Aaʼuriiroʼu

Alatawaisü wamüin kasa mojusü. Eesüjaʼa aire wamüin wanee kasa naaʼinraka wamüin wanee wawala (Sant. 3:2). Eeshiijaʼa nemeeʼerainpalale waya na koleejiajiraakana wamaa jee nayale na aʼyataajiraakana wamaa (1 Ped. 4:3, 4). Eeshijaʼa niale wanee wapüshi ooʼuleʼereeka waya suulia woutkajaain jee suulia waashajaain sümaa wayuu süchiki tü wanoujakalü anain (Mat. 10:35, 36). Eeshiijaʼa wooʼulaweerü suulia anoujaa sünainjee müliain waya. Jaʼitasü kasain alatüin wamüin, kekiijeena maʼin waya nutuma Jeʼwaa jee wachechereerü waaʼin soʼunnaa tü alatakat wamüin. Nüshajirüin Jeʼwaa suluʼu tü Wiwüliakat nachiki wayuu namaiwajana alatakana amüin kasa mojusü, nüshajirüin tia süpüla watüjain nanainjee. Nüshajüin tia Pablo nükajee chi naaʼinkai Maleiwa. Waashajeʼerüle nachiki naya wayuukana, atütülaajeerü waaʼin otta watüjaajeerü aaʼu weʼreenain kasa anasü. Nnojotpejeʼe waashajeʼerüinjatüin neʼe tü Wiwüliakat, wanoutajatü tü jülüjakat waaʼin otta sütanalüinjatü waaʼin. w21.03 14 püt. 1, 2

¿Jülüjasüche waaʼin yapain na wayuu waküjakana amüin pütchi süpüla anoujaa? Eejeerü apünüinsü kasa sünainjee tia. Maʼaka sükotchojünamaatüin süchon wanee aʼttiee süpülapünaa sülatüin sükalia, aküjeena maʼin waya pütchi sümaa jülüjain waaʼin sülüʼülüin nükalia Maleiwa. Tü wane shia talateerüin maʼin waaʼin süka waaʼinmaain tü aküjaakat pütchi. Saashin tü Wiwüliakat, talatüsü maʼin naaʼin na wayuukana wanaa sümaa sükotchojünüin süchon tü aʼttieekat (Is. 9:3). Tü chiiruaajatkat kasa shia jülüjeerüin waaʼin wawalayuujeenain naya otta wachajaajeerüin sukuwaʼipa süpüla waküjain pütchi namüin wanaapünaa sümaa tü kamalainkat namüin. «Mepisalii naya», eeshiijaʼa namüle na nikirajüinkana Jesuu nachiki na wayuu samariajeʼewaliikana. Nnojotpejeʼe müin tü jülüjakat naaʼin Jesuu, jülüjasü naaʼin nanoujeenain naya wayuukana. Müinjatia tü jülüjakat waaʼin nachiki na wayuu waküjakana amüin pütchi. Mapuʼusü sukuwaʼipa nutuma Pablo. Jamüshijaʼa nia, nütüjaa aaʼu tü nanoujakalü anain na wayuu nüküjakana amüin pütchi, niyaawata aaʼu tü kamalainkat namüin otta jülüjasü naaʼin nuwalayuujeenain naya. w20.04 8 püt. 3, 4

Nnojotsü wayoujainjatüin wayuu sünainjee tü sukuwaʼipakat, wayaawatüinjatü saaʼu jamüin makaʼa naaʼin. Niaʼala neʼe Jeʼwaa atüjaakai saaʼu jamüin maʼin tü wakuwaʼipakat. Müshiijeseʼe wachuntajanain kaalinwaa nümüin süpüla kojutuin wamüin na wawalayuukana otta süpüla sümülialaain waaʼin naalin. Nnojoluinjatü amülialaain neʼe waaʼin naalin noʼutku na wawalayuukana. Watüjaa aaʼu eein na wawalayuu alatakana amüin kasa mojusü maʼaka sülatüin nümüin Jonás, Elías, Lot otta sümüin Agar. Eepejeʼe na wawalayuu achajaakana nooʼomüin tü alatakat namüin. Müshiʼiya wayakana, eesü wachajaarale wooʼomüin tü kasa mojusü alatakat wamüin. Müsüjeseʼe nuchuntuin wamüin Jeʼwaa sümülialaainjatüin waaʼin naalin napüshuaʼa na wawalayuukana (1 Ped. 3:8). Woonoole sümaa nünüiki Jeʼwaa, paaʼinweena waya namaa napüshuaʼa na wawalayuukana sainküinpünaa tü mmakat. Wachajaainjatü sukuwaʼipa süpüla weʼraajüin maʼin nakuwaʼipa otta sümülialaain waaʼin naalin. w20.04 18 püt. 15-17

Niʼitaain Jesuu sukuwaʼipa wapüleerua süpüla jaa müinjanain waya waneepia nümüin Jeʼwaa. Jaa meena waya nümüin Jeʼwaa woushikajaale süchiirua nukuwaʼipa Jesuu (Juan 8:29). Süpüla woonooin waneepia sümaa tü shiimainkat, watüjaainjatü saaʼu niain Jeʼwaa chi Maleiwa shiimainshikai otta shiimain süpüshuaʼa tü nümakat suluʼu tü Wiwüliakat. Watüjaainjatü saaʼu niain Jesuu chi Mesías aküjünatüjüikai achiki paala. Watta naalii na wayuu nnojoliikana anoujain niain Jesuu chi aneekünakai süpüla aluwatawaa nutuma Jeʼwaa. Naashin Juan, eejeena na ekirajakana sünain alawaa süpüla nemeejüin na wayuu nnojotkana yapain süpüla asoutaa naaʼu Jeʼwaa otta Jesuu (2 Juan 7-11). Anuu tü nümakat Juan: «¿Jarai chi wayuu alaaka? Nia chi ayouktakai Jesús sünain niain Cristoin» (1 Juan 2:22). Nnojoleena waya emeejünüin wekirajaale waneepia sünain tü sümakat tü Wiwüliakat. Waaʼinrüle tia, watüjaajeerü aaʼu tü shiimainkat nüchiki Jeʼwaa otta Jesuu (Juan 17:3). Otta wayaawateerü saaʼu shiimain tü wanoujakalü anain. w20.07 21 püt. 4, 5

