Juunioʼu

Müliasü maʼin saaʼin tü wayuu outakat aʼwayuuse sutuma maʼletsein shia. Mayaainjeʼe nnojoluin süsetaain sünneetse, arütkaasü shia süʼütpaʼamüin tü kojon ejitünakalü aluʼu nneerü. Nnojotsü jaralüin shijitüin oʼupala. Nütüjaapejeʼe aaʼu Jesuu jeʼrain shijitüin, piamasü nneerü kachueerachen neʼe. Nnojotsü kaliain maʼin soʼu tia, nnojotsü keraain sümaa nülia wanee wüchii kanüliakai gorrión, jaʼyashi maʼin chia wüchiikai. Nuunejaka Jesuu na nikirajüinkana süka ponuin maʼin naaʼin tü saaʼinrakat tia wayuukot. Nümakalaka Jesuu namüin: «Alanaʼaleesia maʼi nümüin Maleiwa tü shijitakat tü wayuukot oukta aʼwayuusetkat suulialeʼeya tü shijitakat tü wayuukolüirua süpüshua». Nusoutakalaka joo Jesuu nüchikuaʼa namüin: «Na washinnuukana, nejitüin tü süpütaalakat nanneetse. Aluʼusa shiakat, mayaainje müliain maʼi, shijitüin süpüshua tü sünneetse sümaʼanajatkat» (Mar. 12:43, 44). Wanaa sümaa shijitüin süpüshuaʼa tü nneerü eejatkat sümaʼana, jaʼyasü saaʼu shiʼitaain saaʼin sünain naaʼinmajeerüin shia Jeʼwaa (Sal. 26:3). w21.04 6 püt. 17, 18

Keeʼireesü naaʼin Jesuu nashatüin nukuwaʼipa na nikirajüinkana. Wanaa sümaa yaajachin nia mmapaʼa aküjapuʼushi maʼin pütchi sümüin wayuu (Juan 4:35, 36). Aküjashii maʼin pütchi na nikirajüinkana Jesuu sümaa yalayalain naaʼin wanaa sümaa yaajachin nia namaa mmapaʼa (Luc. 10:1, 5-11, 17). Shiasaʼa nütaʼünapa jee nuʼutunapa aaʼin Jesuu, nnojotpünaasü naaʼin na nikirajüinkana sünain aküjaa pütchi (Juan 16:32). Süchikijee nüsoʼiraain aaʼin Jesuu nütütüleʼerüin naaʼin na nikirajüinkana süpüla naaʼinmaainjatüin tü aküjaakat pütchi. Shiasaʼa chapa Jesuu chaa sirumatuʼu, aküjashi maʼin pütchi naya sümaa yalayalain naaʼin. Jashichika na naʼünüükana namüin maʼaka süküjain tü pütchi süpülajatkat soʼukai. Nia oʼuniraka Jesuu tü aküjaakat pütchi soʼu nakalia na nikirajüinkana otta eeshi chi naaʼinkai Maleiwa naaʼu. Müshiijeseʼe wainmain na wayuu aapaakana sümaa tü pütchi naküjakat. Jamüsüjaʼa soʼu tü Pentecostés eejatkat soʼu juyakat 33 woutiisashii maʼaka 3.000 wayuu (Aluw. 2:41). Shiasaʼa mapa ayatüshii akooʼomüinraain na nikirajüinkana Jesuu (Aluw. 6:7). Nüküjatüjülia Jesuu wainmainjatüin wayuu aapaaka sümaa tü pütchi anasükat sükalioʼu tü kaʼi sajaʼttajatkalü oʼu kasa süpüshuaʼa (Juan 14:12; Aluw. 1:8). w21.05 14 püt. 1, 2

Talatakajasaʼa paaʼin pütüjaapa saaʼu tü shikirajakalü anain tü Bibliakat. Saaʼin pümüin kamalainjeerü shia sümüin wayuu süpüshuaʼa, aneerüin nakuwaʼipa na wayuukana sutuma tü sümakat tü Bibliakat jee neʼreenain kasa anasü nutuma Maleiwa (Sal. 119:105). Sutuma talatüin paaʼin püküjain shia namüin paʼaleewainyuu jee püpüshi. Mojupejeʼe paaʼin piʼrapa naya mamalain shia namüin. Nnojotsü ponuinjatüin waaʼin wainmain wayuu ayoutaka tü wekirajakalü anain. Wanaa sümaa yaajachin Jesuu mmapaʼa aainjashi kasa pülasü ayaawatünaka aaʼu nümaajachin nia Jeʼwaa. Mayaainjeʼe müin tia, wainma wayuu ayoutaka nia. Jamüshijaʼa wanaa sümaa nüsoʼireʼennüin aaʼin Lázaro nutuma Jesuu, na laülaakana napüleerua na judíokana nnojotsü nanoujain anain niain chi Mesíaskai. Shia naashajaajiraaka achiki tü naaʼinrajatkat süpüla noʼutüin naaʼin Jesuu nümaa Lázaro (Juan 11:47, 48, 53; 12:9-11). w21.05 2 püt. 1, 2

Choʼujaasü woutkajaainjanain waneepia süka sütütüleʼerüin waaʼin jee süka weʼraajeerüin maʼin nakuwaʼipa na wawalayuukana. Aleewainjana waya namaa na wawalayuu akaalinjeenakana waya süpüla anain wakuwaʼipa jaʼitasü nnojoluin wanaawain nouyase wamaa jee naatain nakuwaʼipa. Müsü tü Bibliakat: «Kekiishi maʼin wanee wayuu eekai laülaaichin otta atüjashi maʼin nia» (Job 12:12). Akaʼaya na wawalayuu miyoʼuyuukana eesia tü kasa natüjakat nanainjee na jimaʼalii jee na majayünnüü waneepiakana nümaa Maleiwa. Miyoʼu Jonatán nuulia David, aleewajiraapejeʼe maʼin naya (1 Sam. 18:1). Akaalinjiraashii naya süpüla naʼyataain nümüin Jeʼwaa soʼunnaa tü alatakat namüin (1 Sam. 23:16-18). Anuu sünüiki Irina wanee wawala manoujainka süpüshi: «Na anoujiraakana wanaa wamaa meena aka saaʼin washi, wei jee wawalayuu wamüin. Nükaalinjain waya Jeʼwaa nakajee naya wawalayuukana süpüla nnojoluin müin wamüiwaʼakai waaʼin süka wayoutunüin sutuma wapüshi saaʼujee wanoujain». Natütüleʼereein waaʼin na waʼaleewainyuukana jee nakaalinjeein waya, choʼujaapejeʼe waküjain namüin jamüin waaʼin. w21.06 10 püt. 9-11

