¿Shiimainche nuʼunajachin chaa iipünaa «chi kaainjaraikai kachetüshikai wanaa nümaa» Jesuu?

Natüjawee aaʼu tia na wayuukana sutuma tü nümakat Jesuu nümüin chia wayuukai. Müshi nia nümüin: «Shiimain tü tamakat pümüin jooluʼu: eejeechi pia tamaa suluʼu tü Paʼaraiisükat» (Lucas 23:43, TNM). Nnojotsü nüküjüin Jesuu jalain tia Paʼaraiisükat. ¿Shiache nüküjeeka achiki Jesuu chainjachin chi kaainjaraikai nümaa chaa iipünaa?

Wekirajaa sünain tia. Na anoujashii chainjanakana chaa iipünaa, woutiisashii naya jee aneekünüshii naya nükajee chi Naaʼinkai Maleiwa (Juan 3:3; Juan 3:5, TNM). Akaʼaya naya, naaʼinrüinjatü tü nuluwataakalü anain Maleiwa otta nnojoishii naya aʼluwajüinjanain sükorolo wayuu, lotuinjatü sukuwaʼipa tü kasa naaʼinrakat jee amülialaainjatü naaʼin saalin wayuu (1 Corinto 6:9-11). Suʼunnaa katüin noʼu yaa Mmapaʼa, waneepiainjana naya nümaa Maleiwa jee nümaa Jesuu (Lucas 22:28-30; 2 Timoteo 2:12). Naaʼinrüle süpüshuaʼa tia naya anoujashiikana, asoʼiraajeerü naaʼin chaa iipünaa süpüla sacerdooteinjanain naya jee naluwataainjanain wanaa nümaa Jesuu soʼu miit juya (Alateetkat Mapeena [Apocalipsis] 20:6, TNM).

Chi wayuu naashajaakai amaa Jesuu, ouktüshi sümaa kaainjalain nia (Lucas 23:32, 39-41). «Motojoyoo taya paaʼin puʼttapa sünain aluwatawaa», müshi nia nümüin Jesuu (Lucas 23:42). Nnojoipejeʼe nia woutiisain wanaa sümaa tia, nnojoishi nia nikirajüin Jesuu, nnojoishi nia aneekünüin nükajee chi naaʼinkai Maleiwa süpüla oʼunaa chaa iipünaamüin, nnojoishi waneepiain nia nümaa Maleiwa jee nnojotsü anain nukuwaʼipa noʼuluʼu Maleiwa. Sutuma tia, watüjaa aaʼu nnojoluin nüküjüin Jesuu nümüin chia wayuukai chainjachin nia chaa iipünaa, süka jamüin, nnojoluin süpüla nuluwataain wanaa nümaa Jesuu jee wanaa namaa na nikirajüin Jesuu waneepiakana nümaa (Roma 2:6, 7).

Weʼitaa wanee sukuwaʼipa. Nuʼluwajüle wanee wayuu nneerü puulia otta niyaawajaale suulia naainjala sümaa nuchuntüin pümüin süpüla motuinjatüin paaʼin naainjala, eeshijaʼa süpüla nnojoluin püpüreesajirüin nia. ¿Piʼitaajeeiche nia sünain aʼyateʼera pünneetse jee shiale sünain aaʼinmajaa püpüshi? Nnojottaa. Nieechi piʼitaaka sünain tia wanee wayuu eekai piʼraajüin sümaa lotuin nukuwaʼipa. Akaʼaya na anoujashii chainjanakana chaa iipünaa, neeʼiyatüin sünain lotuin nakuwaʼipa otta noonoojeenain nümaa Maleiwa chapa naya chaa iipünaa sünain aluwatawaa saaʼu wayuu (Alateetkat Mapeena 2:10). Chi kaainjaraikai nnojotsü niiʼiyatüin sükajee nukuwaʼipa paala sünain lotuin nukuwaʼipa jee noonooin nümaa Maleiwa.

Nnojotsü shiain nüküjüin Jesuu nümüin chia wayuukai chainjachin nia nümaa chaa iipünaa soʼuleʼeya kaʼikat tia, süka jamüin, nnojolin nuʼunüin Jesuu chaa iipünaamüin soʼu tia, shiinaluʼujachi nia tü mmakat soʼu apünüin kaʼi (Mateo 12:40; Marcos 10:34). Akaʼaya Jesuu süchikijee süsoʼiraain naaʼin, nnojoishi nia oʼunamaatüin chaa iipünaamüin, yaajachi nia yaa mmapaʼa soʼu pienchi shikii kaʼi (Aluwataaushikana 1:3, 9).

¿Jaratche tü Paʼaraiisü nüküjakalü achiki Jesuu nümüin chi kaainjaraikai? Nüsoʼiraapa aaʼin chia wayuukai, yaajeechi nia suluʼu tü Paʼaraiisükat yaa Mmapaʼa nuluwataapa Jesuu (Aluwataaushikana 24:15; Alateetkat Mapeena 21:3, 4). Pikirajaweere sooʼomüin süchiki tü Paʼaraiisükat jee süchiki tü waaʼinrajatkat naashin Maleiwa süpüla suluʼuin waya tü Paʼaraiisükat, paashajaa nümaa wanee aküjüi pütchi nüchiki Jeʼwaa süpüla nikirajüin pia.