Nnojorüle nashanaweein watuma na wawalayuukana, nnojoishii waya aʼülüjiraainjanain namaa süchiirua waneirua kasa jee nnojoliinjana waya macheʼein süchiirua tü wamakat (Roma 14:19-21; 1 Cor. 8:9, 13). Naatajatü maʼin wakuwaʼipa suulia nakuwaʼipa na ayoujiraaliikana. Mayaainjeʼe wainmain na ayoujiraakana, waneeshia neʼe chi akanajakai. Nnojotpejeʼe kachipünaain naaʼin nakuwaʼipa na waneinnua. Eesü nojutapünaale nachiki süpüla nalatüinjanain palajana. Akaajasaʼa wayakana, nnojotsü wayoujireʼerüin wakuwaʼipa namaa na wawalayuukana (Gal. 5:26; 6:4). Wakaalinjeein napüshuaʼa na wawalayuukana süpüla nantüinjanain eemüinjanale wantüin wapüshuaʼa jee wakaalinjeein naya süpüla nasaʼwatüinjatüin tü naapüinjatkat Jeʼwaa namüin: kataa oʼuu süpüla kaʼikat süpüshuaʼa. Nnojotsü kapülain waaʼin wakuwaʼipa neʼe wamüiwaʼa, kapülasü waaʼin nakuwaʼipa na wawalayuukana maʼaka süküjain shia tü Wiwüliakat (Filip. 2:4, 5). Naapüinjatü Jeʼwaa kataa oʼuu süpüla kaʼikat süpüshuaʼa namüin na antakana eemüinjanale nantüin. Naapüinjatü kataa oʼuu namüin na chainjanakana iipünaa jee kataa oʼuu namüin na yaainjanakana suluʼu tü Paʼaraiisükat. Naaʼinrüinjatü tia saaʼujee alin naya nüpüla. w20.04 28 püt. 10; 29 püt. 12

Wainmeena na anoujashii alateenakana suluʼumüin tü mma jeketkat. Wawalayuukana naainnua, neʼreerü sükanajuuin tü outaakat, süka jamüin, süsoʼiraajeerüin naaʼin watta naalii wayuu outakana sümaiwa paala. ¡Anakatche maʼin tia! (Aluw. 24:15). Na waneepiakana nümaa Jeʼwaa, nakanajeerü tü outaakat jee kateerü noʼu süpüla kaʼikat süpüshuaʼa. Talatüsü waaʼin maaʼulu sutuma tü nüshajakat Pablo namüin na corintojeʼewaliikana, tü nüshajakat süchiki süsoʼiraainjatüin naaʼin na outushiikana. Müshiijeseʼe woonooinjanain sümaa tü nümakat Pablo, waʼyataainjanain nümüin chi Senyotkai waneepia süka süpüshuaʼa waaʼin (1 Cor. 15:58). Waneepiale waya nümaa Maleiwa jee wachajaale sukuwaʼipa süpüla waʼyataain nümüin, talateerü maʼin waaʼin. Weʼreerü nnojoleerüin amülain neʼe tü waʼyataainkat nümüin chi Senyotkai. w20.12 13 püt. 16, 17

Tü pütchi aküjünakat suluʼu Ezequiel 38:10-23; Daniel 2:43-45; 11:44–12:1; otta Alateetkat Mapeena 16:13-16, 21 eesü süpüla wanaawain tü saashajaakalü achiki. Mülejeʼe tia, anuu tü alatajatkat. Suʼttapa tü mülia miyoʼusükat, oonoojeena shikiira nupueulose Jeʼwaa «napüshua na sülaülashiikana mma» (Alat. Map. 16:13, 14). Suluʼu tü Wiwüliakat, «Gog chi chejeʼewaikai Magog» münüshii naya sülaülashiikana mma (Ezeq. 38:2). Naya sülaülashiikana mma ashuteena saaʼu nupueulose Maleiwa jee nachajaajeerü sukuwaʼipa süpüla najaʼttirajatüin shia. Niʼrüin Juan tü alatajatkat namüin na sülaülashiikana mma. Aʼitaa meeria wanee juya sünain miyoʼuyuuin maʼin tü shiyeeloinkat. Tia juyakat, eesüjaʼa shiale shiyaawase tü pütchi naküjainjatkat na aʼyataashiikana nümüin Jeʼwaa süchiki süsalainjatüin saainjala wayuu nutuma. Sünainjee tia, aashichijaajeechi Gog chi chejeʼewaikai Magog otta nushutuin saaʼu nupueulose Maleiwa süpüla najaʼttirajanain naya saaʼujee tü Mmakat (Alat. Map. 16:21). w20.05 15 püt. 13, 14

Anashi kojutule wamüin chi naaʼinkai Maleiwa süka nüsülajüin shia wamüin. Kojuteechi maʼin wamüin chi naaʼinkai Maleiwa jülüjale waaʼin tü kasa nuuntakat Jeʼwaa nükajee maaʼulu yaa. Süpülapünaa nuʼunuin Jesuu iipünaamüin müshi nia namüin na nikirajüinkana: «Nüntapeena chi Naaʼinkai Maleiwa suluʼumüin jaaʼin, pülashiijeena jia nütüma chi Maleiwakai. Ojuitteena jia [...] suluʼupünaa süpüshuaʼa mma wattapünaa maʼi sünain aküjaa süchikü tü takuaippa jiʼrajakat akua» (Aluw. 1:8). Alatüshii suulia 8 miyoone na wayuu aʼyataakana nümüin Jeʼwaa sükajee nükaalinjain naya nükajee chi naaʼinkai. Maaʼulu yaa, müshii suluʼukai waaʼin wanee paʼaraiisü, süka jamüin, nükaalinjain waya chi naaʼinkai Maleiwa süpüla eeinjatüin akuwaʼipa anasü wanain, maʼaka saaʼin aipüralin waya wayuu, talatüin waaʼin, jimatüin waaʼin, watüjain aʼatapajaa, waaʼinrüin kasa anasü, kamaneein waya, kanoulain waya, anamiain waya otta wachecherüin waaʼin (Gal. 5:22, 23). Anashaatasü maʼin tü naaʼinrakat wapüleerua Jeʼwaa. Naapüin wamüin chi naaʼinkai. w20.05 29 püt. 10, 13