Nüküjain Jesuu namüin na nikirajüinkana nüchiki wanee aluwataai nümaa wanee achepchiee. Süka nümülialaain chi aluwataaikai naaʼu chi nüchepchiakai nuuʼulaʼaleeinya nüpüla tü nünneetsekat süka iseerüin nüchiki nuwalaajüin tü nujuyaalakat. Niasaʼa chi achepchieekai nuʼunaka nünainmüin wane achepchiee wanaa nümaa süpüla nüchekajüin nümüin tü palitchonkat nneerü nujuyaajakat nuulia, nnojoikalaka nümülialaain naaʼu. Shiasaʼa sünainjee tü niʼralakat wayumüin chia achepchieekai, jashichishi maʼin chi aluwataaikai, nüpüreesajitkalaka nia. Nnojoishi eʼrüin müliaa neʼe nümüiwaʼa chi achepchieekai sutuma tü naaʼinrakat, eʼrüshiʼiya müliaa na wane achepchieekana. Jamüshijaʼa nia nüpüreesajirüin chi wane achepchieekai waneʼereʼeya nujuʼitinnüin nuwalajaapa nujuyaala nuulia. ¿Jamüsü naaʼin na wane achepchieekana? Anuu nünüiki Jesuu: «Nayasa na waneeirua achepchieekanairua, mojukalaka maʼi naaʼin naapapa süchiki tü alatakat» (Mat. 18:30, 31). Akaataajaʼa wayakana, eesia süpüla mojuin naaʼin na wawalayuukana sünainjee tü waaʼinrakat. ¿Kaseerü alataka nnojorüle motuin waaʼin naainjala wanee wawala wamüin? Mojeerü naaʼin, nnojoleechi müin aikai nia wapüla jee eeshi süpüla nnojoluin jamajachin nia wamüin. Akaʼaya na wane wawalayuukana mojeerü naaʼin neʼrüle müin wakuwaʼipa. w21.06 22 püt. 11, 12

Nukumajüin waya Jeʼwaa maʼaka saaʼin nukuwaʼipa. Kamalainsü nümüin Satanaa naainjirüin wayuu kasa yarüttüsü. Nükalioʼu Noé niʼrüin Jeʼwaa sükooʼomüinraain tü mojulawaakat. Mojushaatasü maʼin naaʼin saaʼu nukumajüin wayuu paala (Gén. 6:5, 6, 11). Ayatüsia aainjünüin tü kasa yarüttüsükat, nnojotsü anoutaain shia. Kamalainsü nümüin chi Yolujaakai keejiain sümüin wayuu tü amaʼüjirawaakalü akuwaʼipaa, anasü nümüin nümaʼüjiraale nukuwaʼipa wanee toolo sümaa wanee jierü, nümaʼüjiraale nukuwaʼipa wanee toolo nümaa wane toolo jee sümaʼüjiraale sukuwaʼipa wanee jierü sümaa wane jierü jee waneirua kasa kashüülasü makat aka saaʼin tia (Éf. 4:18, 19). Talatüshi chi Yolujaakai niʼrapa kaainjalain wanee aʼyataai nümüin Jeʼwaa. Süka niain aluwataain Satanás naaʼu na manoujainsaliikana aluwanaajiraashin na wayuukana saaʼu nakuwaʼipa namüiwaʼa, nnojotsü neisattüin tü Mmakat jee tü mürütkalüirua. Nnojotsü naaʼinrüin tü keeʼireetüjütkalia naaʼin Jeʼwaa (Ecl. 8:9; Gén. 1:28). Naashin waneinnua cientiifico eesü süpüla sajaʼttüin watta saalii mürüt jee wüchii natuma na wayuukana. w21.07 12 püt. 13, 14

Eeshii wawalayuu ayatakana mojuin aaʼin saaliijee naainjala paala. Süka ayatüin mojuin maʼin naaʼin, eesü süpüla jülüjain naaʼin nnojoluin motuin naaʼin Jeʼwaa naainjala mayaainjeʼe nayaawajaain suulia. Müle pukuwaʼipa mayaa, aneerü paaʼin jülüjale paaʼin miyoʼuin paalin nüpüla Jeʼwaa. Eesü süpüla waʼyataain nümüin Jeʼwaa sümaa talatüin waaʼin jee wulein waaʼin nuʼupala, süka jamüin, motuin naaʼin süpüshuaʼa tü waainjalakat sükajee amülain nüsha Jesukürisüto, chi Nüchonkai (1 Juan 1:7). Müleka mojule waaʼin saaliijee wanee kasa mojuka watuma, jülüja waaʼin keeʼireein naaʼin Jeʼwaa motuin naaʼin naainjala chi wayuu ayaawajaakai suulia. Jülüjataa waaʼin tü nümakat chi salmistakai David süchiki motuin naaʼin Jeʼwaa naainjala wanee wayuu süka miyoʼuin naalin nüpüla. Anuu nünüiki: «Alanaʼaleesia maʼin naalin nüpüla Maleiwa na kojutkana amüin nia maʼaka saaʼin sülanaain tü sirumakat sooʼopünaa tü mmakat. Wattasü nutuma tü waainjalakat woulia, maʼaka wattain eere niweetüin chi kaʼikai suulia eere nikerotüin» (Sal. 103:11, 12). w21.11 5 püt. 12, 13

