataain soʼu tü akaratshikat kaʼi süpüla neemeraainjachin chi püpaaʼase toolokoi jee chi püpüliiküsekai otta süpüla katsüinjatüin naaʼin nüchikuaʼa chi süchonkai püchepchia jee müshia chi wayuu nnojoikai israelitain.

13 »Anakajaʼa jaaʼinrüle süpüshuaʼa tü taküjaitpakat jümüin. Nnojo juchuntuin sünülia waneirua maleiwayaasü, nnojotsü aapünajatüin jünüiki sünain aaʼinraa tia.

14 »Aainjainjana jia apünüinsü miʼiraa juyawai süpüla kojutuinjachin taya jümüin. 15 Jaainjainjatü tü Miʼiraa Saainjünakalü oʼu tü Pan Maʼakasatkat Soolojia. Jaaʼinrajatü tia maʼaka taküjain shia jümüin soʼu tü kaʼi taneekakat soʼunnaa tü kashikalü abib,* eküinjana jia pan maʼakasat soolojia soʼu akaratshi kaʼi süka shiain tia tü kaʼi jujuʼitakalü oʼu Egiptojee. Nnojoishi antajachin wanee wayuu tamülatuʼumüin sümaa nnojoluin kasain najapüipain. 16 Jaainjainjatiaʼaya tü Miʼiraa Shikiirakalü Akotchojaa tü Palajatkat Süchon Aʼttiee jeʼweka sünainjee tü jüpünajakat suluʼu juumain. Jaainjeerü tü Miʼiraa Shikiirakalü Akotchojaa Süchon Aʼttiee sajaʼttiamüin juyakat, jukotchojopa süpüshuaʼa süchon tü aʼttieekat suluʼujee juumain. 17 Oʼunajana napüshuaʼa na tooloyuu israelitakana apünüintua süpüla juyakat tamülatuʼumüin tayakai Jehová, chi Señotkai.

18 »Nnojotsü paʼajüinjatüin süsha tü mürüt puʼutakalü aaʼin süpüla paapüinjatüin shia tamüin sümaa wanee kasa eekai kaʼakain soolojia. Nnojotsü pünaajüinjatüin süpüla waneemüin kaʼi saüsü tü mürüt puʼutakalü aaʼin süpüla paapüinjatüin shia tamüin soʼunnaa tü miʼiraa taainjirakat.

19 »Püntirajatü tamüin tayakai Jehová chi Pümaleiwasekai tü palajatkat süchon püʼttia eekai jeʼwein sümaa anapüijain maʼin shia.

»Nnojoishi püʼlakajüinjachin chi kaaʼulachonkai saʼaka süchira nii.

20 »Taluwataajeechi wanee aapiee püpüleerua süpüla naaʼinmajüin pia wopuluʼu jee nümaajeechi pia suluʼumüin tü mma yapakat tatuma püpüla. 21 Jülüja paaʼin tü nümakat pümüin jee poonoo sümaa nünüiki, nnojo piʼrüijaain wayumüin nümüin süka nnojoleerüin nülatirüin sooʼopünaa naaʼin tü piʼralakat wayumüin, jama tanüliamaain nia. 22 Poonoole maʼin sümaa tanüiki jee paaʼinrüle süpüshuaʼa tü tamakat, naʼünüüjeechi taya na püʼünüükana jee peʼipaajeechi taya namaa na peʼipaakana pümaa. 23 Oʼuneechi püpüleerua chi aapiee tamaʼanajeejachikai, nümaajeechikalaka pia eemüin na amorreokana, na hititakana, na perizitakana, na cananeokana, na heveokana jee müshiʼiya na jebuseokana, tajaʼttireenakalaka naya wayuukana. 24 Nnojo püsapainkain pia sümülatuʼu tia maleiwayaasükalüirua jee nnojo kacheʼein pia sümüin tü münakat pümüin süpüla puʼwaajüin shia otta nnojo paaʼinrüin tü naaʼinrakat naya wayuukana. Shia anaka aluʼu pusolojüle shiyaakua tü namaleiwasekalüirua jee pajaʼttira tü ipa apaaʼuwajuushi kojutukat namüin. 25 Aʼyataainjana jia tamüin tayakai Jehová chi Jümaleiwasekai, taapeetkalaka jümüin tü jiküinjatkat sümaa tü wüin jüsüinjatkat. Takaalinjeena jia suulia sooʼotuin ayuulii jünainmüin. 26 Nnojoliijeena ojutirüin na jieyuu puumainpaʼajeʼewaliikana jee nnojoliijeena maralüin naya. Eʼreechi pia anaa tatuma soʼu wainma juya.

27 »Mmoleerü wayuu teema süpülapünaa püntüin sümaʼanamüin, meerü jalapaʼakai naaʼin na wayuu püntiraakana amaa. Akanajuweena na püʼünüükana putuma sümaa napantajaweenain püpüleerua. 28 Eimmolojoojeena na wayuukana peema süpülapünaa püntüin, apantajaweena püpüleerua na heveokana, na cananeokana jee müshiʼiya na hititakana. 29 Nnojoleenapejeʼe naya tajünajaain püpüleerua soʼuleʼeya wanee juya suulia mapaʼajanain neʼe tü mmakat jee suulia wattajaain saalii wüchii wünaʼapüjatü, mojulajaʼa meeria shia pümüin. 30 Tajünajaajeena naya neʼipaʼaya püpüleerua wattalepaʼaya naalii na püpüshikana jee laülaapa pia saaʼu tia mmakat.

31 »Shieerü sülüjüleka puumain tatuma tü palaa Ishosükat sünainmüinreʼeya tü palaa chakat sotpünaa noumain na filisteokana jee chaa eejee tü isashiipaʼakat sünainmüinreʼeya tü süchikat Éufrates, süka jamüin, taapeenain ekii pümüin na wayuu sulujunakana tia mmakat jee püjünajaajeena naya püpüleerua. 32 Nnojo püpansaajüin pünüiki namaa jee sümaa namaleiwase. 33 Nnojoishii kepiainjanain naya wayuukana puumainpaʼa suulia paainjain natuma wanee kasa eekai mojuin tamüin. Amojujaajeerü pukuwaʼipa puʼwaajüle tü namaleiwasekalüirua».

24 Anuujeseʼe nünüiki Jehová nümüin Moisés: «Püʼliikajaa saaʼumüin tü uuchikat nümaa Aarón, Nadab, Abihú jee müshiʼiya akaratshishii nekii na laülaashiikana napüleerua na israelitakana, jejepülaajeenaka kaʼyatajee sümaa juʼwaajüin taya. 2 Piainjachi neʼe piakai Moisés arütkaaka tanainmüin tayakai Jehová. Nnojoishii arütkaainjanain tanainmüin na pümaajanakana jee nnojoishii aʼliikajaainjanain na israelitakana pümaa saaʼumüin tü uuchikat».

3 Nüküjakalaka Moisés namüin na israelitakana süpüshuaʼa tü nümakat Jehová jee süpüshuaʼa tü nuluwataakalü anain. Anuujeseʼe nanüiki napüshuaʼa na israelitakana nümüin: «Woonoojeeria amaa süpüshuaʼa tü nümakat wamüin Jehová». 4 Nüshajaka Moisés süpüshuaʼa tü nümakat Jehová nümüin. Shiasaʼa süchikijee tia, nütamaaka wattachon maalü nuʼunaka süʼütpaʼamüin tü uuchikat, nukumajaka chayaa wanee aʼajülee nümüin Maleiwa. Nüpaʼawajaakalaka ipa, poloosü piamamüin shia nutuma shiyaawase tü poloosükat piamamüin neʼiruku na israelitakana. 5 Shiasaʼa mapa, nüneekaka Moisés jimaʼalii naʼakajee na israelitakana, noʼutakalaka saaʼin mürüt na jimaʼaliikana süpüla naʼajüin shia nümüin Maleiwa, oʼutushiʼiya naya saaʼin paaʼa tooloyuu nümüin Jehová anajiraainjatka aaʼujee naya nümaa. 6 Niʼyotoko Moisés süpüshi süsha tü mürütkat suluʼu waneirua iita, nütülüittiraka tü wane süpüshikat tü ishakat saaʼu tü aʼajüleekat. 7 Naapaakalaka Moisés tü karaloʼuta sümaajatkat tü pütchi apansaajünakat, naashajeʼeraka shia sümaa emetuluin nünüiki namüin na israelitakana. Anuujeseʼe nanüiki na israelitakana nümüin: «Waaʼinreeriaʼaya süpüshuaʼa tü nümakat wamüin Jehová jee woonoojeerü amaa shia». 8 Nütülüittiraka Moisés tü ishakat naaʼu na israelitakana sümaa nümüin namüin: «Ishakat tüü, süikaleʼeria tü pütchi nüpansaajakat Jehová jümaa, wanaapünaa sümaa tü pütchi suluʼukat tü karaloʼuta taashajeʼerakat jümüin».

9 Nüʼliikajaaka Moisés saaʼumüin tü uuchikat nümaa Aarón, Nadab, Abihú jee müshiʼiya akaratshishii nekii na laülaashiikana napüleerua na israelitakana. 10 Neʼrakalaka tü nüpülainkat Maleiwa, müsü aka saaʼin «zafiro» tü eekat suupünaa nuuʼui, warattüsü maʼin shia maʼaka saaʼin jutatuuire tü sirumatuʼukat. 11 Nnojoliikalaka jamajüin nutuma naya wayuu kaawainkana maʼin naʼakajee na israelitakana. Müshi neʼrakai naaʼin chi shiimainshikai suluʼu Maleiwain, ekaashiijeseʼe naya.

12 Anuujeseʼe nünüiki Jehová nümüin Moisés: «Püʼliikajaa saaʼumüin tü uuchikalü eere taya, cheechika pia. Taapeerü pümüin waneirua ipa tashajüinjatka anain tü taluwataainjatkalü anain na israelitakana». 13 Yapajakalaka Moisés nümaa Josué chi niʼipajachikai. Nuʼunakalaka Moisés saaʼumüin tü uuchikalü eere chi shiimainshikai suluʼu Maleiwain. 14 Anuu tü nümatüjütkalia Moisés namüin na laülaashiikana napüleerua na israelitakana: «Jaʼatapajeena waya yaʼayaa, yaajeechi jümaa Aarón jee müshia Hur. Mojujiraale wayuu süchiirua wanee kasa, arütkaainjana naya nünainmüin Aarón nümaa Hur süpüla nanoutuin tü mojujirawaakat». 15 Nüʼliikajaakalaka Moisés saaʼumüin tü uuchikat, süshakataka tü sirumakat saaʼumüin tü uuchikat.

16 Chuwatuuikalaka saaʼu tü uuchikat Sinaí nutuma Jehová süka eejachin nia saaʼu, ayatüsia tü sirumakat saaʼu soʼunnaa aipirua kaʼi. Shiasaʼa soʼu tü akaratshikat kaʼi nuunejünakalaka Moisés saʼakajee tü sirumakat nutuma Maleiwa. 17 Tü chuwatuuitkat saaʼu tü uuchikat nutuma Jehová mataasü aka saaʼin wanee siki chuwataka saaʼin namüin na israelitakana ajaʼttiraka wanee kasa sooʼopünaa tü uuchikat. 18 Nikerotakalaka Moisés saʼakapünaa tü sirumakat sümaa nüʼliikajaain saaʼu tü uuchikat, chajachika nia soʼu pienchi shikii kaʼi jee pienchi shikii ai.

25 Anuukalaka nünüiki Jehová nümüin Moisés: 2 «Püma namüin na israelitakana nakotchojaiwa tü kasa nasülajüinjatkat tamüin, jücheküinjatü süchiki tü kasa asülajünakat tamüin saapüle shia wayuu saaʼinñaka. 3 Anuu tü kasa jücheküinjatkalü achiki süsülajünapa: ooro, pülaata, cobre, 4 jiirü wüittüsü, laana jepisiiyaa,* jiirü ishotot maʼin, lino anaka maʼin, soi kaaʼula, 5 anneeruuta atinjuushika suluʼu ishoin shia, süta tü wüchii kanüliakat foca,* wunuʼu kanüliaka acacia, 6 seita süsüñeʼinjatka ranpara sümaʼaleeya tü oʼyotunakat saʼaka tü seita oʼyotunakat naaʼu wanee wayuu eekai nüneekünüin jee seita süpülajatka tü wunuʼu aʼajünajatkat jemetaka eejuu 7 jee müsia ipa kanüliaka ónice, waneirua ipa eʼitaanajatka sünain tü kuluulu kanüliakalü efod* jee tü eʼitaanajatkat sünain tü naaʼintoʼupünaainjatkat chi laülaashikai napüleerua na sacerdotekana. 8 Akumajüinjana jia wanee miichi eeinjachire taʼwaajünüin, eejeechika taya jümaa. 9 Jukumajüinjatü tia miichi eere taʼwaajünüinjachin sümaʼaleeya süpüshuaʼa tü kasa eeinjatkat suluʼu wanaapünaa sümaa tü sukuwaʼipa taküjainjatkat jümüin.

10 »Jukumajüinjatü wanee kojon aainjuushika süka tü wunuʼu kanüliakalü acacia. 110 centímetro sajaʼapüin,* akaratshi shikii centímetro seeruluin* otta akaratshi shikii centímetro shia iipünaamüin.* 11 Ooroleeinjatia shia putuma suluʼupünaa jee sutoutajee, pushulerüinjatü tü ooro anakat maʼin sünain, kotpünaainjatü shia ooro putuma süpüshuaʼa. 12 Aainjainjachi pia pienchisü sücheʼe aainjuushi süka ooro, piʼitaajeetkalaka shia iipünaa sünain tü pienchisükat süsaʼa: piʼitaajeerü piamasü sücheʼe sünain wanee saʼata jee tü wane piamasükat sünain tü wane saʼatakat. 13 Ashoʼttüinjachi pia wunuʼu kanüliaka acacia jee pushulereetka ooro sutoutajee. 14 Pülatirüinjatü tü wunuʼukalüirua suluʼupünaa tü sücheʼe piʼitaakat sünain tü Kojonkot süpüla sülüʼüjiraanajatüin. 15 Ooʼulaanajatü tü wunuʼukot sünain sücheʼe tü Kojonkot, nnojotsü ayuʼnnajatüin. 16 Piʼitaajeerü suluʼu tü Kojonkot tü ipa ashajünakalü anain tü Pütchi Taluwataakalü Anain.

17 »Ooroleeinjatia putuma shiʼrouse tü Kojonkot pukumajapa shia, 110 centímetro tü sajaʼapüinjatkat* jee akaratshinjatü shikii centímetro tü seeruluinkat.* 18 Akumajüinjachi pia süka ooro nayaakua piamashii querubín, pukumajüinjatü shia süka mattiia, piʼitaainjachi wanee sünain sot shiʼrouse tü Kojonkot jee müshia chi wane sünain tü wane sotkat. 19 Piʼitaainjatü nayaakua na piamashiikana querubín saaʼu shiʼrouse tü Kojonkot, wanee sünain tü sotkat jee müshia chi wane sünain tü wane sotkat. 20 Iipünaamüinjatü natüna na querubínkana, nakooʼoyoluinjatü shiʼrouse tü Kojonkot süka tü natünakat, piʼitaainjachi wanee niʼipoʼujee chi wane sümaa wünapümüin noʼupünaa sünainmüin shiʼrouse tü Kojonkot. 21 Piʼitaajeerü shiʼrouse tü Kojonkot jee piʼitaajeerü suluʼu tü Kojonkot tü ipa ashajünakalü anain tü Pütchi Taluwataakalü Anain taapeetka pümüin. 22 Anteechi taya pünainmüin jee aashajaweechi taya pümaa saaʼujee shiʼrouse tü Kojonkot. Aashajaweechi taya pümaa pasanainjee nanain na piamashii querubín saaʼukana tü kojon kaluʼukat tü Pütchi Taluwataakalü Anain,* taküjeetkalaka pümüin süpüshuaʼa tü taluwataakalü anain püküjainjatka achiki namüin na israelitakana.

23 »Akumajüinjachi pia wanee meesa süka tü wunuʼu kanüliakalü acacia, mekietsalüinjatü shikii centímetro tü sajaʼapüinkat,* pienchinjatü shikii jaʼralimüin centímetro tü seeruluinkat* jee akaratshinjatü shikii centímetro shia iipünaamüin.* 24 Pushulerüinjatü tü ooro anakat maʼin sünain tü meesakat jee piʼitaajeerü ooro sotpünaa. 25 Piʼitaainjatü wanee taapüla sotpünaa tü meesakat, akaratshinjatü centímetro* seeruluin otta kotpünaainjatü ooro putuma tia taapülakat. 26 Paainjeeriaʼaya süka ooro pienchisü sücheʼe tü meesakat, piʼitaajeetka shia eere süchitünüin tü pienchisükat süsaʼa tü meesakat. 27 Piʼitaajeetka tü sücheʼekat peje sünain tü sotkat eʼitaanajatka aluʼupünaa tü wunuʼu sülüʼüjiainjatkat tü meesakat. 28 Shia pushoʼttüinjatka tü wunuʼu kanüliakalü acacia sülüʼüjiraanüinjatka aka tü meesakat, pushulereetka ooro sutoutajee.

29 »Paainjeeriaʼaya pülaata ekia otta asiee jee müsia jaara sümaa iita süpüla piʼyotuinjatüin suluʼu tü asülajünüinjatkat. Paaʼinrajatü shia süka ooro anaka maʼin. 30 Piʼitaʼawaijeetka saaʼu tü meesakat tü pan aapünüinjatkat tamüin.

31 »Akumajüinjachi pia wanee ranpara süka ooro anaka maʼin. Paainjainjatü shia süka mattiia jee waneʼpüshinjatü shia. Kooʼulinjatü shia, kasaʼainjatü, katünainjatü, eeinjatü sünain shiyaakua asiee, shiyaakua süsii wunuʼu eiwaʼatka akumajaain jee shiyaakua süsii wunuʼu. 32 Aipiruainjatü sütüna tü ranparakalü akumajaainjatka sünainjee tü süsaʼa pasanainpünaakat sünain: apünüinjatü sütüna sünain wanee saʼata jee apünüin sünain tü wane saʼatakat. 33 Sünain wanee saʼata tü ranparakalü akumajünajatü shiyaakua apünüinsü asiee sünain waneʼewai sukua tü sütünakat, müinjatü shia maʼaka saaʼin süsii tü wunuʼu kanüliakalü almendro, eeinjatü shiyaakua süsii wunuʼu eiwaʼatka akumajaain jee müsia shiyaakua süsii wunuʼu sümaa pachikuatüin shia. Jee sünain tü wane saʼatakat sünain tü apünüinsükat sütüna, eeinjatiaʼaya apünüinsü shiyaakua asiee sümaa müin shia maʼaka saaʼin tü süsii wunuʼu kanüliakalü almendro, eeinjatiaʼaya shiyaakua süsii wunuʼu eiwaʼatka akumajaain jee müsia shiyaakua süsii wunuʼu sümaa pachikuatüin shia. Müinjatü sukuwaʼipa tü aipiruasükat sütüna tü ranparakalü akumajaaka sünainjee tü süsaʼa pasanainpünaakat sünain. 34 Sünain süsaʼa tü ranparakat, eejeerü pienchisü shiyaakua asiee müinjatka saaʼin süsii tü wunuʼu kanüliakalü almendro, eejeerü shiyaakua süsii wunuʼu eiwaʼatka akumajaain jee müsia shiyaakua süsii wunuʼu sümaa pachikuatüin shia. 35 Wünaapünaa sünain tü piamasükat sütüna tü ranparakalü eeinjatü shiyaakua wanee süsii wunuʼu eiwaʼatka akumajaain sünain süsaʼa tü ranparakat jee wünaapünaa sünain tü wane piamasükat sütüna eeinjatiaʼaya wanee shiyaakua süsii wunuʼu eiwaʼatka akumajaain. Akaataʼaya joo sünain tü wane piamasükat sütünaya, eeinjatiaʼaya wanee shiyaakua süsii wunuʼu eiwaʼatka akumajaain. Müinjatü sukuwaʼipa tü aipiruasükat sütüna tü ranparakalü ojuʼitaka sünainjee tü süsaʼa pasanainpünaakat. 36 Aainjünajatü süka ooro eekai anain maʼin shiyaakua tü süsii wunuʼu eiwaʼatkalü akumajaain jee tü sütünakat tü ranparakat sümaa waneʼpüshinjatüin süpüshuaʼa tü ranparakat. Akumajünajatü tia süka mattiia. 37 Akumajüinjachi pia akaratshi iitachein aainjuushika süka ooro süpülajanainjatka tü mechuuriakat. Puchuwajaapa tü mechuuriakat, chuwatuuijeerü sutuma tü eekat süpüleerua. 38 Akumajünajatü süka ooro eekai anain maʼin shiyokojia tü mechuuriakat jee müsia tü akotchojiakat wanee kasa sünainjee tü mechuuriakat. 39 Pukumajüinjatü süka ooro eekai anain maʼin tü ranparakat jee müsia süpüshuaʼa tü kasa choʼujaakat sümüin. Apünüinjatü shikii pienchimüin kilo* tü ooro pukumajüinjatkalü aka shia. 40 Pukumajüinjatü tia sümaa jülüjain paaʼin tü kasa eeʼiyatünakat pümüin chaa uuchoʼu.