Wainma tü kasa wayaawateenakalü anainjee na wapüshi asoʼiraainjanakana aaʼin, ¿jamüsü watüjaaka saaʼu tia? Shia sünainjee tü naaʼinrakat Jeʼwaa wanaa sümaa nüsoʼireʼerüin naaʼin na wayuukana sümaiwa paala. Meeria sukuwaʼipa nutuma Jeʼwaa nüsoʼireʼerapa naaʼin na outushiikana, ayateeria maʼakaajüle nakuwaʼipa na wayuukana, tü nanüikipalakat otta tü kasa jülüjakat naaʼin süpülapünaa outuin naya. Naashin Jesuu, müshi nutunkakai aaʼin wanee wayuu outule nia jee süsoʼiraale naaʼin, müshi nüchijiraakai aaʼin süchikijee atunkaa (Mat. 9:18, 24; Juan 11:11-13). Jamüshijaʼa nüchijiraale wanee wayuu süchikijee nutunküin maʼin, nnojotsü eeʼiratüin tü nukuwaʼipakat niaʼaya neʼe. Jülüjataa waaʼin tü alatakat nümüin Lázaro, pienchitchi kaʼi süchikijee niʼitaanüin, keejuuichi nia, mayaainjeʼe müin tia nnojotsü nuponojuin tü nushunuumuyuukat nüsoʼiraapa aaʼin nutuma Jesuu otta nayaawatüin niaʼaya (Juan 11:38-44; 12:1, 2). w20.08 14 püt. 3; 16 püt. 8

Wanaawasü nakuwaʼipa noʼuluʼu Jeʼwaa na chainjanakana iipünaa namaa na yaainjanakana saaʼu tü Mmakat, aishii naya nüpüla. Nuluwataainjeseʼe chi Nüchonkai süpüla outajachin nia naaʼu napüshuaʼaleʼeya, jaʼitashii chainjanain naya iipünaa jee yaainjanain naya saaʼu tü Mmakat. Tü naatakalü aluʼu nakuwaʼipa na aneekuushikana noulia na yaainjanakana kepiain saaʼu tü Mmakat, shia süka chainjanain naya iipünaa. Waneepiainjanapejeʼe naya nümaa Maleiwa jee nümaa Kürisüto (Sal. 31:23). Nnojo motuin waaʼin naapüin Jeʼwaa chi naaʼinkai namüin napüshuaʼa na aʼyataashiikana nümüin, jaʼitashii chainjanain waya iipünaa jee yaainjanale waya kepiain saaʼu tü Mmakat. Napüshuaʼa na aʼyataaliikana nümüin Jeʼwaa eesü tü kasa naʼatapajakat nutuma (Jer. 29:11). Wapüshuaʼa wayakana waʼwaajeechi Maleiwa otta Kürisüto sünain tü Outkajawaakat eere Sotuin Waaʼin Outuin Jesuu. Waaʼinreerü tia sükajee kojutuin wamüin katüinjatüin woʼu waneepia natuma. Kojutusü maʼin wamüin wayakana anoujashiikana tia outkajawaakat. w21.01 18 püt. 16; 19 püt. 19

Naʼakajee na wayuu antakana sünain tü Outkajawaakat eere Sotuin Waaʼin Outuin Jesuu wainmaleʼeya na kepiainjanakana yaa saaʼu tü Mmakat. ¿Jamüshii noʼunaka sünain tia outkajawaakat? Süpüla wayaawatüin saaʼu tia, jülüjataa waaʼin tü naaʼinrakat wainma wayuu oʼunakana sünain wanee miʼiraa shikiira kasaalüin wanee naʼaleewain. Oʼunushii naya sünain tia outkajawaakat süka alin napüla jee nakaalinjeein na kasaalüinjanakana. Müsia neʼe tü naaʼinrakat na wane anneerüiruaʼaya waneejannuu münakana, oʼunushii naya sünain tü Outkajawaakat eere Sotuin Waaʼin Outuin Jesuu süka alin Kürisüto napüla namaa na chainjanakana iipünaa otta nakaalinjeein naya. Jee müsia kojutusü namüin katüinjatüin noʼu waneepia yaa saaʼu tü Mmakat saaʼu naapajiraain nikii Jesuu. Na wane anneerüiruaʼaya waneejannuu münakana, oʼunushii naya sünain tü Outkajawaakat eere Sotuin Waaʼin Outuin Jesuu süka noonooin sümaa tü nuluwataakalü anain naya. Anuu nünüiki Jesuu namüin na aluwataaushikana soʼu nuutkajaain namaa: «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya» (1 Cor. 11:23-26). Sümaʼinruʼu eein na chainjanakana iipünaa yaa saaʼu tü Mmakat, ayateenaʼaya na wane anneerüiruaʼaya waneejannuu münakana oʼunuin sünain tia outkajawaakat. w21.01 17 püt. 13, 14

