PÜTCHI SÜNAINKA SÜTA TÜ REWIISÜTAKAT | PIYAAWATEERÜ AAʼU TÜ SÜMAKAT TÜ WIWÜLIAKAT
¿Jamüsü anaka waashajeʼerüle tü Wiwüliakat?
«Tü Wiwüliakat shia wanee karaloukta eʼraajünakat maʼin. Nnojotpajaʼa shia neʼraajüin na chejeʼewaliikana China.» (LIN, CHINA)
«Isasü tachiki tayaawatüin saaʼu tü pütchi ashajünakat suluʼu nakaraloukse na hinduistakana, shialeekajaʼa tayaawateemaatüin saaʼu tü Wiwüliakat.» (AMIT, INDIA)
«Kojutüshaatasü tamüin tü Wiwüliakat süka sümaiwajatüin shia otta sümaʼanasü wayuu maʼleekalia. Nnojotpajaʼa eein wanee tamaʼana.» (YUMIKO, JAPÓN)
Watta saalii wayuu kojutüka amüin tü Wiwüliakat mayaainjeʼe nnojoluin natüjaain saaʼu kasain saashajaain achiki. Tia shia tü alatakat namüin na chejeʼewaliikana Asia. Suluʼu waneeirua mma, eesü sümaʼanaya sümüle wayuu tü Wiwüliakat nnojotpejeʼe nayaawatüin saaʼu tü sümakat.
«¿Jamüsü taashajeʼerüinjatka tü Wiwüliakat?», eesü müle pünüiki. Pütüjaale saaʼu tü sümakat tü Wiwüliakat sükaaliinjeechi pia sünain tüü:
Talateerü paaʼin
Anouktaweerü pukuwaʼipa sümaa püpüshi
Eejiraweechi pia sümaa tü shapaakalü atuma paaʼin
Anajiraweechi pia sümaa wayuu
Piisatteerü pünneetse
Eesüinka wanee wayuu Yoshiko sünülia, chejeʼewat Japón, sütüjawee aaʼu kasain saashajaain achiki tü Wiwüliakat, müsüjeseʼe saashajeʼerüin shia. Müsü sünüiki: «Sükaaliinjain taya tü Wiwüliakat süpüla tayaawatüin saaʼu tü keeʼireekat taaʼin ooʼulaka kaʼatapalasü taaʼin sünain tü alatajatkat mapeena. Nnojoluitpa mojuin taaʼin». Anuutaa joo nünüiki Amit: «Ponoshootosü taaʼin tü taashajeʼerakat suluʼujee tü Wiwüliakat. Tü sümakat, anasü sümüin wayuu süpüshuaʼa».
Watta saalii wayuu anouktaaitpaka akuwaʼipa sutuma tü sümakat tü Wiwüliakat. Anasü paashajeʼerüle tü Wiwüliakat, piʼreetka sükaaliinjeechin pia.