Nuʼwayuuse Isaac

¿PIʼRAAJÜIN tü jierü suluʼukat tü ayaakuaakat? Rebeca sünülia. Chi wayuu suʼunakai anainmüin Isaac nünülia, nuʼwayuuseinjatü shia. ¿Jamakuwaʼipat tia?

Nücheküin Abraham nuʼwayuusein chi nüchonkai wanee jierü eeka sunoujuin nünain Maleiwa, nnojotsü nücheküin na jieyuu kepiakana Canaán süka kamaleiwaseyaain naya. Makalaka nümüin Abraham nümüin wanee aʼyataai nümüin: ‹Puʼuna eemüin na tapüshikana Haránmüin süpüla püchajaain wanee jierü nuʼwayuuseinjatü chi tachonkai Isaac›.

Nuʼunaka chi aʼyataaikai nümüin Abraham sümaa 10 kameeya. Pejepa nia, nüntapünaaka eemüin wanee ishi. Motsoshi chi Kaʼikai otta na jieyuu kepiakana suluʼu tia mmakat antüshii sünain ajaʼitaa wüin suluʼujee tü ishikat. Nümaka chi wayuukai nümüin Jeʼwaa: ‹Tü jierü aapüinjatkat wüin tasüin otta namüin na kameeyakana shiainjatü tü püneekakat süpüla nuʼwayuusein Isaac›.

Süntaka Rebeca sünain ajaʼitaa. Nuchuntaka wüin sümüin, süsiʼraka nia. Mapa süsiʼraka wüin na kameeyakana. Aʼyataasü maʼin shia süka miyoʼuin wüin nasüin na kameeyakana.

Kettaapa shia sutuma, nüsakiraka shia sünain nünülia chi süshikai otta müleka eere süpüla nutunkuin nepialuʼu. Sümaka nümüin: ‹Chi tashikai nia Betuel otta eeshi süpüla putuinkuin wepialuʼu›. Chi aʼyataaikai nümüin Abraham nütüjaa aaʼuchi Betuel nüchoin nia Nacor chi nuwalakai Abraham. Makalaka nüsapainkain nia otta naapüin tü analuʼutkat nümüin Maleiwa sükajee nüntirüin nia eemüin nüpüshi Abraham.

Soʼu aikat tia chi aʼyataaikai nümüin Abraham nüküjüin nümüin Betuel otta Labán chi suwalakai Rebeca tü nüntakat apüla. Makalaka najütüin Rebeca süpüla kasaalüin shia nümaa Isaac. ¿Jamüsü sünüiki Rebeca süsakinnapa? Aa müsü. Waneemüin kaʼi süchikijee tia noʼunaka Canaánmüin.

Antüshii naya aipaʼa, shiʼraka Rebeca wanee wayuu warai müshi, nia Isaac. Mojuyülia naaʼin süka ouktuin tü niikat. Wanaa sümaa niʼrüin Rebeca talatüshi maʼin. Mapa aisü maʼin nüpüla Rebeca, talatüichipa nia nüchikuaʼa.