Shiimainre alin wapüla wayuu aaʼinreena waya kasa anasü napüleerua (anasü paashajeʼerüle Santiago 2:17, 26). Aishii waya nüpüla Jeʼwaa (1 Juan 4:19). Nüküjain suluʼu tü Wiwüliakat alin waya nüpüla (Sal. 25:10; Roma 8:38, 39). Nnojotsü nüküjain neʼe tia wamüin, aaʼinrüshi nia kasa wapüleerua. Naapüin Jeʼwaa nikii chi Nüchonkai süpüla outajachin nia saaʼu waainjala (Juan 3:16). ¿Aashin wayaawatüin sünainjee tia alin maʼin waya nüpüla Jeʼwaa? Weeʼiyateerü naalin Jeʼwaa otta Jesuu wapüla jaa wamüle sümüin tü naluwataakalü anain waya (Juan 14:15; 1 Juan 5:3). Nuluwataain waya Jesuu sünain aijiraainjanain waya waneʼewai wakua (Juan 13:34, 35). Nnojotpejeʼe «aishi pia tapüla» müinjanain neʼe waya namüin na wawalayuukana. Shia anaka aluʼu waaʼinrüle kasa anasü napüleerua (1 Juan 3:18). w21.01 9 püt. 6; 10 püt. 8

Na chainjanakana aluwataain iipünaa nümaa Jesuu, neʼreechi nia, aashajaweena naya nümaa otta nümaajeena naya waneepia (Juan 14:2, 3). Na yaainjanakana kepiain saaʼu tü Mmakat aijeena naya nüpüla Jesuu jee naaʼinmajeena naya. Mayaainjeʼe nnojoleechin neʼrüin nia, ayateenaʼaya aleewain nümaa shiʼipaʼaya neʼrüin tü kasa anasü eejeetkat nutuma Jeʼwaa otta nutuma Jesuu (Is. 9:6, 7). Wainma tü kasa anasü weʼreetkat sünainjee wacheküin süchiki aleewaa nümaa Jesuu. Jamüshiijaʼa waya maaʼulu, aishii waya nüpüla otta nükaalinjain waya. Jee müsia, eʼreena waya kataa oʼuu mapeena süpüla kaʼikat süpüshuaʼa. Tü alanaʼaleekat maʼin sünainjee aleewain waya nümaa Jesuu, shia aleeweenain waya nümaa Jeʼwaa. Anakatche maʼin aleewaa nümaa Jesuu. w20.04 25 püt. 15, 16

Tü karaloʼuta nüshajakat chi aluwataaushikai Pablo namüin na anoujashii chajanakana Corinto, namüinjatü na anoujashii aneekünakana süpüla aluwatawaa nümaa Jesuu. Anoujashiikana naainnua, akatannüshii suulia naainjala nünainmüin chi Maleiwakai jee sünainjee tü naaʼinrakat Kürisüto otta nüküjainya Pablo nachiki na «anoujakana nünain Cristo eekai ouktüin» (1 Cor. 1:1, 2; 15:18; 2 Cor. 5:17). Anuu tü wane nüshajakat Pablo nachiki naya anoujashiikana: «Maa aka ouktüin [Jesuu], müshii aka ouktakai waya wanaa nümaa [...]. Je maa aka susoʼiraain naaʼin Cristo, akaweenia wayakana osoʼiraweeria waaʼin mapeena» (Roma 6:3-5). Asoʼireʼennüsü naaʼin Jesuu suluʼu meʼrujuin nia otta nuʼunaka chaa iipünaamüin. Meeria neʼe nakuwaʼipa na wayuu aneekünakana süpüla aluwatawaa wanaa nümaa. Nüküjain Pablo niain Jesuu «chi palajachikai asoʼiraain aaʼin naʼakajee na outushiikana» (1 Cor. 15:20). Jesuu, nia chi palajachikai asoʼireʼennüin aaʼin suluʼu meʼrujuin nia otta saapünüin nümüin kataa oʼu süpüla kaʼikat süpüshuaʼa. w20.12 5 püt. 15, 16

Na aneekuushikana outakana maaʼulu yaa, asoʼiraamaateerü naaʼin süpüla noʼunuinjanain iipünaamüin. Watüjaa aaʼu tia sünainjee tü nümakat chi aluwataaushikai Pablo suluʼu 1 Corinto 15:51, 52. Süsoʼiraapa naaʼin na nuwalayuukana Kürisüto, talateerü maʼin naaʼin. Süküjain tü Wiwüliakat tü naaʼinrajatkat chaʼayaa iipünaa na aneekuushi asoʼiraamaatüinjanakana aaʼin. Anuu nünüiki Jesuu: «Chi eekai nükanajuuin chi Kamaʼüraikai nütüma sümaa ayatüin naaʼinrüin tü tachekakat nüpüleerua süntaleepaʼa sükalia tü sajaʼlajaainjatkat oʼu kasakat süpüshua, laülaajeechi nia tatüma saaʼu wayuu sainküin mmakat süpüshua, maa aka niʼitaain taya chi Tashikai süpüla laülawaa sünain nümüin tamüin: ‹Teʼitaain pia süpüla aluwatawaa saaʼu wayuu süpüshua sünain meʼrujuinjachin amüin pia. Eekai shiʼrüin pümüin suʼunnaa puluwataain, asaichijaweerü pütüma maa aka saaʼin amüchi eekai süsottüin›» (Alat. Map. 2:26, 27). w20.12 12 püt. 14, 15

Nuʼwanaajireʼerüin Pablo tü alatakat nümüin Jesuu sümaa tü palajatkat süchon naʼttia na israeliitakana süka nasoʼiraajeenain aaʼin waneinnua wayuu nüchikijee Jesuu süpüla chainjanain naya chaa iipünaa (1 Cor. 15:18). Meeria neʼe tü alatakat namüin na aluwataaushikana jee na wayuu aneekünaka süpüla aluwatawaa nümaa Jesuu chaa iipünaa. Wanaa sümaa nüshajüin Pablo tü karaloʼuta namüinjatkat na anoujashii chajanakana Corinto, nnojotsü asoʼiraain naaʼin na aneekünakana süpüla aluwatawaa nümaa Jesuu chaa iipünaa. Anuujeseʼe tü nümakat Pablo süchiki tü alatajatkat: «Katatawaisü sukuwaʼipa tia, chi palajachikai asoʼiraain aaʼin nia Kürisüto, süchikijee na anoujashii aluwataainjanakana chaa iipünaa soʼunnaa tü nükaliakat» (1 Cor. 15:23, TNM; 1 Tes. 4:15, 16). Maaʼulu yaa, kepiashii waya «soʼunnaa nükalia» Kürisüto. Na aluwataaushi outakana paala jee waneinnua anoujashii aneekünakana, naʼatapüin nükalia Jesuu süpüla süsoʼiraain naaʼin jee noʼunuin chaa iipünaa (Roma 6:5). w20.12 5 püt. 12; 6 püt. 16, 17

