PÜTCHI SÜNAINKA SÜTA TÜ REWIISÜTAKAT | ¿JALAKUWATSÜ OʼUNÜIN NAAʼIN WANEE WAYUU OUKTAPA NIA?

¿Kasa alataka nümüin wanee wayuu ouktapa nia?

Wayuu miyoʼuyuu otta tepichiirua jutkatakana nüʼütpaʼa müliashii

«Ouktüle wanee wayuu anamia, chainjachia taaʼinruʼu iipünaamüin. Otta müshia chi mojulaashikai, ojutünüinjachia taaʼinruʼu saʼaka siki jee eeshii na chainjanakana suluʼumüin tü purgatorioa münakat. Nnojoipejeʼe mojulaain maʼin taya süpüla tojutünüinjachin saʼaka siki ouktapa taya. Nnojotsü tayaawatüin aaʼu jaraliinjanain chain suluʼu tü purgatoriokat. Yüüü..., nnojotpuʼusü taashajeʼerüin tü sümakat tü Wiwüliakat süchiki tü ouktaakat. Shia tanoujapuʼuka neʼe tü sümakat wayuu.» (Lionel.)

«‹Ouktapa wayuu, oʼunüsü tü saaʼinkat chaa iipünaamüin›, münapuʼushi neʼe taya. Müsü alawaayaakai saaʼin tamüin tia. Ouktapa wanee wayuu, nnojoishi jalakualin.» (Fernando.)

Eesüjaʼa jülüjüirüle paaʼin tüü: «¿Kasa alataka nümüin wanee wayuu ouktapa nia? ¿Müliashiiche na wapüshi ouktüinnapakana? ¿Weʼreenache naya nachikuaʼa soʼuweena wanee kaʼi? ¿Jaraleetche aküjaka wamüin tü shiimainkat süchiki tü ouktaakat? Anashii wekirajaale sünain tü sümakat tü Wiwüliakat süchiki tia. Wekirajaa palajana kasain alatüin nümüin wanee wayuu ouktapa nia.

Ouktapa wanee wayuu

TÜ SÜMAKAT TÜ WIWÜLIAKAT: «Na wayuu katüshiikana oʼu, natüjaa aaʼu oukteenain naya soʼu wanee kaʼi; akanasaʼa na ouktüshiikana, nnojotsü kasain natüjaain aaʼu süka ouktüinnapain naya. Nnojotsü kasain naʼyataain anain, nnojotsü kasain natüjaain aaʼu [...] apüleerua suluʼu tü Seolkat.b» (Eclesiastés 9:5, 10, TNM.)

«Tü Seolkat» shia eere nojoitünüin wanee wayuu ouktapa nia. Niʼikünapa wanee wayuu, nnojoishi jalakualin nia. Jülüja waaʼin tü nümakat Job süchiki tia. Soʼuleʼeya wanee kaʼi, ouktüshii napüshuaʼa na nüchonniikana jee amülouisü tü nuwashirüinkat. Süchikijeechon tia, ayuuijaashi nia, niʼrüin nümüliala sutuma sajaʼttüin tü nütakat. Nümakalaka Job nümüin Maleiwa: «Kasataalejeseʼe puunjulüin taya suluʼu tü Seolkat. [«saʼaka siki», saashin La Sagrada Biblia, de Guillermo Jünemann]» (Job 1:13-19; 2:7; 14:13, TNM). Nütüjaa aaʼu Job müin neemeraainjachikai aaʼin nojoitünapa. Nnojotsü awataain nikiiruʼumüin Job müliainjachin nia saʼaka siki ouktapa nia.

Watüjaajeerü aaʼu kasain alatüin nümüin wanee wayuu ouktapa nia müleka wekirajaale nachiki na wayuu asoʼiraakana aaʼin paala sümaiwa saashin tü Wiwüliakat (paashajeʼera tü pütchikat, «Mekiisalii wayuu asoʼiraakana aaʼin nachikuaʼa»).

