¿Paapüirü nüchiki Jesucristo?

1. ¿Jamakuwaʼipai Jesuu?

Naata nukuwaʼipa Jesuu suulia wayuu. Chajachi nia sirumatuʼu süpülapünaa wayuuin nia saaʼu tü Mmakat (Juan 8:23). Nukumajala Jeʼwaa palajana otta nükaaliinjüin Jeʼwaa sünain akumajaa tü kasakalüirua. Nia chi «waneeshikai» Nüchon Maleiwa saashin tü Wiwüliakat (Juan 1:14). Pütchipüʼüshi nia nutuma chi Nüshikai, «Pütchi» nümünaka. Püleeja Proverbios 8:22, 23, 30 otta Colosas 1:15, 16.

2. ¿Jamüshi nuluwataanaka Jesuu Mmapaʼamüin?

Nuluwataain Maleiwa chi Nüchonkai Mmapaʼamüin. Nülateʼerüin nia suluʼumüin süchonla wanee wayuu majayülü, Mariia sünülia. Nnojoishi kashin wayuu Jesuu (Lucas 1:30-35). Antüshi nia Mmapaʼamüin süpüla naaʼinrüin apünüinsü kasa: 1) süpüla nikirajüin tü shiimainkat nüchiki Maleiwa, 2) süpüla washatüin nukuwaʼipa sünain aaʼinraa tü nüchekakat Maleiwa, jaʼitainna müliain waya otta 3) süpüla taashinjanain waya suulia waainjala saaʼu ouktüin nia waaʼu. Püleeja Mateo 20:28.

3. ¿Jamüshii taashinjanaka waya?

Ouktüshi Jesuu waaʼu süpüla taashinjanain waya suulia ouktaa (Éxodo 21:29, 30). Nnojotsü aleinjatüin nutuma Maleiwa laülaain jee ouktüin waya. Watüjaa aaʼu tüü sükajee tü nüküjakat nümüin Adán, ouktajachin nia naashin müleka nnojoire noonooin sümaa nünüiki. Nnojoishiijeʼe ouktüin waya nnojoire kaainjalain Adán (Génesis 2:16, 17; 5:5). Kaainjalashii waya saashin tü Wiwüliakat jee ouktüshii waya nünainjee Adán. Makalaka taashinjanain waya suulia ouktaa. Püleeja Roma 5:12 otta 6:23, TNM.

¿Jarai chi wayuu taashinjachikai atuma waya suulia tü ouktaakat? Ouktapa waya, wawalaajüin tü waainjalakat. Nnojoishi süpüla ouktajachin wanee wayuu saaʼu waainjala süka kaainjaralin nia. Püleeja Salmo 49:7-9.

4. ¿Jamüshi ouktaka Jesuu?

Naata nukuwaʼipa Jesuu woulia, loto akuwaʼipachi sümaa maainjalain nia. Nnojoishi ouktüin nia saaʼu naainjala, ouktüshi saaʼu waainjala. Aishii maʼin waya nüpüla Maleiwa süka nuuʼulaain ouktüin chi Nüchonkai waaʼu. Aishii maʼin waya nüpüla Jesuu süka jüüjüüin nia nümüin chi Nüshikai otta naapajiraain nikii süpüla taashin waya suulia kaainjalaa jee ouktaa. Püleeja Roma 5:8 otta Roma 5:18, 19.

Pünaja tü videokot ¿Jamüshi ouktaka Jesuu?

5. ¿Kasa naaʼinraka Jesuu maaʼulu?

Niiyajüin Jesuu na ayuuishiikana, nüsoʼireʼerüin naaʼin na ouktüshiikana otta nükaaliinjüin na müliakana aaʼin wanaa sümaa yaajachin nia saaʼu tü Mmakat. Naaʼinrajatü tia mapeena napüleerua na aʼyataashiikana nümüin Maleiwa (Mateo 15:30, 31; Juan 5:28). Süchikijee ouktüin Jesuu, asoʼireʼennüsü naaʼin nutuma Maleiwa süpüla chainjachin nia sirumatuʼumüin (Éfeso 1:19, 20). Mapa, aʼatapajüshi nia nikialuʼujee chi Nüshikai süpüla Nuluwataainjachin saaʼu tü Mmakat (Hebreokana 10:12, 13). Aluwataashi nia maaʼulu chaa sirumatuʼu otta aküjüshii na nikirajüinkana süchiki tia pütchi anasükat sainküin tü mmakat. Püleeja Daniel 7:13, 14 otta Mateo 24:14.

Süka nuluwataain nutuma Maleiwa, alüʼütsü süpüla najaʼttirüin tü mojulaasükalüirua otta tü kasa müliakalü atuma wayuu. Paʼaraiisüpa tü mmakat, kateena oʼu waneepia napüshuaʼa na anoujakana nünain Jesuu otta na jaa makana nümüin. Püleeja Salmo 37:9-11.