Aashajaashi Pablo nachiki na asoʼiraainjanakana aaʼin süpüla chainjanain naya iipünaa, meʼrujusaliinjana naya (1 Cor. 15:42-44). Wanaa sümaa yaajachin Jesuu saaʼu tü mmakat, shiʼrüin nia wayuu süka wayuuin nia. Shiasaʼa süsoʼiraapa naaʼin, meʼrujuichipa nia jee nuʼunaka iipünaamüin. Müinjatia neʼe nakuwaʼipa na asoʼiraainjanakana aaʼin süpüla kepiaa chaa iipünaa, meʼrujusaliinjana naya. Anuu nünüiki Pablo: «Kataiwaʼaya woʼu, müshii aka waya naaʼin Adán sünain wayuuin waya. Je süsoʼiraapeena waaʼin, meena aka waya naaʼin Cristo, süka shiiʼiranajaajeerüin wakuaippa süpüla ayateenain waya nümaa chaʼaya iipünaa» (1 Cor. 15:45-49). Soteesü waaʼin shiiʼiranajaain nukuwaʼipa Jesuu süsoʼiraapa naaʼin. Anuujeseʼe nünüiki Pablo süchiki tia: «Müleka nnojorule shiiʼiranajaain wakuaippa, nnojoleena waya ayatüin nümaa chi Maleiwakai waneepia chaa eere nuluwataain» (1 Cor. 15:50). Na aluwataaushikana namaa na waneinnua aneekünakana süpüla aluwatawaa iipünaa, nnojoishii oʼunuinjanain naya iipünaamüin nnojorüle shiiʼiranajaain nakuwaʼipa. w20.12 10 püt. 10-12

Nüshajirüin Maleiwa waneinnua nikirajüin Jesuu süchiki tü nakuwaʼipainjatkat na chainjanakana iipünaa süsoʼiraapa naaʼin. Anuu nünüiki chi aluwataaushikai Juan: «Mayaainje nüchooin waya Maleiwa maaʼulu yaa, nnojoliyülia eeʼiyatünüin wamüin jamüinjatüin wakuaippa soʼuweena wane kaʼi. Shiaʼla watüjaaka aaʼu sünain meenain aka waya naaʼin Cristo sünain anain soʼuweena tü kaʼi niweeteetkat oʼu nüchikua» (1 Juan 3:2). Nnojotsü natüjaain saaʼu na wawalayuu chainjanakana iipünaa jameerüin nakuwaʼipa süsoʼiraapa naaʼin. Neʼreechipejeʼe Jeʼwaa naapapa namüin tü namüinjatkat. Süküjain tü Wiwüliakat waneirua kasa süchiki tia. Naashin Pablo, eejeena nümaa Jesuu na chainjanakana iipünaa najaʼttirapa süpüshuaʼa tü aluwataayakalüirua saaʼujee tü mmakat jee müsia najaʼttirapa «tü outaakat». Shiasaʼa mapa, jüüjüüjeechi Jesuu nümüin Jeʼwaa namaa na aluwataainjanakana nümaa jee müsia süpüshuaʼa tü kasakalüirua (1 Cor. 15:24-28). ¡Anakatche maʼin tia! w20.12 8 püt. 2

Asoʼiraajeerü naaʼin na anoujashii nnojoliinjanakana chain iipünaa. Saashin tü Wiwüliakat, chi aluwataaushikai Pablo jee na anoujashii chainjanakana iipünaa, napüshi na asoʼiraainjanakana aaʼin palajana (Filip. 3:11, TNM). Sutuma tia, wayaawata aaʼu süsoʼiraajeerüin naaʼin waneinnua wayuu nachikumüin. Pansaasü tia sümaa tü nunoujakalü anain Job süchiki tü alatajatkat nümüin (Job 14:15). Cheena iipünaa nümaa Jesuu napüshuaʼa na aneekünakana süpüla aluwatawaa soʼu najaʼttirüin Jesuu sukuwaʼipa naluwataaya na wayuukana. Müiria nnojoluin outaa otta nnojoleena outuin nachikuaʼa na chainjanakana iipünaa (1 Cor. 15:23-26, TNM). Na wayuu asoʼiraainjanakana aaʼin yaa saaʼu tü mmakat kaʼatapalashii sünain tü sümakat tü pütchi süpülajatkat soʼukai. Sünainjee tia wayaawata aaʼu süsoʼiraajeerüin saaʼin wayuu saaʼu tü mmakat, jama nnojolin süpüla chain iipünaa na wayuu aaʼinrakana kasa mojusü. w20.12 6 püt. 18, 19

