EKIRAJAAYA 10
¿Jarat tü iküleesia shiimainkat?
1. ¿Waneesia neʼe tü iküleesia shiimainkat?
‹Jalia jia noulia na nünüikimaajanayaakana Maleiwa.› (MATEO 7:15)
Aa, shia tü nikirajakalü aluʼu Jesuu namaa na nikirajüinkana. Naashin Jesuu, müsü aka saaʼin wanee wopu sünainmüinka tü kataakalü oʼu waneepia otta palitchon na wayuu oʼunakana suluʼu (Mateo 7:13, 14). Shia neʼe nüchekaka Maleiwa tü iküleesia ekirajakat tü shiimainkat. Wanaawasü nanoula na aʼwaajakana Maleiwa süka tü shiimainkat. Püleeja Juan 4:23, 24; 14:6 otta Éfeso 4:4, 5.
Pünaja tü videokot ¿Anasüche nümüin Maleiwa süpüshuaʼa tü iküleesiakalüirua?
2. ¿Jamüsü nünüiki Jesuu nachiki na anoujayaakana?
Neʼraajüin Maleiwa naashin; akatsaʼa nnojoluin naaʼinrüin tü nüchekakat (TITO 1:16)
Naashin Jesuu, eejeena wayuu amojujaka nanoula na anoujüshiikana, anoujüshii naya naashin. Mayaapejeʼe nekirajüin tü shiimainkat naashin, ekirajüshii alawaa. Wayaawateerü aaʼu jaralüin tü iküleesia shiimainkat jülüjüle waaʼin nakuwaʼipa na anoujüshii shiimainshiikana. Püleeja Mateo 7:13-23.
3. ¿Jaralii na suluʼukana tü iküleesia shiimainkat?
Wekirajaa sünain jaʼraisü kasa naaʼinraka:
Kojutsü namüin tü Wiwüliakat. Naaʼinrüin maʼin tü sümakat tü Wiwüliakat suulialeʼeya sünüiki wayuu (Mateo 15:7-9). Naaʼinrüin tü nekirajakalü anain. Püleeja Juan 17:17 otta 2 Timoteo 3:16, 17.
Kojutsü namüin tü nünüliakat Jeʼwaa. Niʼraajirüin Jesuu nünülia chi Nüshikai. Nikirajüin na wayuukana nüchiki Jeʼwaa otta nikirajüin naya sünain oʼuraajaa süpüla wuleinjatüin tü nünüliakat (Mateo 6:9, TNM). ¿Jaralii na anoujüshii eʼraajirakana nünülia Maleiwa? Püleeja Juan 17:26, TNM otta Roma 10:13, 14, TNM.
Aküjüshii pütchi süchiki Nuluwataaya Maleiwa. Ajütünüshi Jesuu Mmapaʼamüin süpüla nüküjüin tü pütchi anasükat süchiki Nuluwataaya Maleiwa, anoukteʼerajatka sukuwaʼipa wayuu. Ayatüsü naainjüin tia ouktaleepa nia (Lucas 4:43; 8:1; 23:42, 43). Naashin Jesuu, aküjüinjana pütchi na nikirajüinkana süchiki Nuluwataaya Maleiwa. Naashajaale pümaa wanee wayuu süchiki Nuluwataaya Maleiwa, ¿jarat tü iküleesia kaluʼuka nia saaʼin pümüin? Püleeja Mateo 24:14.
Nnojoishii wanaawain namaa na manoujüinsaliikana. Nnojoishii sünainpünaain poliitika otta tü kasa sütkaakalü achiirua wayuu na nikirajüinkana Jesuu (Juan 17:16; 18:36). Nnojotsü naaʼinrüin tü kasa naaʼinrakat na manoujüinsaliikana otta nnojotsü nashatüin nakuwaʼipa. Püleeja Santiago 4:4.
Jaʼyasü naaʼu aijiraain naya. Shikirajüin naya tü Wiwüliakat süpüla kojutüinjatüin wayuu namüin, jaʼitairü naatain shiʼiruku. Na suluʼukana tü iküleesia nnojotkat shiimain sünainpünaashii atkawaa, akanasaʼa na anoujüshii shiimainshiikana, nnojotsü naaʼinrüin tia (Miqueas 4:1-3). Tü naainjakat, shia nakatalüin kaʼi süpüla natütüleʼerüin saaʼin wayuu otta nasülajüin nneerü süpüla nakaaliinjüin naya. Püleeja Juan 13:34, 35 otta 1 Juan 4:20.
4. ¿Pütüjaa aaʼu jaralüin tü iküleesia shiimainkat?
¿Jaralii na ekirajakana tü sümakat tü Wiwüliakat? ¿Na kojutkana amüin nünülia Maleiwa otta na aküjakana pütchi süchiki Nuluwataaya? ¿Jarat tü iküleesia kaluʼukat na wayuu aijiraakana maʼin otta na nnojoliikana sünainpünaain atkawaa? Püleeja 1 Juan 3:10-12.