Na wayuu asoʼireʼennakana aaʼin saashin tü Wiwüliakat, «anasü wakuwaʼipa chaa eejanale waya» nnojoishii müin naya, «mojusü wakuwaʼipa chaa eejanale waya» nnojoishii müin nayaʼayaa. Jamüsüjaʼa müleka shiimainrejeʼe tia, ashajünüsüjeʼe suluʼu tü Wiwüliakat, ¿aashi müin? Ouktüle wanee wayuu nnojotsü kasain jülüjüin naaʼin, nnojoishi nia aashajaainya, ouktüin nia. Müshijaʼa aka naaʼin chi wayuu eekai nutunküin. Jamüshijaʼa wanee wayuu nutunküle, makutulaainreesai. Saashin tü Wiwüliakat, wanaa sümaa ouktüin David müshi nutunkakai aaʼin, akaʼaya neʼe nukuwaʼipa Estebanya (Aluwataaushikana 7:60, TNM; 13:36, TNM).

¿Weʼreenache nachikuaʼa na wayuu ouktüinnapakana? ¿Achijinneenache naya nachikuaʼa?

a Naashin na anoujakana sünain tia, ouktapa wanee wayuu müliasü naaʼin chaa eemüinre nüntüin süpüla sülaʼajaanüinjatüin tü naainjalakat nuulia. Shiasaʼa süchikijee tia, oʼunaajaa nümüin chaa iipünaamüin.

b Eere nojoitünüin wanee wayuu, Seol münüsü süka hebreo. Akaʼaya neʼe tü Hades münakat süka griego shiaʼaya neʼe. Suluʼu waneeirua Wiwülia «saʼaka siki» münüsü tia pütchikat. Nnojotpejeʼe süküjüin tü Wiwüliakat eein wanee siki eere nujutünüin wanee wayuu ouktapa nia.

MEKIISALII WAYUU ASOʼIRAAKANA AAʼIN NACHIKUAʼAc

Süchon wanee wayuu oukta aʼwayuuset Asoʼiraasü naaʼin nutuma Elías chi süchonkai wanee wayuu oukta aʼwayuuset chejeʼewatkat Sarepta (1 Reyes 17:17-24).

Wanee jintüi chejeʼewaikai Sunem Asoʼiraasü naaʼin wanee jintüi chejeʼewai Sunem nutuma Eliseo. Nüsaajirakalaka nüshi chi jintüikai jee tü niikat (2 Reyes 4:32-37).

Wanee wayuu ojoitünüinjachiyaakai Ojunaanüshi wanee wayuu ouktüshi eejachire niʼitaanüin Eliseo. Shiasaʼa sutuma nujutuuin saaʼu niipüse Eliseo, asoʼiraasü naaʼin chia wayuukai (2 Reyes 13:20, 21).

Süchon wanee wayuu oukta aʼwayuuset chejeʼewatka Naín Asoʼiraasü naaʼin nutuma Jesuu süchon wanee wayuu chejeʼewatka Naín. Nia waneeshikaʼiya süchon. Alüʼüjünüinjachia nia chaa amuuyuupaʼamüin (Lucas 7:11-15).

Nüchonkat Jairo Nuchuntüin Jairo nümüin Jesuu süpüla niiyajüin tü nüchonkat. Laülaashi Jairo suluʼu tü ekirajüleekat tü judíokalüirua. Mayaainjeʼe ouktüin tü nüchonkat nüchikiruʼu, ayatüsia nüsoʼireʼerüin saaʼin Jesuu süchikuaʼa (Lucas 8:41, 42, 49-56).

Lázaro, chi naʼaleewainkai Jesuu Pienchi kaʼi süchikijee nünaajaain Lázaro, asoʼireʼennüsü naaʼin nüchikuaʼa nutuma Jesuu. Watta saalii wayuu eʼrajaka sukua tia (Juan 11:38-44).

Dorcas Nüsoʼireʼerüin saaʼin Pedro süchikuaʼa Dorcas, wanee anoujasü akaaliinjüt maʼin (Aluwataaushikana 9:36-42).

Eutico Nüsoʼireʼerüin naaʼin Pablo nüchikuaʼa Eutico, wanee jimaʼai ouktaleekai sutuma nujutuuin iipünaajee suluʼujee wanee wentaana (Aluwataaushikana 20:7-12).

c Shia kojutüleeka maʼin wamüin süsoʼiraain naaʼin Jesuu. Naata süsoʼireʼeria naaʼin Jesuu noulia na wayuu asoʼiraakana aaʼin saashin tü Wiwüliakat. Wekirajaajeerü anain tia sünain tü wanee pütchikat.