Na tooloyuu kaʼwayuusekana kojutuinjatü namüin naʼwayuuse (1 Ped. 3:7). Kapülainjatü naaʼin jee nnojoluinjatü mojuin nanüiki sümüin. Kojutusü namüin naʼwayuuse wanaa sümaa nnojoluin nachuntuin kasa eekai kapüleein sümüin jee nnojoluin nayoujireʼerüin sukuwaʼipa sümaa wane jiet. ¿Jamüsü mojuka nayoujireʼerüle sukuwaʼipa naʼwayuuse? Jülüjataa waaʼin tü alatakat sümüin wanee wawala kanüliaka Rosa, manoujainsai suʼwayuuse jee niyoujireʼerawalin sukuwaʼipa sümaa waneinnua jieyuu. Süka airuʼuluin nünüiki sümüin jülüjasü saaʼin nnojoluin kasain anain apüla shia jee maalin shia apüla. Anuu sünüiki: «Choʼujaasü süküjünawalin tamüin kojutuin taya nümüin Jeʼwaa». Naatainjatpejeʼe nukuwaʼipa wanee anoujashi eekai kaʼwayuusein, kojutuinjatü nümüin nuʼwayuuse süpüla anainjatüin nukuwaʼipa sümaa jee nümaa Jeʼwaa. Chi wayuu kojutukai amüin nuʼwayuuse anasü nünüiki süchiki, nüküjain sümüin alin shia nüpüla jee nüküjain anain tü saaʼinrakat. w21.07 22 püt. 7, 8

¿Jameerü paaʼin nnojorüle süntamaatüin wanee kasa aluwataanaka pümüin? Müleka pütüjaale saaʼu kasain nnojoluin süntamaatüin atuma tü kasa paʼatapajakat, nnojoleerü shapaain paaʼin. Anuu sünüiki Proverbios 13:11: «Washirüle wanee wayuu uatuwoʼushi ajaʼlajamaateerü tü nuwashirüinkat nuulia, eekajasaʼa chi wayuu aʼyataakai, kooʼomüin kooʼomüin meerü tü nuwashirüinkat». ¿Kasa watüjaka sünainjee tia pütchikat? Tü watüjakat sünainjee shia nnojoliinjanain washapajaain sünain aaʼinraa wanee kasa suulia mojuin sukuwaʼipa watuma. Anuu sünüiki Proverbios 4:18: «Napüna na lotushiikana akuwaʼipa müsü aka saaʼin nuwarala chi kaʼikai, suwasajaa suwasajaa sümapa tü aikat». Wayaawata aaʼu sünainjee tia pütchikat nikirajüin Jeʼwaa shiʼipaʼaya tü nupueulosekat süpüla shiyaawatüin saaʼu tü keeʼireekat naaʼin. Jee wane kasa wayaawataka sünainjee tia pütchikat shia sükooʼomüinraain shiʼipaʼaya nunoula wanee anoujashi süpüla aleewain nia nümaa Jeʼwaa. Nnojoishii waya aleewamaatüin nümaa Jeʼwaa, kakaliasü süpüla wountuin tia. w21.08 8 püt. 1, 3, 4

Wainma kasa waaʼinrüinjatka süpülapünaa sajaʼttüin kasa süpüshuaʼa (Mat. 24:14; Luc. 10:2; 1 Ped. 5:2). Sutuma waʼyataweein nümüin Jeʼwaa, wachajaain maʼin sukuwaʼipa süpüla wakooʼomüinrüin shia. Eeshii na aʼyataakana süchiirua süpüla pürekutsooliinjanain naya, süpüla naʼyataainjanain suluʼu Weteet jee shiale sünain akumajaa otta anouteʼeraa piichi waʼwaajaka aluʼu Maleiwa. Eeshii na aʼyataakana süchiirua süpüla laülaashiinjanain naya napüleerua na wawalayuukana jee shiale süpüla naʼyataain neʼipajee na laülaashiikana (1 Tim. 3:1, 8). Talatakajasaʼa naaʼin Jeʼwaa niʼrapa tü naaʼinrakat na aʼyataakana nümüin (Sal. 110:3). Mojule waaʼin sutuma nnojoluin waʼyataain sünain tü waʼyataweekalü amüin suluʼu nupueulose Jeʼwaa, waküja nümüin Jeʼwaa jamüin waaʼin (Sal. 37:5-7). Wasakira waneinnua wawalayuu laülaakana aaʼin sünain anoujaa süchiki tü waaʼinrajatkat süpüla anain wakuwaʼipa sünain aʼyatawaa nümüin Jeʼwaa jee waaʼinra tü namakat wamüin. Müle shia watuma, eesüjaʼa süpüla saapünüin wamüin tü waʼyataweekalü amüin. w21.08 20 püt. 1; 21 püt. 4

Ana shia wanee wayuu outa aʼwayuuset jee nünüikimaajatü shia Maleiwa, 84 suuyase. Matüjainsat shia ojuʼitaa suluʼujee tü piichi aʼwaajüleekat Maleiwa. Kojutusü nümüin Maleiwa Ana süka waneepiain shia nümaa otta nnojoluin outuin shia süpülapünaa shiʼrüin Kürisüto (Luc. 2:36-38). Maaʼulu yaa, wainma na wawalayuu laülaayuu anakana akuwaʼipa napüleerua na jimaʼaliikana jee na majayünnüükana. Akatchinraasü waaʼin wasakirüle naya süchiki tü kasa anasü neʼrakat sutuma suluʼuin naya nupueulose Jeʼwaa. Kojutushii na wawalayuu laülaayuukana sümüin nupueulose Jeʼwaa. Neʼrüin naya wawalayuukana tü kasa anasü naapakat Jeʼwaa namüin jee tü naapakat sümüin nupueulose. Atüjashii naya süpüleerua nakuwaʼipa sünainjee tü mojukuwaʼipatkat natuma, makalaka eein süpüla watüjain sünainjee nakuwaʼipa jee tü natüjakalü apüleerua (Prov. 18:4). Wachajaale sukuwaʼipa süpüla weʼraajüin naya, akooʼomüinraajeerü tü wanoulakat. w21.09 3 püt. 4; 4 püt. 7, 8; 5 püt. 11, 13