26 »Pukumajüinjatü tü miichi aʼwaajüleekat süka poloosü kuluulu aainjuushika süka lino anaka maʼin sümaa suuttajuushin, eeinjatü sünain jiirü wüittüsü, laana jepisiiyaa, jiirü ishotot maʼin otta pusonoinjatü shiyaakua querubín sünain. 2 Polooinjatü piamamüin metro shiatapünaamüin sajaʼapüin* tü kuluutkat otta 180 centímetro seeruluin,* wanaawainjatü sajaʼapüin jee seeruluin süpüshuaʼa tü kuluutkat. 3 Piʼyapüjeerü tü jaʼraisükat kuluulu sümaa pachiiruaain shia putuma, meeria putuma tü wane jaʼraisükat kuluulu, piʼyapüjeerü shia sümaa pachiiruaain. 4 Eʼineechi pia jiirü wüittüsü sotpünaa tü palajatkat kuluulu piʼyapüjaka. Müinjatia neʼe putuma tü wane kuluulu piʼyapüjakat, süntiraajeetka tü piamasükat kuluulu aʼyapüjuushikat. 5 Jaʼralinjatü shikii sücheʼechein tü piʼinüinjatkat sotpünaa tü palajatkat kuluulu piʼyapüjaka otta jaʼralinjatü shikii sücheʼechein tü piʼinüinjatkat sotpünaa tü wane kuluulu piʼyapüjakat. Peʼipaainjatü sücheʼechein tia kuluutkat süpüla süntanajiraain. 6 Aainjainjachi pia süka ooro jaʼraisü shikii sajapuluʼujia tü kuluulu aʼyapüjuushikat, pejeʼipanajiraajeetka tü kuluutkat süka. Waneeseetka neʼe tü kuluulu süpülajatkat sukumajünüin tü miichi aʼwaajüleekat.

7 »Outtajeechi pia soi kaaʼula süpüla paainjainjachin kuluulu saajunainjatka tü miichi aʼwaajüleekat. Poloosüinjatü waneemüin kuluulu süpülajatka tü miichikat. 8 Polooinjatü apünüinmüin metro shiatapünaamüin sajaʼapüin* tü kuluutkat otta 180 centímetro seeruluin.* Müinjatü süpüshuaʼa sajaʼapüin jee seeruluin tü poloosükat waneemüin kuluulu. 9 Piʼyapüjeerü tü jaʼraisükat kuluulu otta piʼyapüjeerü tü wane aipiruasükat kuluulu, pushokoleetka sajaʼttiamüin tia kuluutkat, tü eʼitaanajatkat soʼuluʼu tü miichikat. 10 Eʼineechi pia jaʼraisü shikii sücheʼechein sotpünaainjatka tü kuluulu piʼyapüjakat otta eʼineechiaʼaya pia jaʼraisü shikii sücheʼechein sotpünaainjatka tü wane kuluulu piʼyapüjakat. Peʼipaajeetka sücheʼechein tü piamasükat kuluulu süpüla süntanajiraain. 11 Paainjainjatü süka cobre jaʼraisü shikii sajapuluʼujia tü kuluutkat, piʼitaajeetka shia sünain sücheʼechein tü piʼinakat süpüla sajapuluʼujain tü piamasükat kuluulu aʼyapüjuushikat, waneeseetka neʼe tü kuluutkat. 12 Kacheteerü neʼe tü kuluulu apütaakat, shiasaʼa saʼata tia kuluutkat kacheteerü shia süsapoʼujee tü miichi aʼwaajüleekat. 13 Sücheʼetoʼujee tü miichikat, apütaajeerü pienchi shikii jaʼralimüin centímetro* kuluulu. Kacheteerü shia atumawaa süpüla saajunain shia tü miichi aʼwaajüleekat.

14 »Piʼitaajeerü saajünaa tü miichikat wanee kuluulu aainjuushika süka anneeruuta atinjuushika suluʼu ishoin shia otta saaʼujee tia kuluutkat piʼitaajeerü wanee kuluulu aainjuushika süka süta tü wüchii kanüliakat foca.

15 »Aainjeechi pia taapüla eekai kaʼlein süpüla tü miichi aʼwaajüleekat, paainjeerü shia süka tü wunuʼu kanüliakalü acacia jee shaʼwashawaleerü shia putuma. 16 Pienchinjatü metro shiatapünaamüin sajaʼapüin* tü taapülakat otta akaratshinjatü shikii centímetro seeruluin.* 17 Piamainjatü suuʼui waneʼewai sukua tü taapülakat süpüla paʼataain shia, müinjatü sukuwaʼipa süpüshuaʼa tü taapüla süpülajatkat tü miichi aʼwaajüleekat. 18 Aainjainjachi pia piama shikii taapüla süsepüinjatka tü miichi aʼwaajüleekalü uuchijeeruʼu sünain.

19 »Aainjainjachi pia süka pülaata pienchi shikii süpülajana tü piamakat shikii taapüla: piamawalinjatü süpülajana suuʼui tü taapülakat süpüla shikerotuin suluʼu. 20 Aainjainjachiaʼaya pia piama shikii taapüla süsepüinjatka tü miichi aʼwaajüleekat palaajeeruʼu sünain. 21 Aainjainjachia pia süka pülaata pienchi shikii süpülajana tü taapülakat: piamawalinjatü süpülajana suuʼui tü taapülakat. 22 Aainjainjachia pia aipiruasü taapüla süsepüinjatka tü miichikat süchiiruajee wopujeeruʼu sünain. 23 Aainjeechia pia piamasü taapüla eʼitaaneetka süshekeʼinruʼu tü miichikat chaa süchiiruajee. 24 Piamainjatü taapüla, ashaʼwaleʼennüinjatü shia mmoluʼujee, süntiraajeetka iipünaamüin eere shiʼitaanüin tü palajatkat sücheʼe. Müinjatü sukuwaʼipa tü piamasükat taapüla süshekeinruʼuinjatka tü aʼwaajüleekat Maleiwa. 25 Eejeerü mekiisatsü taapüla sümaa tü poloosükat aipiruamüin süpülajana aainjuushika süka pülaata: piamawalinjatü süpülajana süpüla shikerotuin suuʼui tü taapülakat suluʼu.

26 »Ashoʼttüinjachi pia tü wunuʼu kanüliakalü acacia: jaʼraisüinjatü wunuʼu sajapuluʼujiainjatka tü taapüla sünainkat wanee saʼata süsepü tü aʼwaajüleekat. 27 Jaʼraisüinjatü wunuʼu sajapuluʼujiainjatka tü taapüla süsepüinjatkat wane saʼata tü aʼwaajüleekat otta jaʼraisü wunuʼu sajapuluʼujiainjatka tü taapüla eʼitaaneetkat süchiiruajee tü miichikat wopujeeruʼu sünain. 28 Eʼitaaneerü tia wunuʼukot shiatapünaa tü taapülakalüirua suluʼu waneʼpüshin shia, antaleejeerü shia waneemüin saʼata.

29 »Pushulerüinjatü ooro sünain tü taapülakalüirua jee ooroleeinjatia putuma tü sücheʼekat, tü kaluʼupünaainjatkat tü wunuʼukalüirua, pushulerüinjatia ooro sünain tü wunuʼukalüirua. 30 Pukumajüinjatü tü miichi aʼwaajüleekat wanaapünaa sümaa tü teeʼiyatakat pümüin chaa uuchoʼu.

31 »Aainjeechi pia kuluulu soʼulujunainjatka tü kuattakat süka jiirü wüittüsü, laana jepisiiyaa, jiirü ishotot maʼin otta lino anaka maʼin sümaa suuttajuushin, pusoneetka shiyaakua querubín sünain. 32 Pükachereerü shia sünain tü pienchisükat wunuʼu aainjuushika süka tü kanüliakalü acacia ashulennaka anain ooro. Ooroleeinjatia sajapuluʼujia tü kuluutkat, eʼitaanajatü tü wunuʼukalüirua saaʼu tü pienchisükat süpülajana aainjuushika süka pülaata. 33 Pükachereerü tü kuluulu soʼulujunakat tü kuattakat sünain tü sajapuluʼujiakat, piʼitaajeetka tü kojon kaluʼukat tü Pütchi Taluwataakalü Anain süchiiruajee tü kuluulu soʼulujunakat tü kuattakat. Tia kuluutkat sütaüjiainjatü tü Kuatta Wulekat suulia tü Kuatta Wulekat Maʼin. 34 Piʼitaajeerü shiʼrouse tü kojon kaluʼukat tü Pütchi Taluwataakalü Anain, cheerü shia suluʼu tü Kuatta Wulekat Maʼin.

35 »Piʼitaajeerü tü meesakat suluʼu tü Kuatta Wulekat.* Shiʼipoʼujee tü meesakat piʼitaajeerü tü ranparakat, palaajeeruʼuinjatü tü meesakat suluʼu tü miichi aʼwaajüleekat otta uuchijeeruʼuinjatü tü ranparakat. 36 Paainjeerü wanee kuluulu soʼulujunainjatka tü miichikat süka jiirü wüittüsü, laana jepisiiyaa, jiirü ishotot maʼin otta lino anaka maʼin sümaa suuttajuushin. 37 Ashoʼtteechi pia jaʼraisü wunuʼu kanüliaka acacia jee pushulereerü ooro sünain süpülajatka tü kuluulu soʼulujunakat tü miichikat, paainjeeria süka ooro tü sajapuluʼujiakat tü kuluutkat otta paainjeerü jaʼraisü süpülajana tü wunuʼukot süka cobre aʼlakajuushi.

27 »Aainjeechi pia wanee aʼajülee süka wunuʼu kanüliaka acacia. Pienchinjatü süshekein tü aʼajüleekat, piamainjatü metro shiatapünaamüin tü sajaʼapüinkat sümaa tü seeruluinkat* otta waneeinjatü metro shiatapünaamüin shia iipünaamüin.* 2 Piʼitaajeerü shiyaakua suʼuwa mürüt sünain tü pienchisükat süshekein tü aʼajüleekat. Waneʼpüshinjatü shia sümaa tü aʼajüleekat, pushulereetkalaka cobre sutoutajee tü aʼajüleekat. 3 Aainjainjachia pia waatte akotchojiainjatka paliʼi, aainjeechi pia paara, iita, teneroot jee müsia süpülajanainjatka sikemechi. Paainjainjatü süpüshuaʼa tia süka cobre. 4 Aainjeechi pia wanee pariia süka cobre süpülajatka tü aʼajüleekat. Piʼitaajeerü pienchisü sücheʼe aainjuushika süka cobre sünain tü pienchisükat süshekein tü aʼajüleekat. 5 Puʼutteetka tü pariiakat shiatapünaa tü aʼajüleekat wünaapünaa sünain tü sotkat. 6 Ashoʼtteechi pia wunuʼu kanüliaka acacia süpülajatka tü aʼajüleekat, pushulereetka cobre sutoutajee tü wunuʼukot. 7 Sülüʼüjünapa tü aʼajüleekalü eʼitaanajatü tü wunuʼukot suluʼupünaa sücheʼe tü aʼajüleekat. 8 Müinjatü aka saaʼin wanee kojon maluʼusat tü aʼajüleekat, aainjünajatü shia süka taapüla. Aainjünajatü shia maʼaka shiiʼiyatünüin pümüin uuchoʼu.

9 »Kapaatiaseinjatü putuma tü miichi aʼwaajüleekat. Pienchinjatü shikii jaʼralimüin metro sajaʼapüin* uuchijeeruʼu sünain, kasepüinjatü shia putuma kuluulu aainjuushika süka lino anaka maʼin sümaa suuttajuushin. 10 Aainjeechi pia süka cobre piama shikii puntaat jee piamainjatü shikii tü süpülajanainjatkat. Aainjünajatü süka pülaata sajapuluʼujiainjatka tü puntaatkat jee müsia tü sücheʼekat. 11 Kasepüinjatü putuma kuluulu tü süpaatiase palaajeeruʼukot, pienchinjatü shikii jaʼralimüin metro sajaʼapüin.* Paainjainjatü süka cobre tü piamakat shikii puntaat jee tü piamakat shikii süpülajanainjatka tü puntaatkat jee müsia aainjünajatü süka pülaata tü sajapuluʼujiakat sümaa sücheʼe tü puntaatkat. 12 Kasepüinjatü shia putuma kuluulu wopujeeruʼu, piamainjatü shikii piamamüin metro seeruluin* tü süpaatiasekat, poloosüinjatü puntaat jee poloosüinjatü süpülajana. 13 Shiasaʼa wüinpüjeeruʼu eepünaale niweetüin chi kaʼikai, piamainjatü shikii piamamüin metro seeruluin tü süpaatiasekat. 14 Aipiruainjatü metro shiatapünaamüin seeruluin* tü kuluulu süsepüinjatkat tü paatiakat wane saʼata tü soʼukot, apünüinjatü puntaat sümaa apünüinjatüin süpülajana. 15 Akaataajaʼa wane saʼata tü soʼukot, aipiruainjatü metro shiatapünaamüin seeruluin tü kuluulu süsepüinjatkat tü paatiakat, apünüinjatü puntaat jee apünüinjatü süpülajana.

16 »Koʼulujunainjatü kuluulu soʼu tü paatiakat, mekietsalüinjatü metro sajaʼapüin* sümaa saainjünajatüin süka jiirü wüittüsü, laana jepisiiyaa, jiirü ishotot maʼin otta lino anaka maʼin sümaa suuttajuushin. Pienchisü puntaat eeinjatka soʼuluʼu tü paatiakat sümaʼaleeya pienchisü süpülajana. 17 Aainjünajatü süka pülaata sajapuluʼujia süpüshuaʼa tü puntaat süpülajatkat tü paatiakat sümaʼaleeya tü sücheʼekat, eekajasaʼa tü süpülajanajatkat aainjünajatü süka cobre. 18 Pienchinjatü shikii jaʼralimüin metro sajaʼapüin* tü paatiakat, piamainjatü shikii piamamüin metro tü seeruluinkat* jee müsia piamainjatü metro shiatapünaamüin shia iipünaamüin.* Aainjünajatü süsepü tü paatiakat süka lino anaka maʼin sümaa suuttajuushin jee aainjünajatü süka cobre tü süpülajanakat. 19 Aainjünajatü süka cobre süpüshuaʼa tü choʼujaajeetkat suluʼu tü miichi aʼwaajüleekat sümaʼaleeya tü oʼojia sajapuluʼujiainjatkat tü miichikat jee müsia tü oʼojia sajapuluʼujiainjatkat süsepü tü paatiakat.

20 »Püküjainjatü namüin na israelitakana nantiraiwa seita anaka maʼin ayuʼluushika sünainjee olivo süpüla chuwatüin tü ranparakat, warattuuijeetka sutuma. 21 Niainjachi Aarón namaa na nüchonniikana jülüjaka aaʼin chuwatüin waneepia tü ranparakat suluʼu tü miichi aʼwaajüleekat, tü chakat wane saʼata tü kuluulu soʼulujunakat tü kuattakat, tü süʼütpaʼakat tü kojon kaluʼukat tü Pütchi Taluwataakalü Anain, chuwatajatü shia waneepia tamülatuʼu tayakai Jehová aliikajee sünainmüinreʼeya wattaʼa maalü. Naaʼinrajatü tia waneepia na israelitakana namaʼaleeya na naikeyuukana.

28 »Püneeküinjachi Aarón chi puwalakai namaʼaleeya na nüchonniikana naʼakajee na israelitakana süpüla sacerdoteinjachin nia tamüin. Nianjachiaʼaya püneekaka Aarón namaʼaleeya na nüchonniikana, püneeküinjachi Nadab, Abihú, Eleazar jee müshia Itamar. 2 Aainjainjachi pia nüsheʼin Aarón chi puwalakai, shiainjatü wanee kuluulu eekai anain maʼin, kojuteechika nia suluʼujee tia jee aneerü niyolojo. 3 Aashajaainjachi pia namaa napüshuaʼa na wayuu eekai natüjain, na wayuu kekiikana tatuma, pümeechikalaka namüin naainjainjanain nüsheʼin Aarón tü kojutuinjachikalü aluʼujee nia, sacerdoteechikalaka nia tamüin.

4 »Anuu tü kuluulu naainjainjatkat: wanee eʼitaanajatka naaʼintoʼupünaa chi laülaashikai napüleerua na sacerdotekana, wanee kuluulu kanüliaka efod, wanee kuluulu eekai matünain, wanee kuluulu eʼinuushi kanaka cuadro, wanee ekiaalaja eekai anain maʼin jee müsia wanee kuluulu ayatapünaajanainjatka. Paainjainjatü tia kuluulu anakat maʼin süpüla nüsheʼinjatüin shia Aarón namaa na nüchonniikana, tia makat süpülajatü sacerdoteinjachin nia tamüin. 5 Naainjainjatü tü kuluutkat naya wayuu atüjakana maʼin süka ooro, jiirü wüittüsü, laana jepisiiyaa, jiirü ishotot maʼin jee müsia lino anaka maʼin.

6 »Naainjeerü tü kuluulu kanüliakalü efod süka ooro, jiirü wüittüsü, laana jepisiiyaa, jiirü ishotot maʼin jee müsia süka lino anaka maʼin sümaa suuttajuushin, asonuushinjatü tia kuluutkat. 7 Piamainjatü süʼülia tia kuluutkat süntiraajeetkalaka iipünaa nunutpünaa chi kasheʼinjachikai shia. 8 Eʼinuushinjatü tü kuluulu niyatapünaainjatkat chi laülaashikai napüleerua na sacerdotekana, aʼyapüjünajatü shia sünain tü kuluulu kanüliakalü efod, ayateetkalaka shia eere shiʼitaanüin, aainjünajatü shia süka tü aainjünakalü aka tü kanüliakalü efod, aainjünajatü süka ooro, jiirü wüittüsü, laana jepisiiyaa, jiirü ishotot maʼin jee müsia süka lino anaka maʼin sümaa suuttajuushin.

9 »Aapaainjachi pia piamasü ipa kanüliaka ónice, pushoʼojeetkalaka sünain nanülia na nüchonniikana Israel. 10 Pushoʼojeerü aipiruasü nanülia sünain wanee ipa jee sünain tü wane ipakat pushoʼojeerü nanülia na wane aipiruashiikana, pushoʼojeerü tia wanaapünaa sümaa jaralin joʼuuin palajana. 11 Nushoʼojüinjatü wanee wayuu eekai nütüjain sünain tü piamasükalü ipa nanülia na nüchonniikana Israel, müinjatü sukuwaʼipa maʼaka sukuwaʼipa tü shipekiakat wanee kasa. Piʼiteʼereetkalaka tü ipakat suluʼu wanee süta aainjuushika süka ooro. 12 Piʼitaainjatü tü piamasükalü ipa sunuloʼu tü kuluulu kanüliakalü efod süpüla sotuinjachin taya naaʼin na nüchonniikana Israel. Müinjatü nülüʼüjakai saaʼin nunuloʼu Aarón toʼupala tayakai Jehová nanülia na nüchonniikana Israel suluʼu süshajuushin süpüla sotuinjachin taya naaʼin. 13 Akumajüinjachi pia süka ooro tü sütainjatkat tü ipacheinkat. 14 Aainjainjachia pia piamasü jiirü outtajuushika süka ooro anaka maʼin, kaülajeetka tü jiitkat sünain süta tü ipacheinkat.