«¿Jamüsü süpüla tatüjaain saaʼu nnojolin niyüülajüin taya Jeʼwaa?», eesüjaʼa müirüle pünüiki. Sünainjee müin pünüiki, piyaawata aaʼu eein süpüla motuin naaʼin Jeʼwaa tü paainjalakat. Anuu tü aküjünakat paala suluʼu Aapiria Wayuu: «Eeshii kaainjarale waya kojuyatua sutuma wanee kasa kiʼrakalü anain waya sümaiwa paala. Nnojo jülüjain paaʼin paainjain wanee kasa nnojotka süpüla nülatirüin Jeʼwaa soopünaa naaʼin. Shia nüchekaka Satanaa müinjatüin tü jülüjakat paaʼin. Sünainjee mojuin paaʼin saalinjee tü kasa paainjakat, jayasü paaʼu wayuuin anamia pia otta jülüjain paaʼin eein süpüla motuin naaʼin Jeʼwaa paainjala. Nnojorüle yaletüin paaʼin jee puchuntüle nümüin Jeʼwaa nülatirajatüin soopünaa naaʼin paainjala, nükaalinjeechi pia süpüla wulein paaʼin otta süpüla puuʼulaainjachin suulia tü kasa mojusü paaʼinrakat». Watta saalii tü kasa mojusü naaʼinrapuʼukat chi aluwataaushikai Pablo nnojoliiwaʼaya nunoujain. Mayaainjeʼe sotuin naaʼin tü kasa mojusü naaʼinrapuʼukat (1 Tim. 1:12-15). Jülüjasü naaʼin motuin naaʼin Jeʼwaa tü naainjalakat saaʼujee naapajiraain nikii Jesuu. Sükajee naaʼinrüin Pablo tia, nnojoluitpa jülüjakuʼu müin naaʼin tü kasa mojusü naaʼinrakat paala. Shiaitpa naaʼinmaaka maʼin tü niʼyataainkat nümüin Jeʼwaa. w20.11 27 püt. 14; 29 püt. 17

Wainma tü kasa naaʼinrakat Satanaa süpüla kaainjalainjanain waya nutuma. ¿Kasache waaʼinreetka shiʼipajee tia? Eesüjaʼa müle pünüiki: «Nnojoleechi taya ojuʼitinnüin, jama nnojoluin mojuin maʼin tü taaʼinrakat». Nnojotsü anain müle tü jülüjakat waaʼin. Shia anaka aluʼu wasakirüle waaʼin sünain pütchikat tüü: «¿Nuuʼulaküinche waaʼin Satanaa sükajee tia süpüla nnojoliinjanain waʼyataain nümüin Jeʼwaa süka süpüshuaʼa waaʼin? ¿Mojeetche pütchi nüchiki Jeʼwaa waaʼinrüle tü suchuntaakat waaʼin? ¿Arütkaajeenache maʼin waya nünainmüin Jeʼwaa waaʼinrüle tia? ¿Akayalaataajeenaka waya nuulia?». Anasü wasakirüle waaʼin sünain tia. Wachunta kaalinwaa nümüin Jeʼwaa süpüla wayaawatüin saaʼu suchuntaale waaʼin kasa eekai mojuin. Sükaalinjeena waya tia süpüla wayoutuin tü kasa mojusü ooʼulakünakalü akajee waaʼin, maʼaka naaʼinrüin shia Jesuu soʼu nümüin: «Puʼuna pümata toulia Satanás» (Mat. 4:10). Nnojoleerü anain wakuwaʼipa nnojorüle waʼyataain nümüin Jeʼwaa süka süpüshuaʼa waaʼin. w20.06 12 püt. 16, 17

Jüüjüüshii waya nümüin Jeʼwaa süka wayaawatüin saaʼu niain neʼe atüjaain saaʼu tü anainjatkalü atuma wakuwaʼipa (Éf. 4:22-24). Nnojorüle yaletüin waaʼin, waaʼinreerü tü keeʼireekat naaʼin Jeʼwaa suulialeʼeya tü keeʼireekat waaʼin otta jülüjeerü waaʼin nayain alanaʼaleein akuwaʼipa na waneinnua woulia. Müleʼe shia watuma, aneerü wakuwaʼipa nümaa Jeʼwaa jee namaa na wawalayuukana (Filip. 2:3). Nnojorüle eejüin waaʼin, wanaaweerü wakuwaʼipa namaa na wayuu yaletakana aaʼin otta na kapülakana aaʼin nakuwaʼipa neʼe namüiwaʼa. Alatüsü tia namüin na anoujashii namaiwajanakana. Anuujeseʼe tü nümakat Pablo namüin na anoujashii kepiakana Roma: «Tamüshii paala jia jüpüshua: ‹Nnojo juʼwaataain suluʼu jukuaippa. Shia anaka aluʼu müleka jiyaawatüle naaʼu Maleiwa sünain niain juuntüin atüma jaaʼinrüin tü nüchekakat jüpüleerua›». Nütüjaa aaʼu Pablo choʼujaain kojutuinjanain waya wamüinjiraa. Pansaajeetpejeʼe tü jülüjakat waaʼin wachikijiraa nnojorüle yaletüin waaʼin. w20.07 2 püt. 1, 2

Nnojorülaʼa müsü jimataa aaʼin soʼu nükalia Asá. Ashutüshii saaʼu tia mmakat na surulaat chejeʼewaliikana Etiopía, eetaashii maʼaka saaʼin wanee miyon surulaat. Zérah, chi nekiipüʼükai, nükanajüinjana na chajanakana Judá naashin. Niʼitaapejeʼe naaʼin Asá nünain Jeʼwaa. Anuujeseʼe nünüiki nümüin: «Kaaliinya maa waya püpüla Jeʼwaa, piaʼaya neʼe pümüiwaʼa chi weʼitaakai anain waaʼin. Shiimain wakanaleerüin wayuukalüirua tüü süka wamaajachin pia» (2 Crón. 14:11). Mayaainjeʼe wainmaleein maʼin na surulaat chejeʼewaliikana Etiopía noulialeʼeya na surulaat chajanakana Judá, nütüjaa aaʼu Asá pülashin maʼin Jeʼwaa otta nükaalinjeerüin tü nupueulosekat. Shiaʼaya naaʼinraka tia Jeʼwaa. Akanajuushii na surulaat chejeʼewaliikana Etiopía (2 Crón. 14:8-13). Nnojotsü watüjaain saaʼu tü alateetkat watta kaʼi nümüin wanee wayuu aʼyataakai nümüin Maleiwa. Watüjaapejeʼe saaʼu nnojoleerüin jimatüin saaʼin mmapaʼakat soʼu palitchon kaʼi. Soto waaʼin tü alatajatkat naashin Jesuu namüin na nikirajüinkana. Anuu nünüiki: «Maalinjeena jia süpüla wayuu sainküin mmakat süpüshua» (Mat. 24:9). w20.09 17 püt. 14-16

