¡Talata pia waneepia sümaa katüin poʼu saaʼu tü Mmakat!
Ashajünüsü karalouktakat tüü, süpüla pütüjaain saaʼu jaralin kakumalain tü Mmakat otta süpüshuaʼa tü kasa eekat saaʼu. Pütüjaajeerü aaʼu nünülia chi Maleiwa kakumalakai tü Mmakat. Otta müsia, aküjüneerü pümüin jamüin nukumajaka Maleiwa na wayuukana otta tü paainjüinjatkat süpüla talatüin pia waneepia sümaa katüin poʼu saaʼu tü Mmakat.
Pütüjaajeerü aaʼu tia sutuma tü ayaakuaakalüirua otta paashajeʼerüle tü pütchi suluʼujeejatkattü Wiwüliakat ashajünaka süʼütpaʼa tü ayaakuaakalüirua. Müle shia putuma, paashajeʼereerü süpüshi tü kasa anasü nüküjakat Maleiwa suluʼu tü Wiwüliakat otta tü paainjüinjatkat süpüla naapüin shia pümüin.
Eeshii pükaaliinjeere na waneeinua süka karalouktakat tüü. Kachonle pia, eeshii süpüla pikirajüin naya süka süpüla neʼraajüin Maleiwa. Kepiale pia suluʼu wanee mma eere wainmain wayuu miyoʼuyuu sümaa matüjüin naya aashajeʼeraa karaloukta, pikiraja naya süka tü ayaakuaakalüirua süpüla natüjaain saaʼu tü naainjüinjatkat Maleiwa. Otta mapa nekirajeena na kepiakana naʼütpaʼa.
Kasataalejese naapüin Jeowa wainma kasa anasü pümüin sutuma pikirajaain sünain karalouktakat tüü otta süpüla püküjüin namüin na waneeinua tü naainjüinjatkat süpüla katüin noʼu waneepia saaʼu tü Mmakat.