15 »Paainjirüinjachi wanee wayuu eʼinüi tü naaʼintoʼupünaainjatkat chi laülaashikai napüleerua na sacerdotekana, tü ayaawatünakalü akajee tü nüneekakat Maleiwa süchiki wanee kasa. Müinjatü saainjia maʼaka saainjia tü kuluulu kanüliakalü efod, aainjünajatü süka ooro, jiirü wüittüsü, laana jepisiiyaa, jiirü ishotot maʼin jee müsia süka lino anaka maʼin sümaa suuttajuushin. 16 Pienchinjatü shiʼichi tia kuluutkat süshataanapa, piamainjatü shikii piamamüin centímetro* sajaʼapüin jee piamainjatü shikii piamamüin centímetro seeruluin. 17 Pienchinjatü shiʼipa tü ipakat suluʼu pachiiruaain shia, sünain tü palajatkat shiʼipa eʼitaaneerü tü ipa kanüliakat rubí, topacio jee müsia esmeralda. 18 Sünain tü wane shiʼipakat eʼitaaneerü tü ipa kanüliakat turquesa, zafiro jee müsia jaspe. 19 Sünain tü apünüinkat shiʼipa eʼitaaneerü tü ipa kanüliakat léshem,* ágata jee müsia amatista. 20 Jee sünain tü chiiruaajatkat shiʼipa eʼitaaneerü tü ipa kanüliakat crisólito, ónice jee müsia jade. Aainjuushinjatü süka ooro süta süpüshuaʼa tü ipacheinkat. 21 Eʼitaanajatü sünain tü ipacheinkat nanülia na polookana piamamüin nüchonnii Israel. Tia nanüliakat shiyaawaseinjatü tü poloosükat piamamüin neʼiruku na israelitakana. Eʼitaanajatü sünain tü ipacheinkat waneʼewai sukua nanülia na nüchonniikana Israel, müinjatü tia maʼaka saaʼin shipekia wanee kasa.

22 »Aainjainjachiaʼaya pia jiirü outtajuushi süpüla tü naaʼintoʼupünaainjatkat chi laülaashikai napüleerua na sacerdotekana, aainjuushinjatü tia süka ooro anaka maʼin. 23 Aainjeechi pia piamasü süttiija süka ooro süpülajatka tü naaʼintoʼupünaainjatkat chi laülaashikai napüleerua na sacerdotekana, piʼitaajeetka tia süttiijakat sünain tü piamasükat sücheʼe tia kuluutkat. 24 Pülatireetka tü piamasükat jiirü aainjuushika süka ooro suluʼupünaa tü piamasükat süttiija sünainka sücheʼe tü naaʼintoʼupünaainjatkat chi laülaashikai napüleerua na sacerdotekana. 25 Pülatireerü tü piamasü jiirü outtajuushikat suluʼu soʼu tü piamasükat süta tü ipacheinkat jee piʼitaajeetka shia sunuloʼupünaa tü kuluulu kanüliakalü efod süpüleeruajee. 26 Paainjeerü piamasü süttiija süka ooro, piʼitaajeetka shia sünain tü piamasükat sücheʼe tü kuluulu naaʼintoʼupünaainjatkat chi laülaashikai napüleerua na sacerdotekana, süchiiruajeeinjatü shia wanaa maʼin sümaa tü kuluulu kanüliakalü efod yalaka sutuʼujee. 27 Aainjainjachiaʼaya pia piamasü süttiija süka ooro, piʼitaajeetka shia süpüleeruajee tü kuluulu kanüliakalü efod wanaa maʼin sümaa tü kuluulu piamakalü aaʼulia antiraaka nunutpünaa chi laülaashikai napüleerua na sacerdotekana, süʼütpaʼainjatü tia eere kaülajain tü kuluulu kanüliakalü efod iipünaa sünain tü kuluulu eʼinuushi niyatapünaajanainjatkat chi laülaashikai napüleerua na sacerdotekana. 28 Suulia sujutuuin tü naaʼintoʼupünaainjatkat chi laülaashikai napüleerua na sacerdotekana, kaülajainjatü tü süttiija sünainkat tü naaʼintoʼupünaakat sünain tü süttiija eʼitaanakat sünain tü kuluulu kanüliakalü efod, kaülajainjatü shia süka tü jiirü wüittakat. Ayateetkalakaʼaya tü naaʼintoʼupünaakat chi laülaashikai napüleerua na sacerdotekana saaʼu tü kuluulu kanüliakalü efod, iipünaainjatü shia sünain tü kuluulu eʼinuushi niyatapünaajanakat.

29 »Nikerotapa Aarón suluʼu tü Kuatta Wulekat, müinjatü nülüʼüjakai saaʼin nanülia na nüchonniikana Israel toʼupala tayakai Jehová, eʼitaanajatü tia nanüliakat sünain tü naaʼintoʼupünaakalü ayaawatünaka akajee tü taneekakat süchiki wanee kasa, soteechikalaka taya naaʼin waneepia. 30 Piʼitaainjatü tü kanüliakalü ‹Urim› jee tü kanüliakat ‹Tumim› suluʼu tü naaʼintoʼupünaainjatkalü Aarón ayaawatünaka akajee tü taneekakat süchiki wanee kasa. Nünainjatü Aarón tia nikerotapa suluʼu tü Kuatta Wulekat toʼupala tayakai Jehová, naaʼintoʼupünaainjatü Aarón waneepia tü kanüliakalü ‹Urim› jee müsia tü kanüliakat ‹Tumim› süpüla nüküjain namüin na israelitakana tü taneekakat süchiki wanee kasa nikerotapa toʼupala tayakai Jehová.

31 »Paainjainjatü süka jiirü wüittüsü tü kuluulu matünasat sutujeekat tü kuluulu kanüliakalü efod. 32 Koʼuinjatü tü kuluutkalü iipünaa wanaa maʼin sümaa tü shiyatapünaakat, eʼinünüinjatü sotpünaa nutuma wanee wayuu eʼinüi. Soʼu tü kuluutkat müinjatü aka saaʼin soʼu tü kachueera naaʼintoʼupünaakat wanee surulaat, nnojoleetkalaka sütsajaain. 33 Aainjeechi pia shiyaakua süchon wunuʼu kanüliaka granada, paainjeerü shia süka jiirü wüittüsü, laana jepisiiyaa, jiirü ishotot maʼin jee piʼitaajeetkalaka shia sotpünaa tü kuluutkat. Piʼitaajeerü shiyaakua wanee campanachon aainjuushika süka ooro pasanain sünain shiyaakua süchon tü wunuʼu kanüliakat granada. 34 Sünain sot tü kuluulu matünasatkat, wünaapünaapünaa sünain, piʼitaainjatü shiyaakua wanee campanachon aainjuushika süka ooro jee süchikijee tia piʼitaajeerü shiyaakua süchon tü wunuʼu kanüliakat granada, pachikuatüinjatü tia putuma piʼitaapa shia. 35 Naʼatüinjatü Aarón nünain tia kuluutkat süpüla naaʼinrajatüin tü niʼyataakalü anain wanee sacerdote. Aapünajatü shipisana tü shiyaakuakat campanachein sümaa tü shiyaakuakat süchon wunuʼu kanüliaka granada nikerotapa suluʼu tü miichi aʼwaajüleekat toʼupala tayakai Jehová jee aapünajatü shipisana nujuʼitapa, müinjatü sukuwaʼipa tia suulia outajüin nia.

36 »Paainjainjatü wanee saʼata ooro anaka maʼin sümaa chinatüin maʼin shia, pushoʼojüinjatü shia maʼaka sushoʼojia shipekia wanee kasa, piʼitaajeetka pütchikat tüü sünain: ‹Nia Jehová chi wulekai maʼin akuwaʼipa›. 37 Pijiʼttaainjatü tia süka wanee jiirü wüittüsü sünain tü ekiaalaja anakat maʼin, ayatajatkalaka shia kaülajain süpüleerua tü ekiaalajakat. 38 Eʼitaanajatü tia niʼipoʼunain Aarón jee niainjachi asoutaka saaʼujee mojutuin nümüin wanee israelita tü kasa kojutukat tamüin tayakai Maleiwa, tü nasülajakat na israelitakana tamüin tayakai Maleiwa. Waneepiainjatü niʼipoʼunain Aarón tü aainjuushikat süka ooro süpüla talatüinjachin tayakai Jehová namaa na israelitakana.

39 »Aainjeechiaʼaya pia süka lino anaka maʼin wanee kuluulu eʼinuushi kanaka cuadro, paainjeetkalaka süka lino anaka maʼin wanee ekiaalaja anasü maʼin jee wanee kuluulu eʼinuushi ayatapünaajanainjatka.

40 »Aainjeechiaʼaya pia nasheʼin na nüchonniikana Aarón sümaa kuluulu nayatapünaajanainjatü jee müsia tü nekiaalajainjatkat, kojuteenaka naya suluʼujee tia jee aneerü nayolojo. 41 Paʼateetkalaka tia nünain Aarón chi puwalakai jee nanain na nüchonniikana, oʼyoteechi pia seita saaʼu nekii, püneekeena naya jee kojuteenakalaka naya putuma süpüla sacerdotein naya tamüin. 42 Aainjeechi pia süka lino tü naicheinjatkat suulia jaʼyajüin naya, yalejeeinjatü tü naichekat nayatapünaajee sünainmüinreʼeya tü napüʼükat. 43 Naʼatüinjatü Aarón nünain tia jee naʼatüinjatü shia nanain na nüchonniikana nekerotapa suluʼu tü miichi aʼwaajüleekat jee narütkaapa sünain tü aʼajüleekat süpüla naʼyataain tamüin tayakai Maleiwa suluʼu tü paatiakat, nnojoleenaka naya kaainjalain jee nnojoleenaka naya outuin. Naaʼinrajatü tia Aarón waneepia namaʼaleeya na nüikeyuukana.

29 »Anuu tü paaʼinrüinjatkat süpüla kojutuinjanain naya jee sacerdoteinjanain naya tamüin: püneeküinjachi wanee paaʼachon jee piamashii anneerü tooloyuu eekai mamojulain. 2 Paainjeerü pan maʼakaka soolojia süka ariina eekai yütchoin ayuʼluushika sünainjee trigo, pan maʼakaka soolojia lakayaasü* seitamaajatka otta galleta arülachonsü maʼakaka soolojia ashulennaka aaʼu seita. 3 Piʼitaajeetkalaka tia suluʼu wanee kanaasüta jee püntireetka shia tamülatuʼumüin nümaʼaleeya chi paaʼachonkai otta tü piamasükalü anneerü tooloyuu.

4 »Pümaajeechika Aarón namaa na nüchonniikana soʼuluʼumüin tü miichi aʼwaajüleekat jee puluwataajeena naya süpüla noʼoojuinjanain. 5 Paapaajeetka tü nasheʼinjatkat otta paʼateerü nünain Aarón tü kuluutkat, tü kuluulu matünasat sutujeekat tü kuluulu kanüliakalü efod, tü kuluulu kanüliakalü efod otta tü naaʼintoʼupünaainjatkat. Paʼateetka nünain tü kuluulu eʼinnuushi niyatapünaainjatkat, püchechereetka shia nünain. 6 Piʼitaajeetka saaʼu nikii tü ekiaalaja anakat maʼin otta piʼitaajeerü sünain tü ekiaalajakat tü saʼata ooro anakat maʼin.* 7 Püneekeechika nia sümaa piʼyotuin saaʼu nikii tü seita oʼyotunakat naaʼu wanee wayuu eekai nüneekünüin.

8 »Pürütkeʼereena pünainmüin na nüchonniikana Aarón paʼateetkalaka nanain tü kuluulu nasheʼeinjatkat. 9 Paʼateetkalaka nanain tü nekiaalajainjatkat otta paʼateerü nünain Aarón namaa na nüchonniikana tü kuluulu nayatapünaainjatkat. Sacerdoteinjana naya waneepia, shia taluwataaka anain tia süpüla kaʼika süpüshuaʼa. Müinjatü sukuwaʼipa putuma süpüla püneeküinjachin Aarón namaa na nüchonniikana süpüla sacerdoteinjanain naya tamüin.

10 »Pajatteechi chi paaʼachonkai eemüin tü miichi aʼwaajüleekat, niʼitaajeetkalaka najapü Aarón jee najapü na nüchonniikana saaʼu nikii chi paaʼakai. 11 Puʼuteechikalaka naaʼin chi paaʼachonkai toʼupala tayakai Jehová soʼuluʼu tü miichi aʼwaajüleekat. 12 Pushulereetka süka pajapira süpüshi nüsha chi paaʼachonkai sünain tü shiyaakuakat suʼuwa mürüt sünainkat tü aʼajüleekat, piʼyoteetkalaka tü isha apütaakat süʼütpaʼa tü aʼajüleekat. 13 Pükatala süpüshuaʼaleeya tü saüsü sünainkat niyüülain jee tü saüsü sünainkat nüpana. Pükataleetka tü piamasükat nüchüʼü sümaa tü saüsükat, paʼajeetkalaka shia saaʼu tü aʼajüleekat süpüla kaittüinjatüin sümüsain. 14 Eekajasaʼa niʼiruku chi paaʼachonkai, tü nütakat jee tü nüchaʼakat paʼajeerü shia wattaluʼu suulia nepia na israelitakana. Oʼutunajachi aaʼin chi paaʼachonkai saaʼu naainjala naya wayuukana jee aʼajünajachi nia tamüin tayakai Maleiwa.

15 »Paapaweechi wanee anneerü naʼakajee na piamashiikana, niʼitaajeetka najapü Aarón jee najapü na nachonniikana saaʼu nikii chi anneetkai. 16 Puʼuteechi aaʼin chi anneetkai jee pütülittireetka tü nüshakat sünain tü pienchisükat saʼata tü aʼajüleekat. 17 Puchonoojeetka niʼiruku chi anneetkai suluʼu saʼatawalin shia, puʼlojeetkalaka tü niyüülainkat jee tü nuuʼuikat. Paʼataajeetka tü puchonoojokot sümaʼaleeya tü nikiikat. 18 Paʼajeerü süpüshuaʼa niʼiruku chi anneetkai sümaa kaittüin sümüsain saaʼu tü aʼajüleekat. Paapeerü shia tamüin tayakai Jehová, paʼajeerü shia süpüshuaʼa otta jemeteerü maʼin seejuu tia aʼajünakat tamüin tayakai Jehová.

19 »Süchikijee tia paapaajeechi chi wane anneetkai jee niʼitaajeetka najapü Aarón jee najapü na nüchonniikana saaʼu nikii chi anneetkai. 20 Puʼuteechi aaʼin chi anneetkai jee piʼitaajeetka süpüshi tü nüshakat sünain tü nücheʼe nikialuʼujeekalü Aarón jee sünain nacheʼe na nüchonniikana, sünain shii najapü nekiaka jee sünain shii nooʼui nekialuʼujeeka. Pütülittireetka nüsha chi anneetkai sünain tü pienchisükat saʼata tü aʼajüleekat. 21 Pütülittirüinjatü naaʼu Aarón jee saaʼu tü nüsheʼinkat jee pütülittirüinjatü naaʼu na nüchonniikana jee saaʼu tü nasheʼinkat süpüshi tü isha saaʼukat tü aʼajüleekat jee tü seita oʼyotunakat naaʼu wanee wayuu eekai nüneekünüin. Sükajee müin sukuwaʼipa aneeküneechi Aarón jee na nüchonniikana süpüla naʼyataainjanain tamüin jee keraajeerü tü nasheʼinkat süpüla tü aʼyatawaa naaʼinrüinjatkat tamüin.

22 »Piʼyotooinjatü naüsü chi anneetkai, tü nüsi kaüsükat maʼin, saüsü tü niyüülainkat, saüsü tü nüpanakat jee tü piamasükat nüchüʼü sümaa tü saüsükat. Piʼyotooinjatia tü nüsaʼa nikialuʼujeekat süka niain aapünüinjachin saaʼu naneekünüin na sacerdotekana. 23 Suluʼujee tü kanaasüta kaluʼukat tü pan maʼakakat soolojia yalaka tamülatuʼu tayakai Jehová, paapaainjatü wanee pan koʼoyoosü, wanee pan lakayaasü seitamaajatka otta wanee galleta eekai arülachoin. 24 Piʼitaajeetkalaka tia najapuluʼu Aarón jee najapuluʼu na nüchonniikana jee piʼyuunaleetka shia tamülatuʼu tayakai Jehová sümaa paapüin shia tamüin. 25 Paapaajeetkalaka shia najapuluʼujee jee paʼajeetkalaka shia saaʼu tü aʼajüleekat, saaʼu tü aʼajünakat paala tamüin tayakai Jehová süpüla jemetüinjatüin maʼin seejuu tamüin tayakai Jehová.

26 »Nünainjee chi anneerü aapünakai süpüla nüneekünüinjachin Aarón süpüla sacerdoteinjachin nia, paapaweerü nuʼluuwain chi anneetkai, piʼyuunaleetka shia toʼupala tayakai Jehová süpüla paapüin shia tamüin, tia shia tü pümüinjatkat. 27 Pükatalüinjatü nüsaʼa chi anneetkai sümaa tü nuʼluuwainkat, tü aapünakat wanaa sümaa nüneekünüin Aarón namaa na nüchonniikana süpüla sacerdoteinjanain naya, tü aʼyuunannakat toʼupala taya Maleiwakai. 28 Kojutusü maʼin tia otta aapünajatü shia nümüin Aarón jee namüin na nüchonniikana. Tü taluwataakalü anain shia wanee kasa noonooinjatka amaa na israelitakana waneepia, kojutuinjatü shia namüin na israelitakana jee naapüinjatü shia tamüin tayakai Jehová. Shia wanee kasa anajiraainjanaka aaʼujee naya tamaa.

29 »Tü nüsheʼin Aarón anakat maʼin nasheʼinjatü shia na nüchonniikana nünaajaapa. Nasheʼinjatü shia naneekünapa süpüla sacerdotein naya. 30 Naʼateetkalaka tia kuluutkat soʼu akaratshi kaʼi wanee wayuu naʼakajee na nüchonniikana Aarón sacerdoteinjachika nüchikumüin jee chi ekerotuinjachikai suluʼu tü miichi aʼwaajüleekat süpüla niʼyataainjachin suluʼu.

31 »Paapaajeetka niʼiruku chi anneetkai, tü aapünakat süpüla naneekünüin na sacerdotekana jee pushuujeetka shia suluʼu tü aʼwaajüleekat.* 32 Nikaainjatü Aarón namaa na nüchonniikana soʼuluʼu tü miichi aʼwaajüleekat niʼiruku chi anneetkai otta tü pan suluʼukat tü kanaasütakat. 33 Aapünüsü tia süpüla sülatinnüinjatüin naainjala wanaa sümaa naneekünüin süpüla sacerdotein naya jee nakatannüin tamüin, shia neküinjatka tia. Nnojotpejeʼe niküinjatüin tia chi wayuu nnojoikai sacerdotein* süka kojutuin maʼin shia. 34 Shiasaʼa waneemüin kaʼi, süpütaale niʼiruku chi anneerü aapünakai süpüla naneekünüin na sacerdotekana jee süpütaale pan, aʼajünüinjatü shia saʼaka siki. Nnojotsü ekünüinjatüin shia süka shiain wanee kasa kojutuka maʼin.