Nnojotsü jaralüin acheküin süchiki mojuinjatüin pütchi sümüin. Mojeetpejeʼe maʼin waaʼin shapaale waaʼin sünainjee tü namakat na waneinnua wachiki (Prov. 24:10). Mojule pütchi wachiki anasü washatüle nukuwaʼipa chi aluwataaushikai Pablo. Jamüshijaʼa nia, aneerü naaʼin naashin mayaasüjeʼe mojuin sünüiki wayuu nümüin. ¿Jamüsü anainjatka waaʼin mojule pütchi wamüin? Shia süka watüjaain saaʼu waaʼinrüin tü nüchekakat Jesuu jaʼitashii müliain waya atumawaa jee mojuin pütchi wamüin (1 Ped. 4:14). Nüküjatüjülia Jesuu kanainjeenain saaʼin wayuu na nikirajüinkana (Juan 15:18-20). Shiaʼaya alataka tia namüin na anoujashiikana nükalioʼu Jesuu. Soʼu tia, eepuʼushii waneinnua wayuu maʼaka naaʼin na griegokana, jülüjapuʼukana aaʼin nnojoluin natüjain karaloʼuta na anoujashiikana jee nnojoluin kasain anain apüla naya naashin. Jaʼitakajeʼe na judíokana, jülüjasü naaʼin nüchiki Pedro otta Juan wayuuin matüjainsalii naya karaloʼuta otta wayuuwaʼatain neʼe naya naashin (Aluw. 4:13). Wainma na wayuu jülüjakana aaʼin malain na anoujashiikana süka nnojoluin naya sünainpünaain poliitika, nnojoluin surulaalüin naya otta isain nachiki asoutaa naaʼu. Nnojotpejeʼe nooʼulaain mojuin nakuwaʼipa naya anoujashiikana natuma na makana anüiki namüin. w20.07 14 püt. 3, 4

Aishii maʼin nüpüla Juan na anoujashiikana otta nükaalinjain naya süpüla katchinjatüin nanoula. Jaʼyasü tia saaʼu tü nümakat namüin suluʼu tü apünüinsükat karaloʼuta nüshajalaka. Anataʼaleesüjaʼa maʼin süka eejeenain sünain aluwatawaa wanaa nümaa Jesuu na wayuu makana aka saaʼin nukuwaʼipa Juan (1 Juan 2:27). Waapaa sümaa tü nümakat wamüin Juan. Ayataʼaya woonooin waneepia sümaa tü shiimainkat. Jüüjüü waya nümüin Jeʼwaa sünain süpüshuaʼa tü waaʼinrakat. Wekirajaa maʼin sünain tü Wiwüliakat otta wanouja tü sümakat. Wakatchinra wanoula nünain Jesuu. Wayouta tü pütchi süleʼeruʼujeejatkat wayuu jee tü alawaa ekirajünakalü anain. Nnojo anayaain wakuwaʼipa noʼupalapünaa na waneinnua sümaa waaʼinrataain kasa mojusü. Waaʼinra tü nuluwataakalü anain Jeʼwaa. Wakaalinjeena na wawalayuukana, motule waaʼin tü naainjakat wamüin otta wakaalinjale naya sünain tü choʼujaakat namüin. Jaʼitasü kapüleein maʼin tü alatakat wamüin, ayateenaʼaya waya oonooin waneepia sümaa tü shiimainkat. w20.07 24 püt. 15-17

Naatayaa müsü tü aʼyatawaa naapakat Jeʼwaa wamüin suluʼu tü outkajaaleekat. Mayaainjeʼe müin tia, kojutushii waya wapüshuaʼa nümüin otta choʼujaashii wamüin waneʼewai nakua na wawalayuukana. Wayaawata aaʼu tia sünainjee tü nümakat chi aluwataaushikai Pablo nnojoluin anain wamüle nümüin wanee wawala: «Nnojotsü kasain paamüin tamüin» (1 Cor. 12:21). Süpüla anajiraain waya namaa na wawalayuukana, kojutuinjanain naya wamüin otta aʼyataajiraainjana waya namaa (Éf. 4:16, TNM). Paaʼinwale waya sünain aʼyatawaa namaa na wawalayuukana, aijiraajeena waya namaa otta katchinjeerü wanoula. Napüshuaʼa na laülaashiikana suluʼu tü outkajaaleekat aneekünüshii naya nutuma Jeʼwaa nükajee chi naaʼinkai. Mayaainjeʼe müin tia, naatayaa müsü tü kasa natüjakalü apüleerua nutuma (1 Cor. 12:17). Eeshii na laülaashii aneekünakana jekenainka otta eesüjaʼa nnojorüle natüjain maʼin süpüleerua tü naʼyataainkat. Eetaashii joo na isainnakana achiki tü naʼyataainkat süka laülaayuuinnain jee ayuulin naya. Nnojoipejeʼe süpüla nümüin wanee laülaashi nümüin wane laülaashi: «Nnojotsü kasain paamüin tamüin» shia naaʼinrajatkat tü nümakat Pablo suluʼu Roma 12:10. w20.08 26 püt. 1, 2, 4

Nuʼunirüin wakuwaʼipa Jeʼwaa sükajee tü nupueulose eekat yaa saaʼu tü mmakat. Süpansaajitpa wamüin nupueulose Maleiwa wanee pütchi suluʼujeejatka tü Wiwüliakat otta shiale süchiki tü waaʼinrajatkat süpüla wulein wakuwaʼipa, waapaain sümaa tia. ¿Kasache waaʼinrajatka süpansaajirüle nupueulose Maleiwa wanee kasa sünainpünaaka wakuwaʼipa? ¿Jama suikünüle tü Piichi woutkajaapuʼukalü aluʼu? Ayateeria talatüin waaʼin sotule waaʼin niain waʼyataain amüin Jeʼwaa otta niain oʼunirüin sukuwaʼipa tü nupueulosekat (Col. 3:23, 24). Anasü maʼin washatüle nukuwaʼipa chi aluwataaikai David, aapüshi nia nneerü süpüla sukumajünüin tü aʼwaajüleekat. Anuu nünüiki: «¿Jarai taya otta tapueulose süpüla nnojoluin wasülajüin pümüin süka waaʼin? Pümaʼanajeejatü süpüshuaʼa tü kasakalüirua, jaʼitakajeʼe neʼe tü waapakat pümüin, pümaʼanajeejatü shia» (1 Crón. 29:14). Mayaainjeʼe nümaʼanajeejatüin Jeʼwaa tü kasa wamaʼanakat, kojutusü nümüin tü waapakat nümüin otta waʼyataale maʼin nümüin (2 Cor. 9:7). w20.11 22 püt. 14-16