Maʼaka süküjünüin suluʼu Isaías jalouishii maʼin na saʼanasiakana tü pueulokalüirua (Is. 60:5, 16). Nakajee naya wayuukana, ountunüsü süküjünüin tü pütchikat suluʼu 240 mma jee alatüsü suulia 1.000 anüikii süshajünaka aluʼu tü karaloʼutakalüirua. Sutuma müin nülianajeʼerakai saaʼin Jeʼwaa tü pueulokalüirua maaʼulu, naneeküinjatü na wayuukana jaralin kamaainjanain naya. ¿Namaajeenache naya Maleiwa? ¿Namaataajeenapa na sülaülashiikana mma? Mayaainjeʼe jüüjüüin na aʼyataashiikana nümüin Jeʼwaa sümüin tü nachuntakat na sülaülashiikana mma, nnojoliishii naya sünainpünaain poliitika (Roma 13:1-7). Natüjaa aaʼu shiainjatüin anain atuma sukuwaʼipa wayuu tü Nuluwataayakat Maleiwa. Waneejatü sukuwaʼipa tia aluwataayakat suulia sukuwaʼipa suluwataaya wayuu (Juan 18:36, 37). w21.09 17 püt. 13, 14

Nuuʼulapa suulia anoujaa wanee wayuu aikai maʼin püpüla aleewainjachi maʼin pia nümaa Jeʼwaa jee pükaalinjainjana na püpüshikana süpüla naaʼinrüin tiaya. Puunteerü tia paashajeʼerüle tü Bibliakat waneepia sümaa püsakireʼerüin paaʼin sünain jee puʼunawaire sünain tü outkajawaakat. Jülüjataa waaʼin sukuwaʼipa Joanna, ooʼulaashi suulia anoujaa chi süshikai jee tü suwalakat. Anuu sünüiki: «Wanaa sümaa taashajeʼerüin suluʼu tü Bibliakat süchiki Abigaíl, Ester, nüchiki Job, José otta Jesuu, anasü taaʼin sutuma. Jülüjasü maʼin taaʼin tü kasa anasü naaʼinrakat jee jutatüsü taaʼin sutuma». Püküja nümüin Jeʼwaa süpüshuaʼa tü shapaakalü atuma paaʼin. Puchunta nümüin chi Maleiwa aikai apüla waya süpüla pansaain tü jülüjakat paaʼin, süpüla piyaawatüin saaʼu tü alatakat jee süpüla püneeküin tü paaʼinrajatkat (Sal. 32:6-8). Eesü kapüleere pümüin püküjain nümüin Jeʼwaa jamüin paaʼin, niyaawatapejeʼe maʼin saaʼu Jeʼwaa jamüin paaʼin, jee keeʼireesü naaʼin püküjain nümüin tü suluʼukat paaʼin (Éx. 34:6; Sal. 62:7). w21.09 27 püt. 9, 10

Süchikijee tü Pascua eejatkat soʼu juyakat 32, eeʼiranajaasü nukuwaʼipa Jesuu nuʼupala Pedro, Santiago ooʼulaka Juan. Eesüjaʼa chajatüle tia saaʼu wanee uuchi chajatkat Hermón. Anuu sünüiki tü Bibliakat: «Chuwatsü maʼi nuʼupünaa [Jesuu] maa aka naaʼin chi kaʼikai. Otta nüsheʼin, jorojorotsü maʼi» (Mat. 17:1-4). Naapakalaka na aluwataaushikana nünüiki Maleiwa sünain maa: «Anii chi Tachonkai aishikai tapüla. Talatüshi maʼi taya nümaa. Jüüjüü jümata sümüin nünüiki». Sünainjee tü naaʼinrakat naya aluwataaushikana, jaʼyasü naaʼu jüüjüüin naya sümüin nünüiki Jesuu. Meesia wakuwaʼipa maʼaka naaʼin nayakana. Talatüshii maʼin waya süka nuʼunirüin wakuwaʼipa Jeʼwaa nükajee Jesukürisüto, chi wekiipüʼükai (Éf. 5:23, 24). Woonoo sümaa nünüiki Jesuu maʼaka naaʼinrüin shia chi aluwataaushikai Pedro, Santiago ooʼulaka Juan. Waaʼinrule tia, watteerü saalii tü kasa anasü weʼreetkat maaʼulu otta talateerü waaʼin süpüla kaʼikat süpüshuaʼa. w21.12 22 püt. 1; 27 püt. 19

Aʼluwajiraashi nukuwaʼipa wanee anoujashi chejeʼewai Corinto sümaa nuʼwayuuse chi nüshikai. Nüküjain Pablo nujuʼitinnüinjachin naʼakajee na anoujashiikana. Amojujaasü nakuwaʼipa naya anoujashiikana nünainjee chi kaainjalashikai. Eeshii na jülüjakana aaʼin nnojoluin mojuin maʼin tia naaʼinrakat (1 Cor. 5:1, 2, 12, 13). Naapakalaka Pablo mapa süchiki nunouteʼerüin nukuwaʼipa chi kaainjalashikai jee niyaawajaain suulia naainjala. Anuu nünüiki Pablo namüin na laülaashiikana: «Anakaja motüle jaaʼin naainjala nuulia sümaa kamaneeinjanain jia nümüin». Otta nüküjain Pablo jamüin naaʼinrajatka tia soʼu nümüin: «Suulia nuuʼulaajüin suulia anoujaa sütümajee mojuin naaʼin». Amülialaasü naaʼin Pablo naalin chia anoujashi ayaawajaakai suulia naainjala. Nnojotsü keeʼireein naaʼin Pablo niyüülajaainjachin suulia anoujaa saaliijee naainjala. Jee nnojotsü keeʼireein naaʼin nuuʼulaainjachin suulia achuntaa nümüin Maleiwa motuinjatüin naaʼin naainjala (2 Cor. 2:5, TNM; 2:6-8, 11). Amüliajeeshii wayuu na laülaashiikana maʼaka naaʼinrüin shia Jeʼwaa. Nayaawatüle saaʼu na laülaashiikana shiain anain nojuʼitirüle wanee anoujashi naʼakajee na wawalayuukana, naaʼinrüin tia. Shiasaʼa nayaawatüle saaʼu shiimainre niyaawajaain suulia naainjala, nnojoishi nojuʼitirüin nia süka namüliajüin nia. Nnojoire nachiaain wanee anoujashi kaainjalakai, nnojoishijaʼamata namüliajüin nia otta müsü nnojotkai mojushiin namüin tü naaʼinrakat. w21.10 10 püt. 12-15