35 »Shia paaʼinrüinjatka tia nümüin Aarón jee namüin na nüchonniikana wanaapünaa sümaa tü taluwataakalü anain pia. Akaratshinjachi kaʼi pia sünain aneekaa naya süpüla sacerdoteinjanain naya. 36 Paapüinjachi kaʼiwai wanee paaʼachon saaʼu naainjala na sacerdotekana, paaʼinrüinjatü tia süpüla suchuntunuin tamüin tayakai Maleiwa motuinjatüin taaʼin naainjala jee kojutuinjatüin tü aʼajüleekat. Amülainjatü putuma seita saaʼu tü aʼajüleekat süpüla sütüjaanüin aaʼu sükatannüin tia aʼajüleekat süpüla taʼwaajünüin tayakai Maleiwa. 37 Kojutuinjatü putuma tü aʼajüleekat soʼu akaratshi kaʼi jee aneekünüinjatü shia süpüla taʼwaajünüin tayakai Maleiwa. Wuleinjachi chi wayuu aʼyataakai eekai tü aʼajüleekat.

38 »Anuu tü paʼajüinjatkat saaʼu tü aʼajüleekat: puʼutuinjatü aaʼin kaʼiwai piamasü anneerü tooloyuu waneeitka juya sümaa paʼajüin shia. 39 Puʼuteechi aaʼin chi palajachikai anneerü sümaa paʼajüin nia wattaʼa maalü jee chi wane puʼuteechi aaʼin sümaa paʼajüin nia shipiʼyuushijaapa. 40 Paapapa tamüin chi palajachikai anneerü, paapüinjatiaʼaya wanee kilo* ariina yütchonsü, pujuruttuinjatü shia sümaa wanee litro seita ayuʼluushika sünainjee olivo jee aapeechiaʼaya pia tamüin wanee litro* wiino. 41 Chi wane anneetkai paapüinjachi tamüin shipiʼyuushijaapa sümaʼaleeya eküülü otta wanee kasa amülainjatka tamüin, maʼaka saaʼin tü oʼyotunakat tamüin wattaʼa maalü. Tia shia wanee kasa jemetüinjatka maʼin eejuu tamüin jee wanee kasa aʼajünüinjatka tamüin tayakai Jehová. 42 Aʼajünajatü tia tamüin kaʼiwai, naaʼinrüinjatü tia na jüikeyuukana soʼuluʼu tü miichi aʼwaajüleekat tamülatuʼu tayakai Jehová. Cheechiaʼaya taya antüin jaʼakamüin süpüla taashajaainjachin pümaa.

43 »Anteechi taya chayaa naʼakamüin na israelitakana, waratteetkalaka tü tapülainkat chayaa. 44 Kojuteerü tatuma tü miichi aʼwaajüleekat jee tü aʼajüleekat, kojuteechia tamüin Aarón namaa na nüchonniikana süpüla sacerdoteinjanain naya tamüin. 45 Eejeechi taya naʼaka na israelitakana jee Namaleiwaseechi taya. 46 Nayaawateetkalaka saaʼu tayain Jehová chi Namaleiwasekai, chi ayuʼlakai naya suluʼujee tü mmakalü Egipto süpüla eeinjachin taya naʼaka. Taya Jehová chi Namaleiwasekai.

30 »Aainjeechi pia wanee aʼajülee süka tü wunuʼu kanüliakalü acacia süpüla aʼajia wunuʼu jemetaka eejuu. 2 Pienchinjatü süshekein tü aʼajüleekat, pienchinjatü shikii jaʼralimüin centímetro sajaʼapüin,* pienchinjatü shikii jaʼralimüin centímetro seeruluin* jee mekietsalüinjatü shikii centímetro shia iipünaamüin.* Waneʼpüshinjatü shiyaakua tü suʼuwakat mürüt sümaa tü aʼajüleekat. 3 Pushulereerü ooro anaka maʼin süraloʼu tü aʼajüleekat, sutoutajee jee müsia sünain shiyaakua tü suʼuwakat mürüt, piʼitaajeerü ooro sotpünaa. 4 Suupünaa sotkat, piʼitaajeerü pienchisü sücheʼe aainjuushika süka ooro, piʼitaajeerü piamasü sünain wanee saʼata jee müsia piamasü sünain tü wane saʼatakat. Tia süpülajatü shiʼitaanüin suluʼupünaa tü wunuʼu alüʼüjiainjatkat shia. 5 Ashoʼtteechi pia wunuʼu kanüliaka acacia, pushulereetka ooro sutoutajee. 6 Piʼitaajeerü tü aʼajüleekat shiʼipoʼujee tü kuluulu soʼulujunakat tü kuattakat, wanee saʼata eere tü kojon kaluʼukat tü Pütchi Taluwataakalü Anain sümaa tü shiʼrousekat, eere tanteechin süpüla taashajaain pümaa.

7 »Aʼajüinjachi Aarón wunuʼu jemetaka eejuu saaʼu tü aʼajüleekat, kaittüinjatü sümüsain nutuma wattaʼa maalüwai wanaa sümaa nuchuwajaain tü ranparakat. 8 Aʼajüinjachiaʼaya Aarón wunuʼu jemetaka eejuu shipiʼyuushijaapa, nuchuwajaapa tü ranparakat. Aʼajünajatiaʼaya tamülatuʼu tayakai Jehová tü wunuʼu jemetakalü eejuu, aaʼinnajatü tia waneepia. 9 Nnojoishii aʼajüinjana jia wunuʼu jemetaka eejuu, wanee kasa aʼajünüinjatka tamüin, tü eküülü asülajünakat otta tü oʼyotunakat saaʼu tü aʼajüleekat. Nnojotsü naaʼinrajatüin tia wanee wayuu nnojoire nuluwataanüin sünain. 10 Müinjatü wulekai saaʼin nutuma Aarón tü aʼajüleekat nushuletpa sünain tü shiyaakuakat suʼuwa mürüt süsha tü mürüt oʼutunakalü aaʼin sülatinnaka akajee saainjala wayuu. Wuleinjatü shia juyawai nutuma suulia saainjala wayuu, shia sukuwaʼipainjatkat tia. Kojutushaatasü maʼin shia tamüin tayakai Jehová».

11 Anuujeseʼe nünüiki Jehová nümüin Moisés: 12 «Piyaawajüinjanapa na israelitakana awalaajüinjana naya tamüin tayakai Jehová waneʼewai nakua saaʼu katüin noʼu soʼunnaa nayaawajünüin, nnojoleenaka neʼrüin müliaa nayaawajünapa. 13 Awalaajüinjana aipirua gramo pülaata* napüshuaʼa na ashajinnakana anülia, nawalaajüinjatü tia wanaapünaa sümaa shipesajia wanee kasa suluʼu tü miichi aʼwaajüleekat. Aipiruainjatü gramo pülaata tü aapünajatkat tamüin tayakai Jehová. 14 Awalaajüinjana tamüin tayakai Jehová napüshuaʼa na wayuu ashajinnakana anülia eekai piamain shikii nouyase jee sülatüle nouyase suulia tia. 15 Nnojotsü alanaʼaleeinjatüin tü nawalaajakat na washinnuukana jee nnojotsü palitchoinjatüin tü nawalaajakat na wayuu maʼletsesaliikana suulia aipirua gramo pülaata,* juwalaajüinjatü tia tamüin tayakai Jehová süpüla talatirüinjatüin tü jaainjalakat juulia. 16 Paapaajeetkalaka tü pülaata nantirakat na israelitakana süpüla sülatinnajatüin naainjala noulia, paapajeerü shia süpüla tü aʼyatawaa aainjünakat suluʼu tü miichi aʼwaajüleekat. Tia pülaatakat süpülajatü sotuin taaʼin tayakai Jehová na israelitakana, moteetkalaka taaʼin tü naainjalakat».

17 Ayatakalakaʼaya naashajaain Jehová nümaa Moisés sünain maa: 18 «Aainjainjachi pia süpülajana wüin jee kasaʼainjatü shia putuma, paainjainjatü süka cobre tia piamasükat kasa. Piʼitaajeerü tü süpülajanakat wüin pasanain sünain tü miichi aʼwaajüleekat jee tü aʼajüleekat, pipirajeetka shia sümaa wüin. 19 Nuʼlojeechika Aarón najapü sümaa nuuʼui süka tia wüinkat. Naaʼinrüinjatiaʼaya tia na nüchonniikana. 20 Noʼlojuinjatü najapü sümaa nooʼui nekerotapa suluʼu tü miichi aʼwaajüleekat, narütkaapa eere tü aʼajüleekat wanee kasa süpüla naʼyataain tamüin jee naʼajüinjatpa wanee kasa sümaa kaittüin tü sümüsainkat tamüin tayakai Jehová. Müle sukuwaʼipa natuma nnojoleena naya outuin. 21 Noʼlojooinjatü najapü sümaa nooʼui süpüla nnojoliin outuin naya. Oonooinjachi Aarón waneepia namaa na nüikeyuukana sümüin tia pütchi taluwataakalü anain».

22 Ayatakalakaʼaya naashajaain Jehová nümaa Moisés sünain maa: 23 «Achajaainjachi pia waneirua kasa anaka maʼin jemetaka eejuu: achajaainjachi pia aipirua kilo ‹mirra›* oosojuushika, apünüin kilo canela jemetaka eejuu sümaʼaleeya apünüin kilo ‹cálamo› jemetaka eejuu. 24 Aipirua kilo wunuʼu kanüliaka casia wanaapünaa sümaa shipesajia wanee kasa suluʼu tü miichi aʼwaajüleekat sümaʼaleeya apünüin litro shiatapünaamüin* seita ayuʼluushika sünainjee olivo. 25 Süka süpüshuaʼa tia aainjainjachi pia wanee seita anaka maʼin oʼyotunajatka naaʼu wanee wayuu eekai nüneekünüin, anainjatü maʼin saainjia. Shiainjatü wanee seita anaka maʼin ashulennaka naaʼu wanee wayuu eekai nüneekünüin.

26 »Pushulereerü tü seitakat saaʼu tü miichi aʼwaajüleekat jee saaʼu tü kojon kaluʼukat tü Pütchi Taluwataakalü Anain. 27 Pushulereerü shia sünain tü meesakat jee sünain tü kasa choʼujaajeetkat sümüin tü meesakat, sünain tü ranparakat jee sünain tü kasa choʼujaajeetkat sümüin tü ranparakat jee sünain tü aʼajüleekat kasa jemetaka eejuu. 28 Pushulereerü tü seitakat sünain tü aʼajüleekat mürüt jee sünain tü kasa choʼujaajeetkat sümüin jee müsia sünain tü süpülajanakat wüin sümaa tü süsaʼakat. 29 Pükatalüinjatü süpüshuaʼa tia süpüla aʼyataayainjatüin shia tamüin. Wuleinjachi chi eekai epettüin süpüshuaʼa tia. 30 Pushulereetkalaka seita saaʼu nikii Aarón jee saaʼu nekii na nüchonniikana, pükataleena naya süpüla sacerdotein naya tamüin.

31 »Anuu tü pünüikinjatkat namüin na israelitakana: ‹Shia oʼyotunawalinjatka waneepia tia seita anakat maʼin saaʼu nikii wanee wayuu nüneekünüinjachipa. 32 Nnojotsü ashulennüinjatüin tia seitakat nutoutajee wanee wayuu, nnojotsü ashatünajatüin sukuwaʼipa tü saainjiakat. Kojutusü tü seitakat, kojutuinjatüin shia waneepia jümüin. 33 Outajachi wanee wayuu naʼakajee na israelitakana naainjale wanee seita jemetaka eejuu makalü aka saaʼin tia seitakat otta nushulerüle shia nünain wanee wayuu nnojoikai sacerdotein›».*

34 Anuukalaka nünüiki Jehová nümüin Moisés: «Anakajaʼa püchajaale waneirua kasa jemetaka maʼin eejuu: süjü ‹estacte›, süta warutta jemetaka eejuu, ‹gálbano› jemetaka eejuu jee müsia ‹olíbano›* nnojotka ejitünüin akaʼa kasa. 35 Aainjainjachi pia süka süpüshuaʼa tia wanee kasa jemetaka maʼin eejuu aʼajünüinjatka. Anainjatü maʼin sujuruttia, ichiimainjatü shia, nnojoluinjatü kaʼakain wanee kasa jee kojutuinjatü maʼin shia jümüin. 36 Piyüüjaajeerü süpüshi tia, yütchechoinjatü shia putuma. Piʼitaajeetka süpüshi sümülatuʼu tü kojon kaluʼukat tü Pütchi Taluwataakalü Anain, eere tanteechin sünain aashajawaa pümaa. Kojutuinjatü maʼin jümüin tü kasa jemetakalü eejuu, jama jükataluushin tamüin tayakai Maleiwa. 37 Nnojotsü jaʼainjüinjatüin jümüin tia kasa jemetakalü eejuu, kojutuinjatü shia jümüin süka jükataluushin tamüin tayakai Jehová. 38 Oʼutunajachi aaʼin naʼakajee na israelitakana chi ashatakai tü kasa jemetakalü eejuu süpüla anain naaʼin sümaa tü seejuukat».

31 Anuukalaka nünüiki Jehová nümüin Moisés: 2 «Taneeküin Bezalel naʼakajee na nüikeyuukana Judá, nüchon nia Urí jee nülüin nia Hur. 3 Eejeerü naaʼu tü tapülainkat süpüla kekiinjachin nia tatuma, niyaawateerü saaʼu wanee kasa jee atüjeechi nia süpüleerua aainjaa kasa eekai eein. 4 Atüjeechi nia süpüleerua jamüin sukumajia wanee kasa, aaʼinreechi kasa süka ooro, pülaata otta cobre, 5 atüjeechi nia achinaa ipa eekai anain maʼin sümaa niʼitaain shia suluʼu tü süpülajanainjatkat otta aaʼinreechi waneirua kasa süka wunuʼu. 6 Taneeküinña Oholiab chi nüchonkai Ahisamac jee chi napüshikai na nüikeyuukana Dan, niainjachi akaalinjaka Bezalel. Kekiijeena tatuma napüshuaʼa na wayuu atüjakana süpüleerua wanee kasa süpüla naaʼinrüinjatüin süpüshuaʼa tü taluwataaitpakalü anain: 7 tü miichi aʼwaajüleekat, tü kojon kaluʼukat tü Pütchi Taluwataakalü Anain sümaa tü shiʼrousekat, süpüshuaʼa tü eʼitaanakat suluʼu tü miichi aʼwaajüleekat, 8 tü meesakat jee tü kasa choʼujaajeetkat sümüin tü meesakat, tü ranpara aainjünakat süka ooro anaka maʼin otta tü kasa choʼujaajeetkat sümüin tü ranparakat, tü aʼajüleekat kasa jemetaka eejuu, 9 tü aʼajüleekat mürüt sümaa süpüshuaʼa tü kasa choʼujaajeetkat sümüin, tü süpülajanakat wüin sümaa tü süsaʼakat, 10 tü kuluulu eʼinuushinjatkat, tü kuluulu anakat maʼin nüsheʼinjatka Aarón chi sacerdotekai otta tü kuluulu nasheʼinjatkat na nüchonniikana süpüla sacerdotein naya, 11 tü seita oʼyotunakat naaʼu wanee wayuu eekai nüneekünüin otta tü kasa jemetakat maʼin eejuu süpülajatka tü aʼwaajüleekat. Naaʼinrüinjatü naya wayuukana süpüshuaʼa tü taluwataaitchipakalü anain pia».

12 Ayatakalaka naashajaain Jehová nümaa Moisés sünain maa: 13 «Anuu tü püküjainjatkat namüin na israelitakana: ‹Kojutuinjatü maʼin jümüin tü sükaliakalü eemerawaa süka shiain wanee shiyaawase tü pütchi tapansaajakat jümaa jee namaa na jüikeyuukana, jütüjaainjatü aaʼu taneeküinnapain jia süpüla jiʼyataain tamüin tayakai Jehová. 14 Kojutusü maʼin tü sükaliakalü eemerawaa müsüjeseʼe kojutuinjatüin shia jümüin. Outajachi wanee wayuu mojutule shia nümüin. Niʼyataale wanee wayuu soʼu kaʼikat tia, oʼutunajachi aaʼin nia naʼakajee na israelitakana. 15 Aʼyataainjana jia soʼu aipirua kaʼi, eemeraainjanapejeʼe jia soʼu tü akaratshikat kaʼi. Kojutusü maʼin tia tamüin tayakai Jehová. Outajachi wanee wayuu niʼyataale soʼu tü sükaliakalü eemerawaa. 16 Ayatüinjatia naaʼinrüin na israelitakana tü aainjünakat soʼu tü sükaliakalü eemerawaa otta naaʼinrüinjatü tia na naikeyuukana, tapansaajüin tia süpüla kaʼikat süpüshuaʼa. 17 Tü sükaliakalü eemerawaa shiyaawaseinjatü waneepia tü pütchi tapansaajakat namaa na israelitakana, jamüshijaʼa tayakai Jehová takumajüin tü sirumatuʼukat jee tü mmakat soʼu aipirua kaʼi, shiasaʼa soʼu tü akaratshikat kaʼi ooʼulaashi taya suulia aʼyatawaa sümaa teemeraain›».

18 Kettaapa Maleiwa suulia aashajawaa nümaa Moisés saaʼu tü uuchikat Sinaí, naapüin nümüin tü piamasü ipa ashajuushikalü anain tü Pütchi Nuluwataakalü Anain, tü nüshajakat süka najapü.

32 Neʼrakalaka na israelitakana nnojolin nüshakatamaatüin Moisés saaʼujee tü uuchikat, narütkaakalaka napüshuaʼa nünainmüin Aarón sümaa müin nanüiki nümüin: «Paainja wamüin shiyaakua kasa wamaleiwaseinjatka jee oʼunirajatka wakuwaʼipa, jama nnojoluin watüjaain saaʼu kasain alatüin nümüin Moisés chi wayuu ayuʼlakai waya Egiptojee». 2 Anuujeseʼe nünüiki Aarón namüin: «Jukotchojo süpüshuaʼa tü cheʼesaa aainjuushikat süka ooro sünainka nacheʼe na juʼwayuusekana, na jüchonnii tooloyuukana jee na jüchonnii jieyuukana, jüntireetkalaka shia tamüin». 3 Naakatakalaka napüshuaʼa sünainjee nacheʼe tü nacheʼese aainjuushikat süka ooro, neʼikajaakalaka shia nümüin Aarón. 4 Naapaakalaka Aarón tü oorokot, nüchinakalaka shia süka wanee cincel, nukumajakalaka niyaakua wanee paaʼachon süka tia oorokot. Anuujeseʼe nanüiki na israelitakana: «Anii chi Wamaleiwasekai, nia ayuʼlaka waya suluʼujee tü mmakalü Egipto».

5 Niʼrapa Aarón tia, nukumajakalaka wanee aʼajülee sümülatuʼu niyaakua chi paaʼachonkai. «Eejeerü watuma wanee miʼiraa wattaʼa süpüla waʼwaajüin Jehová», nümakalaka Aarón süchikijee tia. 6 Nütamaakalaka wattaʼa maalü waneemüin kaʼi, noʼutakalaka saaʼin mürüt süpüla naʼajüinjatüin shia nümüin Maleiwa, noʼuta aaʼinria tü anajiraainjatkalü aaʼujee naya nümaa. Naikalaaka na israelitakana sünain ekawaa jee sünain asawaa. Süchikijee tia, natamaaka sünain emiʼijaa.

7 Anuukalaka joo nünüiki Jehová nümüin Moisés: «Anakajaʼa püshakatüle, amojujaasü neʼe nakuwaʼipa na wayuu püpüshi piyuʼlakana suluʼujee tü mmakalü Egipto. 8 Eetaayaai kamaʼain naya sünain oonowaa sümaa tü pütchi taluwataakalü anain, nakumajüin niyaakua wanee paaʼachon, ichaaka naya sünain nasapainkain sümülatuʼu tia ayaakuaakat. Noʼuta aaʼinrü mürüt sümaa naʼajüin shia sümüin. ‹Anii chi Wamaleiwasekai, nia ayuʼlaka waya suluʼujee tü mmakalü Egipto›, mataalashii naya». 9 Ayataka naashajaain Jehová nümüin Moisés sünain maa: «Teʼrüin wayuuin macheʼesalii na israelitakana. 10 Anakajaʼa puuʼulaale tajaʼttiraiwa naya, jama jashichin maʼin taya namüin, pieechikalaka wattain maʼin aalii apüshii tatuma».