Nnojotsü anain neʼe tü waʼyataainkat sutuma wainmain wayuu woutiisakana sünainjee wekirajüin naya (Luc. 8:11-15). Aneerü noʼuluʼu Jeʼwaa tü waʼyataainkat ayatüle waya sünain aküjaa pütchi otta ekirajaa wayuu. ¿Jamüsü aneetka shia noʼuluʼu Jeʼwaa? Shia süka jüüjüüin waya nümüin otta nümüin Jesuu (Mar. 13:10; Aluw. 5:28, 29). Aküjainjana maʼin waya pütchi süka watüjaain saaʼu sülüʼülüin sükalia süpüla sajaʼttajatüin kasakat süpüshuaʼa. Nnojo paʼatapüin sunoutaain sukuwaʼipa süpüshuaʼa tü kasa alatakat pümüin süpüla püküjalinjachin pütchi otta pikirajüinjachin wayuu. Püchajaa sukuwaʼipa süpüla kamalainjatüin pümüin aküjaa pütchi otta ekirajaa wayuu. Pikirajaa maʼin sünain tü Wiwüliakat, yalayala paaʼin otta pikeraaja tü piʼyataainkat. Talateerü maʼin paaʼin piʼyataajiraale namaa napüshuaʼa na wawalayuu eekana sainküin tü mmakat (Neh. 8:10; Luc. 5:10). Püküja maʼin pütchi otta ayataʼaya paaʼinrüin shia waneʼereʼeya «kettaasü yaapünaa», nümapa Jeʼwaa. w20.09 7 püt. 18-20

Nnojotsü shiainjatüin waaʼinmaain oʼunaa süchiirua kamaʼanaa wainma korolo. Kachiiruale waaʼin tia, amalajaajeerü tü naalinkat Jeʼwaa wapüla, nnojoleerü kojutuin wamüin tü sümakat tü Wiwüliakat otta nnojoleena waya aküjain pütchi (Mat. 13:22). Süpüla waaʼinmaain tü kasa naapakat Jeʼwaa wamüin watüjaatüjülüinjatü aaʼu tü kasa waaʼinrajatkat süpülapünaa sülatüin wanee kasa wamüin. Jülüjatüjülüinjatü waaʼin tü waaʼinrajatkat sujuʼitalaʼa sümüle suluʼu telewisoot, suluʼu Internet jee suluʼu peliikula wanee kasa neʼitaaka na ekirajüliikana sünain alawaa jee shiale shiyaakua wayuu amaʼüjiraaka sukuwaʼipa jee atkawaa. Watüjaatüjürüle saaʼu tü waaʼinrajatkat, wayoutamaateerü tia kasa mojusükat süpüla waaʼinmajüin wakuwaʼipa nümaa Jeʼwaa otta süpüla wulein waaʼin noʼuluʼu (Sal. 101:3; 1 Tim. 4:12). Waya anoujashiikana, waaʼinmajüinjatü tü kasa kojutusü naapakat Jeʼwaa wamüin. Tia shia tü pütchi shiimain suluʼujeejatkat tü Wiwüliakat otta wekirajüin wayuu sünain tia pütchikat. Waaʼinrüle tia, wuleerü waaʼin, watüjaajeerü aaʼu tü wakuwaʼipainjatkat otta wakaalinjeena na waneinnua sünain eʼraajaa Jeʼwaa. w20.09 30 püt. 16-19

Woutiisale waya, weeʼiyatüinjaʼa namüin na waneeinna sünain kanoulain waya nünain Jeʼwaa otta waʼyataweein nümüin sümaa tü nupueulosekat. Nuʼunirüin Jeʼwaa sukuwaʼipa tü nupueulosekat maaʼulu yaa. Wayaawatüinjeseʼe saaʼu jamüin maʼin nukuwaʼipa, tü keeʼireekat naaʼin otta tü kasa wulekat noʼuluʼu. Jülüja waaʼin apünüinsü kasa süshataka nupueulose Jeʼwaa nünainjee. Tü palajatkat kasa shia nnojoluin koʼuin nukuwaʼipa sümüin wayuu (Aluw. 10:34). Süka aishaatain waya nüpüla Jeʼwaa, naapüin nikii chi Nüchonkai süpüla outajachin nia (1 Tim. 2:6; Juan 3:16). Nüküjirüin Jeʼwaa tü pütchi anasükat namüin na wayuu aapajeekana shia süpüla neʼrüin tü kasa anasü eekat sünainjee naapajiraain nikii Jesuu. Naaʼinrüin tia sükajee tü nupueulosekat. Tü wane, lotusü sukuwaʼipa süpüshuaʼa tü naaʼinrakat Jeʼwaa (1 Cor. 14:33, 40). Müsüjeseʼe lotuin sukuwaʼipa tü kasa naaʼinrakat na aʼyataashiikana nümüin. Tü chiiruaajatkat, nikirajüin waya Jeʼwaa (Is. 30:21). Shia naaʼinmaaka na aʼyataashiikana nümüin Jeʼwaa nekirajüin wayuu sünain tü sümakat tü Wiwüliakat. Naaʼinrüin tia suluʼu tü outkajaaleekat jee naküjapa pütchi. w20.10 20 püt. 1-3