SUSOUKTAKA EʼIPAJEE TÜ WIWÜLIAKAT
¿Jamüshii wachuntajanakaʼa nümüin Maleiwa nüntirüinjatüin tü Nuluwataayakat?
¿Pütüjawee aaʼu sooʼomüin süchiki Nuluwataaya Maleiwa jee süchiki tü saaʼinrajatkat wapüleerua?
Tü Nuluwataayakat Maleiwa chasü chaa iipünaa. Niʼiküin Jesuu na nikirajüinkana sünain oʼuraajaa nümüin Maleiwa süpüla nüntirüinjatüin tü Nuluwataayakat yaa Mmapaʼamüin. Shia neʼe Nuluwataaya Maleiwa lotuinjatka atuma sukuwaʼipa kasa süpüshuaʼa jee müsia eeinjatka atuma anaa aaʼin. Isasü nachiki na aluwataaliikana saaʼu tü mmakat najaʼttirüin tü kaainjarannuukalüirua, tü kasa mojusü aainjünakat sümüin wayuu jee tü ayuuliikat, akaajasaʼa tü Nuluwataayakat Maleiwa, sajaʼttireerü süpüshuaʼa tia. Nia eʼitaanaka Jesukürisüto nutuma Maleiwa süpüla nuluwataainjachin suluʼu tü Nuluwataayakat otta nüneeküin waneeinnua anoujüshii süpüla naluwataainjanain wanaa nümaa Jesuu. ( Paashajeʼera Lucas 11:2, TNM otta 22:28-30.)
Najaʼttireena Maleiwa na nüʼünüükana soʼu palitchoin kaʼi. Naainjeerü tia sükajee tü Nuluwataayakat. Wanaa sümaa wachuntüin nümüin Maleiwa nüntirajatüin tü Nuluwataayakat, shia wachuntaka nümüin niainjachin neʼe aluwataaka waaʼu yaa mmapaʼa. ( Paashajeʼera Daniel 7:13, 14 otta Alateetkat Mapeena [Apocalipsis] 11:15, 18.)
¿Jamüsü aneetka sukuwaʼipa wayuu sutuma Nuluwataaya Maleiwa?
Nia anaka Jesuu süpüla aluwatawaa saaʼu wayuu süka sümülialaain naaʼin saalii. Pülashi maʼin nia süka Nüchoin nia Maleiwa. Makalaka eein süpüla nükaaliinjüin napüshuaʼa na achuntakana kaaliinwaa nümüin chi Nüshikai. ( Paashajeʼera Salmo 72:8, 12-14.)
Aneerü maʼin nakuwaʼipa napüshuaʼa na wayuu aaʼinrakana tü nümakat Maleiwa otta achuntaka süka süpüshuaʼa naaʼin nüntirajatüin Maleiwa tü Nuluwataayakat. Talatashaateerü maʼin paaʼin pikirajaale sünain tü Wiwüliakat süchiki tia aluwataayakat. ( Paashajeʼera Lucas 18:16, 17 otta Juan 4:23, TNM.)