11 Nuchuntakalaka maʼin Moisés nümüin Jehová chi Nümaleiwasekai sümaa nümüin nümüin: «Jehovákalee, ¿jamüshi paashichijaakaʼa nooʼomüin na püpüshikana süchikijee piyuʼluin naya suluʼujee tü mmakalü Egipto sümaa paaʼinrüin kasa pülasü napüleerua? 12 ‹Niyuʼluin naya chi Namaleiwasekai süka naaʼinreein kasa mojusü namüin. Nuʼutee aaʼinchii naya chaa uuchoʼu jee najaʼttireein naya süpaʼajee tü mmakat›, meena na egipciokana püchiki paaʼinrüle tia. Nnojo jashichikuʼu pümüin, puuʼulaa suulia tü kasa mojusü paaʼinreekat namüin na israelitakana. 13 Soto paaʼin chi püchepchiakai Abrahán, Isaac jee müshia Israel. Anuu tü pütchi püpansaajakat namaa paaʼujiraa: ‹Wainmeena maʼin tatuma na jüikeyuukana maʼaka tü shüliwala chakalü iipünaa, taapeeriaʼaya namüin süpüshuaʼa tü mma taneekakat napüla jee noumainjeerü shia waneepia›».

14 Nuuʼulaakalaka Jehová suulia tü kasa mojusü nüküjakalü achiki paala naaʼinrüinjatiaaka namüin na israelitakana.

15 Nuuyantaka Moisés nüchikuaʼa, nüshakataka uuchoʼujee sümaa najapüipain tü piamasü ipa ashajuushikalü anain tü Pütchi Nuluwataakalü Anain Maleiwa. Ashajuushisü tü pütchikat sünain tia ipakalüirua süpüleeruajee jee süchiiruajee. 16 Nia kakumalaka Maleiwa tia piamasükalü ipa jee nia kashajalaka tü pütchi sünainkat. 17 Naapakalaka Josué shipisana wanee kasa jee naapüin nekiisa na israelitakana. «Ichaa taapüin shikiisa wayuu sünain atkawaa eere kepiain na israelitakana», nümakalaka nümüin Moisés. 18 Anuupejeʼe nünüiki Moisés nümüin:

19 Nürütkaapa Moisés eere kepiain na israelitakana, niʼraka tü niyaakuakat chi paaʼachonkai jee niʼrüin na israelitakana sünain oyonnojoo. Aashichijaashijeseʼe nia, nujutaka tü piamasükalü ipa najapuluʼujutka, yülaʼawaka shia nutuma süsaʼaluʼu tü uuchikat. 20 Naapaakalaka Moisés niyaakua chi paaʼachon nakumajirakai na israelitakana, naʼajakalaka tia ayaakuaakat soʼu siki, yütchonka shia nutuma maleepaʼaya shia saaʼin paliʼi. Nijitakalaka tia paliʼikat shiroku wüin jee nuluwataakalaka na israelitakana sünain asaa tia wüinkat. 21 Anuukalaka nünüiki Moisés nümüin Aarón: «¿Jamajüshi pia natuma na israelitakana süpüla paainjirüinjanain naya wanee kasa mojuka maʼin?». 22 Nusoutakalaka Aarón nümüin sünain maa: «Nnojo paashichijaain tamüin, pütüja aaʼulu kapülain naaʼin na israelitakana aainjaa kasa mojusü. 23 ‹Paainja wamüin shiyaakua kasa wamaleiwaseinjatka jee oʼunirajatka wakuwaʼipa, jama nnojoluin watüjaain saaʼu kasain alatüin nümüin Moisés, chi wayuu ayuʼlakai waya Egiptojee›, müshii naya tamüin. 24 Anuujeseʼe tanüiki namüin: ‹Na kanainkana kasa aainjuushika süka ooro anasü naakatüle shia jee nantirüle shia tamüin›. Tojutakalaka tü oorokot saʼaka tü sikikat, sukumajaakalaka niyaakua wanee paaʼachon».

25 Niʼrakalaka Moisés müin jamakai naaʼin na israelitakana süka nuuʼulaain Aarón müin nakuwaʼipa, müshiijeseʼe mojutuin naya sutuma naʼünüü. 26 Nüshaʼwalaakalaka Moisés eere kepiain na israelitakana sümaa nümüin: «¿Jara oonooka nümaa Jehová? Anashi nüntüle tamaʼanamüin». Noutkajaakalaka napüshuaʼa na levitakana nüʼütpünaa Moisés. 27 Anuu tü nümakat namüin: «Anuu tü nümakat Jehová chi Namaleiwasekai na israelitakana: ‹Anashii jaapaale jüchajaruutse waneʼewai jukua, jülateenaka pasanainpünaa sünain eere kepiain na israelitakana waneemüinreeya saʼata eere kepiain naya, juʼuteenaka naaʼin juwalayuu, na wayuu kepiakana jüʼütpünaa jee müshiʼiya jaʼaleewainyuu›». 28 Naaʼinrakalaka na levitakana tü nümakat Moisés namüin. Outakalaka soʼu kaʼikat tia 3.000 wayuu. 29 Anuukalaka tü nuluwataakalü anain naya Moisés: «Anashii jükatalaale soʼukai süpüla jiʼyataainjanain nümüin Jehová, atkaashii jia namaa jüchonnii jee namaa juwalayuu, aneerü jukuwaʼipa soʼukai nutuma Maleiwa sünainjee tü kasa jaaʼinrakat».

30 Anuukalaka nünüiki Moisés namüin na israelitakana waneemüin kaʼi: «Mojusü maʼin tü kasa jaaʼinrakat, aliikajaainjachi taya saaʼu tü uuchikat süpüla taashajaain nümaa Jehová, nülatittaajeetka sooʼopünaa naaʼin tü kasa mojusü jaainjakat». 31 Nüliikajaakalaka Moisés nüchikuaʼa saaʼumüin tü uuchikat, anuuka nünüiki nümüin Jehová: «Mojusü maʼin tü kasa naaʼinrakat na israelitakana, aainjashii naya wanee shiyaakua maleiwayaasü süka ooro. 32 Anakajaʼa motule paaʼin naainjala anashiirejeʼeya shia saaʼin pümüin. Nnojorülejeʼeya anashiin shia saaʼin pümüin anakajaʼa püsünneʼerüle maa tanülia suluʼujee tü karaloʼuta püshajakat». 33 Anuupejeʼe nünüiki Jehová nümüin Moisés: «Nieechi tasünneʼeraka anülia suluʼujee tü karaloʼuta tashajakat chi eekai aainjain wanee kasa mojuka tamüin. 34 Anakajaʼa puʼunule, pümaa na israelitakana suluʼumüin tü mma taküjakalü achiki pümüin. Oʼuneechi püpüleerua chi aapiee tamaʼanajeejachikai, süsaleena naainjala na israelitakana tatuma soʼu tü kaʼi nasoutuinjatkalü oʼu tamüin saaʼu naainjala». 35 Süsalaka naainjala na israelitakana nutuma Jehová saaʼujee nachuntuin nümüin Aarón naainjain niyaakua chi paaʼachon naʼwaajakai.

33 Ayatakalakaʼaya naashajaain Jehová nümaa Moisés sünain maa: «Anashi puʼunule namaa na israelita piyuʼlakana suluʼujee tü mmakalü Egipto. Pümaa naya suluʼu tü mma taküjatüjütkalia achiki nümüin Abrahán, Isaac jee müshia Jacob wanaa sümaa tamüin namüin: ‹Taapeerü shia namüin na püikeyuukana›. 2 Tajüteechi wanee aapiee jüpüleerua jee tajünajaajeena jüpüleerua na cananeokana, na amorreokana, na hititakana, na perizitakana, na heveokana jee müshiʼiya na jebuseokana. 3 Oʼuneechi pia suluʼumüin wanee mma joutka aluʼu leechi jee müsia mapa, nnojoleechipejeʼe taya oʼunuin pümaa jee namaa na israelitakana süka macheʼein maʼin naya, eeshii süpüla tajaʼttirüin naya wopuluʼu».

4 Mojukalaka maʼin naaʼin na israelitakana süka nüchiaain naya Maleiwa, nnojotsüjeseʼe naʼatüin nanain tü korolo anakalü atuma nayolojo. 5 Anuukalaka nünüiki Jehová nümüin Moisés: «Püma namüin na israelitakana: ‹Wayuu macheʼesalii maʼin jia, talatapünaale jaʼakapünaa eere kepiain jia eeshii süpüla tajaʼttirüin jia. Anashiʼiya müin nnojoluin jaʼatüin korolo anaka atuma jiyolojo sümaʼainruʼu taneeküin tü kasa taaʼinrajatkat jüka›». 6 Naakatüinjeseʼe na israelitakana chaa eekai tü uuchikat Horeb tü korolo anakalü atuma nayolojo, nnojorüleesia naʼatüin süchikuaʼa.

7 Nukolojeʼeraka Moisés tü nipiayaasü aainjuushikat süka loona naʼakajee na israelitakana, niʼitaaka shia kaʼyataluʼu nanain. «Miichi eere yootuin wayuu nümaa Maleiwa», müsü sünülia nutuma. Oʼunushii suluʼu tia miichikat na atüjaweekana saaʼu nünüiki Jehová süchiki wanee kasa. 8 Nuʼunawaipa Moisés suluʼu tü nipiakat ashaʼwalaʼawaishii napüshuaʼa na israelitakana, shaʼwatüshii naya napüshuaʼa soʼuluʼu tü nepiakat. Nananajüin Moisés nikerotaleepaʼaya suluʼumüin tü nipiakat. 9 Ashakatüsü tü sirumakat nikerotapa Moisés suluʼu tü miichikat, yalasü shia soʼuluʼu sümaʼainruʼu naashajaain Maleiwa nümaa Moisés. 10 Ejepülaayaa müshii napüshuaʼa na israelitakana soʼuluʼu nepia neʼrapa tü sirumakat soʼuluʼu tü miichikat. 11 Yootushi Jehová nümaa Moisés maʼaka yootuin wanee wayuu nümaa waneʼeya. Nuʼunawaipa Moisés naʼakamüin na israelitakana nia makatawaika suluʼu tü miichikat Josué chi nüchonkai Nun, chi aʼyataakai niʼipajee.

12 Anuukalaka nünüiki Moisés nümüin Jehová: «‹Puʼunira na israelitakana›, müshi pia tamüin, nnojoipejeʼe püküjain tamüin jaralinjachin püjütüin tamaa. ‹Taneeküichipa pia otta talatüshi taya pümaa›, müshi pia tamüin. 13 Talatülejeʼeya pia tamaa, püküja tamüin tü paaʼinrajatkat süpüla tatüjaain saaʼu tü pukuwaʼipakat jee ayatüinña talatüin pia tamaa, nnojo motuin paaʼin püpüshin na israelitakana». 14 Nusoutakalaka Maleiwa* nümüin: «Tayeechi oʼunaka pümaa jee jimateerü paaʼin tatuma». 15 Anuujeseʼe nünüiki Moisés nümüin: «Nnojoire puʼunajachin wamaa, puuʼulaamata makataiwa waya yaʼayaa. 16 ¿Jamüsü süpüla sütüjaain aaʼu wayuu talatüin pia tamaa jee namaa na israelitakana? Eere pia wamaa atüjaaneerü aaʼu naatain tü wakuwaʼipakat suulia sukuwaʼipa wayuu sainküinka tü mmakat».

17 Anuukalaka nünüiki Jehová nümüin Moisés: «Taaʼinreeriaʼaya tü puchuntakat tamüin süka talatüin taya pümaa jee taneeküin pia». 18 Anuujeseʼe nünüiki Moisés nümüin Maleiwa: «Anashi puuʼulaale teʼraiwa pia». 19 Anuukalaka nünüiki Maleiwa nümüin: «Oʼuneechi taya püpüleerua sümaa teeʼiyatüin pümüin tü tamaneekat otta taküjeerü pümüin jamaluʼuluin Jehováin tanülia. Takaalinjeechi chi eekai takaalinjeein amüin jee tamüliajeechi aaʼin chi eekai tamüliajeein aaʼin». 20 Ayatakalakaʼaya naashajaain Maleiwa sünain maa: «Nnojoishi süpüla piʼrüinjachin taya, süka nnojolin eein wanee wayuu eʼrakai taya sümaa ayatüinña katüin noʼu».

21 Ayataka naashajaain Jehová sünain maa: «Anashi yaale pia saaʼu tü ipa pejekat yaajee yaa, 22 sümaʼainruʼu talatüin teʼitaajeechi pia suluʼu suwakala tü ipakat, taaʼinmajeechi pia süka tajapü talataleepaʼaya püʼütpünaa. 23 Tasünneʼerapa tajapü piʼreerü tü tasapükat, nnojoleetpejeʼe piʼrüin toʼupünaa».

34 Anuuka nünüiki Jehová mapa nümüin Moisés: «Püchina piamasü ipa maʼaka saaʼin tü piamasükalü ipa palajatka püchinain, tashajeetka sünain tü tashajakat paala sünain tü piamasükalü ipa pusoʼttakat. 2 Anashi yapajüle pia süpüla püliikajaainjachin wattaʼa wattaʼa maalü saaʼumüin tü uuchikat Sinaí, antajachi pia tamaʼanamüin saaʼumüin tü uuchikat. 3 Nnojotsü jaralinjatüin aliikajaain pümaa otta nnojotsü eeinjatüin wayuu warai maka süʼütpünaa tü uuchikat, nnojotsü ekajeʼennajatüin anneerü jee müsia paaʼa süʼütpünaa».

4 Nüchinakalaka Moisés piamasü ipa maʼaka saaʼin tü palajatkalüirua. Shiasaʼa waneemüin kaʼi nütamaaka wattachon jee nuʼunaka saaʼumüin tü uuchikat Sinaí maʼaka nuluwataain nia Jehová, nülüʼüjainña tü piamasükalü ipa achinuushika nutuma. 5 Nüshakatakalaka Jehová saʼaka tü sirumakat jee yalajachika nia nüʼütpaʼa Moisés, nüküjakalaka Jehová tü nünüliakat. 6 Nülatakalaka Jehová nüpüleerua Moisés sümaa müin nünüiki: «Taya chi kanüliakai Jehová, Jehová tanülia, taya wanee Maleiwa amüliajüi, anamia taya, nnojoishi kashapajaaralin taya, amülialaasü taaʼin saalin wayuu, tekeraajüin waneepia tanüiki, 7 kamaneeshi taya sümüin wayuu süpüshuaʼa, talatirüin sooʼopünaa taaʼin saainjala wayuu, motusü taaʼin tü kasa mojusü naaʼinrakat wanee wayuu jee naainjala chi nnojoikai jaa müin otta süsalashi tatuma wayuu eekai kaainjalain. Kaainjarale tamüin wanee wayuu, süsaleena tia na nüchonniikana, na nüikeyuukana jee nachonnii na nüikeyuukana».

8 Nejepülaamaatakalaka Moisés mmoluʼu sümaa nüsapainkain nia. 9 Anuukalaka nünüiki Moisés nümüin: «Jehovákalee, talatülejeʼeya pia tamaa, anashi puʼunule wamaa mayaainjeʼe wayuuin macheʼesalii waya. Anashi puʼunule wamaa Jehová, pülatira sooʼopünaa paaʼin tü waainjalakat jee anashii püpüshire waya». 10 Nusoutakalaka Maleiwa nümüin: «Anuu tü pütchi tapansaajüinjatkat jümaa: aaʼinreechi taya kasa pülasü noʼupala napüshuaʼa na israelitakana nnojoyütkalia aainjünüin suʼupala wayuu sainküinpünaa tü mmakat. Napüshuaʼa na wayuu pasanainkana anain jia neʼreerü süpüshuaʼa tü taaʼinrajatkat tayakai Jehová süka taaʼinreerüin wanee kasa pülasü jüpüleerua.

11 »Kacheʼe jia sümüin süpüshuaʼa tü kasa taluwataainjatkalü anain jia soʼukai. Tajünajaajeena jüpüleerua na amorreokana, na cananeokana, na hititakana, na perizitakana, na heveokana jee müshiʼiya na jebuseokana. 12 Jalia jia suulia jüpansaajüin jünüiki namaa na wayuu chainjanakana aʼaka jia suulia sumojujaain jukuwaʼipa. 13 Jusoʼlojüinjatü eere naʼajüin kasa sümüin namaleiwase, jajaʼttirajatü tü ipa apaʼawajaaushi kojutukat namüin otta yülaʼawainjatü jutuma tü wunuʼu shiyaawasekat namaleiwase. 14 Nnojoishii jüsapainkainjanain jia nümülatuʼu wanee maleiwayaashi, tayakai Jehová eʼnnaajünüshi suluʼu tayain wanee Maleiwa achekakai nuʼwaajünüin nümüiwaʼa. Taya wanee Maleiwa aʼwaajünüinjachikai nümüiwaʼa. 15 Jalia jia suulia jüpansaajüin jünüiki namaa na wayuu sulujunakana tia mmakat, süka eein süpüla nounejaain jia sünain aʼwaajaa* namaleiwase jee jiküin namaa tü naʼajakat sümüin namaleiwase. 16 Kasaaleenaka na jüchonniikana jutuma namaa nachonnii naya wayuukana, nayasaʼa naya jieyuukana naʼwaajireena na jüchonniikana namaleiwase.

17 »Nnojo jukumajüin shiyaakua wanee maleiwa sükajee kachueera ojojuushi.

18 »Jaaʼinrajatü tü Miʼiraa saainjünakalü oʼu tü Pan Maʼakasatkat Soolojia. Jiküinjatü tü pan maʼakasatkat soolojia maʼaka taluwataain jia. Jaaʼinrajatü shia soʼunnaa akaratshi kaʼi soʼu tü kashikalü abib,* tü kaʼi aneekünakalü apüla shia, süka shiain tü kashikalü abib jujuʼitaka oʼu Egiptojee.

19 »Napüshuaʼa na jüchonnii tooloyuuchein jiʼirumakana tamüinjana naya, müsia neʼe tü tooloyuuchein shiʼirumaka jümüʼlüin, shiale süchon paaʼa jee süchon anneerü. 20 Awalaajüinjana jia wanee anneerü süpüla jaakajirüinjachin chi shiʼirumakai jüpüliiküse. Nnojorüle juwalaajüin tia naaʼu, jiʼyaatajachi anutpünaa chi shiʼirumakai jüpüliiküse süpüla outajachin nia. Awalaajüinjana jia süpüla jaakajirüinjanain napüshuaʼa na tooloyuuchein jiʼirumakana. Nnojoishi jaralinjachin antüin tamaʼanamüin sümaa majapüitpain nia.

21 »Aʼyataainjana jia soʼu aipirua kaʼi shiasaʼa soʼu tü akaratshikat kaʼi, eemeraainjana jia otta eemeraainjana jia suulia ajaralaa jiyüüjase jee suulia akotchojaa süchon jüʼttia.

22 »Jaaʼinrüinjatü tü Miʼiraa Shikiirakalü Akotchojaa tü Palajatkat Süchon Aʼttiee, jaapüinjatü tü palajatkat süchon tü trigo jakütüsükat jee jaaʼinrajatü tü Miʼiraa Shikiirakalü Akotchojaa Süchon Aʼttiee sajaʼttiamüinka juya.

23 »Oʼunajana napüshuaʼa na tooloyuu israelitakana apünüintua süpüla juyakat tamülatuʼumüin tayakai Jehová chi Senyotkai, chi Namaleiwasekai na israelitakana. 24 Tayuʼleena na wayuukana jüpüleerua jee miyoʼujeerü tü juumainkat tatuma. Nnojoleerü jaralüin ashutuin saaʼu tü juumainkat juʼunapa apünüintua süpüla juyaka tamaʼanamüin tayakai Jehová chi Jümaleiwasekai.

25 »Nnojotsü jaʼajüinjatüin süsha tü mürüt juʼutakalü aaʼin süpüla jaapüinjatüin shia tamüin sümaa wanee kasa eekai kaʼakain soolojia. Tü jaapüinjatkat tamüin soʼu tü miʼiraa kanüliakat Pascua nnojotsü jünaajaainjatüin süpüla waneemüin kaʼi.

