Mepire tü ayuulii pünainkat

Anuu tü sümakat Linda, wanee wayuu 71 suuyase: «Soʼu süküjünüin tamüin kanserüin tasoso sümaa tayüülain, tatüjaa aaʼu outajatüin taya. Shiasaʼa tantapa tepialuʼumüin majiraasü taya: ‹nnojotsü tatüjaain aaʼu müinjatüin tü alatakat tamüin. Nnojotpejeʼe taapüinjatüin taaʼin sünain ayuulin taya›».

Anuu sünüiki Elise, wanee wayuu 49 suuyase: «Outaleesia waneepünaa saʼata tekii sutuma wanee ayuulii aisü maʼin. Aishaatasü maʼin tia ayuuliikat otta mojuwaisü taaʼin sutuma. Eesü toʼuniraweere taaʼin süka müin nnojotkai jaralin kachipünaain aaʼin takuwaʼipa».

Wanee wayuu ayuuishi saaʼukai silla de ruedas otta sümaashii nüpüshi

SÜKÜJÜNÜLE pümüin outasiroʼuluin tü ayuulii pünainkat jee shiale tü nünainkat wanee püpüshi, mojushaateerü maʼin paaʼin sünainjee tia. Eesü süpüla shapaain maʼin paaʼin nnojorüle pünaʼannamaatüin, isale püchiki püwalaajüin tü soʼuinnakat tottoolu, matunküinre pia jee aire püleʼe sutuma tü wunuʼu püsajakat. Mojushaatasü maʼin saaʼin wayuu sünainjee mepin tü ayuulii sünainkat.

¿Kasa akaalinjeenaka waya sülatüle tia wamüin? Watta maʼin naalii na wayuu anakana aaʼin sutuma noʼuraajüin jee sutuma naashajeʼerüin pütchi atütüleʼeraka naaʼin suluʼujee tü Wiwüliakat. Otta eeshii na anakana aaʼin sutuma nakaalinjünüin natuma napüshi jee natuma naʼaleewainyuu.

TÜ NAAʼINRAKAT WANEINNUA WAYUU

Anuu tü eekat süpüla waaʼinrüin naashin Robert, wanee wayuu 58 nuuyase. Müshi nia: «Piʼitaa paaʼin nünain Jeʼwaa, nükaalinjeechi pia süpüla nnojoluin paapüin paaʼin sünain ayuulii. Püküja nümüin Jeʼwaa jamüin paaʼin, puchunta nümüin chi naaʼinkai otta puchunta nümüin püchecherüinjatüin paaʼin süpüla pükaalinjain na püpüshikana. Puchunta kaalinwaa nümüin Jeʼwaa jaʼitasü mepin tü ayuulii pünainkat.

»Choʼujaasü nümüin wanee wayuu nükaalinjünüin sutuma nüpüshi. Jamüshijaʼa taya, neenajawalin taya na tapüshikana süpüla natüjaain saaʼu jamüin taaʼin. Otta eeshii taʼaleewainyuu wattajanakana atütüleʼeraka taaʼin. Anatsü taaʼin sutuma tia jee nnojoishi yüülain taya».

Püʼnalaainjachire nümüin wanee paʼaleewain eekai ayuulin, jülüjeesü paaʼin tü sümakat Linda. Müsü shia: «Ayuuire wanee wayuu nnojoishi nia aashajaweein süchiki tü ayuulii nünainkat. Müsüjeseʼe paashajaainjatüin nümaa süchiki waneirua kasa aneetka atuma naaʼin».

Nnojoleerü yüülain paaʼin mayaainjeʼe mepin tü ayuulii pünainkat süka nükatsüinreerüin paaʼin Jeʼwaa jee nümülialeerü paaʼin sükajee tü sümakat tü Wiwüliakat. Otta aneerü paaʼin sutuma nakaalinjain pia na püpüshikana jee na paʼaleewainyuukana.

Pütchi suluʼujeejatka tü Wiwüliakat akaalinjeechika pia

Puchunta kaalinwaa nümüin Maleiwa

«Achuntushi taya nümüin Jeʼwaa jee nükaalinjaka taya, wainma kasa mojusü nuʼtteʼeraka achikumüin taya. Sükajee müliain maʼin taya, achuntushi taya kaalinwaa nümüin Jeʼwaa jee naapaka tanüiki» (Salmo 34:4, 6).

Anuu sünüiki Linda: «Nnojotsü tachuntüin nümüin Maleiwa anainjatüin taya nutuma. Shia tachuntaka nümüin nükatchinrüin taaʼin süpüla nnojoluin taapüin taaʼin sünain ayuulii».

Paashajeʼera tü Wiwüliakat süpüla katsüin paaʼin

«Nnojoleechi eein wanee wayuu eekai ‹ayuuishi taya› nümeechin» (Isaías 33:24).

Soto paaʼin tü naaʼinrüinjatkat Maleiwa, müle shia putuma nnojoleerü shapaain maʼin paaʼin jee jülüjeerü paaʼin tü kasa anasü eejeetkat mapeena.

Puuʼulaa nakaalinjai pia püpüshi jee paʼaleewainyuu

«Shiimainre alin nüpüla naʼaleewain wanee wayuu, aishi nia nüpüla waneepia, müshi aka naaʼin wanee nuwala müliale nia niʼrüin» (Proverbios 17:17).

Anuu tü sümakat Elise: «Nnojotsü anain pümüiwaʼale pia. Puuʼulaa nakaalinjai pia na paʼaleewainkana. Eesüjaʼa sünteerüle suluʼumüin pikii pümüiwaʼain pia jee nnojoluin naapüin Maleiwa pünüiki, nnojotpejeʼe anain pükayalaale».