Jamüsüjaʼa seeshituule pajapü sutuma wanee kasa eesü süpüla alin pümüin motsomüin, süshatamaatüle puulia jee motomaatüle shia paaʼin. Tia müsü aka saaʼin sülanaʼaleere nünüiki wanee paʼaleewain pümüin sümaa nnojoluin naaʼinjeein shia, eepejeʼe süpüla motomaatüin shia paaʼin. Eekajasaʼa eʼikaale maʼin pajapü, oʼunuinjachi pia nümaʼanamüin chi tottootkai süpüla niiyajüin jee niyapüjüin shia, pipennajakuʼu pümüle shia asaaraluujeerü. Shieerü alataka tia nümüin wanee wayuu üttakuʼu sümüle naaʼin, jülüjakuʼu sümüle naaʼin tü kasa mojusü aainjünakat nümüin, mojeerü nukuwaʼipa. Shiakalaka anain maʼin waaʼinrüle tü sümakat tü pütchi süpülajatkat soʼukai. w21.12 12 püt. 15

Nnojorüle anain nümüin wanee laülaashi sukuwaʼipa naʼanaaya wanee wawala, anasü nüsakireʼerüle naaʼin sünain pütchikat tüü: «¿Mojusüche tü kasa naaʼinrakat saashin tü Bibliakat?». Süka nnojoleein nuʼunuin süchiirua tü jülüjakat naaʼin, eeshi süpüla nüsakirüin wanee laülaashi jee niale wanee wawala laülaakai aaʼin sünain anoujaa. Eesü süpüla nekirajaain sünain tü nümakat Pablo süchiki tü sukuwaʼipainjatkat naʼanaaya wanee anoujashi (1 Tim. 2:9, 10). Nnojotsü nüküjain Pablo süpüshuaʼa tü naaʼinrajatkat wanee anoujashi süpüla nüneeküin tü nüsheʼinjatkat. Shia nüküjaka Pablo waneirua pütchi niyaawatüinjatka anainjee tü anakat noʼuluʼu Maleiwa. Süpüla nayaawatüin saaʼu na laülaashiikana choʼujaale nachiaain wanee wawala, jülüjainjatü naaʼin laülaale naaʼin jee anale sukuwaʼipa naʼanaaya. Sotuinjatü waaʼin eein süpüla nnojoluin wanaawain tü naneekakat sünain wanee kasa piamashii wawalayuu laülaakana aaʼin sünain anoujaa. Eepejeʼe anale tü kasa naneekakat waneʼewai nakua. Makalaka nnojoluinjatüin wapüleeruain naaʼin na wawalayuukana süpüla naneeküin tü anakat saaʼin wamüin. w22.02 16 püt. 9, 10

Wainma kasa anasü weʼraka süka miyoʼuin naalin wapüla na wawalayuukana. Anuu soʼutku tia saashin tü Bibliakat: «Jülüja paaʼin tü shiimainkat otta miyoʼuinjatü maʼin saalin wayuu püpüla [...]. Müle shia putuma, aneechi pia otta kekiijeechi pia nuʼupala Maleiwa otta suʼupala wayuu». «Chi wayuu aishaatakai apüla wayuu eʼreechi kasa anasü» otta «chi wayuu achajaakai sukuwaʼipa süpüla naaʼinrüin kasa anasü namüin na waneinnua sümaa aishaatain maʼin naya nüpüla, kateerü noʼu» (Prov. 3:3, 4; 11:17, noota; 21:21). Aküjünüsü suluʼu tia wetsiikulokalüirua apünüinsü kasa miyoʼuinjatka aaʼujee saalin wayuu wapüla. Palajana, kojutushii waya noʼuluʼu Maleiwa. Piama, aneerü wakuwaʼipa. Miyoʼule naalin wapüla na wawalayuukana, aleewajiraajeena waya namaa. Otta apünüin, weʼreerü naʼanasia Maleiwa maʼaka saaʼin kateerüin woʼu nutuma waneepia. Makalaka anain maʼin waaʼinrüle tü nümakat Jeʼwaa, tü makat: «Miyoʼuinjatü maʼin jaalin jüpülajiraa sümaa jümüliajiraain jaaʼin». w21.11 8 püt. 1, 2

Piyaawatüle saaʼu kooʼomüinjatüin sütsüin punoula sutuma wanee kasa alataka pümüin, nnojo sümalajaain paaʼin. Shia anaka aluʼu püchajaale sukuwaʼipa süpüla pükatsüinrüin shia. Puʼuraaja nümüin Jeʼwaa süka süpüshuaʼa paaʼin soʼunnaa tü alatakat pümüin. Ana pümüin pükaalinjünüin natuma püpüshi otta natuma na wawalayuukana. Puuʼulaale nükaalinjain pia Jeʼwaa maaʼulu soʼunnaa tü alatakat pümüin, piʼitaajeerü maʼin paaʼin sünain nükaalinjeechin pia soʼunnaa tü alateetkat pümüin mapeena. Nüküjain Jesuu namüin na nikirajüinkana jamüin kooʼomüinjatka nanoula. Nütüjaapejeʼe saaʼu nükaalinjeenain naya Jeʼwaa süpüla nalatüin süchikumüin tü alateetkat namüin (Juan 14:1; 16:33). Jee müsia, nütüjaa aaʼu watteerüin saalii wayuu oʼttaajeetka süchikumüin tü müliaa miyoʼusükat sutuma kanoulain maʼin naya (Alat. Map. 7:9, 14). Eeshi süpüla naʼakain pia naya wayuukana püchajaale maʼin sukuwaʼipa pükatchinrüin punoula (Heb. 10:39). w21.11 25 püt. 18, 19