26 »Jüntirajatü tamüin tayakai Jehová chi Jümaleiwasekai tü palajatkat süchon jüʼttia eekai jeʼwein sümaa anapüijain maʼin shia.

»Nnojoishi jüʼlakajüinjachin chi kaaʼulachonkai saʼaka süchira nii».

27 Ayatakalaka yootuin Jehová nümaa Moisés sünain maa: «Anasü püshajüle pütchikat tüü, süka tapansaajüin pümaa tanüiki otta tapansaajüin shia namaa na israelitakana wanaapünaa sümaa tü pütchi taküjaitpakat pümüin». 28 Makatakalaka Moisés yala nümaa Jehová soʼu pienchi shikii kaʼi jee pienchi shikii ai. Meküinsai nia otta nnojoishi asüin wüin. Nüshajakalaka* sünain tü ipakat tü pütchi nüpansaajakat, tia shia tü Poloosükat Pütchi Aluwataanaka Anain.

29 Nüshakatakalaka Moisés saaʼujee tü uuchikat Sinaí sümaa nülüʼüjain tü piamasükalü ipa ashajünaka anain tü Pütchi Nuluwataakalü Anain Maleiwa. Kayaajakalaka nuʼupünaa sutumajee yootuin nia nümaa Maleiwa, nnojotpejeʼe nütüjaain aaʼu kayaajüin nuʼupünaa. 30 Shiasaʼa niʼnnapa Moisés nutuma Aarón jee natuma na israelitakana, neʼrakalaka kayaajüin nuʼupünaa. Mmotkalaka naya seema arütkawaa nünainmüin.

31 Neenajaka naya Moisés, nürütkaakalaka Aarón nünainmüin namaa na nekiipüʼüjanakana na israelitakana, yootokalaka nia namaa. 32 Narütkaakalaka napüshuaʼa na israelitakana, nüküjaka Moisés namüin süpüshuaʼa tü pütchi nüküjakat Jehová nümüin saaʼu tü uuchikat Sinaí. 33 Kettaapa nünüiki Moisés namüin, nükooʼoyolüin nuʼupünaa süka kuluulu. 34 Nuʼunawaipa Moisés sünain aashajawaa nümaa Jehová, naakatawalin tü kooʼoyokalü aka nuʼupünaa. Shiasaʼa nüleʼejapa namaʼanamüin na israelitakana nüküjawalin namüin tü aluwataanakalü anain naya. 35 Neʼrawalin na israelitakana kayaajüin nuʼupünaa Moisés. Nükooʼoyolokalaka nuʼupünaa Moisés süchikuaʼa süka kuluulu, naakatawaika shia naashajaapa nümaa Maleiwa.

35 Nuutkajeʼeraka Moisés mapa napüshuaʼa na israelitakana sümaa nümüin namüin: «Anuu tü jaaʼinrüinjatkat naashin Jehová: 2 aʼyataainjana jia soʼu aipirua kaʼi, eemeraainjanapejeʼe jia soʼu tü akaratshikat kaʼi süpüla juʼwaajüinjachin Jehová, kojutuinjatü maʼin jümüin tia kaʼikat. Outajachi wanee wayuu niʼyataale soʼu tü sükaliakalü eemerawaa. 3 Nnojoishii achuwajaainjanain jia siki jipialuʼu soʼu tü sükaliakalü eemerawaa».

4 Anuuka joo nünüiki Moisés mapa namüin na israelitakana: «Anuu tü nuluwataakalü anain Jehová: 5 ‹Jukotchoja süpüshuaʼa tü jüsülajüinjatkat nümüin Jehová. Chi eekai asülajeein süka naaʼin nümüiwaʼa nüntirüinjatü shia nümüin Jehová: ooro, pülaata, cobre, 6 jiirü wüittüsü, laana jepisiiyaa, jiirü ishotot maʼin, lino anaka maʼin, soi kaaʼula, 7 anneeruuta atinjuushika suluʼu ishoin shia, süta tü wüchii kanüliakat foca, wunuʼu kanüliaka acacia, 8 seita süsüñeʼinjatka ranpara sümaʼaleeya tü oʼyotunakat saʼaka tü seita oʼyotunakat naaʼu wanee wayuu eekai nüneekünüin jee seita süpülajatka tü wunuʼu aʼajünajatkat jemetaka eejuu, 9 ipa kanüliaka ónice, waneirua ipa eʼitaanajatka sünain tü kuluulu kanüliakalü efod jee tü eʼitaanajatkat sünain tü naaʼintoʼupünaainjatkat chi laülaashikai napüleerua na sacerdotekana.

10 »›Anashii nantüle napüshuaʼa na wayuu atüjakana süpüleerua wanee kasa süpüla naaʼinrüinjatüin süpüshuaʼa tü kasa nuluwataaitpakalü anain Jehová: 11 tü miichi aʼwaajüleekat sümaa tü koroloirua eekat sünain otta tü saajunakat, tü sajapuluʼujiainjatkat tü miichikat, tü taapüla süsepüinjatkat, tü wunuʼu sajapuluʼujiainjatkat tü taapülakat, süsaʼa tü miichikat otta tü süpülajanakat süsaʼa; 12 tü Kojonkot sümaa tü wunuʼu sülüʼüjiainjatkat, tü saajunakat otta tü kuluulu sütaüjiainjatkat tü miichikat; 13 tü meesakat, tü wunuʼu sülüʼüjiainjatkat tü meesakat, tü kasa choʼujaajeetkat sümüin tü meesakat otta tü pan aapünajatkat nümüin Maleiwa; 14 tü ranparakat sümaa tü kasa choʼujaajeetkat sümüin, tü iitachein aainjuushikat süka ooro süpülajanajatka tü mechuuriakat otta seita süpülajatka chuwatüin shia; 15 tü aʼajüleekat kasa jemetaka eejuu sümaa tü wunuʼu sülüʼüjiainjatkat, tü seita oʼyotunakat naaʼu wanee wayuu eekai nüneekünüin jee tü seita süpülajatkat tü wunuʼu aʼajünajatkat jemetaka eejuu, tü kuluulu soʼulujunainjatkat tü miichi aʼwaajüleekat; 16 tü aʼajüleekat mürüt, tü pariia aainjünajatkat süka cobre, tü wunuʼu sülüʼüjiainjatkat sümaa tü kasa choʼujaajeetkat sümüin; tü süpülajanakat wüin sümaa tü süsaʼakat; 17 tü kuluulu süsepüinjatkat tü paatiakat, tü puntaat süsaʼainjatkat süsepü tü paatiakat otta tü süpülajanainjatkat tü puntaatkat; tü kuluulu soʼulujunainjatkat tü paatiakat; 18 tü oʼojia sajapuluʼujiainjatkat tü miichi aʼwaajüleekat, tü oʼojia sajapuluʼujiainjatkat süsepü tü paatiakat otta jiiku ajapuluʼujiainjatka shia 19 otta tü kuluulu eʼinuushinjatkat süpüla tü aʼyatawaa aainjünajatkat suluʼu tü miichi aʼwaajüleekat, tü kuluulu anakat maʼin nüsheʼinjatka Aarón chi sacerdotekai otta tü kuluulu nasheʼinjatkat na nüchonniikana süpüla sacerdotein naya›».

20 Noʼunakalaka napüshuaʼa na israelitakana nümaʼanajee Moisés. 21 Nayasaʼa napüshuaʼa na israelita asülajeekana süka naaʼin namüiwaʼa, neʼikajaain tü nasülajüinjatkat nümüin Jehová. Tia kasa nasülajakat, süpülajatü sukumajünüin tü miichi aʼwaajüleekat sümaa tü kasa choʼujaajeetkat süpüla tü aʼyatawaa aainjünajatkat suluʼu otta süpüla saainjünüin tü kuluulu anakat maʼin nasheʼinjatka na sacerdotekana. 22 Nayasaʼa na tooloyuu otta na jieyuu asülajeekana süka naaʼin namüiwaʼa, nalüʼüjain atpiita, cheʼesaa, süttiija jee waneirua korolo. Nalüʼüjainña waneirua kasa aainjuushika süka ooro. Neʼikajaaka tia korolo aainjuushikat süka ooro nümülatuʼumüin Jehová süpüla nasülajüin shia nümüin. 23 Nayasaʼa na kamaʼanakana jiirü wüittüsü, laana jepisiiyaa, jiirü ishotot maʼin, lino anaka maʼin, soi kaaʼula, anneeruuta atinjuushika suluʼu ishoin shia otta süta tü wüchii kanüliakat foca, neʼikajaain shia. 24 Napüshuaʼa na asülajeekana pülaata otta cobre neʼikajaain shia nümüin Jehová otta napüshuaʼa na wayuu kamaʼanakana wunuʼu kanüliaka acacia nasülajüin shia süpüla sukumajünüin süka tü kasa choʼujaajeetkat süpüla tü miichi aʼwaajüleekat.

25 Nayasaʼa napüshuaʼa na jieyuu atüjakana süpüleerua outtajaa, outtajüshii naya jiirü wüittüsü, laana jepisiiyaa, jiirü ishotot maʼin otta lino anaka maʼin, neʼikajaakalaka tü nouttajüinkat. 26 Wainma maʼin na jieyuu outtajakana soi kaaʼula süka natüjain süpüleerua, naaʼinrüin tia süka naaʼin namüiwaʼa.

27 Müshiʼiya neʼe nekiipüʼü na israelitakana, eʼikajaashii naya ipa kanüliaka ónice jee waneirua ipa süpüla shiʼitaanajatüin sünain tü kuluulu kanüliakalü efod otta sünain tü naaʼintoʼupünaainjatkat chi laülaashikai napüleerua na sacerdotekana. 28 Alüʼüjashiʼiya naya seita jemetaka eejuu,* seita süsüñeʼinjatka ranpara, seita oʼyotunaka naaʼu wanee wayuu eekai nüneekünüin jee seita süpülajatka tü wunuʼu aʼajünajatkat jemetaka eejuu. 29 Napüshuaʼa na israelitakana neʼikajaain tü nasülajüinjatkat nümüin Jehová wanaapünaa sümaa tü nasülajeekat süka naaʼin namüiwaʼa. Tia kasa nasülajakat, süpülajatü saainjünüin tü aʼyatawaa aluwataanakalü anain Moisés nutuma Jehová, tü naaʼinrüinjatkat na israelitakana.

30 Anuukalaka nünüiki Moisés namüin na israelitakana: «Nüneeküin Jehová Bezalel naʼakajee na nüikeyuukana Judá, nüchon nia Urí jee nülüin nia Hur. 31 Naapüin Maleiwa tü nüpülainkat süpüla kekiin nia, niyaawatüin saaʼu wanee kasa jee nütüjain süpüleerua aainjaa kasa eekai eein. 32 Atüjeechi nia süpüleerua jamüin sukuwaʼipa saainjia wanee kasa, aaʼinreechi kasa süka ooro, pülaata otta cobre, 33 atüjeechi nia achinaa ipa eekai anain maʼin sümaa niʼitaain shia suluʼu tü süpülajanainjatkat otta aaʼinreechi waneirua kasa süka wunuʼu. 34 Niʼitaain suluʼu naaʼin Bezalel jee suluʼu naaʼin Oholiab, chi nüchonkai Ahisamac jee chi napüshikai na nüikeyuukana Dan, natüjainjanain süpüleerua ekirajaa na waneinnua. 35 Atüjashii naya nutuma Maleiwa süpüla naaʼinrüin aʼyatawaa naaʼinraka wanee wayuu eekai kuʼyamalin, eekai nütüjain süpüleerua jamüin sukumajia wanee kasa otta chi eekai nütüjain eʼinaa jee asonoo kuluulu süka jiirü wüittüsü, laana jepisiiyaa, jiirü ishotot maʼin otta lino anaka maʼin. Naaʼinreerü naya wayuukana aʼyatawaa eekai eein otta atüjeena naya akumajaa sukuwaʼipa wanee kasa süpüla naaʼinrüinjatüin shia.

36 »Naainjeerü Bezalel nümaa Oholiab jee namaa napüshuaʼa na kekiikana maʼin süpüshuaʼa tü kasa süpülajatkat tü miichi aʼwaajüleekat Maleiwa wanaapünaa maʼin sümaa tü nuluwataakalü anain Jehová, naapüin Jehová kekiwaa namüin süpüla naaʼinrüinjatüin tia».

2 Nuunejaka Moisés Bezalel, Oholiab jee müshiʼiya napüshuaʼa na atüjakana süpüleerua wanee kasa jee kekiikana maʼin nutuma Jehová, na achekakana süka naaʼin namüiwaʼa naaʼinrajatüin tia aʼyatawaakat. 3 Naapakalaka Moisés namüin süpüshuaʼa tü nasülajakat na israelitakana süpülajatka tü miichi aʼwaajüleekat Maleiwa, ayatapejeʼe nantirüin na israelitakana soʼukaiwai tü nasülajüinjatkat.

4 Yalapa sukumajünüin tü miichi aʼwaajüleekat Maleiwa, antayaa müshii waneʼewai nakua nümaʼanamüin Moisés napüshuaʼa na wayuu atüjakana süpüleerua wanee kasa 5 sümaa müin nanüiki nümüin: «Wainma maʼin tü kasa nantirakat na wayuukana, alanaʼaleesia suulia tü choʼujaakat süpüla tü aʼyatawaa nuluwataakalü anain Jehová». 6 Nuluwataainjeseʼe Moisés süküjünüinjatüin pütchikat tüü eepünaale kepiain na israelitakana: «Nnojo jüntirüin sooʼomüin kasa sukumajiainjatka tü miichi aʼwaajüleekat». Müsü sukuwaʼipa süpüla nooʼulaainjanain na israelitakana suulia asülajaa. 7 Wainmaleesia tü kasa eejatkat süpüla tü aʼyatawaa aainjünajatkat, alanaʼaleesia shia.

8 Nayasaʼa napüshuaʼa na aʼyataalii kekiikana maʼin, naainjain tü miichi aʼwaajüleekat Maleiwa süka poloosü kuluulu aainjuushika süka lino anaka maʼin sümaa suuttajuushin, jiirü wüittüsü, laana jepisiiyaa otta jiirü ishotot maʼin. Nusonokalaka* shiyaakua querubín sünain. 9 Poloo piamamüin metro shiatapünaamüin sajaʼapüin* tü kuluutkat otta 180 centímetro seeruluin,* wanaawasü sajaʼapüin jee seeruluin süpüshuaʼa tü kuluutkat. 10 Niʼyapüjakalaka tü jaʼraisükat kuluulu, müsiaʼaya neʼe nutuma sukuwaʼipa tü wane jaʼraisükat kuluulu, niʼyapüjain shia. 11 Niʼinaka mapa süka jiirü wüittüsü sotpünaa tü palajatkat kuluulu niʼyapüjaka. Müsia neʼe sukuwaʼipa nutuma tü wane kuluulu niʼyapüjakat, süntiraaka tü piamasükat kuluulu niʼyapüjaka. 12 Niʼinaka sotpünaa tü palajatkat kuluulu jaʼrai shikii sücheʼechein otta niʼinüin sotpünaa tü wane kuluutkat jaʼrai shikii sücheʼecheinña. Peʼipaakalaka nutuma tia sücheʼecheinkat süpüla süntiraainjatüin tia kuluutkat. 13 Naainjakalaka mapa süka ooro jaʼrai shikii sajapuluʼujiainjatka tü piamasükat kuluulu aʼyapüjanaka süpüla süntiraainjatüin. Waneesükalaka neʼe tü kuluulu sujumajünakalü aka tü miichi aʼwaajüleekat.

14 Nuuttajakalaka mapa soi kaaʼula süpüla tü kuluulu saajunainjatkat tü miichi aʼwaajüleekat. Polookalaka waneemüin kuluulu naainjaka süpüla tü miichikat. 15 Poloo apünüinmüin metro shiatapünaamüin sajaʼapüin* tü kuluutkat otta 180 centímetro seeruluin.* Müsia neʼe süpüshuaʼa sajaʼapüin jee seeruluin tü poloosükat waneemüin kuluulu. 16 Niʼyapüjakalaka palajana tü jaʼraisükalüirua kuluulu, niʼyapüja nümüsia tü wane aipiruasükalüirua kuluulu. 17 Niʼinakalaka mapa jaʼrai shikii sücheʼechein sotpünaa tü palajatkat kuluulu niʼyapüjaka süpüla süntiraain sümaa tü wane, niʼinünña jaʼrai shikii sücheʼechein sotpünaa tü wane kuluutkat süpüla süntiraainjatüin sümaa tü palajatkat kuluulu niʼyapüjaka. 18 Naainjakalaka süka cobre jaʼrai shikii sajapuluʼujiainjatkat tü piamasükat kuluulu süpüla waneesüinjatüin tü kuluutkat.

19 Naainjakalaka tü saajünaainjatkat tü miichikat süka anneeruuta atinjuushika suluʼu ishoin shia otta saaʼujee tü anneeruutakat niʼitaain süta tü wüchii kanüliakat foca.

20 Naainjakalaka taapüla eekai kaʼlein süpüla tü miichi aʼwaajüleekat, naainjain shia süka tü wunuʼu kanüliakalü acacia jee shaʼwashawatka shia nutuma. 21 Pienchi metro shiatapünaamüin sajaʼapüin* tü taapülakat otta akaratshi shikii centímetro seeruluin.* 22 Piamasü suuʼui waneʼewai sukua tü taapülakat süpüla paʼataain shia, müsü sukuwaʼipa süpüshuaʼa tü taapüla süpülajatkat tü miichi aʼwaajüleekat. 23 Naainjakalaka piama shikii taapüla süsepüinjatka tü miichi aʼwaajüleekalü uuchijeeruʼu sünain. 24 Naainjakalaka süka pülaata pienchi shikii süpülajana tü piamakat shikii taapüla: piamawaisü süpülajana suuʼui tü taapülakat süpüla shikerotuin suluʼu. 25 Naainjainña piama shikii taapüla süsepüinjatka tü miichi aʼwaajüleekat palaajeeruʼu sünain. 26 Naainjain süka pülaata pienchi shikii süpülajana tü taapülakat: piamawaisü süpülajana suuʼui tü taapülakat.

27 Aainjashi nia aipiruasü taapüla süsepüinjatka tü miichikat süchiiruajee wopujeeruʼu sünain. 28 Naainjüinña piamasü taapüla eʼitaanaka süshekeʼinruʼu tü miichikat chaa süchiiruajee. 29 Eʼitaanüsü piamasü taapüla sooʼomüin, ashaʼwaleʼennüsü shia mmoluʼujee süpüla süntiraain iipünaamüin eere shiʼitaanüin tü palajatkat sücheʼe. Müsü sukuwaʼipa tü piamasükat taapüla süshekeinruʼuka tü aʼwaajüleekat Maleiwa. 30 Eejatkalaka mekiisatsü taapüla sümaa tü poloo aipiruasükat süpülajana aainjuushika süka pülaata: piamawaisü süpülajana süpüla shikerotuin suuʼui tü taapülakat suluʼu.

31 Ashoʼttüshia nia wunuʼu kanüliaka acacia: jaʼraisü tü wunuʼu nushoʼttakat sajapuluʼujiainjatka tü taapüla sünainkat wanee saʼata süsepü tü aʼwaajüleekat. 32 Jaʼraisü wunuʼu sajapuluʼujiainjatka tü taapüla süsepüinjatkat wane saʼata tü aʼwaajüleekat otta jaʼraisü wunuʼu sajapuluʼujiainjatka tü taapüla eʼitaanajatkat süchiiruajee tü miichikat wopujeeruʼu sünain. 33 Saʼakajee tü wunuʼu nushoʼttakat niʼitaain wanee shiatapünaa tü taapülakalüirua suluʼu waneʼpüshin shia, antaleesia shia waneemüin saʼata. 34 Nushuleraka ooro sünain tü taapülakalüirua jee nukumajaka süka ooro tü sücheʼekat, tü kaluʼupünaainjatkat tü wunuʼukalüirua, nushulerüinña ooro sünain tü wunuʼukalüirua.

35 Naainjaka kuluulu soʼulujunainjatka tü kuattakat süka jiirü wüittüsü, laana jepisiiyaa, jiirü ishotot maʼin otta lino anaka maʼin sümaa suuttajuushin. Nusonoko shiyaakua querubín sünain. 36 Nushoʼttakalaka pienchisü wunuʼu kanüliaka acacia sükachennüinjatka anain tü kuluutkat, nushuleraka ooro sutoutajee. Naainjaka süka ooro sajapülüjiainjatkat tü kuluutkat jee naainjain süka pülaata pienchisü süpülajanainjatkat tü wunuʼukot. 37 Naainjakalaka tü kuluulu soʼulujunainjatka tü miichikat süka jiirü wüittüsü, laana jepisiiyaa, jiirü ishotot maʼin otta lino anaka maʼin sümaa suuttajuushin. 38 Nüshoʼttakalaka jaʼraisü wunuʼu eeinjatüle sükachennüin tü kuluutkat, naainjainña tü sajapülüjiainjatkat tü kuluutkat. Nushuleraka ooro sutoutajee tü wunuʼukot jee müsia sutoutajee tü sücheʼekalüirua, eekajasaʼa tü jaʼraisü süpülajanainjatkat tü wunuʼukot naainjain shia süka cobre.

37 Naainjakalaka mapa Bezalel tü Kojonkot süka tü wunuʼu kanüliakalü acacia. 110 centímetro sajaʼapüin,* akaratshi shikii centímetro seeruluin* otta akaratshi shikii centímetro shia iipünaamüin.* 2 Nushuleraka suluʼupünaa jee sutoutajee ooro anaka maʼin, kotpünaaka shia ooro nutuma. 3 Naainjakalaka pienchisü sücheʼe aainjuushika süka ooro, niʼitaakalaka shia iipünaa sünain tü pienchisükat süsaʼa: niʼitaain piamasü sücheʼe sünain wanee saʼata jee tü wane piamasükat sünain tü wane saʼatakat. 4 Nüshoʼttakalaka wunuʼu kanüliaka acacia sümaa nushulerüin ooro sutoutajee. 5 Nülatiraka tü wunuʼukalüirua suluʼupünaa sücheʼe tü Kojonkot süpüla sülüʼüjiraanajatüin.

6 Naainjakalaka shiʼrouse tü Kojonkot süka ooro anaka maʼin. 110 centímetro tü saʼajapüinjatkat* jee akaratshi shikii centímetro tü seeruluinkat.* 7 Nukumajaka süka mattiia nayaakua piamashii querubín saaʼuinjanakana shiʼrouse tü Kojonkot, naainjain shia süka ooro jee niʼitaain shia sünain tü piamasükat sot tü Kojonkot. 8 Niʼitaakalaka niyaakua wanee querubín sünain sot tü shiʼrousekat jee müshia chi wane sünain tü wane sotkat. 9 Iipünaasü natüna na querubínkana, nakooʼoyoluin shiʼrouse tü Kojonkot süka tü natünakat, niʼitaain wanee niyaakua querubín niʼipoʼujee chi wane sümaa wünapümüin noʼupünaa sünainmüin shiʼrouse tü Kojonkot.

10 Nukumajakalaka wanee meesa süka tü wunuʼu kanüliakalü acacia, mekietsat shikii centímetro tü sajaʼapüinkat,* pienchi shikii jaʼralimüin centímetro tü seeruluinkat* jee akaratshi shikii centímetro shia iipünaamüin.* 11 Nushuleraka sünain tü meesakat ooro anaka maʼin jee kotpünaasü ooro nutuma. 12 Niʼitaakalaka wanee taapüla sotpünaa tü meesakat, akaratshi centímetro* seeruluin otta kotpünaasü ooro nutuma tia taapülakat. 13 Naainjainña pienchisü sücheʼe tü meesakat süka ooro ojojuushi, niʼitaaka shia eere süchitünüin tü pienchisükat süsaʼa tü meesakat. 14 Niʼitaain tü sücheʼekat peje sünain tü taapüla sotpünaajatkat tü meesakat, süpülajatü shiʼitaanüin suluʼupünaa tü wunuʼu sülüʼüjiainjatkat tü meesakat. 15 Nushoʼttakalaka wunuʼu kanüliaka acacia sülüʼüjiainjatka tü meesakat, nushulereetka ooro sünain tia wunuʼukalüirua. 16 Naainjakalaka mapa süka ooro anaka maʼin tü saaʼuinjatkat tü meesakat: tü pülaata ekiakat sümaa tü asieekat, tü iitakat sümaa tü jaara oʼyotunüinjatkalü aluʼu tü asülajünüinjatkat.

17 Nukumajaka mapa wanee ranpara süka ooro anaka maʼin. Naainjain shia süka mattiia jee waneʼpüshisü shia nutuma. Kooʼiusü shia nutuma, kasaʼasü, eesü sünain shiyaakua asiee, shiyaakua süsii wunuʼu eiwaʼatka akumajaain otta shiyaakua süsii wunuʼu. 18 Aipiruasü sütüna tü ranparakalü akumajaaka sünainjee tü süsaʼa pasanainkat sünain: apünüin sütüna sünain wanee saʼata jee apünüin sünain tü wane saʼatakat. 19 Sünain waneʼewai sukua saʼata sütüna tü ranparakalü, eesü shiyaakua apünüinsü asiee, müsü aka saaʼin süsii tü wunuʼu kanüliakalü almendro, eesü shiyaakua süsii wunuʼu eiwaʼatka akumajaain jee müsia shiyaakua süsii wunuʼu sümaa pachikuatüin shia. Jee sünain tü wane saʼatakat sünain tü apünüinsükat sütüna eesü shiyaakua apünüinsü asiee, müsü aka saaʼin süsii tü wunuʼu kanüliakalü almendro, eesü shiyaakua süsii wunuʼu eiwaʼatka akumajaain jee müsia shiyaakua süsii wunuʼu sümaa pachikuatüin shia. Müsü sukuwaʼipa tü aipiruasükat sütüna tü ranparakalü akumajaaka sünainjee tü süsaʼa pasanainkat sünain. 20 Sünain süsaʼa tü ranparakat eesü pienchisü shiyaakua asiee, müsü aka saaʼin süsii tü wunuʼu kanüliakalü almendro, eesü shiyaakua süsii wunuʼu eiwaʼatka akumajaain jee müsia shiyaakua süsii wunuʼu sümaa pachikuatüin shia. 21 Wünaapünaa sünain tü piamasükat sütüna tü ranpara ojuʼitakat sünainjee tü süsaʼakalü eesü shiyaakua süsii wunuʼu eiwaʼatka akumajaain jee wünaapünaa sünain tü wane piamasükat sütüna eesü wanee shiyaakua süsii wunuʼu eiwaʼatka akumajaain, akaataajaʼa joo sünain tü wane piamasükat sütünaya eesü wanee shiyaakua süsii wunuʼu eiwaʼatka akumajaain. Müsü sukuwaʼipa tü aipiruasükat sütüna tü ranparakalü ojuʼitaka sünainjee tü süsaʼakat. 22 Naainjain süka ooro anaka maʼin shiyaakua tü süsii wunuʼu eiwaʼatkalü akumajaain jee sütüna tü ranparakat sümaa waneʼpüshin süpüshuaʼa tü ranparakat, akumajünüsü shia süka mattiia. 23 Naainjakalaka mapa süka ooro anaka maʼin akaratshi iitachein süpülajanaka tü mechuuriakat, tü shiyokojiakat tü mechuuriakat jee müsia tü akotchojiakat wanee kasa sünainjee tü mechuuriakat. 24 Apünüin shikii pienchimüin kilo* ooro anaka maʼin sukumajünaka aka tü ranparakat jee müsia süpüshuaʼa tü kasa choʼujaakat sümüin.

25 Naainjainña wanee aʼajülee süka tü wunuʼu kanüliakalü acacia süpülajatka aʼajia wunuʼu jemetaka eejuu. Pienchinsü süshekein tü aʼajüleekat, pienchi shikii jaʼralimüin centímetro sajaʼapüin,* pienchi shikii jaʼralimüin centímetro seeruluin* jee mekietsat shikii centímetro shia iipünaamüin.* Waneʼpüshisü shiyaakua tü suʼuwakat mürüt sümaa tü aʼajüleekat. 26 Nushulereeraka ooro anaka maʼin süraloʼu tü aʼajüleekat, sutoutajee jee müsia sünain shiyaakua tü suʼuwakat mürüt, kotpünaasü ooro shia nutuma. 27 Niʼitaakalaka suupünaa sotkat, pienchisü sücheʼe aainjuushika süka ooro, niʼitaain piamasü sünain wanee saʼata jee müsia piamasü sünain tü wane saʼatakat. Tia süpülajatü shiʼitaanüin suluʼupünaa tü wunuʼu alüʼüjiainjatkat shia. 28 Nukumajakalaka tü wunuʼu alüʼüjiainjatkat süka wunuʼu kanüliaka acacia, nushuleraka ooro sutoutajee tia wunuʼukalüirua. 29 Naainjakalaka tü seita anakat maʼin oʼyotunajatka naaʼu wanee wayuu eekai nüneekünüin jee tü seita süpülajatka tü wunuʼu aʼajünüinjatkat jemetaka eejuu, anasü maʼin saainjia nutuma.

38 Naainjaka wanee aʼajülee mürüt süka wunuʼu kanüliaka acacia. Pienchisü süshekein tü aʼajüleekat, piamasü metro shiatapünaamüin tü sajaʼapüinkat sümaa tü seeruluinkat* otta wanee metro shiatapünaamüin shia iipünaamüin.* 2 Nukumajaka shiyaakua suʼuwa mürüt sünain tü pienchisükat süshekein tü aʼajüleekat, waneʼpüshisü shia nutuma sümaa tü aʼajüleekat. Nushuleraka cobre sutoutajee tü aʼajüleekat. 3 Naainjaka mapa süpüshuaʼa tü choʼujaajeetkat sümüin tü aʼajüleekat: waatte, paara, iita, teneroot jee müsia süpülajanainjatka sikemechi. Naainjain süpüshuaʼa tia süka cobre. 4 Naainjaka süka cobre wanee pariia süpülajatka tü aʼajüleekat. Nuuʼuttaka tü pariiakat shiatapünaa tü aʼajüleekat wünaapünaa sünain tü sotkat. 5 Naainjaka pienchisü sücheʼe süpülajanainjatka tü wunuʼu alüʼüjiainjatkat tü aʼajüleekat, niʼitaaka shia sünain tü pienchisükat süshekein tü aʼajüleekat wanaapünaa sümaa tü pariia aainjuushikat süka cobre. 6 Nüshoʼtakalaka wunuʼu kanüliaka acacia sülüʼüjiainjatka tü aʼajüleekat, nushuleraka cobre sutoutajee tü wunuʼukalüirua. 7 Nuuʼuttakalaka tü wunuʼukalüirua suluʼupünaa tü pienchisükat sücheʼe eʼitaanaka sünain süshekein tü aʼajüleekat süpüla sülüʼüjiraanajatüin. Tü aʼajüleekat müsü aka saaʼin wanee kojon maluʼuka jee aainjuushi shia süka taapüla.

8 Naainjakalaka süka cobre tü süpülajanakat wüin sümaa tü süsaʼakat. Naainjain shia süka narouyain na jieyuu aʼyataakana soʼuluʼu tü miichi aʼwaajüleekat.

9 Kapaatiaseka nutuma tü miichi aʼwaajüleekat. Pienchi shikii jaʼralimüin metro sajaʼapüin* uuchijeeruʼu sünain, kasepüsü shia nutuma kuluulu aainjuushika süka lino anaka maʼin sümaa suuttajuushin. 10 Naainjaka süka cobre piama shikii puntaat jee piama shikii süpülajanaka tü puntaatkat. Naainjain süka pülaata sajapuluʼujiaka tü puntaatkat jee müsia tü sücheʼekat. 11 Kasepüsia nutuma kuluulu palaajeeruʼu sünain tü paatiakat, pienchisü shikii jaʼralimüin metro sajaʼapüin. Naainjain süka cobre tü piamakat shikii puntaat jee tü piamakat shikii süpülajanaka tü puntaatkat jee müsia naainjain süka pülaata tü sajapuluʼujiakat sümaa sücheʼe tü puntaatkat. 12 Kasepüsü nutuma kuluulu wopujeeruʼu sünain tü paatiakat, piama shikii piamamüin metro seeruluin,* eejatü nutuma poloosü puntaat jee poloosü süpülajanaka tü puntaatkat. Naainjakalaka süka pülaata sajapuluʼujia tü puntaatkat jee müsia tü sücheʼekat. 13 Piamakalaka shikii piamamüin metro seeruluin tü paatia wüinpüjeeruʼukat, eepünaale niweetüin chi kaʼikai. 14 Aipirua metro shiatapünaamüin seeruluin* tü kuluulu süsepükat tü paatiakat wane saʼata tü soʼukot, eʼitaanüsü apünüinsü puntaat sünain otta apünüinsü süpülajana tü puntaatkat. 15 Akaataajaʼa wane saʼata tü soʼukot aipirua metro shiatapünaamüin seeruluin tü kuluulu süsepükat tü paatiakat, eʼitaanüsü apünüinsü puntaat sünain jee apünüinsü süpülajana tü puntaatkat. 16 Süpüshuaʼa tü kuluulu süsepükat tü paatiakat aainjuushi süka lino anaka maʼin sümaa suuttajuushin. 17 Aainjuushi süka cobre tü süpülajanakat tü puntaatkat, aainjuushi süka pülaata tü sajapuluʼujiakat sümaa tü sücheʼekat, ashulennüsü pülaata iipünaa sünain tü püntaatkat. Süpüshuaʼa tü puntaat süpülajatkat tü paatiakat kanainña müsü sücheʼe aainjuushi süka pülaata.

18 Tü kuluulu soʼulujunakat tü paatiakat aainjuushi süka jiirü wüittüsü, laana jepisiiyaa, jiirü ishotot maʼin otta lino anaka maʼin sümaa suuttajuushin. Mekietsat metro tü sajaʼapüinkat,* piama metro shiatapünaamüin shia iipünaamüin.* Wanaawasü tü sajaʼapüinkat iipünaamüin sümaa tü kuluulu süsepükat tü paatiakat. 19 Aainjuushi süka cobre tü pienchisükat puntaat jee müsia tü pienchisükat süpülajana tü puntaatkat. Tü sajapuluʼujiakat tü puntaatkat sümaa tü sücheʼekat aainjuushi süka pülaata jee müsia iipünaa sünain tü puntaatkat ashulennüsü pülaata. 20 Aainjuushi süka cobre süpüshuaʼa tü oʼojia sajapuluʼujiakat tü miichi aʼwaajüleekat jee müsia tü sajapuluʼujiakat süsepü tü paatiakat.

21 Anuu ashajünüin tü akumajünakalü aka tü miichi aʼwaajüleekat Maleiwa eʼitaanaka aluʼu tü kojon kaluʼukat tü Pütchi Nuluwataakalü anain Maleiwa. Nuluwataain Moisés na levitakana sünain ashajaa tia, nia jülüjaka aaʼin Itamar tü aʼyatawaa nekeraajakat na levitakana, nüchon nia Aarón chi sacerdotekai. 22 Naainjain Bezalel süpüshuaʼa tü aluwataanakalü anain Moisés nutuma Jehová. Bezalel nüchon Urí jee nülüin nia Hur, napüshi nia na nüikeyuukana Judá. 23 Eejachi nümaa Oholiab chi nüchonkai Ahisamac, napüshi nia na nüikeyuukana Dan. Kuʼyamai nia, atüjashi nia asonoo kuluulu jee eʼinaa süka jiirü wüittüsü, laana jepisiiyaa, jiirü ishotot maʼin jee lino anaka maʼin.

24 Süpüshuaʼa tü ooro akumajünakalü aka tü miichi aʼwaajüleekat wanaawasü shia sümaa tü ooro asülajünakat sümaa shiyuunannüin nümülatuʼu Maleiwa: 1.000 kilo ooro,* epesajünüsü shia wanaapünaa sümaa shipesajia wanee kasa suluʼu tü miichi aʼwaajüleekat. 25 Tü pülaata nantirakat na tooloyuu ayaawajünakana paala 3.440 kilo* pülaata, epesajünüsü shia wanaapünaa sümaa shipesajia wanee kasa suluʼu tü miichi aʼwaajüleekat. 26 Na tooloyuu piamainnakana shikii nouyase jee alataka nouyase suulia tia, na ayaawajünakana paala, antitshii waneʼewai nakua aipirua gramo* pülaata, epesajünüsü shia wanaapünaa sümaa shipesajia wanee kasa suluʼu tü miichi aʼwaajüleekat. 603.550 napüshuaʼa na tooloyuukana.

27 Tres mil cuatrocientos veinte kilo* pülaata ojojuushika süpüla saainjünüin süpülajana süsaʼa tü miichi aʼwaajüleekat jee müsia tü süpülajanakat süsaʼa eere shiʼitaanüin tü kuluulu sütaüjiakat tü miichikat. Poloo shikii süpülajana süsaʼa tü miichikat aainjünaka süka 3.420 kilo pülaata. Apünüin shikii pienchimüin kilo* shipesain waneʼewai sukua tü süpülajanakat süsaʼa. 28 Naainjakalaka süka piama shikii kilo* pülaata tü sajapuluʼujiainjatkat wanee kasa eʼitaanaka sünain süsaʼa tü miichikat, nushuleraka pülaata iipünaa sünain tü süsaʼakat, nüntireerakalaka shia.

29 Dos mil cuatrocientos veinte kilo* tü cobre asülajünakat. 30 Naainjakalaka süka tia tü süpülajanakat süsaʼa tü miichi aʼwaajüleekat yalaka soʼuluʼu, tü aʼajüleekat mürüt aainjünaka süka cobre, tü pariia aainjünaka süka cobre, süpüshuaʼa tü choʼujaakat sümüin tü aʼajüleekat mürüt, 31 tü süpülajanakat tü puntaat sünainkat süsepü tü paatiakat, tü süpülajanakat tü puntaat soʼulujunakat tü paatiakat, süpüshuaʼa tü oʼojia sajapuluʼujiakat tü miichi aʼwaajüleekat jee müsia süpüshuaʼa tü oʼojia sajapuluʼujiakat süsepü tü paatiakat.

39 Naainjakalaka kuluulu eʼinuushi anaka maʼin nasheʼinjatka na wayuu aʼyataainjanakana suluʼu tü miichi aʼwaajüleekat, naainjain shia süka jiirü wüittüsü, laana jepisiiyaa otta jiirü ishotot maʼin. Naainjainña tü kuluulu anakat maʼin nüsheʼinjatka Aarón, naainjain shia wanaapünaa sümaa tü aluwataanakalü anain Moisés nutuma Jehová.

2 Naainjakalaka Bezalel tü kuluulu kanüliakalü efod süka ooro, jiirü wüittüsü, laana jepisiiyaa, jiirü ishotot maʼin otta lino anaka maʼin sümaa suuttajuushin. 3 Nayasaʼa na aʼyataakana nümaa nachinüin süka mattiia saʼata ooro süpüla pasanuainjatüin shia, niyotookalaka shia Bezalel süpüla niʼinüinjatüin shia sümaa jiirü wüittüsü, laana jepisiiyaa, jiirü ishotot maʼin otta lino anaka maʼin. Nusonokoloko tü kuluulu kanüliakalü efod süka tia. 4 Piamakalaka süʼülia tü kuluutkat natuma süpüla süntiraainjatüin iipünaamüin nunutpünaa chi kasheʼinjachikai shia. 5 Tü kuluulu eʼinuushi niyatapünaainjatkat chi laülaashikai napüleerua na sacerdotekana ayapüjünüsü shia sünain tü kuluulu kanüliakalü efod, ayatakalaka shia eere shiʼitaanüin. Aainjünüsü shia süka tü aainjünakalü aka tü kanüliakalü efod, aainjünüsü süka ooro, jiirü wüittüsü, laana jepisiiyaa, jiirü ishotot maʼin jee müsia süka lino anaka maʼin sümaa suuttajuushin. Aainjünüsü shia wanaapünaa maʼin sümaa tü aluwataanakalü anain Moisés nutuma Jehová.