Maaʼulu yaa nnojotsü waʼatapajüin naaʼinmajüinjanain waya na aapiee nümaʼanajeejanakana Maleiwa. Watüjaapejeʼe saaʼu nnojoleechin amüloulin chi eekai niʼitaain naaʼin nünain Maleiwa. Alüʼütsü maʼin tü kaʼi atüjaaneetkalü oʼu shiimainrejeʼe weʼitaain waaʼin sünain naaʼinmajeenain waya Jeʼwaa. Nushutapa waaʼu Gog chi chejeʼewaikai Magog, eesüjaʼa süpüla jülüjain waaʼin nuʼuteerüin waaʼin. Chi Gog chejeʼewaikai Magog münakai, naya na sülaülashiikana mma oonoojeenaka wekiira. Müsüjeseʼe weʼitaainjatüin maʼin waaʼin sünain naaʼinmajeenain waya Jeʼwaa otta nuʼtteʼereenain waya noulia. Meena waya namüin na sülaülashiikana mma maʼaka saaʼin anneerü maaʼinmajuuka (Ezeq. 38:10-12). Nakanajeena waya naaʼinruʼu süka maʼapülain waya jee matüjain waya atkawaa. Nnojoleena neʼrüin na aapiee wamaajanakana aaʼinmajaka waya suulia jamajüin waya natuma. Ainkeerü neʼe naaʼin nashutapa naaʼu na nümaajanakana Jesuu süpüla noʼtteʼerüin waya noulia (Alat. Map. 19:11, 14, 15). w22.01 6 püt. 12, 13

Keeʼireesü naaʼin Jeʼwaa kojutuinjanain wamüin na wawalayuukana maʼaka kojutuin naya nümüin. Waaʼinrüinjatü kasa eeka eein süpüla waaʼinmajüin na wawalayuukana. Müleka airuʼurule wanüiki nümüin wanee wawala wakumajamaata sukuwaʼipa tia. «Nnaweerüjaʼa nukuwaʼipa nümüiwaʼa, nnojoishi taluwataalain nia», nnojoishii müinjanain waya. Eeshii wawalayuu nnnojoliikana jameein amüin pütchi. Müsü nakuwaʼipa sutuma aletüjülüin nepijia natuma na kachoinkana naya. Eeshii na jekenakana sünain anoujaa kapüleekana amüin motuin naaʼin naainjala na waneinnua. Wakumajamaata sukuwaʼipa wanee mojujirawaa. Eere wanee wawala nnojotka jameein pütchi nümüin, niyaawatüinjatü saaʼu nunouteʼerüinjatüin nukuwaʼipa. Naaʼinrüinjatü tia süpüla anainjatüin naaʼin jee anainjatüin naaʼin na wawalayuukana. w21.06 21 püt. 7

Niyaawata aaʼu Jesuu jamüin paaʼin. Anasü waaʼin nümaa wanee waʼaleewain ayaawatakai saaʼu jamüin waaʼin shapaapa maʼin waaʼin, shialeekajaʼa sülatüle nümüin tü alatakat wamüin. Müsia nukuwaʼipa Jesuu wamaa, chi waʼaleewainkai. Nütüjaa aaʼu matsüinre waaʼin jee choʼujaale wakaalinjünüin. Otta müsia niʼraajüin wakuwaʼipa jee nükaalinjeena waya soʼu tü kaʼi choʼujaakalü oʼu shia wamüin (Heb. 4:15, 16). Wacheka wakaalinjünüin nutuma Jeʼwaa maʼaka nücheküin Jesuu nükaalinjünüin nutuma wanee aapiee wanaa sümaa chajachin nia Getsemaní. Eeshii süpüla nükaalinjain waya Jeʼwaa sükajee wanee karaloʼuta, wanee video, wanee pütchi ekirajünaka otta nuwaraijaale waaʼu wanee laülaashi jee niale wanee waʼaleewain laülaakai aaʼin sünain anoujaa (Luc. 22:39-44). Naapeerü Jeʼwaa wanee anaa pümüin. ¿Kasa naaʼinreetka Jeʼwaa süpüla nükatchinrüin waaʼin? Naapeerü wanee anaa wamüin woʼuraajapa nümüin, «isasü wachiki wayaawatüin saaʼu tia anaa naapakat wamüin, saaʼu wayuuin neʼe waya» (Filip. 4:6, 7). w22.01 18 püt. 17-19

Lotusü nukuwaʼipa Jehová sünain süpüshuaʼa tü kasa naaʼinrakat. Eepejeʼe süpüla kapüleein wamüin weʼitaain waaʼin nanain na wayuu nüneekakana süpüla nuʼunirüin wakuwaʼipa. Eesüjaʼa jülüjale waaʼin naaʼinrüin tü nachekakat neʼe namüiwaʼa suulia tü nüchekakat Jehová. Shiasaʼa nnojorüle weʼitaain waaʼin nanain, nnojotsüjaʼamata weʼitaain waaʼin nünain Jehová. Maaʼulu nuʼunirüin Jehová sukuwaʼipa nupueulose nükajee «chi achepchiee oonookai otta kekiikai maʼin» (Mat. 24:45, TNM). Achepchieekai chii jülüjasü naaʼin tü waʼyataainkat sainküin mmakat süpüshuaʼa otta naküjain namüin na laülaashiikana tü naaʼinrajatkat wapüleerua maʼaka naaʼinrapuʼuin na laülaashii jülüjakana aaʼin na anoujashii namaiwajanakana. Otta na laülaashiikana jülüjainjatü naaʼin saainjünüinjatüin tü aluwataanakalü anain. Jüüjüüle waya sümüin tü suluwataakalü anain waya nupueulose Jehová otta na laülaashiikana, jaʼyeerü waaʼu weʼitaain waaʼin sünain lotuin süpüshuaʼa tü kasa naaʼinrakat Jehová. w22.02 4 püt. 7, 8