6 Neitaakalaka tü piamasükalü ipachen kanüliaka ónice suluʼu tü süta aainjuushikat süka ooro jee nashoʼojaka sünain nanülia na nüchonniikana Israel. Müsü sukuwaʼipa natuma maʼaka sukuwaʼipa shipekia wanee kasa. 7 Niʼitaakalaka Bezalel tü piamasükalü ipachein sunuloʼu tü kuluulu kanüliakalü efod süpüla sotuinjachin Maleiwa naaʼin na nüchonniikana Israel. Naainjain tia wanaapünaa sümaa tü aluwataanakalü anain Moisés nutuma Jehová. 8 Naainjakalaka mapa tü naaʼintoʼupünaainjatkat chi laülaashikai napüleerua na sacerdotekana, müsü saainjia tia kuluutkat maʼaka saainjia tü kuluulu kanüliakalü efod, asonuushi shia süka ooro, jiirü wüittüsü, laana jepisiiyaa, jiirü ishotot maʼin jee süka lino anaka maʼin sümaa suuttajuushin. 9 Pienchisü shiʼichi tia kuluutkat süshataanapa, piama shikii piamamüin centímetro* sajaʼapüin jee piama shikii piamamüin centímetro seeruluin. 10 Pienchisü shiʼipa tü ipa eʼitaanakat sünain tü naaʼintoʼupünaainjatkat chi laülaashikai napüleerua na sacerdotekana suluʼu pachiiruaain shia. Sünain tü palajatkat shiʼipa eʼitaanüsü tü ipa kanüliakat rubí, topacio jee müsia esmeralda. 11 Sünain tü wane shiʼipakat eʼitaanüsü tü ipa kanüliakat turquesa, zafiro jee müsia jaspe. 12 Sünain tü apünüinkat shiʼipa eʼitaanüsü tü ipa kanüliakat léshem,* ágata jee müsia amatista. 13 Sünain tü chiiruaajatkat shiʼipa eʼitaanüsü tü ipa kanüliakat crisólito, ónice jee müsia jade. Aainjünüsü süka ooro süta süpüshuaʼa tia ipacheinkat. 14 Eʼitaanüsü sünain tü ipacheinkat nanülia na polooshiikana piamamüin nüchonnii Israel. Tia nanüliakat shiyaawasesü tü poloosükat piamamüin neʼiruku na israelitakana. Oshoʼojunüsü nanülia sünain tü ipacheinkat maʼaka saaʼin shipekia wanee kasa.

15 Nouttajaka jiirü süpüla tü naaʼintoʼupünaainjatkat chi laülaashikai napüleerua na sacerdotekana, naainjain shia süka ooro anaka maʼin. 16 Naainjakalaka süka ooro tü piamasükat süta tü ipacheinkat otta tü piamasükat süttiija, neʼitaakalaka tü piamasükat süttiija sünain tü piamasükat sücheʼe tü kuluutkat. 17 Nalatiraka tü piamasükat jiirü aainjuushika süka ooro suluʼupünaa tü piamasükat süttiija eʼitaanaka sünain tü piamasükat sücheʼe tü kuluutkat. 18 Süchikijee tia, nalatirüin tü piamasükat jiirü suluʼupünaa soʼu tü piamasükat süta tü ipacheinkat jee neʼitaain shia sunuloʼu tü kuluulu kanüliakalü efod, tü yalakat süpüleeruajee. 19 Naainjainña piamasü süttiija süka ooro, neʼitaakalaka shia sünain tü piamasükat sücheʼe tü kuluulu naaʼintoʼupünaainjatkat chi laülaashikai napüleerua na sacerdotekana, tü yalakat süsapoʼujee wanaa maʼin sümaa tü kuluulu kanüliakalü efod yalaka sutuʼujee. 20 Naainjainña piamasü süttiija süka ooro, neitaakalaka shia süpüleeruajee tü kuluulu kanüliakalü efod wanaa maʼin sümaa tü kuluulu piamakalü aaʼulia antiraka nunutpünaa chi laülaashikai napüleerua na sacerdotekana, süʼütpaʼasü eere kaülajain tü kuluulu kanüliakalü efod iipünaa sünain tü kuluulu niyatapünaainjatkat chi laülaashikai napüleerua na sacerdotekana. 21 Kaülajaka süka jiirü wüittüsü tü süttiija sünainkat tü naaʼintoʼupünaainjatkat chi laülaashikai napüleerua na sacerdotekana sümaa tü süttiija sünainkat tü kuluulu kanüliakalü efod. Müsü sukuwaʼipa suulia sujutuuin jee süpüla ayatüinjatüin saaʼu tü kuluulu kanüliakalü efod, iipünaasü shia sünain tü kuluulu eʼinuushi niyatapünaainjatkat. Aainjünüsü tia wanaapünaa sümaa tü aluwataanakalü anain Moisés nutuma Jehová.

22 Naainjakalaka Bezalel süka jiirü wüittüsü tü kuluulu matünasat sutujeeka tü kuluulu kanüliakalü efod, eʼinuushi shia nutuma wanee wayuu. 23 Eʼitaanüsü tü soʼukot wanaa maʼin sümaa shiyatapünaa tü kuluulu matünasatkat, maʼaka saaʼin soʼu tü kachueera naaʼintoʼupünaakat wanee surulaat. Eʼinünüsü shia sotpünaa suulia sütsajaain. 24 Eʼinünüsü sotpünaa tia kuluutkat süka jiirü wüittüsü shiyaakua süchon wunuʼu kanüliaka granada, outtajuushi shia sümaa laana jepisiiyaa otta jiirü ishotot maʼin. 25 Naainjaka süka ooro shiyaakua campanachon, neʼitaakalaka shia sünain sot tü kuluulu matünasatkat saʼakapünaa shiyaakua süchon tü wunuʼu kanüliakat granada. Pasanainwaisü shiyaakua tü campanachonkat saʼaka shiyaakua süchon tü wunuʼu kanüliakat granada. 26 Eʼitaanüsü shiyaakua wanee campanachon jee süchikijee eʼitaanüsü shiyaakua süchon tü wunuʼu kanüliakat granada, pachikuatüsü shia atumawaa. Müsü sukuwaʼipa süpüshuaʼa sot tü kuluulu matünasat nasheʼinjatkat na sacerdotekana. Aainjünüsü tia wanaapünaa sümaa tü aluwataanakalü anain Moisés nutuma Jehová.

27 Naainjainña kuluulu süka lino anaka maʼin, eʼinuushi shia nutuma wanee wayuu, nüsheʼinjatü shia Aarón namaa na nüchonniikana. 28 Naainjainña süka lino anaka maʼin tü ekiaalaja anakat maʼin otta tü nekiaalainjatkat na nüchonniikana Aarón. Naainjain tü naicheinjatkat süka lino anaka maʼin sümaa suuttajuushin 29 otta naainjain wanee kuluulu eʼinuushi nayatapünaainjatka süka lino anaka maʼin sümaa suuttajuushin, jiirü wüittüsü, laana jepisiiyaa otta jiirü ishotot maʼin. Aainjünüsü shia wanaapünaa maʼin sümaa tü aluwataanakalü anain Moisés nutuma Jehová.

30 Naainjakalaka mapa wanee saʼata ooro anaka maʼin sümaa chinatüin maʼin shia,* nashoʼojüin shia maʼaka süshoʼojünüin shipekia wanee kasa, anuu tü pütchi neʼitaakat sünain: «Nia Jehová chi wulekai maʼin akuwaʼipa». 31 Nejittaakalaka sünain wanee jiirü wüittüsü süpüla shiʼitaanajatüin sünain tü ekiaalajakat. Aainjünüsü shia wanaapünaa sümaa tü nuluwataakalü anain Jehová nükajee Moisés.

32 Kettaakalaka natuma süpüshuaʼa tü miichi aʼwaajüleekat jee süpüshuaʼa tü kasa eeinjatkat sünain. Naainjain na israelitakana tü nuluwataakalü anain naya Jehová nükajee Moisés, naaʼinrüin wanaapünaa maʼin sümaa tü nümakat.

33 Shiʼikajaanaka nümüin Moisés tü kasairua süpülajatkat süshaʼwaleʼennüin tü miichi aʼwaajüleekat, eʼikajaanüsü tü kuluulu saajünüinjatkat otta tü kasa eeinjatkat sünain: tü sajapuluʼujiakat kuluulu, tü taapüla süsepüinjatkat tü miichikat, tü wunuʼu sajapuluʼujiainjatkat tü taapülakat, tü süsaʼakat otta tü süpülajanakat süsaʼa; 34 tü saajünainjatkat tü miichikat aainjuushika süka anneeruuta atinjuushika suluʼu ishoin shia, tü saajünaa aainjuushikat süka süta tü wüchii kanüliakat foca otta tü kuluulu sütaujiainjatkat tü miichikat; 35 tü kojon kaluʼukat tü Pütchi Nuluwataakalü Anain Maleiwa sümaa tü wunuʼu sülüʼüjiainjatkat otta tü shiʼrousekat; 36 tü meesakat sümaa tü saaʼuinjatkat tü meesakat otta tü pan aapünajatkat nümüin Maleiwa; 37 tü ranpara aainjuushikat süka ooro anaka maʼin, tü iitachein süpülajatkat tü mechuuria eʼitaanakat suluʼu pachiiruaain shia, süpüshuaʼa tü kasa choʼujaajeetkat sümüin otta tü seita süpülajatkat chuwatüin tü mechuuriakat; 38 tü aʼajülee süpülajatkalü aʼajia wunuʼu jemetaka eejuu aainjuushika süka ooro, tü seita oʼyotunakat naaʼu wanee wayuu eekai nüneekünüin, tü seita süpülajatkat tü wunuʼu aʼajünajatkat jemetaka eejuu otta tü kuluulu soʼulujünainjatkat tü miichi aʼwaajüleekat; 39 tü aʼajüleekat mürüt aainjuushika süka cobre sümaa tü pariia aainjuushikat süka cobre, tü wunuʼu sülüʼüjiainjatkat sümaa süpüshuaʼa tü choʼujaakat sümüin tü aʼajüleekat mürüt, tü süpülajanakat wüin sümaa tü süsaʼakat; 40 tü kuluulu süsepüinjatkat tü paatiakat sümaa tü puntaatkat jee tü süpülajanakat tü puntaatkat, tü kuluulu soʼulujünainjatkat tü paatiakat, tü jiikü ajapuluʼujiainjatkat shia, tü oʼojia sajapuluʼujiainjatkat süsepü tü paatiakat otta süpüshuaʼa tü choʼujaajeetkat sümüin tü aʼyatawaa aainjünüinjatkat suluʼu tü miichi aʼwaajüleekat; 41 tü kuluulu eʼinuushikat süpülajatka tü aʼyatawaa aainjünüinjatkat suluʼu tü miichi aʼwaajüleekat, tü kuluulu anakat maʼin nüsheʼinjatka Aarón chi sacerdotekai otta tü kuluulu nasheʼinjatkat na nüchonniikana süpüla sacerdotein naya.

42 Naainjain na israelitakana süpüshuaʼa tü aʼyatawaakat, naainjain shia wanaapünaa sümaa tü nuluwataakalü anain Jehová nükajee Moisés. 43 Nünaʼlapa Moisés tü naʼyataainkat niʼrüin naainjain shia wanaapünaa sümaa tü nuluwataakalü anain Jehová. Nuchuntakalaka Moisés anaa napüleerua.

40 Anuukalaka nünüiki Jehová nümüin Moisés: 2 «Soʼu tü palajatkat kaʼi, noʼu chi palajachikai kashi, pushaʼwaleereerü tü miichi aʼwaajüleekat. 3 Piʼitaajeetka suluʼu tü miichikat tü kojon kaluʼukat tü Pütchi Taluwataakalü Anain jee piʼitaajeerü sümaaluʼu tü kuluulu sütaüjiakat tü kuattakat. 4 Piʼitaajeeria suluʼu tü miichi aʼwaajüleekat tü meesakat sümaa tü saaʼuinjatkat tü meesakat, piʼitaajeerü tü ranparakat jee puchuwajaajeerü tü mechuuria eekat sünain tü ranparakat. 5 Piʼitaajeerü tü aʼajüleekat wunuʼu jemetaka eejuu aainjuushika süka ooro süpüleeruajee tü kojon kaluʼukat tü Pütchi Taluwataakalü Anain jee piʼitaajeerü tü kuluulu soʼulujünainjatkat tü miichi aʼwaajüleekat.

6 »Piʼitaainjatü shiʼipoʼujee tü miichi aʼwaajüleekat tü aʼajüleekat mürüt, shiʼipoʼujeeinjatü shia tü soʼukot. 7 Pasanainjeerü putuma tü süpülajanakat wüin sünain tü aʼajüleekat mürüt jee tü miichi aʼwaajüleekat, piratüinjatü shia wüin. 8 Piʼitaajeerü süsepü süpaatiase tü miichi aʼwaajüleekat otta tü kuluulu soʼulujunainjatkat tü paatiakat. 9 Pushulereerü tü seita oʼyotunakat naaʼu wanee wayuu eekai nüneekünüin sünain tü miichi aʼwaajüleekat jee saaʼu süpüshuaʼa tü kasa eekat suluʼu, pükataleetkalaka shia tamüin. 10 Pushulereeria tü seita oʼyotunakat naaʼu wanee wayuu eekai nüneekünüin saaʼu tü aʼajüleekat mürüt jee saaʼu süpüshuaʼa tü korolo eekat sünain, pükataleetka shia süpüla taʼwaajünüinjachin. 11 Müinjatia putuma tü süpülajanakat wüin jee tü süsaʼakat, pushulerüinjatü saaʼu tü seita oʼyotunakat naaʼu wanee wayuu eekai nüneekünüin, pükataleetkalaka shia tamüin.

12 »Pürütkeʼereechika Aarón namaa na nüchonniikana soʼuluʼumüin tü miichi aʼwaajüleekat, puluwataajeenaka naya sünain oʼoojoo. 13 Paʼatüinjatü nünain Aarón tü kuluulu anakat maʼin, pushulereerü naaʼu tü seita oʼyotunakat naaʼu wanee wayuu eekai nüneekünüin, pükataleechi nia süpüla niʼyataain tamüin, sacerdotechikalaka nia tamüin. 14 Pürütkeʼereena na nüchonniikana, paʼateetkalaka nanain tü kuluulu nasheʼinjatkat. 15 Pushulereerü seita naaʼu nayakana maʼaka pushulerüin seita naaʼu chi nashikai süpüla sacerdoteinjanain naya tamüin. Shia paaʼinrajatka tia süpüla sacerdoteinjanain naya jee sacerdoteinjanain na naikeyuukana süpüla kaʼika süpüshuaʼa».

16 Naaʼinrakalaka Moisés süpüshuaʼa tü nuluwataakalü anain Jehová, naaʼinrüin shia wanaapünaa sümaa tü nümakat.

17 Ashaʼwaleʼennüsü tü miichi aʼwaajüleekat soʼu tü palajatkat kaʼi, noʼu chi palajachikai kashi jee soʼu tü piamakat juya.* 18 Nushaʼwaleerapa Moisés tü miichi aʼwaajüleekat Maleiwa, niʼitaain süpülajana tü taapülakat otta niʼitaaka saaʼu tü taapüla süsepüinjatkat tü miichikat. Nuuʼuttaka tü wunuʼu sajapuluʼujiainjatkat tü taapülakat, nüshaʼwaleʼeraka süsaʼa tü miichikat. 19 Nüwayatkalaka Moisés tü saajunainjatkat tü miichi aʼwaajüleekat Maleiwa otta nüwayalüin saaʼu tü kuluulu aainjuushikat süka süta mürüʼlü maʼaka nuluwataanüin nutuma Jehová.

20 Naapaakalaka Moisés mapa tü piamasükalü ipa kanainka tü Pütchi Nuluwataakalü Anain Maleiwa, nünaajaakalaka shia suluʼu tü Kojonkot. Nuuʼuttakalaka suluʼu sücheʼe tü Kojonkot tü wunuʼu sülüʼüjiainjatkat, niʼitaakalaka tü shiʼrousekat. 21 Niʼitaakalaka Moisés tü Kojonkot suluʼu tü miichi aʼwaajüleekat, niʼitaainña tü kuluulu sütaüjiainjatkat tü kuattakat eeinjatüle shia, nnojotkalaka jaʼyain tü kojon kaluʼukat tü Pütchi Nuluwataakalü Anain Maleiwa maʼaka nuluwataain shia Jehová.

22 Niʼitaakalaka Moisés tü meesakat palaajeeruʼu suluʼu tü miichi aʼwaajüleekat wanee saʼata tü kuluulu sütaüjiakat tü Kuatta Wulekat Maʼin. 23 Niʼitaakalaka saaʼu tü meesakat tü pan aapünajatkat nümüin Jehová, naaʼinrüin shia Moisés maʼaka nuluwataain nia Jehová.

24 Niʼitaaka tü ranparakat uuchijeeruʼu suluʼu tü miichi aʼwaajüleekat, shiʼipoʼujee tü meesakat. 25 Nuchuwajaaka tü mechuuria sünainkat tü ranparakat nümülatuʼuka Jehová, naaʼinrüin shia Moisés maʼaka nuluwataain nia Jehová.

26 Niʼitaakalaka suluʼu tü miichi aʼwaajüleekat tü aʼajiakat wunuʼu aainjuushika süka ooro, niʼitaain shia shiʼipoʼujee tü kuluulu sütaüjiakat tü kuattakat 27 süpülajatü saʼajünüin tü wunuʼu jemetakalü eejuu, naaʼinrüin shia Moisés maʼaka nuluwataain nia Jehová.

28 Niʼitaakalaka tü kuluulu soʼulujunainjatkat tü miichi aʼwaajüleekat.

29 Niʼitaainña tü aʼajüleekat mürüt shiʼipoʼujee soʼu tü miichi aʼwaajüleekat süpülajatü saʼajünüin mürüt saaʼu otta saʼajünüin tü eküülü asülajünakat, naaʼinrüin shia Moisés maʼaka nuluwataain nia Jehová.

30 Pasanainka nutuma tü süpülajanakat wüin sünain tü aʼajüleekat mürüt jee tü miichi aʼwaajüleekat, piratakalaka wüin shia nutuma süpüla noʼlojooin najapü jee nooʼui na sacerdotekana. 31 Nuʼlojookalaka Moisés, Aarón jee na nüchonniikana Aarón najapü sümaa nooʼui süka tia wüinkat. 32 Noʼlojoʼowaliin najapü jee nooʼui nekerotuinjanapa suluʼu tü miichi aʼwaajüleekat jee narütkaapa süʼütpaʼamüin tü aʼajüleekat mürüt. Naaʼinrüin shia Moisés maʼaka nuluwataain nia Jehová.

33 Niʼitaakalaka mapa süsepü tü süpaatiasekat tü miichi aʼwaajüleekat sümaa tü aʼajüleekat mürüt, niʼitaainña tü kuluulu soʼulujunainjatkat tü paatiakat.

Kettaakalaka nutuma Moisés tü niʼyataakalü anain. 34 Süshakatakalaka wanee siruma saaʼu tü miichi aʼwaajüleekat, warattuuisüjeseʼe suluʼu tü miichikat süka eejachin Jehová. 35 Nnojoikalaka süpüla nikerotüin Moisés suluʼu tü miichi aʼwaajüleekat süka yalajatüin tü sirumakat saaʼu, warattuuisü maʼin suluʼu tü miichikat nutuma Jehová.

36 Eepünaale nooʼonoʼopünaain na israelitakana natsajüin tü loona nepiayaasükat shiyaleraapa tü sirumakat saaʼujee tü miichi aʼwaajüleekat. 37 Ayatüleʼeya tü sirumakat saaʼu tü miichi aʼwaajüleekat nnojotsü natsajüin na israelitakana tü nepiayaasükat, waneʼereeya shiyaleraapa tü sirumakat saaʼujee tü miichi aʼwaajüleekat. 38 Eepünaale nooʼonoʼowalin na israelitakana, neʼrüin soʼukaiwai tü siruma nümaʼanajeejatkat Jehová saaʼu tü miichi aʼwaajüleekat jee müsia saʼwai neʼrüin chuwatüin wanee sikoʼu süraloʼu.