Anataʼaleeshiijaʼa maʼin waya süka waküjaliin pütchi nüchiki Jeʼwaa. Talatüshii waya wanaa sümaa wakaalinjain wanee wayuu süpüla niʼyataainjachin nümüin Jeʼwaa (Aluw. 13:48, TNM). Talatüsia maʼin waaʼin maʼaka talatüin maʼin naaʼin Jesuu wanaa sümaa naküjain na nikirajüinkana nümüin anain tü nakuwaʼipakat sünain aküjaa tü pütchi anasü nüchikikat Maleiwa (Luc. 10:1, 17, 21). Anuu wanee pütchi nüküjaka Pablo nümüin Timoteo jülüjainjatka naaʼin: «Ee paaʼin sünain tü pukuaippakat suulia paaʼinrajüin kasa mojusü je suulia pikirajüin sünain kasa naatajatü. Müleka püchecherüle paaʼin sünain tüü, oʼtteʼenneena na aapajakana pünüiki. Je müshia piakaʼiya, oʼttaweechi» (1 Tim. 4:16). Wayaawatüin sünainjee tia pütchikat eein süpüla suʼttaain wayuu sutuma waküjain pütchi. Jülüjainjatpejeʼe waaʼin wakuwaʼipa süka suluʼuin waya nupueulose Jeʼwaa. Aneesü maʼin wakuwaʼipa waneepia süpüla kojutuinjachin watuma Jeʼwaa jee süpüla sütüjaanüin aaʼu pansaain wakuwaʼipa wanaapünaa sümaa tü waküjakalü achiki (Filip. 1: 27). Eejüsü waaʼin sünain tü wekirajüinjatkat yapale watuma tü wanüikinjatkat sünain aküjaa pütchi otta wachuntule nümüin Jeʼwaa yalayalainjatüin waaʼin nutuma sünain ekirajaa wayuu nüchiki. w21.10 24 püt. 1, 2

Chi wayuu eeʼiratakai nukuwaʼipa, müshi naʼatakai naaʼin nünain wanee nüsheʼin jeketü süka niiʼiratüin tü jülüjakat naaʼin süpüla jülüjain naaʼin tü jülüjakat naaʼin Jehová jee nüshatüin nukuwaʼipa. ¿Kasa waaʼinrajatka süpüla müin waʼatakai saaʼin wanain tia akuwaʼipaakat? Shia wooʼulaainjatüin nunouteʼerüin Jehová tü jülüjakat waaʼin otta tü waaʼinrakat süpüla washatüin tü akuwaʼipaa eekat sutuma tü nüpülainkat. Jamüshijaʼa wanee wayuu eeʼiratakai nukuwaʼipa, aishi Jehová nüpüla otta na aʼyataakana nümüin (Mat. 22:36-39). Ayatüsia talatüin naaʼin mayaainjeʼe niʼrüin müliaa (Sant. 1:2-4). Paaʼinwajiraasü wayuu nutuma (Mat. 5:9). Nnojoishi kashapajaaralin otta kamaneeshi nia namüin na waneinnua (Col. 3:12, 13). Kamalainsü nümüin aaʼinraa tü kasa anasükat (Luc. 6:35). Saaʼujee tü naaʼinrakat, atüjaana aaʼuchi kanoulain maʼin nia nünain chi Washi iipünajachikai (Sant. 2:18). Jaʼitairü mojulaajüin wayuu nümüin, nnojoishi jashichin (Tito 3:2). Achechetshi naaʼin suulia tü ooʼulakünakalü aka naaʼin (1 Cor. 9:24, 25, 27). Süpüla weeʼiratüinjatüin wakuwaʼipa müinjatü wakuwaʼipa maʼaka saaʼin tü aküjünakat suluʼu Galacia 5:22, 23 otta waneirua pütchi eekat suluʼu tü Bibliakat. w22.03 8 püt. 3, 4

Na laülaashiikana eesü süpüla nashatüin nukuwaʼipa chi aluwataaushikai Pablo naküjale pütchi eepünaale naya (Éf. 6:14, 15). Maʼaka naaʼinrüin shia Pablo, eeshii süpüla nekirajüin na waneinnua naküjapa pütchi namaa maʼaka naaʼin na aʼyataakana neʼipajee na laülaashiikana (1 Ped. 5:1, 2). Nnojotsü anain nnojorüle naaʼinmaain maʼin aküjaa pütchi na laülaashiikana sutuma wainmain maʼin naʼyataain (Mat. 28:19, 20). Süpüla anainjatüin maʼin sukuwaʼipa naʼyataain eesü kaʼi «nnojo», nameetka oʼu suchuntunule namüin naaʼinrüinjatüin wanee kasa. Sülatüle tia nümüin wanee laülaashi eeshi süpüla naashajaain nümaa Jehová süchiki tia. Eesüjaʼa niyaawatüle saaʼu nnojoleerüin naaʼinmaain waneirua kasa anaka saapünüle nümüin sooʼomüin aʼyatawaa, maʼaka saaʼin nuʼwaajüin Maleiwa sümaa nüpüshi semaanawai, nujuʼituin sünain aküjaa pütchi otta nikirajüin nüchonnii sünain aküjaa pütchi. Nütüjaa aaʼu Jehová aneein natuma sukuwaʼipa süpüshuaʼa tü naʼyataainkat. w22.03 27 püt. 4; 28 püt. 7, 8

Wanaa sümaa wekirajünapuʼuin sünain tü Bibliakat, eeshii mmorüle waya seema waküjaliin pütchi nüchiki Jeʼwaa. Eesü jülüjale waaʼin iseerüin wachiki waküjain pütchi sainküin piichi. Eeshii mmorüle waya saaʼu eein süpüla jashichin wamüin wapüshi jee waʼaleewainyuu. Jülüjale waaʼin tia, eesü süpüla wayaawatüin saaʼu jamüin naaʼin chi wekirajüinkai. Nüküjain Jesuu eejeenain waneinnua wayuu mmoleenaka saaʼujee tia. Nütütüleʼerapejeʼe naaʼin Jesuu na nikirajüinkana süpüla nnojoluinjanain nooʼulaain suulia aʼyatawaa nümüin Jeʼwaa sünainjee mmoluin naya (Mat. 10:16, 17, 27). Wakaalinja chi wekirajüinkai süpüla naashajaain süchiki tü nikirajaakalü anain. Eeshiijaʼa mmorüle na nikirajüinkana Jesuu wanaa sümaa naluwataanüin sünain aküjaa pütchi nutuma Jesuu. Nükaalinjapejeʼe naya Jesuu süpüla natüjaain saaʼu kasainjatüin naküjain otta jaraliinjanain naküjain amüin pütchi (Mat. 10:5-7). ¿Kasa waaʼinrajatka süpüla washatüin tü naaʼinrakat Jesuu? Waküja nümüin chi wekirajüinkai tü naaʼinrajatkat süpüla nüküjain pütchi. Wasakira nia müleka niʼraajüle wanee wayuu aneetka atuma nukuwaʼipa naaʼinrüle tü sümakat tü Bibliakat. Süchikijee tia, wakaalinja nia süpüla nütüjain süpüleerua tü nünüikinjatkat nikirajapa. w21.06 6 püt. 15, 16

«Ojuʼichijaamaatüsü tü oikaaleekalüirua otta tü piichikalüirua». «Mmotshaatasü tü wayuukalüirua [...]. ‹Motsoʼo sümaʼa›, eeshii eeka namüin, kamaʼapejeʼe maʼin tamüin tayakai». Tia shia nanüiki noʼutku na oʼttaakana süchikijee sukutkujaain mmaka chaa Nepal soʼu 2015. Maaʼulu yaa, müsü sülianajeʼennakai saaʼin tü pueulokalüirua. Anuu nünüiki Ageo, wanee nünüikimaajachi Maleiwa: «Anuu nünüiki Jeʼwaa chi wainmakai asurulaatse: ‹Soʼu palit kaʼi, meerü talianajeʼerakai saaʼin süchikuaʼa tü sirumatuʼukat otta tü mmakat ›» (Ageo 2:6). Eesü kasa mojusü sutuma sukutkujaain mma. Aluʼujasaʼa tü nümakat Ageo süchiki müinjatüin sülianajeʼennakai saaʼin tü pueulokalüirua nutuma Maleiwa, eesü kasa anasü sünainjee. Anuu nünüiki Jeʼwaa: «Meerü talianajeʼerakai saaʼin süpüshuaʼa tü pueulokalüirua otta ekeroteerü tü saʼanasiakat suluʼu piichikat tüü jee anaʼleejeeria shia tatuma». w21.09 14 püt. 1-3

Aleewashii maʼin waya nümaa wanee wayuu waashajaale waneepia nümaa jee waküjale süchiki tü alatawaikat wamüin. Müsia neʼe wakuwaʼipa nümaa Jeʼwaa, aleeweena waya nümaa waashajaale waneepia nümaa. Jaʼyeerü waaʼu weʼitaain waaʼin nünain Jeʼwaa sümaa watüjaain saaʼu alin waya nüpüla, waküjale nümüin tü suluʼukat waaʼin, tü jülüjakat waaʼin jee tü shapaakalü atuma waaʼin (Sal. 94:17-19; 1 Juan 5:14, 15). Namaa waya na wawalayuukana. Anasü wakuwaʼipa nutuma Jeʼwaa nakajee na wawalayuukana (Sant. 1:17). Kapülasü naaʼin Jeʼwaa wakuwaʼipa waneʼewai wakua süka nüntirüin waya naʼakamüin na wawalayuu aikana apüla waya (Prov. 17:17). Nüküjain chi aluwataaushikai Pablo suluʼu tü karaloʼutakat Colosas eein wawalayuu akaalinjakana nia sümaa nümüliajünüin natuma (Col. 4:10, 11). Akaalinjünüshiaʼaya Jesukürisüto natuma waneinnua naʼaleewainyuu otta kojutusü nümüin tia. Naʼakajee na akaalinjakana nia, eeshii aapiee otta wayuu (Luc. 22:43, 44). Waküjale nümüin wanee wawala eekai laülaain aaʼin sünain anoujaa süchiki tü shapaakalü atuma waaʼin, nükaalinjeena waya. w21.04 24 püt. 14-16

¿Kasa waaʼinrajatka aire maʼin wamüin tü naainjakat wamüin wanee wawala? Wachajaamaatüinjatü sukuwaʼipa süpüla anajiraainjanain waya. Waküja nümüin Jeʼwaa jamüin waaʼin otta wachunta nümüin anaiwa nukuwaʼipa nutuma chia wawalakai. Wachunta nümüin nükaalinjaiwa waya süpüla jülüjain waaʼin tü kasa anasü eekat sünain nukuwaʼipa chia wawalakai maʼaka naaʼinrüin shia Jeʼwaa (Luc. 6:28). Müleka ayatüle alin wamüin tü naainjakat wamüin wakumaja sukuwaʼipa süpüla waashajaain nümaa süchiki tia (Mat. 5:23, 24). Waashajaapa nümaa anasü jülüjale waaʼin nnojolin naainjeein tia. ¿Kasa waaʼinrajatka nnojoire anajiraweein nia wamaa? Anuu tü sümakat tü Bibliakat: «Jaaʼinra tü anasükat shiʼipajee eekai shiʼrülüin wayumüin jümüin». Nnojo kuʼlajaain waaʼin nümaa chi wawalakai (Col. 3:13). Nnojotsü anain üttakuʼu müle waaʼin nünain süka eein süpüla sumojujaain wakuwaʼipa nümaa Jeʼwaa. Nnojorüle wooʼulaain suulia anoujaa sutuma tü kasa naaʼinrakat na waneinnua, jaʼyeerü waaʼu alin maʼin wapüla Jeʼwaa sooʼopünaa kasa süpüshuaʼa (Sal. 119:165). w21.06 23 püt. 15